Imbujolenu Chakutalilahu Chayesu Chakutona

‘Tonenuña nikulomba.’—MAT. 26:41.

MUKWAKULA NENUDI?

․․․․․

Tunateli kumwekesha ñahi mukulomba kwetu netu tudi atona?

․․․․․

Munjilanyi mutwatela kumwekeshela netu tudi atona mumudimu wetu wakushimwina?

․․․․․

Muloñadi chichalemena kwikala atona neyi tudi mukweseka nawa tunateli kwikala ñahi atona?

1, 2. (a) Malwihwinyi itwatela kudihula kutalisha hachakutalilahu chaYesu chakutona? (b) Komana antu akwanshidi anateli kudizila kudi Yesu wawanina? Hanenu chakutalilahu.

 MUNATELI kudihula nenu: ‘Mwalala tunateli kutwesha kwimbujola chakutalilahu chaYesu chakutona? Yesu wadiña wawanina! Mpinji jikwawu, Yesu welukili cheñi yuma yakamwekana mumakombakaji ayaaka yakumbidi. Komana wateleleli kwikala watona?’ (Mat. 24:37-39; Heb. 4:15) Tusambilenu kwakula awa malwihu kulonda twiluki muloña wutwatela kwikalila atona chikupu makonu.

² Komana antu akwanshidi anateli kudizila kudi muntu wawanina? Eñañi, muloña chaswayi kudizila kudi ntañishi wamuwahi nikuyuma yakoñeliyi. Toñojokenu hadi muntu wunakudiza chakusowa muvu. Hakutwesha kwasa nsewu heluña hanamupiminuwuku, ilaña watela kutwalekahu nakudiza chakwasa. Hakwila yeluki, watela kutala chinakwilayi muntu wunakumudizisha wakuluka yitembi. Kadizi watela kwiluka chinakwimanayi ntañishi yindi, chinakukwatayi wuta nichinakuzatishayi nyinu hakwevula mukunji. Iwu kadizi wukutachika kwiluka chovu-chovu ñovu yatela kuzatishayi hakwevula wuta wamukunji, nikwiluka kunakuya mpepela kulonda muvu wubuli kuleluka nawa wukutwalekahu nakudishaku. Chatwalekahu kumwimbujola ntañishi yindi, wukutachika kwasila kwakwihi nankashi neluña dinamupiminuwu. Anetu nawa akwaKristu twatela kudishaku chikupu kulonda tutweshi kulondela nshimbi jaYesu niyuma yakoñeliyi.

3. (a) Indi Yesu wamwekesheli ñahi nindi wateleli kwikala watona? (b) Yumanyi yitukuhanjekahu muchinu chibaaba?

³ Indi hansañu yakutona? Komana Yesu wateleleli kwikala watona? Eñañi. Chakutalilahu, hawufuku wakukumishaku kwikala hamaseki, Yesu wayikonkomweneni apostolu indi ashinshika nindi: ‘Tonenenu hamu nanami.’ Watwalekeluhu nindi: ‘Tonenuña nikulomba, kulonda mubuli kwiñila mukweseka.’ (Mat. 26:38, 41)  Hela chakwila wadiña watona mpinji yejima, ilaña haniyi mpinji yakala Yesu wateleli kwikala wasoñama nankashi nikukundama kwakwihi naTata yindi wamwiwulu. Welukili nindi atumbanji twindi ateleleli kwikala asoñama hayina mpinji nimpinji yakumbidi. Hanu dinu tutalenu chuma chinakukeñelayi Yesu nindi twikaleña atona. Nkumininaku, tukutala hanjila jisatu jikutukwasha kwimbujola chakutalilahu chaYesu chakutona mukuhanda kwetu.

CHAKEÑELAÑAYI YESU NINDI TWIKALI ATONA

4. Muloñadi chitwatela kwikalila atona?

⁴ Kuhosha hohu mukwihihisha, Yesu wakeñaña nindi twikala atona hamuloña wayuma yitwabula kwiluka niyitweluka. Hampinji yadiñayi Yesu hamaseki, komana welukili yuma yejima yakamwekana kumbidi? Inehi, muloña wahosheli nindi: ‘Ilaña itañwodu hela mpinji oyu hosi wayilukaku, hela añelu amwiwulu, hela Mwana, chiña Tata hohu.’ (Mat. 24:36) Hayina mpinji, Yesu, ‘Mwana,’ helukili mpinji yayeni yamba kakuma dinu ituña datamaku. Indochu etu makonu? Komana tweluka hohu yuma yantesha yakamwekana kumbidi? Eña! Tweluka wanyi mpinji yakatemeshayi Yehova Mwanindi nakujilumuna dinu ituña datama. Neyi twadiña eluka mpinji, komana twadi kwikala asoñama? Yesu walumbulwili nindi, kukuma kwakenza chakukasumwisha, hampinji yakadi kwiluka; dichi twatela kwikala asoñama.—Tañenu Matewu 24:43.

5, 6. (a) Indi yuma yitweluka yakamwekana kumbidi ninkeñelu yaNzambi yatukwashaña ñahi kwikala atona? (b) Indi kumwiluka Satana kwatukwashaña ñahi kwikala atona?

⁵ Ilaña Yesu helukili yuma yayivulu yayiwahi yakamwekana kumbidiku nawa antu amavulu adiñaku hayina mpinji hiyayilukiluku. Eña, tweluka wanyi yuma yayivulu neyi yelukiliyi Yesu, ilaña twamuhamekaña muloña watudizisha yuma yayivulu yaWanta waNzambi niyuma yiwakakoña kumbidi. Neyi tushinshika antu amavulu hashikola, hamudimu, hela mwiluña mutwashimwinaña, komana hitunakumona netu adi mumwidima wakubula kwiluka iyi nsañu yalala yalemaku? Ichi hichuma chikwawu chikutukwasha kwikala atona. Kufwana Yesu, twatela kwikala asoñama, nikuwana mpinji yakushimwina nsañu yitweluka yaWanta waNzambi. Mpinji yejima yitukweti yalema, dichi twatela kuyizatisha chiwahi. Mawumi awantu adi hakatoña!—1 Tim. 4:16.

⁶ Kudi yuma yikwawu yelukili Yesu yamukojejeli kwikala watona. Welukili nindi Satana wamwimakeneni nindi yamweseki, yamukabishi, nikufumpa kashinshi kindi. Iwu chilumbu wasweja kuzuwa wamutalileña mpinji yonsu ‘nindi amoni mpinji yekwawu yakumwesekelayi’ Yesu. (Luka 4:13) Yesu wadiña wasoñama. Wadiloñesheli kuholokela mukweseka, kudimbulula, hela kumukabisha. Komana iku dikweseka kutwamonañaku? Tweluka netu Satana wuchidi ‘kukeñakeña akudyayi neyi mutupa wabulumaña.’ Dihafuma Izu daNzambi kukonkomwena akwaKristu ejima nawu: ‘Babalenu nikwikala atona.’ (1 Pet. 5:8) Tunateli kwikala ñahi atona?

CHITWATELA KWIKALA ATONA MUKULOMBA

7, 8. Yesu wahosheli nindidi kutalisha hakulomba, nawa washili chakutalilahu chamuchidinyi?

⁷ Bayibolu yahosha nankashi hakunuñañana kwekala hakusoñama kwakuspiritu hela kutona nakulomba. (Kol. 4:2; 1 Pet. 4:7) Hashimbwili wanyi kufuma hayilejeliyi atumbanji twindi kutonena hamu nayena, Yesu nindi: ‘Tonenuña nawa lombenuña, kulonda mubuli kwiñila mukweseka.’ (Mat. 26:41) Komana chinayi mukwila nawu iku kufumba kwakuminini hohu hayina mpinji yamwenuwu kukala kweneni? Inehi, twatela kuzatisha iku kufumba mpinji yejima.

⁸ Yesu waheni chakutalilahu chachiwahi chakulomba. Munateli kwanuka mpinji  yimu yachishiliyi wufuku wejima nakulomba kudi Tata yindi. Tufwikijenu yuma yamwekeni. (Tañenu Luka 6:12, 13.) Yadiña mpinji yanooña, hadaha wadiña kwakwihi nambaka yaKaperinawu mwakwatileñawu nshi, mwashakamineñayi Yesu. Chikwelili melela, Yesu wayili kumpidi yadikumashanini Nejiya daÑaliliya. Chamweniyi mwejima himukushishita mwidima, hadaha wamweneña hohu manoñu akesi muKaperinawu nimunyikala yikwawu. Chelili Yesu hakuhosha naYehova, washili hohu muchima hakulomba. Hahitili maora amavulu nankashi. Watachikili kumona chajimineñawu manooñu, chelili kakweji hikakushika hakachi kewulu nipumba dawanyama mwisaña. Kulomba kwindi kwashindameneni hachuma cheneni chakeñeleña kwilayi, chakusakula apostolu indi 12. Tunateli kufwikija Yesu natokamenumu nakumuleja Tata yindi yuma yejima yinakutoñojokayi nikulomba maana nikashinshi kulonda yatweshi kwakamena atumbanji twindi ejima.

9. Chumanyi chitukudizila kuchakutalilahu chaYesu chakuchisha wufuku wejima nakulomba?

⁹ Yumanyi yitukudizila kuchakutalilahu chaYesu? Komana twatela kuhumisha itañwa nakulomba? Inehi, muloña welukili kuzeyazeya kwawatumbanji twindi nindi: “Spiritu chalala yinakeñi, ilaña mujimba wunazeyi.” (Mat. 26:41) Hela chochu, tunateli kumwimbujola Yesu. Chakutalilahu, komana twamulejañamu Tata yetu wamwiwulu henohu kanda tufuukuli hachuma chinateli kuluwañesha wuspiritu wetu hela wachisaka chetu indi kwiji wawakwetu akakwitiya? Komana twalombelañaku amana kwetu niahela akakwitiya? Komana twalombaña chakufuma hamuchima tahindi twahitulukaña hohu mumazu itweluka dehi? Yesu walemesheli wubwambu windi naTata yindi kuhitila mukuhosha nindi kumbadi. Mukanu kaayi munenzali yuma yayivulu, muntu nateli kulalamena kwila chuma chalema nankashi. Dichi neyi tukwikala nampinji yakuya kwakanka wetu nakulomba chikupu, tukwikala asoñama kuspiritu. (Mat. 6:6, 7) Tukukundama kwakwihi naYehova, tukukolesha wubwambu wetu nayena nawa tukutondolwela yuma yejima yinateli kuluwañesha wubwambu wetu.—Mas. 25:14.

CHAKWIKALA ATONA MUMUDIMU WAKUSHIMWINA

10. Chakutalilahwinyi chinakumwekesha nawu Yesu wawanineña njila jakushimwinamu nsañu yayiwahi?

¹⁰ Yesu washiluku muchima kumudimu wamwinkeluwu kudi Yehova. Kudi nyidimu yikwawu yinateli kuzatayi muntu iku nakutoñojoka hayuma yikwawu ilaña hakumona jomisha mbañaku. Ilaña nyidimu yayivulu yakeñekaña kushaku muchima chikupu nikwikala wasoñama, dichidi nimudimu wetu wawakwaKristu. Yesu washili muchima hamudimu nawa wakeñeleña njila yakushimwinamu nsañu yayiwahi. Chakutalilahu, chashikiliyi nawatumbanji twindi mumukala waSika hanyima yakwenda yintampu yayivulu ntentemena yejima, atumbanji ayili nakulanda yakudya. Yesu washalili nakunooka heshima hatahileñawu menji antu amuniwu mukala, ilaña wadiña wasoñama nawa waweneni njila yakuhaninamu wunsahu. Kwenjili mumbanda kaSamariya nakutaha menji. Haniyi mpinji Yesu kachi wakaminuhu chantesha. Kachi wawanini njila jakuleyelamu kuhanjeka nawantu. Ilaña watachikili kuhanjeka nanona mumbanda nawa washimwini nsañu yayiwahi chikupu yakwashili antu amavulu muwuna musumba. (Yow. 4:4-26, 39-42) Komana kwila twimbujola chakutalilahu chaYesu chakutona, kuhitila mukuwana njila jajivulu jakushimwinamu nsañu yayiwahi kudi antu itwawanaña mpinji yejima nehi?

11, 12. (a) Indi Yesu wahosheli nindidi kudi antu akeñeleña kuluwañesha mudimu windi? (b) Indi Yesu welileña ñahi yuma nakwesekeja hakuzata mudimu windi?

¹¹ Mpinji yikwawu, antu alumbuluka  akeñeleña kumuluwañesha Yesu kulonda yaleki kuzata mudimu windi. MuKaperinawu, antu atiyili kuwaha nankashi hakumona yihayamisha yakoñeliyi Yesu yakuuka akata chakwila akeñeleña nawu yatwalekuhu kushakama nawu. Antu ejima anateli kwiteja chaleñeleli ahoshi muniyi njila. Hela chochu, Yesu wakeñeleña kushimwina ‘nyikoku yejima yajimbala yamwitala daIsarela’ bayi kudi antu amumusumba wumu hohuku. (Mat. 15:24) Wayilejeli awa antu nindi: “Chiña nishimwina nsañu yawanta waNzambi yayiwahi nikunyikala yikwawu yinashali nawa; muloña dichi chantemesheleluwu.” (Luka 4:40-44) Chakadi nikujina, Yesu washili muchima hamudimu windi wakushimwina. Hetejeli chuma chidi chejima kumuluwañeshaku.

¹² Komana Yesu washili muchima hamudimu windi chakwila wakañenyeña nikuwana mpinji yakwila yuma yikwawu? Komana washili muchima nankashi hamudimu wakushimwina chakwila helukileña niyuma yakeñeleñawu antuku? Inehi, Yesu washili chakutalilahu chachiwahi chakwila yuma nakwesekeja. Wadiluñishileña nikuzañalela hamu nawamabwambu jindi. Walemesheli yisaka, wayitiyilileña wushona hayuma yakeñeleñawu nikukala kwamweneñawu nawa wakeñeli anyana.—Tañenu Maku 10:13-16.

13. Tunateli kwimbujola ñahi chakutalilahu chaYesu chakutona nikwila yuma nakwesekeja kutalisha kumudimu wetu wakushimwina Wanta?

¹³ Hampinji yitunakwimbujola chakutalilahu chaYesu chakutona, tunateli kwila ñahi yuma nakwesekeja neyi cheliliyi Yesu? Bayi twiteja yuma yamwituña yiluwañeshi mudimu wetuku. Hela tuhu amabwambu niantaña itwakuhwelela anateli kutuleja nawu bayi tusweja kushimwinaku hela nawu tutachiki kwila yuma yalemeshawu. Neyi tumwimbujola Yesu, tukuwulemesha mudimu wetu neyi yakudya. (Yow. 4:34) Mudimu wetu watukoleshaña kuspiritu nawa watuzañaleshaña. Ilaña twatela kuleka chaaku chakubula kwila yuma nakwesekeja, nakudimona neyi twasweja kuloña, hela kubula kudiluñisha yuma yikwawu. Kufwana Yesu, twatela kwikala amuzañalu, nikwila yuma nakwesekeja neyi ambuña ‘Nzambi wamuzañalu.’—1 Tim. 1:11.

CHAKWIKALA ATONA NEYI TUDI MUKWESEKA

14. Twatela kutondolwela chaaku chamuchidinyi neyi tudi mukweseka nawa muloñadi?

¹⁴ Neyi chitunamoni, mazu amakwawu akonkomweneniyi Yesu chikupu nindi twikali atona wayihosheli hampinji yadiñiyi mukweseka kweneni. (Tañenu Maku 14:37.) Neyi tudi mukukala, twatela kwanuka chikupu yuma yakoñeliyi. Neyi antu adi mukweseka, amavulu avulamenaña nsañu yalema, yashimunawu kayedi mumukanda waYishimu nawu: ‘Kwekala njila yamwekanaña kudi muntu neyi yaloña; komana kuyakumina hinjila jakufwa.’ (Yish. 14:12; 16:25) Neyi tushindamena hayitoñojoka yetu, sweje-e neyi tuholokela mukukala kweneni, tukudanyika kumakenyi kushilahu tuhu niantaña jetu.

15. Kwesekanyi kunateli kumonayi mutu wachisaka neyi hakweti maluku?

 ¹⁵ Chakutalilahu, mutu wachisaka nateli kumona kukala kwakukeñela ‘akwetala dindi’ yuma yakumujimba. (1 Tim. 5:8) Nateli kwiñila mudimu wukumukañesha kwikala nampinji yakuya kukupompa kwawakwaKristu, kulombola hakudifukula kwachisaka, hela kushimwina. Neyi yashindamena hayitoñojoka yawuntu, wukutachika kutoñojoka nindi chuma chineliyi chachiwahi nawa chaloña. Ilaña mwafumaña kuzeya hela kufwa kuspiritu. Dichi chikuwaha neyi wukulondela kufumba kwekala haYishimu 3:5, 6! Solomoni nindi: “Mukuhweleli Yehova namuchima weyi wejima, bayi wushindamena kukashinshi keyeyi awenuku. Mwitijaña Yehova mwejima muwukwilaña, niyena wakakwolwelaña njila jeyi.”

16. (a) Yesu watushila chakutalilahwinyi chakushindamena hamaana aYehova kubadika hakudishindamena yomweni? (b) Nyitu yayisaka yiñahi yembujolaña chakutalilahu chaYesu chakumukuhwelela Yehova neyi adi mukukala?

¹⁶ Hampinji yaholokeleliyi Yesu mukweseka, wakaanini chikupu kushindamena hayitoñojoka yindi. Chitoñojokenu! Muntu wasweja maana kubadika antu ejima hamaseki wafuukwiluhu kubula kushindamena kukashinshi kindi hakwakula. Chakutalilahu, chamwesekeluwu kudi Satana, Yesu watwalekeluhu nakwakula nindi: “Anasoneki nawu.” (Mat. 4:4, 7, 10) Washindameneni hamaana aTata yindi hakushinda kweseka, nawa wamwekesheli kudizoza kwabulayi Satana nawa kwahelayi. Anetu nawa dichitwelaña? Mutu wachisaka wembujolaña chakutalilahu chaYesu chakutona wetejaña Izu daNzambi kumulombola, sweje-e hampinji yidiyi mukweseka. Dichelaña nyitu yayisaka yayivulu mukaayi kejima. Atwamijaku nankashi Wanta waNzambi nikudifukula kwalala muchihandilu chawu, kubadika yuma yakumujimba. Nawa ahembaña yisaka yawu chiwahi. Yehova niyena wakiswilaña nyidimu yawu kuhitila mukuyinka yuma yakumujimba, neyi chochakana Izu dindi.—Mat. 6:33.

17. Chumanyi chayisañumunaña enu kwimbujola chakutalilahu chaYesu chakutona?

¹⁷ Eñañi, Yesu watushila chakutalilahu chachiwahi chakutona. Yuma yeliliyi yatukwashaña, yatuheteshaña nawa yatupulwishaña. Anukenu nenu Satana nakufwila nindi mukaami tulu twakuspiritu, mwikali nachikuhwelelu chazeya, mubuleña kusha muchima kukudifukula nikufumpa kashinshi kenu. (1 Tesa. 5:6) Bayi mumwiteja yayizeyeshuku. Ikalenu atona neyi chadiñayi Yesu, ikalenu atona mukulomba, mumudimu wenu wakushimwina nawa neyi mudi mukweseka. Neyi mwila mwenimu, mukwikala namuzañalu nankashi muchihandilu chenu makonu hampinji yimukumonaña kukuma kwadinu ituña datama. Neyi mukwikala atona, hampinji yakenzayi Mwanta wenu nakujilumuna dinu ituña datama, wakayiwana mudi asoñama nakudikita nikwila nkeñelu yaTata yindi. Wenowu muzañalu wakatiyayi Yehova hakuyinka wuloku hamuloña wakashinshi kenu!—Chim. 16:15.

[Malwihu aKuzatisha haKudiza]

[Mwevulu wudi hefu 6]

Yesu washimwinini kudi mumbanda heshima. Njilanyi jimwazatishaña kulonda mushimwineña mpinji yejima?

[Mwevulu wudi hefu 7]

Kukwasha chisaka chenu kuspiritu kwamwekeshaña nawu mudi atona