Bayi Mutala ‘Kuyuma Yakunyimaku’

“Muntu wukwila nakwati dehi kwitemwa hakutala munyima, hanateli wanta waNzambuku.”—LUKA 9:62.

MUKWAKULA NENUDI?

․․․․․

Muloñadi chitwatela ‘kwanukila iñoda Loti’?

․․․․․

Yumanyi yisatu yitwatela kutondolwela?

․․․․․

Tunateli kwendela ñahi hamu nakuloñesha kwaYehova?

1. Yesu wasoñamishili nindidi nawa lwihwinyi lutwatela kudihula?

 “ANUKENU iñoda Loti.” (Luka 17:32) Awa mazu akusoñamisha ahosheliyi Yesu Kristu yaaka 2,000 yinahituhu achidi kuzatika nikulelu. Hanu dinu Yesu watalishili mudihi hakuhosha awa mazu akusoñamisha? A Yudeya hiyateleleli kuyilumbulwila chikupu iyi nsañuku. Elukili chuma chamumwekeneni iñoda Loti. Hampinji yafumineñayi muSodoma nachisaka chindi, wafumpili lushimbi nakutala kunyima nawa wabalumukili ilola damuñwa.—Tañenu Kutachika 19:17, 26.

2. Muloñadi iñoda Loti chatalililiyi kunyima nawa chumanyi chafumini mukubula kwovwahila?

² Hanu dinu muloñadi iñoda Loti chatalililiyi kunyima? Komana wakeñeleña kumona yuma yamwekeneña? Tahindi watalili kunyima hamuloña wakujinoka hela kubula chikuhwelelu? Indi kwinji watalili kunyima hamuloña wakwanuka yuma yejima yashiliyi muSodoma? (Luka 17:31) Hichikweti muloña nachuma chaletesheli yatala kunyimaku, ilaña wafwili hamuloña wakubula kwovwahila. Toñojokenu! Wafwili ifuku dodimu nawantu ajikwa amuSodoma naGomora. Dihafumini Yesu kuhosha nindi: “Anukenu iñoda Loti”!

3. Indi Yesu wakonkomweneni ñahi nindi bayi tutala yuma yakunyima muchifwikijaku?

³ Anetu nawa tunakushakama mumpinji yakala chakwila hitwatela kutala kunyima muchifwikijaku. Yesu wakonkomweneni hanichi chikuma hampinji yakwiliyi iyala wakeñeleña kufunta nakushika chisaka chindi henohu kanda yekali kambanji. Yesu nindi: “Muntu wukwila nakwati dehi kwitemwa hakutala munyima, hanateli wanta waNzambuku.” (Luka 9:62) Komana Yesu wamwakwili munjila yakuzuwa hela chakadi kutoñojoka? Inehi, muloña welukili nindi iwu muntu wehwileña kulonda yawani hakuleyela mudimu  wakwikala kambanji. Yesu walumbulwili nindi muntu waleyaña mudimu wunamwinkuwu wudi neyi ‘nakutala yuma yakunyima.’ Kudihu chuma chikumwekana neyi muntu wunakudima yabalumuka nakutala kunyima hakampinji kantesha hela yatenteka itemwa nakutala kunyima? Hela wukutala hanyima hela wukutenteka itemwa, wukuleka kuzata mudimu windi nawa mudimu windi wukufunta hanyima.

4. Twatela kusha maana hayumanyi?

⁴ Chatela tusheña maana kuyuma yakunyima, twatela kusha maana kuyuma yidi kumbidi. Talenu awa mazu chinayilumbululiwu chiwahi haYishimu 4:25: “Mesu eyi atali kwakumbidi hohu, nlabu jeyi jitali kuwukuya swi-i.”

5. Chumanyi chikutuleñela kubula kutala hayuma yakunyima?

⁵ Kudi chuma chikutuleñela tubuli kutala kuyuma yakunyima. Hichumanyi? Anu ‘himafuku akukuminina.’ (2 Tim. 3:1) Tunakutalila kujilumuka kwakaayi kejima bayi neyi kujilumuka kwanyisumba yiyedi yatama hohuku. Chumanyi chikutukwasha kulonda tubuli kwila chuma cheliliyi iñoda Loti? Chatachi, twatela kwiluka yuma yitwashiya kunyima yikutuleñela tutachiki kuyitala. (2 Kor. 2:11) Tusambilenu kutala haniyi yuma kulonda twiluki chitwatela kuyitondolwela.

MAFUKU AMAWAHI AKUNYIMA

6. Muloñadi chitukubulila kushindamena hayitoñojoka yetu mpinji yikwawu?

⁶ Tunateli kutachika kutoñojoka mwaheña netu kumafuku akunyima twahandileña chachiwahi. Yitoñojoka yetu mpinji yikwawu yaluwankanaña. Chakadi kwiluka tukutachika kutoñojoka netu kukala kutwamweni kunyima kwaswejeli wanyi, hampinji yoyimu tukusweja kulebumuna netu twazañaleleña nankashi, nakutwamba netu yuma yadiña chiwahi komana nehi. Yitoñojoka yamuchidiwu yaheña yikutukojeja kutachika kutoñojoka hamafuku amawahi akunyima. Bayibolu yatusoñamishaña nawu: “Bayi wila neyi, Mafuku akusambila chanabadikuwu mafuku anu chinafumi hankaku? Muloña hansañu iyi hiwudi nakwihula chamaanaku.” (Mukwa. 7:10) Muloñadi kutoñojoka muniyi njila chikwatamina?

7-9. (a) Chumanyi chamwekeni kudi aIsarela muEjipitu? (b) Yumanyi yamwenuwu aIsarela yadi kuyiletela muzañalu? (c) A Isarela atachikili kutoba hayumanyi?

⁷ Talenu chuma chayimwekeneni aIsarela mumafuku aMosi. Hela chakwila hakusambila aIsarela ayimweneña neyi enyi mwituña daEjipitu, chafwiliyi Yosefu, aEjipitu ‘ayishilili aIsarela atupita kulonda ayikabishi nayiteli yawu.’ (Kwid. 1:11) Nkumininaku antu jaNzambi atachikili kuyijaha nankashi muloña Fwaro wakeñeleña kukeheshaku antu. (Kwid. 1:15, 16, 22) Dihafumini Yehova kumuleja Mosi nindi: “Chalala namoni antu ami adi muEjipitu chakumonawu ihuñu, natiyi chakudilawu nawakwakuyikalakesha; ami neluki chakabañawu.”—Kwid. 3:7.

⁸ Toñojokenu hamuzañalu watiyiluwu aIsarela hakwidika mwituña mwayikwatiluwu wunduñu nakwikala antu akasunuka! Muchihayamisha, amweni ñovu jaYehova hampinji yaleteliyi Yipupu Ikumi hadi Fwaro wadinka wanta nihadi antu jindi. (Tañenu Kwidika 6:1, 6, 7.) Dichi, aEjipitu hiyayumbili aIsarela hohuku ilaña aEjipitu ayilejeli nawu ayi, ayinkeli siliva  yayivulu niwuru kulonda yakamwekeshi nawu antu jaNzambi “ayibuwili aEjipitu.” (Kwid. 12:33-36) Cheñi, aIsarela azañaleli chamwenuwu Fwaro niamashidika indi ayijilumuni haKaluñalwiji Kachinana. (Kwid. 14:30, 31) Chikuhwelelu chawu chatela chakoleleluku nankashi hakumona yuma yejima yayikoñeleliyi Yehova!

⁹ Chawushona, hashimbwili wanyi kufuma hayipulwishiluwu, antu wowamu atachikili kutoba. Atobeleña hayumanyi? Hayakudya! Aneñeli nayuma yayinkeleñayi Yehova nawa atachikili kutoba nawu: “Tunaanuki inshi twadiilaña muEjipitu yakadi nindandu nitutanda nimachimpa nimafu nisapoli nikanyenzi nyichima yetu yatuuma dehi mumavumu chawu kwosi chuma chitunamoni nichimu chiña yowu manina hohu.” (Kuch. 11:5, 6) Eña, yitoñojoka yawu yaluwankeni chikupu, chakwila akeñeleña nikufunta mwituña mwayikwatiluwu wuduñu! (Kuch. 14:2-4) A Isarela atalili hayuma yakunyima nawa ajimbesheli wuselewa waYehova.—Kuch. 11:10.

10. Yumanyi yitukudizila kuchuma chakoñeluwu aIsarela?

¹⁰ Chumanyi chitukudizilaku? Neyi tunaholokeli mukukala, bayi tutoñojoka netu yuma yadiña chiwahi kunyimaku, hadaha henohu kanda tudizi nichalalaku. Hela chakwila twatela kutoñojoka hayuma yitwadizila kuyuma yatumwekeneni kunyima hela kutoñojoka hayuma yatuzañalesheli, twatela kwesekeja yuma nikubula kwiñija mutu muyuma yatumwekeneni kunyima. Neyi tukañanya kwila mwenimu, hitukudiluñisha nayuma yakatatakaku nawa tukutachika kutoñojoka hayuma yitwelileña kunyima.—Tañenu 2 Petulu 2:20-22.

YUMA YITWASHIYA

11. Indi antu amakwawu amonaña ñahi yuma yashiluwu kunyima?

¹¹ Chawushona, antu amakwawu atalaña hayuma yashiyawu kunyima nawa atoñojokaña nawu ombili kukooleka kwakuvulu. Hadaha mwadiña nakukooleka kwakutaña shikola yahewulu, kutiyakana mpuhu, kwikala namali amavulu ilaña mwafuukwiluhu kubula kuyifwila. Amana kwetu niahela amavulu ashiya yifulu yamaneni hanyidimu yazatileñawu yakuselujola, shikola niyisela. Mpinji niyena yinahiti, kukuma nikwena kanda kushiki. Komana mwafwikijaña yuma yadi kumwekana neyi chakwila himwashili yifulu yenuku?

12. Indi Pawulu wamweneña ñahi yuma yashiliyi kunyima?

¹² Kapostolu Pawulu washili yuma yayivulu hakwila nawu yekala kambanji kaKristu. (Fwi. 3: 4-6) Indi yuma yashiliyi kunyima wayimweneña ñahi? Watulejaña nindi: “Yumoyu yadiñi yakunhetesha, nayifuukuli nami yakujimbañesha hohu hadi Kristu.” Muloñadi? Watwalekeluhu nindi: ‘Nafuukulaña yuma yejima nami yakujimbañesha hohu, nanochu chasweja kuwaha kumwiluka Kristu Yesu, Mwanta wami. Hadi yena najimbañeshi yuma yejima, ninochu nayifuukulaña nami hiwuzondu hohu, kulonda niheti Kristu.’ * (Fwi. 3:7, 8) Neyi chochabulaña kuditoñeshayi  muntu wunanati nswadi mwibuku, Pawulu niyena haditoñesheli hanyidimu yakumujimba yashiliyi kunyimaku. Hatoñojokeli cheñi nindi yuma yashiliyi yadiña yalemaku.

13, 14. Tunateli kwimbujola ñahi chakutalilahu chaPawulu?

¹³ Yumanyi yikutukwasha neyi tutachika kutoñojoka hayuma yamwekanaña kuwaha yitwashiya kunyima? Twatela kulondela chakutalilahu chaPawulu. Munjilanyi? Toñojokenu hayuma yalema yimukweti hayinu mpinji. Mukweti wubwambu wawuwahi chikupu naYehova nawa munatuñi ijina dadiwahi nayena dakwikala ashinshika. (Heb. 6:10) Yumanyi yakumujimba yinateli kutwinka kaayi yikwesekana nankisu jakuspiritu jitunakudiluñisha chayinu mpinji nijitwakadiluñisha kumbidi?—Tañenu Maku 10:28-30.

¹⁴ Pawulu washimwini cheñi chuma chinateli kutukwasha kulonda tutwalekuhu kumukalakela nakashinshi. Wahosheli nindi wadiña ‘nakuvulamena yuma yakunyima nakufwila yuma yakumbidi.’ (Fwi. 3:13) Pawulu washimwini yikuma yiyedi, yejima yalema. Chatachi, twatela kudiwula yuma yitwashiya kunyima, bayi tumanishaña ñovu nimpinji nakutoñojoka hayumiyuku. Chamuchiyedi, kufwana mukwakutemuka wudi kwakwihi nakushika hamufunda, twatela kusha maana hayuma yidi kumbidi.

15. Yumanyi yitukuhetelamu neyi tutoñojoka chikupu hayuma yakoñeli ambuña aNzambi ashinshika?

¹⁵ Neyi tutoñojoka chikupu hayuma yakoñeli ambuña aNzambi ashinshika akunyima hela amakonu, chikutuleñela tushi maana hayuma yakumbidi chatela tutaleña yuma yakunyimaku. Chakutalilahu, neyi chakwila Abarahama niSara atwalekeluhu kwanuka mukala waUri, ‘mutenowu adi kufunta cheñi.’ (Heb. 11:13-15) Ilaña hiyafuntiluku. Mosi washili yuma yayivulu muEjipitu kubadika yuma yashiluwu aIsarela ejima. Ilaña muBayibolu himwekalahu nsañu yamwekeshaña nawu watachikili kwanuka yuma yashiliyuku. Bayibolu yatulejaña nawu “wafuukwili kusawuka kwaKristu nindi himaheta abadika yuma yalema yamuEjipitu yejima, nanochu chatalililiyi masomu amba kamusomonawu.”—Heb. 11:26.

YUMA YATAMA YATUMWEKENENI

16. Indi yuma yamwekeni kunyima yinateli kutuluwañesha ñahi?

¹⁶ Hela chochu, bayi neyi yuma yejima yamwekeni kunyima yayiwahuku. Hadaha tunakwakamena muloña wanshidi hela yiluwa yitwakoñeli kunyima. (Mas. 51:3) Hadaha kumuchima kuchidi kuyeña hayuma yatufumbiluwu. (Heb. 12:11) Neyi antu anatuheli hela anakutufwikijila yatama kunateli kuluwañesha yitoñojoka yetu. (Mas. 55:2) Chumanyi chitwatela kwila kulonda yuma yamuchidiwu yibuli kutuluwañesha nakutoñojoka hayuma yakunyima? Tutalenu hayakutalilahu yisatu.

17. (a) Muloñadi Pawulu chadilumbulwiliyi nindi ‘wabadikili kukeha mukachi kawakwakujila ejima asweja kukeha’? (b) Chumanyi chamukwashili Pawulu kubula kusha muchima hayuma yakosomweniyi kunyima?

¹⁷ Yuma yitwakosomweni kunyima. Kapostolu Pawulu wadilumbulwili yomweni nindi ‘wabadikili kukeha mukachi kawakwakujila ejima asweja kukeha.’  (Efwes. 3:8) Muloñadi chatoñojokeleliyi muniyi njila? Wahosheli nindi: “Muloña nakabishili chipompelu chaNzambi.” (1 Kor. 15:9) Munateli kufwikija chatoñojokeleñayi Pawulu neyi nawani amana kwetu niahela akabishiliyi kunyima? Chatela yeteji yuma yakosomweniyi yisweji kwinzala mumuchima windi, Pawulu washili muchima haluwi niwushona wamutiyililuwu. (1 Tim. 1:12-16) Chafuminumu watiyili kuwaha nawa watwalekeluhu namudimu windi wakushimwina. Nshidi yakoñeliyi kunyima yadiña hakachi kayuma yakeñeleña kuvulamenayi Pawulu. Anetu nawa neyi tusha muchima haluwi lunatutiyiliyi Yehova, hitukuzeya hamuloña wakutoñojoka hayuma yitwakosomweni kunyima yitukubula kutwesha kuhimpaku. Tunateli kuzatisha ñovu yetu nakukalakala mudimu wutukweti.

18. (a) Chumanyi chikumwekana neyi tutachika kutoñojoka munjila yatama hakufumba kwatufumbiluwu? (b) Tunateli kulondela ñahi mazu aSolomoni ahosha hakwiteja kufumba?

¹⁸ Kufumba kwakatishaña kumuchima. Indi neyi tunahili muloña wakufumba kwatufumbiluwu? Chumichi chinateli kutukatisha kumuchima nawa ‘chatuzeyeshaña.’ (Heb. 12:5) Hela chakwila ‘tudiwula’ mwanatufumbuwu hamuloña wakukaana mwanatufumbuwu hela ‘tuzeya’ hamuloña wakwiteja kufumba, nkumininaku tukaana mwanatufumbuwu, tunakoñi chuma chochimu, tweteja wanyi kuna kufumba kutukwashi nikutolola. Chikuwaha neyi tukulondela mazu aSolomoni akwila nawu: “Kwataku kufumbika mbe, bayi yena akukosomokaku; muhembi muloña yena diyi wumi weyi.” (Yish. 4:13) Kufwana ñendeshi wovwahilaña yinjikijilu yahamukwakwa, twatela kwiteja kufumba, kuzatisha kufumba nikutwalekahu kwila yuma yaloña.—Yish. 4:26, 27; tañenu Aheberu 12:12, 13.

19. Tunateli kwimbujola ñahi chikuhwelelu chaHabakuki niYeremiya?

¹⁹ Neyi antu anatuheli hela anakutufwikijila yatama. Mpinji yikwawu tunateli kutoñojoka neyi kaprofwetu Habakuki, wamudilili Yehova nindi yamwekeshi wuñanji, ilaña helukili chakojejeli Yehova kwiteja yuma yikwawu yatama kumwekanaku. (Hab. 1:2, 3) Dichi twatela kwimbujola chikuhwelelu chaniwu kaprofwetu, wahosheli nindi: “Ami kwami nukuluñila mudi Yehova, nukutiya kuwaha mudi Nzambi yawamwinu wami.” (Hab. 3:18) Kufwana Yeremiya wakunyaka, neyi twikala ‘nachililu chakuchiñilila’ nikumukuhwelela Yehova chikupu, Nzambi wawuñanji, tunateli kukuhwelela netu yuma yejima akayolola hampinji yatelela.—Mukeŋa 3:19-24.

20. Tunateli kumwekesha ñahi netu ‘tunakwanuka iñoda Loti’?

²⁰ Tunakushakama mumpinji yayiwahi nankashi. Kudi yuma yayiwahi yinakumwekana chayinu mpinji niyakamwekana kumbidi. Dichi wejima wetu twendeleña hamu nakuloñesha kwaYehova. Tulondelenu kufumba kwamuNsona kunakuhosha hakutala hayuma yidi kumbidi nakubula kutala hayuma yakunyima. Neyi twila mwenimu tukumwekesha netu ‘tunakwanuka iñoda Loti’!

[Tumazu twaheshina]

[Malwihu aKuzatisha haKudiza]