Munateli Kwikala Namuzañalu Muchisaka Chashiyashana Muyipompelu

‘Wukwiluka ñahi, hamwaha wukuhandisha mwinikweyi?’—1 KOR. 7:16.

MUNATELI KUWANA ÑAKWILU?

․․․․․

Indi akwakwitiya anateli kwiladi kulonda aleti kuwunda muchisaka chashiyashana muyipompelu?

․․․․․

Indi mukwaKristu nateli kukwasha ñahi antaña jindi kudiza nsañu yalala?

․․․․․

Indi antu amakwawu anateli kwiladi kulonda akwashi akwawu akwaKristu ekala muyisaka yashiyashana muyipompelu?

1. Neyi muntu yeteja nsañu yaWanta, antaña jindi atiyaña ñahi?

 MPINJI yimu Yesu watemesheli apostolu indi nakuyileja nindi: “Chimukuya, muyaña nakushimuna nenu, Wanta wamwiwulu wudi kwakwihi.” (Mat. 10:1, 7) Iyi nsañu yayiwahi yikaleta kuwunda nimuzañalu kudi antu ayitejaña namuchima wumu. Hela chochu, Yesu wayisoñamishili atumbanji twindi nindi antu amavulu akadimbulula mudimu wawu wakushimwina Wanta. (Mat. 10:16-23) Twatiyaña kutama nankashi neyi antaña jetu akaana nsañu yaWanta.—Tañenu Matewu 10:34-36.

2. Muloñadi wutukuhoshela netu akwaKristu ashiyashana muyipompelu anateli kwikala namuzañalu?

² Komana nsañwiyi yinatalishi mukwila nawu akwakumulonda Kristu akweti yisaka yashiyashana muyipompelu hiyatela kwikala namuzañaluku? Inehi. Hela chakwila antaña jetu anateli kutudimbulula chikupu, bayi neyi ejima atudimbululañaku. Cheñi nawa chisaka chetu kwila chitwalekahu kutudimbulula haya nyakaku. Chuma cheneni chashindamena hadi akwakutiya chiyelañawu neyi anakuyidimbulula hela kuyikañesha. Kubombelahu, Yehova wakiswilaña antu ashinshika kudi yena, nawa wayikwashaña kwikala namuzañalu hampinji yinakumonawu kukala. Akwakwitiya anateli kwikala namuzañalu (1) kuhitila mukuleta kuwunda hetala ni (2) kuhitila mukukwasha antaña jawu abula kwitiya kwiluka nsañu yalala.

IKALENU NACHILILU CHAKUWUNDA HETALA

3. Muloñadi mukwaKristu wekala muchisaka chashiyashana muyipompelu chatelelayi kwikala nachililu chakuwunda?

³ Hakwila nawu mukabu wakuloña wusoñi nyikabu muchisaka, chalema neyi mukwikala nachililu chakuwunda hetala. (Tañenu Yakoba 3:18.) Hela chakwila chisaka chindi kanda chikali mukudifukula kwalala, mukwaKristu watela kuzata nañovu kulonda yekali nachililu  chakuwunda hetala. Nateli kwila ñahi mwenimu?

4. Indi akwaKristu anateli kutwalekahu ñahi kwikala nakuwunda?

⁴ AkwaKristu atela kutwalekahu kwikala nachililu chakuwunda. Hakwila nawu twikali ‘nakuwunda kwaNzambi’ twatelela kulomba chakufuma hamuchima. (Fwi. 4:6, 7) Tunateli kwikala nakuwunda nimuzañalu neyi tudiza chalala chaYehova nikuzatisha yishina yamuNsona muchihandilu chetu. (Isa. 54:13) Kuya kukupompa kuchipompelu nikudikita mumudimu wakushimwina nikwena kwalema nankashi neyi tunakukeña kudiluñisha kuwunda nimuzañalu. Akwakwitiya akweti yisaka yashiyashana muyipompelu anateli kuzata nyidimu yawakwaKristu. Chakutalilahu, Enza, * wukweti nfumwindi wamudimbululaña nankashi. Wakalakalaña mudimu wakwilisha atumbanji hanyima yakuzata nyidimu yindi yahetala. Enza wahosheli nindi, “Yehova wankiswilaña nankashi nayuma yayiwahi mpinji yejima yinazataña nañovu hakulejaku amakwawu nsañu yayiwahi.” Nkisu yamuchidiwu yaletaña kuwunda nimuzañalu.

5. Kukalanyi kwavula kumonawu akwakwitiya ekala muyisaka yashiyashana muyipompelu, nawa yumanyi yinateli kuyikwasha?

⁵ Twatela kuzata nañovu hakwila nawu twikali nawulunda wawuwahi nawantaña abula kwitiya. Chumichi chinateli kutukalila muloña yuma yikukeñawu nawu tuyilili mpinji jikwawu yinateli kuzuñesha yishina yaBayibolu. Neyi tukakela chikupu kunshimbi jaloña tunateli kuhilisha antaña jetu abula kwitiya, ilaña kwila mwenimu kukaleta kuwunda kumafuku akumbidi. Kafwampi, neyi tubula kwovwahila hansañu yabulaña kuzuñesha nshimbi jamuNsona tunateli kuleta ipumba. (Tañenu Yishimu 16:7.) Neyi tunakumona kukala chalema nankashi kuzatisha kufumba kwamuNsona kwekala munyikanda yanduñu wamaana nikashinshi nikufumba kwawaeluda.—Yish. 11:14.

6, 7. (a) Muloñadi antu amakwawu chadimbulwilañawu antaña jawu adizaña nawaYinsahu jaYehova? (b) Indi kadizi waBayibolu hela mukwakwitiya watela kwiladi nawantaña jindi abula kwitiya amudimbululaña?

⁶ Hakwila nawu hetala hekali kuwunda mwatela kumukuhwelela Yehova, nikwiluka chikupu yitoñojoka yawantaña jenu abula kwitiya. (Yish. 16:20) Hela atudizi aBayibolu amaha anateli kwikala nakashinshi muniyi nsañu. Amayala hela ambanda amakwawu abula kwitiya anateli kwiteja mwinikwawu kudiza Bayibolu. Anateli kwiluka nawu chumichi chikukwasha chisaka chawu. Hela chochu, amakwawu anateli kudimbulula. Esther, wekala dehi Chinsahu wetejeli nindi wadiña “nakuzuwa chikupu” mpinji yatachikiliyi nfumwindi kudiza Bayibolu nawaYinsahu jaYehova. Wahosheli nindi: “Mpinji jikwawu nanatileña nyikanda yanfumwami hela kuyocha.” Howard, wadiña nakumudimbulula ñodindi hampinji yadizileñayi Bayibolu wahosheli nindi: “Amayala amakwawu achinaña nawu añodijawu anakuyidimbeka kulonda ayeña mwizanvu dansakililu. Iyala hanateli kwiluka chakwila haniyi nsañuku nawa nateli kutachika kudimbulula.”

⁷ Kadizi waBayibolu wukweti mwinikwindi wamudimbululaña atela kumukwasha kulonda yabuli kuleka kudiza Bayibolu. Kakavulu chuma chinateli kumukwasha haniyi nsañu hikwikala namuchima wawunda nikumulemesha mwinikwindi wabula kwitiya. (1 Pet. 3:15) Howard wahosheli nindi, “Nasakililaña hama muloña ñodami wadiwunjikili nawa hadiña nanduluku.” Ñodindi walumbulwili nindi: “Howard wanlejeli nindi nileki kudiza Bayibolu. Wahosheli nindi adiña nakundimba. Chatela nitaadiki netejeleña nami hadaha nakuhosha mwalala, ilaña namulejeli cheñi nami chakadi kutwamba neluki wanyi neyi anakundimba. Dichi namwilili nami yatañi mukanda wunadizileña. Watañili nawa  wetejeli nsañu yadiñamu. Iyi nsañu yamushikili hamuchima.” Chachiwahi kwiluka nenu mwinikwenu wabula kwitiya nateli kutoñojoka nindi munakumushiya hela kutiya kutama hampinji yimunakuzata nyidimu yawakwaKristu, ilaña mwatela kumuleja nenu mwamukeña kulonda yaleki kutoñojoka muniyi njila.

YIKWASHENU ETEJI NSAÑU YALALA

8. Kufumbanyi kwafumbiliyi Pawulu akwaKristu akweti enikwawu abula kwitiya?

⁸ Kapostolu Pawulu wayifumbili akwaKristu nindi bayi aseña enikwawu hamuloña wakubula kwikala akwakwitiyaku. * (Tañenu 1 AKorinda 7:12-16.) Mukwakwitiya nateli kwikala namuzañalu hela chakwila ashiyashana muyipompelu neyi yeluka nindi mwinikwindi wabula kwitiya nateli kwikala mukwaKristu. Hampinji yimunakufwila kumushimwina mwinikwenu wabula kwitiya nsañu yalala, mwatela kwikala ababala neyi chinakumwekesha yakutalilahu yinalondeluhu.

9. Neyi himukuleja antaña jenu abula kwitiya chalala chamuBayibolu, mwatela kuhanjeka nawu munjilanyi?

⁹ Jason wazañaleli nankashi chatachikiliyi kudiza nsañu yalala, wahosheli nindi, “Nakeñeleña kuleja antu ejima.” Neyi kadizi waBayibolu yeluka kulema kwansañu yinakudizayi muNsona, nateli kutiya kuwaha chakwila wukuhoshaña haniyi nsañu mpinji yejima. Nateli kukuhwelela nindi antaña jindi abula kwitiya niwena akwiteja nsañu yaWanta hohenohu, ilaña anateli kumudimbulula chikupu. Indi muzañalu watiyiliyi Jason hakusambila waleñeleli ñodindi kwiladi? Ñodindi wahosheli nindi, “Nfumwindi halekeli kuhosha hansañu yalalaku.” Mumbanda wumu wetejeli nsañu yalala chimwahitili yaaka 18 kufuma hampinji yadiziliyi nfumwindi wahosheli nindi, “Ami nakeñeleña kudiza chalala chovu-chovu.” Neyi mwadizaña Bayibolu namuntu wukweti mwinikwindi wunakubula kukeña kwiteja nsañu yalala, kwila mumukwasha kadizi wenu mpinji yejima kulonda yeluki chatela kulumbululayi nsañu yalala munjila yayiwahi nehi? Mosi wahosheli nindi: “Yinukuyileja yakasosota neyi nvula, yinukuyishimwina yakalembama neyi wuumi, neyi chelaña nvula yamusanvu hamunyenvu.” (Kuhit. 32:2) Neyi muhosha mazu antesha hohu hansañu yalala munjila yayiwahi nawa hampinji yatelela kakavulu mwafumaña yuma yayiwahi kubadika mazu amavulu.

10-12. (a) Kufumbanyi kwayifumbiluwu akwaKristu akweti enikwawu abula kwitiya kudi kapostolu Petulu? (b) Indi kadizi waBayibolu wumu wadizili ñahi kuzatisha kufumba kwasonekawu ha 1 Petulu 3:1, 2?

¹⁰ Kapostolu Petulu wayifumbili ambanda akwaKristu ekala muyisaka yashiyashana muyipompelu kufumba kwonenawu. Wasonekeli nindi: ‘Mwomumu ninenu ambanda, shakamenu nakwovwahila anfumu  jenwenu aweni; kulonda, hela amu anabuli kwovwahila mazu, akayikoki chakadi mazu, nanochu chakushakamawu añodijawu; chakumonawu chimukushakama nakalemesha kakeni, chakubula kubajama.’ (1 Pet. 3:1, 2) Mumbanda nateli kumukoka nfumwindi kukudifukula kwalala kuhitila mukwovwahila nikumulemesha chikupu nfumwindi, hela chakwila nakumumwesha ilamba. Chochimu, iyala mukwaKristu watela kwila yuma kwesekeja nachakeñañayi Nzambi nikwikala mutu wakeña chisaka chindi hela chakwila anakumudimbulula kudi ñodindi wabula kwitiya.—1 Pet. 3:7-9.

¹¹ Makonu akwaKristu amavulu anakuhetelamu hamuloña wakuzatisha kufumba kwaPetulu. Talenu chakutalilahu chaSelma. Hampinji yatachikiliyi kudiza Bayibolu nawaYinsahu jaYehova, nfumwindi Steve watiyili kutama. Nfumwindi wetejeli nindi, “Nazuwileña, natiyileña mukawu niwoma.” Selma nindi: “Nihampinji yinadiña kanda nidizi nsañu yalala, Steve wadiña muntu wakala. Wadiña wazuwa. Waswejeli dinu kuzuwa chinatachikili kudiza Bayibolu.” Chumanyi chamukwashili?

¹² Selma wanukaña nsañu yadiziliyi kudi Chinsahu wamudizishileña Bayibolu. Wahosheli nindi, “Ifuku dimu, nakeñeleña kudiza Bayibolu wanyi. Muloña Steve wañeteli nawufuku hampinji yinakeñeleña kumuleja chikuma, naneñeli nawa natiyili kutama. Chinamulejeli muhela chuma chamwekeni nichinatiyili, wañilili nindi nitañi 1 Akorinda 13:4-7. Chinatañili natachikili kutoñojoka nami, ‘Steve kanda yañilileñahu dehi yuma yayiwahi yinatenuwu aha.’ Ilaña muhela wankwashili kutoñojoka munjila yambukaku kuhitila mukuñihula nindi, ‘Haniyi yuma yakukeña, yiñahi yiwamumwekeshelaña nfumweyi?’ Nakwili nami, ‘Kwosi muloña wasweja kukalisha.’ Muhela wañilili mumesu awunda nindi, ‘Selma, hinyi wunakufwila kwikala mukwaKristu, eyi tahindi Steve?’ Chinelukili nami nateleleli kuhimpa yitoñojoka yami, nalombeli kudi Yehova nami yankwashi kulonda nimukeñi Steve nankashi. Yuma yatachikili kuhimpa chovu-chovu.” Chimwahitili yaaka 17 Steve wetejeli nsañu yalala.

ANTU AMAKWAWU CHIYANATELI KUYIKWASHAWU

13, 14. Indi amakwawu muchipompelu anateli kukwasha ñahi antu ekala muyisaka yashiyashana muyipompelu?

¹³ Kufwana nyisa yanvula yazoweshaña iseki nakuleñela nyitondu kumena chiwahi, antu amavulu muchipompelu chawakwaKristu akwashaña antu ekala muyisaka yashiyashana muyipompelu kwikala namuzañalu. Elvina washakamaña kuBrazil wahosheli nindi: “Kukeña kwamwekesheluwu amana kwami niahela dikwankwashili kukakela kuchalala.”

¹⁴ Neyi antu muchipompelu amwekeshaña luwi nikusha maana hadi antu,  chumichi chinateli kukwasha chikupu antaña abula kwitiya. Iyala wakuNigeria wetejeli nsañu yalala hanyima yakwila munahiti dehi yaaka 13 kufuma hampinji yadiziliyi ñodindi wahosheli nindi: “Twayileña halwendu naChinsahu wumu dichi motoka yindi yafwili. Wakeñeli akwawu aYinsahu munyikala yakwakwihi, nawa atwinkeli hakukama nawufuku. Atuhembeli chiwahi neyi kwiji twadilukili nawu kufuma kuwansi. Hayoyina mpinji namweni kukeña kwawakwaKristu kwashimwineñayi ñodami mpinji yejima.” Mumbanda wakuEngland wadizili chalala henohu munahiti dehi yaaka 18 kufuma hampinji yadiziliyi nfumwindi wanukaña nindi: “A Yinsahu atutambikileña wonsu wetu nakudya yakudya. Antambwilileña chiwahi mpinji yejima.” Iyala wumu wamwituña dodimu wekalili Chinsahu wahosheli nindi: “Amana kwetu niahela atuhempwileña hela kututambika kumatala awu, nawa nelukili nami akamenaña. Sweje-e dinu hampinji yinadiña muchipatela amavulu enjili nakunhempula.” Kwila muwana njila yakumwekeshelamu kukeña kwamuchidiwu kudi antaña jenu abula kwitiya nehi?

15, 16. Chumanyi chatela kukwasha mukwaKristu kwikala namuzañalu hela chakwila antaña jindi hiyetiyaku?

¹⁵ Kafwampi, hela tuhu tukumwekesha yililu yayiwahi nikuyishimwina munjila yayiwahi hadi yaaka yayivulu bayi neyi antu ejima muchisaka chetu anateli kwiteja nsañu yalalaku. Amakwawu hiyanateli kumwekesha mpwila yakudizaku nawa akutwalekahu kudimbulula. (Mat. 10:35-37) Hela chochu, neyi tumwekesha yililu yawakwaKristu, chumichi chikusoña nyikabu yayiwahi. Iyala wumu wabulili kwikala mukwakwitiya wahosheli nindi: “Neyi mwinikweyi wetiya yatachika kumwekesha iyi yililu himukwiluka jinakutoñojokayi muntu wabula kwitiya mumuchimaku. Dichi bayi muzeya kumukwasha mwinikwenu wabula kwitiyaku.”

¹⁶ Munateli kwikala namuzañalu hela chakwila antaña jenu hiyakwakwitiyaku. Hela chakwila nfumwindi heteja nsañu yaWantaku hanyima yakuzata nañovu hadi yaaka 21, muhela wumu wahosheli nindi: “Nekalaña namuzañalu hampinji yinafwilaña kumuzañalesha Yehova, kuhitila mukwikala washinshika nikukolesha wuspiritu wami. Kuzata nañovu nyidimu yakuspiritu, kudiza nkawami, kuya nakupompa, kuzata mudimu wamwiha nikukwasha amakwawu muchipompelu, yumiyi yinankwashi hama kukundama kwakwihi naYehova nawa yinahembi muchima wami.”—Yish. 4:23.

BAYI MUZEYAKU

17, 18. Indi mukwaKristu nateli kutwalekahu ñahi kukuhwelela hela wekala muchisaka chashiyashana muyipompelu?

¹⁷ Neyi mudi akwaKristu ashinshika ekala muchisaka chashiyashana muyipompelu bayi muzeyaku. Anukenu nenu “Yehova hakayishiya antu induku, nanochu chatoha ijina dindi.” (1 Sam. 12:22) Wakekala nanenu neyi mutwalekahu kukakela kudi yena. (Tañenu 2 Kushindulula 15:2.) Eñañi, ‘mutiyenu Yehova kuwaha, kunjikenu njila jenu kudi Yehova, mukuhwelelenu.’ (Mas. 37:4, 5) “Kakelenu kulomba chakadi kuzeya” nawa kuhwelelenu nenu Tata yetu wamwiwulu wukweti kukeña nateli kuyikwasha kuumika kukala kudi kwejima.—Rom. 12:12.

¹⁸ Mulembelelenu Yehova kulonda yayinki spiritu yajila yiyikwashi kuleta kuwunda mwitala. (Heb. 12:14) Mwamweni, munateli kwikala nayililu yayiwahi yaletaña kuwunda yakaleñela kubalumuna nyichima yawantaña jenu abula kwitiya. Munateli kwikala namuzañalu nikuwunda hampinji ‘yimukwilaña yuma yejima kulonda kumulemesha nachu Nzambi.’ (1 Kor. 10:31) Mukwikala akola hampinji yimunakwila mwenimu hakwiluka nenu amana kwenu niahela muchipompelu chawakwaKristu ayikwashaña.

[Tumazu twaheshina]

[Malwihu aKuzatisha haKudiza]

[Mwevulu wudi hefu 28]

Keñenu mpinji yayiwahi yimwatela kulumbulula yuma yimwakuhwelela

[Mwevulu wudi hefu 29]

Aakamenenuña enikwenu abula kwitiya