Yuma yidi Munkalaña yetu

‘Kakojejeli Antu Anmoni’

Chashikiliyi Charlotte White mukwakushimwina wampinji yejima muLouisville, Kentucky, U.S.A., iku nakwendesha kaluwasha hadiñi ipakumuna, antu amavulu amumweni.

Mwadiña muchaaka cha 1908, Muhela White wakojejeli antu amumusumba kumubokwela muloña wakaluwasha kakaha kashinjikileñayi katenañawu nawu, Dawn-Mobile. Wahosheli nindi: ‘Antu atachikili kuhosha-hosha nawa ‘kakojejeli antu anmoni.’

A Yinsahu jaYehova ateneneñawu hayina mpinji nawu atudizi aBayibolu, atachikili kushimwina nsañu yalala yadiziluwu chikupu muNsona. Antu amavulu adizili nsañu yamuBayibolu munyikanda yidi neyi Millennial Dawn (yateneneñawu cheñi nawu Studies in the Scriptures). Awa akwaKristu adihanini ayileña kwejima, mujimbaka, munyikala nimumaluña amakwawu, nakuhana nyikanda yateneneñawu nawu “Yozelu Yakukwasha Nachu Atudizi aBayibolu” kudi antu adiña nampwila yakutaña.

Mu 1908, Muhela White niakwakushimwina aWanta adikita ahanini mukanda wamavolyumu atanu nayimu, akuvuñila mwihina alandishiluwu hadi $1.65 mali akuAmerica. Chatela amwinki mwiniitala nyikanda hayoyina mpinji, adiña nakusonekesha kulonda akafunti nakumwinka mpinji yacheñi, afuntileña sweje-e hefuku dakutambula wufwetu, nakuyinka nyikanda nikutambula kadali kantesha kakuyikwashaku hakupulinta nyikanda. Mukwakudimbulula wumu wahosheli nindi antu ahanineña mali antesha nankashi hakutambula iyi nyikanda!

Malinda Keefer wanukili nindi mumulungu wumu wadiña nakusonekeshela antu nyikanda nkulakaji jiyedi hela jisatu. Kwadiña kukala muloña antu amavulu akeñeli mukanda waDawns. Muloña iwu mukanda  wamavolyumu atanu nawumu wadiña namafu 740. The Watch Tower yetejeli nawu “nyikanda 50 yadiña namakeji 18, hakwila nawu ayisendi kwadiña kuposomoka,” sweje-e ahela.

Hakwila nawu amanishi kukala kwamweneñawu hakusenda nyikanda, Mana kwetu James Cole watuñili kakaluwasha katufumbu tuyedi hasendeleleñawu ipakumuna dakukasa namanati ansaña. Chalekeliyi kusenda yikasha yalema yenzala nyikanda, iwu mana kwetu wahosheli nindi: “Ichi hinukulemukaña mafwijuku.” Walejeli antu apompeli hakupompa kweneni Kwawatudizi aBayibolu mu 1908 muCincinnati, Ohio, nindi natuñi chozelu chachiha. Hewulu jammota jadiña kunsa yachikuñu asonekeluhu ijina nawu Dawn-Mobile, muloña wakusendelamu nyikanda yaMillennial Dawn. Hamuloña wakwinjilila, chadiña chaswayi kusenda ipakumuna enzeleña nyikanda, nachikasa chimu hohu. Aka kaluwasha akilehesheleña nikukihihisha kwesekeja nachiminu chamukwakushimwina, nawa tufumbu atunyamwineña kwesekeja nachidi mukwakwa. Chamanishawu kushimwina, tufumbu twandundu atuvuñilileña mumbanvu yepakumuna hakufunta kwitala hamaseki hela namotoka.

Ahela adiña mumudimu wampinji yejima ayinkeleña kaluwasha kaDawn-Mobile kawana. Neyi kulanda namali kafwikileña madola $2.50 mali akuAmerica. Muhela Keefer, wudi hamwevulu, welukili chakwendesha Dawn-Mobile chiwahi chakwila wakendesheleña nachikasa chimu henohu hadi niipakumuna dinenzali mbe-e nanyikanda nawa kuchikasa chikwawu wasendeleleñaku ipakumuna dikwawu danyikanda. Hakwila yawani antu adi nampwila yakutaña muPennsylvania, U.S.A., mbaka yanyigoti, wendeleña njila jisatu hela jiwana nakuzambuka hachawu hefuku dakutwala nyikanda.

Kukumana kwayaaka yamuma 1980, ñendeshi wandeki watuñili itemba datufumbu hakusendela mapakumuna, nawa chumichi dichinakuzatishawu nankashi mumabulu ajindeki amavulu nimunyikwakwa yasweja antu yamunyisumba. Ilaña yaaka nkulakaji yinahituhu, Atudizi aBayibolu atiyileña kuwaha hakumona antu anakuyibokwela hakwendesha kaluwasha kaDawn-Mobile nawa atachikili kushimwina chikupu chalala chamuBayibolu.

[Mazu ekoku adi hefu 32]

Muhela Keefer wendeleña njila jisatu hela jiwana nakuzambuka hachawu hefuku dakutwala nyikanda

[Mazu ekoku adi hefu 32]

Yamanishili kukala kwamweneñawu hakusenda nyikanda