Kwashenu Antu Kulonda ‘Ahinduki Mutulu’

“Muneluki dehi mpinji yakuhinduka mutulu hiyikuya nakupandakana.”—ROM. 13:11.

MUNATELI KULUMBULULA?

․․․․․

Muloñadi akwaKristu chatela kwikalilawu atona kuspiritu?

․․․․․

Muloñadi ankoñi atona chatela kwikalilawu namuchima wakutiyilila nikusoñama?

․․․․․

Indi kuhosha mumesu awunda nikudiwunjika kwatukwashaña ñahi neyi tudi mwiha?

1, 2. Munjilanyi antu amavulu mwatela kuhindukilawu mutulu?

 CHAAKA nichaaka, antu amavulu afwaña hamuloña wakunoñoka hela kukama hampinji yinakwendeshawu motoka. Amakwawu niwena nyidimu yamanaña hamuloña wakubula kuhinduka swañu kulonda ayi kumudimu hela hamuloña wakukama hamudimu. Ilaña kunoñoka kwakuspiritu kwafwana nankashi. Dihafuma Bayibolu kuhosha nawu: ‘Muntu wukutona nakooleki.’—Chim. 16:14-16.

² Chineli ifuku deneni daYehova didi kwakwihi, antu amavulu adi mutulu twakuspiritu. Hela tuhu akulumpi jamuKristendomu atenaña anyikoku jawu nawu ‘hiluntu lwakama tulu.’ Indi tulu twakuspiritu hichumanyi? Muloñadi akwaKristu chatela kwikalilawu atona? Tunateli kukwasha ñahi antu kulonda ahinduki mutulu twakuspiritu?

INDI TULU TWAKUSPIRITU HICHUMANYI?

3. Munateli kumulumbulula ñahi muntu wudi mutulu twakuspiritu?

³ Antu adi mutulu hiyekalaña nañovu yakuzata nyidimuku. Ilaña, antu akaamaña tulu twakuspiritu akasikaña nanyidimu yayivulu, ilaña hiyashaña maana kuyuma yakuspirituku. Ashaña maana hayuma yakudihandisha nachu, kufwila yuma yakudiluñisha nachu, kutiyakana mpuhu hela maheta. Hamuloña wakwiñija mutu muyumiyi, hiyashaña nankashi maana kuyuma yakuspirituku. Ilaña, antu atona kuspiritu eluka nawu tunakushakama ‘mumafuku akukuminina,’ nawa ashaña muchima hakwila nkeñelu yaNzambi.—2 Pet. 3:3, 4; Luka 21:34-36.

4. Indi kufumba kwakwila nawu: “Bayi tukamaña tulu neyi chelañawu antu acheñuku” kwatalisha mudihi?

⁴ Tañenu 1 Atesalonika 5:4-8. Haniyi nsona kapostolu Pawulu wakonkomweneni akwawu akwakwitiya kubula  ‘kukama tulu neyi chelañawu amakwawuku.’ Watalishili mudihi? Njila yimu mutwatela ‘kukamina tulu’ yidi yakudiwula nshimbi jajiwahi jaYehova. Njila yikwawu mutwatela ‘kukamina tulu’ yidi yakudiwula wunsahu wakwila nawu mpinji yaYehova yakujilumuna antu atama yinashiki dehi. Dichi twatela kubabala kuchina twakenda kasambula yaaku yawantu atama.

5. Yitoñojoka yamuchidinyi yekala nawantu akama mutulu twakuspiritu?

⁵ Antu amakwawu atoñojokaña nawu kwosi Nzambi watela kuyitwika muloña. (Mas. 53:1) Amakwawu niwena atoñojokaña nawu Nzambi hatwakamenaña etu antuku, anetu nawa kwila tumukuhwelela nehi. Ilaña amakwawu atoñojokaña nawu neyi atachika kuya kuchechi akwikala amabwambu jaNzambi. Antu amuchidiwu adi mutulu twakuspiritu. Atela kuhinduka mutulu. Tunateli kuyikwasha ñahi?

TWATELA KWIKALA ATONA ETU AWENI

6. Muloñadi akwaKristu chatela kwikalilawu atona kuspiritu?

⁶ Hakwila tuhindwishi akwetu, chiña etu aweni twikala atona. Yumanyi yitwatela kwila? Izu daNzambi desekeja tulu twachifwikija ‘nanyidimu yamwidima’ yidi neyi yisela, kusheta, wusenji, kubajama, ndombu niichima. (Tañenu Aroma 13:11-14.) Kutondolwela yililu yamuchidiwu kwakala. Twatela kwikala asoñama. Ñendeshi wakañanyaña kumona wubanji wafumaña mukunoñoka iku nakwendesha motoka wadipundilaña yomweni ijamu. Dichi mukwaKristu watela kwiluka nindi kukama tulu twakuspiritu kwafwana.

7. Indi kwikala yitoñojoka yaheña hadi antu kunateli kutuluwañesha ñahi?

⁷ Chakutalilahu, mukwaKristu wukutachika kutoñojoka nindi antu ejima mwiluña mwashimwinañayi akaanaña chikupu nsañu yayiwahi. (Yish. 6:10, 11) Nateli kutoñojoka nindi, ‘Neyi kwosi muntu wukwiteja nsañu yayiwahi, muloñadi chinatela kuzatila nañovu kulonda nishimwineña hela kukwasha antu?’ Eña, antu amavulu adi mutulu twakuspiritu, ilaña anateli kuhimpi yililu yawu. Amakwawu ahindukaña nakwiteja. Tunateli kuyikwasha hohu neyi etu aweni twikala atona, kuhitila mukuzatisha njila jajiha jakushimwinamu nsañu yaWanta munjila yayiwahi. Hakwila twikali atona, twatela kwiluka chuma chaleñelaña mudimu wetu wakushimwina kwikala walema nankashi.

YUMANYI YAKOJEJAÑA MUDIMU WETU KWIKALA WALEMA?

8. Muloñadi chitukuhoshela netu mudimu wetu wawakwaKristu walema nankashi?

⁸ Twatela kwanuka netu hela chakwila antu anakukaana kutiya, mudimu wetu wakushimwina wamulemeshaña Yehova nawa wazataña mudimu weneni hakushikija nkeñelu yindi. Antu ejima adiwulaña nsañu yayiwahi keña ayibabeshi. Wunsompeshi wakashindamena hakukaana nsañu yayiwahi yitwashimwinaña. (2 Tesa. 1:8, 9) Cheñi nawa, mukwaKristu wukuluwañesha neyi yatachika kutoñojoka nindi hitwatela kushimwina nañovuku muloña “kwamba kekala kusañuka kwawaloña nikwawabula kuloña.” (Yil. 24:15) Izu daNzambi datulejaña nawu antu adi neyi ‘ampembi’ akasompeshawu akaya “mukubabesha kwahaya nyaka.” Mudimu wetu wakushimwina wamwekeshaña nawu Nzambi hisaluwi, wakwashaña antu kuhimpa yililu yawu kulonda akaheti “wumi wahaya nyaka.” (Mat. 25:32, 41, 46; Rom. 10:13-15) Neyi tuleka kushimwina, antu anateli kwikala ñahi nakukooleka kwakutiya nsañu kulonda akaheti wumi?

9. Indi kushimwina nsañu yayiwahi kunayiheteshi ñahi enu niakwenu?

⁹ Kushimwina nsañu yayiwahi kwatuheteshaña. (Tañenu 1 Timotewu 4:16.) Hadaha mukwiteja nenu chikuhwelelu chenu chinakoleluku nawa munasweji kumukeña Nzambi hamuloña wakushimwina hadi Yehova nihayuma yakaleta Wanta, netuku?  Hikunayikwashi kwikala nayililu yawakwaKristuku? Komana kumwekesha kudihana kwenu kudi Nzambi kuhitila mukushimwina hikunayileteli muzañaluku? Antu amavulu anadizishi amakwawu chalala atiyaña kuwaha hakumona spiritu yaNzambi chiyinayikwashi kuhimpa chihandilu chawu.

IKALENU ASOÑAMA

10, 11. (a) Indi Yesu niPawulu adimwekesheli ñahi kwikala asoñama? (b) Lumbululenu kusoñama chikunateli kukwasha mudimu wetu wakushimwina.

¹⁰ Tunateli kuzatisha njila jashiyashana hakukwasha antu kulonda akeñi nsañu yayiwahi. Dichi ankoñi akwaKristu atela kwikala asoñama. Yesu diyi chakutalilahu chetu. Chineli wadiña wawanina, Yesu wamweni kuzuwa kwadiña mumuchima wakaFwarisi, chabalumukiliyi chikupu mumbanda mukwanshidi nikudihana kwamumbanda nfwila. (Luka 7:37-50; 21:1-4) Yesu wayikwashili wejima wawu kuspiritu. Ilaña hichinayi mukwila nawu kambuña Nzambi watela kwikala wawanina kulonda yekali wasoñamaku. Kapostolu Pawulu walumbulwili ichi chikuma. Wahimpili njila jakushimwinamu kulonda yashimwini antu amboka-mboka nawa akweti yililu yashiyashana.—Yil. 17:22, 23, 34; 1 Kor. 9:19-23.

¹¹ Neyi twikala asoñama neyi chadiñayi Yesu niPawulu, tunateli kwiluka chakusañumuna mpwila yawantu itwawanaña. Chakutalilahu, neyi munawani antu, keñenu yinjikijilu yikuyikwashaku kwiluka chisemwa chawu, yuma yakeñawu hela kukala kunakumonawu muchisaka. Hadaha mukumona yuma yinakwilawu hanoyu mpinji nikuhoshahu nakavumbi hakutachika kuhanjeka.

12. Muloñadi chitwatela kwikalila ababala hansañu yakuhanjeka neyi tudi mwiha?

¹² Muntu wasoñama hahuwankanaña nayuma yikwawuku. Hampinji yitudi mwiha, twakoleshewaña neyi tunakuhanjeka namukwetu mutunakuzatila. Hela chochu, twatela kwanuka netu tunakuya mwiha nakushimwina kudi antu. (Mukwa. 3:1, 7) Twatela kwiluka netu mpanji yitunakuhanjeka hakuya hetala dikwawu hiyinakuluwañesha mudimu wetuku. Kuhanjeka nsañu yitunakuya nakuleja antu yikutukwasha nankashi kusha maana kumudimu wetu. Cheñi, hela chakwila selufoni yatukwashañaku mpinji jikwawu kuzata chiwahi mudimu wetu, twatela kuyichuna kuchina yakenda kuketwisha mpanji yetu neyi tunakuhosha namwiniitala.

MWEKESHENU KUKEÑA

13, 14. (a) Tunateli kwiluka ñahi yuma yakeñayi mwiniitala? (b) Yumanyi yinateli kusañumuna muntu kwikala nampwila muyuma yakuspiritu?

¹³ Ankoñi atona nawa asoñama atiyililaña nankashi neyi anakuhosha nawantu. Malwihwinyi imwatela kwihula muntu imunawani kulonda mwiluki yitoñojoka yindi? Nakwakama hamuloña wakuvula kwansakililu, madombu, tahindi hayuma yinakañanyi kuzata nfulumendi? Komana kwila mumusañumuna kulonda yekali nampwila muyuma yakuspiritu kuhitila mukuhosha hayuma yayiwahi yikweti wumi hela kuhosha hakufumba kwamuBayibolu kwakuwahi? Kulomba kwakokolaña antu ejima kushilahu niakwakusekesha. Antu amavulu ajinokaña neyi kudi muntu watiyaña kulomba. Amakwawu ehulaña nawu: Komana Nzambi watiyaña kulomba kwawantu ejima? Neyi watiyaña wanyi, chumanyi chitwatela kwila kulonda Nzambi yatiyeña kulomba kwetu?

¹⁴ Anetu nawa tunateli kudiza chakutachika kuhanjeka nawantu neyi tushinshika chelañawu akwakushimwina akuluka yitembi. Talenu chatondolwelañawu kwihula malwihu abula kutelela hela kuhosha nsañu yinabuli kuyikundama. Indi ntiyakenu yezu dawu hela mmwekenu yayikwashaña ñahi kwiluka chinakutoñojokayi mwiniitala?—Yish. 15:13.

 HOSHENU MUMESU AWUNDA NAKASHINSHI

15. Indi kuwundisha muchima kunateli kutukwashaña ñahi hakushimwina?

¹⁵ Komana mwatiyaña kuwaha kuyihindwisha munkomu yatulu? Antu amavulu azuwaña neyi ayivumbula hatulu chakukasumwisha. Akeñaña kuyihindwisha chachiwahi. Dichitwatela kuhindwisha antu adi mutulu twakuspiritu. Chakutalilahu, neyi muntu imunendeli nayihañi, mwatela kumwakula ñahi? Mwekeshenu muchima wakudizoza, musakililenu hakuhosha chakadi kusweka nawa fumenuhu mumesu akuwunda. (Yish. 15:1; 17:14; 2 Tim. 2:24) Neyi mumwekesha muchima wamuchidiwu, ona muntu waketeja kuhanjeka naChinsahu mukwawu wakamwendela mpinji yikwawu.

16, 17. Tunateli kuzatisha ñahi kashinshi mumudimu wetu?

¹⁶ Mpinji yikwawu, munateli kushinda neyi muntu nakaani. Muntu nateli kuhosha nindi, “Kwami nehi. Anami nawa netiya” hela “inakukeña wanyi” kulonda yaketwishi mpanji. Ilaña neyi mwikala nakashinshi ninyitakalaji, munateli kumwihula lwihu lukusañumuna mwiniitala kwikala nampwila yakukeña yuma yakuspiritu.—Tañenu Akolose 4:6.

¹⁷ Mpinji yikwawu neyi tuwana antu anakuhosha nawu anakasiki nanyidimu, twatela kwiteja nakudiyila. Mpinji yikwawu munateli kuhoshahu tumazu twantesha nawa twatuwahi. Amana kwetu amakwawu abakulaña Bayibolu nakumutañila nsona yinateli kumusañumuna, nakumwihula mwiniitala lwihu, yuma yejimiyi ayilaña mukapinji kantesha hohu. Mpinji yikwawu yikuma yayiwahi yahoshañawu mukwihihisha yakojejaña mwiniitala wakaanaña kwikala nampinji yeneni yakukeña kuhanjeka nakuhumisha itañwa. Komana kwila muzatisha iyi njila nehi neyi muwana muntu?

18. Chumanyi chitwatela kwila kulonda tutweshi kushimwina chiwahi wunsahu wamumpanji?

¹⁸ Neyi tunawani antu hampinji yitunakuzata nyidimu yetu yakumujimba, twatela kuyisañumuna nansañu yayiwahi neyi tunadiloñeshi kushimwina wunsahu wamumpanji. Amana kwetu niahela amavulu asendelaña nyikanda muyisweku nimumafuba awu. Anateli cheñi kutañila hamu nsona yamuBayibolu namwiniitala neyi neteji. Mwatela kuhosha nankoñi wamudimu hela nawapayiniya muchipompelu chenu kulonda ayikwashiku chimwatela kudiloñesha.

KUHINDWISHA ANTAÑA JETU CHIWAHI

19. Muloñadi chitwatela kutwalekelahu nakukwasha antaña jetu?

¹⁹ Wonsu wetu twakeñaña kukwasha antaña jetu kulonda eteji nsañu yayiwahi. (Yosh. 2:13; Yil. 10:24, 48; 16:31, 32) Neyi akaana hampinji yatachi yitunakukeña kuhosha nawu, kumuchima kukwiyila. Tukutachika kutoñojoka netu kwosi chuma hela mazu itwatela kuhosha akuhimpa yililu yawu. Ilaña yuma yamwekanaña yinateli kuhimpa chihandilu hela yitoñojoka yantaña yenu. Hela kudi yuma yayivulu yimuneluki yinateli kuyikwashaku  kulumbulula chalala kulonda mutweshi kuyishika hamuchima.

20. Muloñadi chitwatela kwikalila ababala hakushimwina kudi antaña jetu?

²⁰ Twatela kulemesha yitoñojoka yawantaña jetu. (Rom. 2:4) Komana kwila tuhosha nawu mumesu awunda neyi chitwahoshaña nawantu itwawanaña mumudimu wakushimwina nehi? Twatela kuhosha mumesu awunda nikalemesha. Chatela mumushimwineña hohu, shimunenu wunsahu wunakumwekesha chinahimpiki chihandilu chenu hamuloña wakudiza chalala. (Efwes. 4:23, 24) Lumbululenu chinayikiswiliyi Yehova muchihandilu chenu ‘nichinayilejiyi nakuyiwahisha.’ (Isa. 48:17) Antaña jenu atela kumona nawu mukweti yililu yatelela akwaKristu.

21, 22. Shimunenu chakutalilahu chinakumwekesha chichalemena kutatakena hakwila mukwashi antaña jenu kuspiritu.

²¹ Katataka, muhela wumu wasonekeli nindi: “Nesekaña kushimwina kudi amana kwami niahela 13 munhoshelu nimuyililu yami. Nayisonekelaña nyikanda hachaaka hachaaka. Hadi yaaka 30 yinahituhu, muchisaka chetu yami hohu nadiña Chinsahu.”

²² Muhela watwalekeluhu nindi: “Ifuku dimu, namutemesheleli yayami wamumbanda nshiña washakamaña kwakulehi chikupu. Wanlejeli nindi wamwilili ntañishi yindi wamuchechi nindi yadizeña nindi Bayibolu, ilaña hamwekenuku. Chinamwilili nami nidizeña nindi, wahosheli nindi: ‘Chachiwahi, ilaña nukuleja nami: Ami kwila nikala Chinsahu chaYehova nehi.’ Hanyima yakumutemeshela mukanda waChumanyi Chacheni Chatañishaña Bayibolu?, natachikili kumutemeshela nshiña neyi hanahiti mafuku antesha. Ilaña chatambwiliyi iwu mukanda wawufuchikili. Nkumininaku, namulejeli nami yanoni mukanda windi nawa twahanjekeli hanshiña hadi jiminiti 15, twatañili nikuhanjeka hansona. Hanyima yakusinsashana kumutemeshela nshiña, wekalili nampwila yakudiza kubadika hadi jiminiti 15. Kufumahu, watachikili kuntemeshela nindi tudizi, mpinji yikwawu watemesheleña henohu kanda nihinduki nikuhinduka, mpinji yikwawu watemesheleña kayedi hefuku. Chaaka chahiñiluhu, amupapatishili, chimwahitili chaaka chimu wekalili payiniya.”

23. Muloñadi chitukutwalekelahu nakuhindwisha antu adi mutulu twakuspiritu?

²³ Hakwila nawu mukwashi antu kulonda ahinduki mutulu twakuspiritu chakeñekaña kuzata nañovu. Hela chochu, antu amwovu anakwiteja nsañu yitwayilejaña. Haavareji antu akubadika ha 20,000 hakakweji hakakweji anakuyipapatisha nakwikala aYinsahu jaYehova. Dichi twatela kulondela kufumba kwaPawulu kwafumbiliyi mana kwetu wamunkulakaji yakusambila Akipusa nindi: “Shaku muchima kumudimu wunatambuli mudi Mwanta, wuwukalakali chalala.” (Kol. 4:17) Chibaaba chinahiñuhu chikutukwasha wejima wetu kwiluka mwatalisha kuzata nañovu hakushimwina.

[Malwihu aKuzatisha haKudiza]

[Caption on page 13]

YUMA YIMWATELA KWILA KULONDA MWIKALI ATONA

▪ Shenu muchima hakwila nkeñelu yaNzambi

▪ Tondolwelenu nyidimu yamwidima

▪ Tondolwelenu yuma yaletaña tulu twakuspiritu

▪ Keñenu antu ekala mwiluña denu dakushimwina

▪ Esekenu njila jajiha hakushimwina kudi antu

▪ Anukenu nenu mudimu wenu walema