Malwihu Ehulañawu Antañi

Komana chaaku chakutala nyevulu yanzekesi chamukwaKristu chinateli kutama nankashi chakwila anateli kumuhaña muchipompelu chawakwaKristu?

▪ Eña, anateli kumuhaña. Dimuloña waweni wutwatela kutondolwela chikupu kutala nyevulu yanzekesi, yasonekañawu munyikanda, nyevulu yamumagazini, mafilimu, mavidiyo nihaIntaneti.

Nyevulu yanzekesi yidi mukaayi kejima. HaIntanenti dihalumbama nyevulu yanzekesi chikupu nawa naambala yawantu anakufwa munichi chipupu chafwana yinavuliluku nankashi. Atwansi niakulumpi amakwawu aluwukilaña nyevulu yanzekesi hamaWeb site. Amakwawu niwena atalaña nyevulu yanzekesi mumushikila hamaWeb site, atoñojokaña nawu kwosi wukunmona muloña atañaña hela kutala nyevulu yanzekesi mukuswamujoka mwitala hela mukasanji kawu. Muloñadi akwaKristu chatela kushilawu muchima haniyi nsañu?

Twawanaña muloña waweni mumazu akusoñamisha ahosheliyi Yesu nindi: “Muntu wukutala mumbanda namesu akumufwila, neli dehi nindi wuvumbi mumuchima windi.” (Mat. 5:28) Hela chochu, eyala namumbanda adi mumaluwi diwu etejawu kubulakana nawa dichuma chayizañaleshaña. (Yish. 5:15-19; 1 Kor. 7:2-5) Ilaña kutala nyevulu yanzekesi dichikwekala wanyi. Ilaña yamwekeshaña wuvumbi wasañumunaña muntu kwikala nayitoñojoka yazonda yakaanishiliyi Yesu. Chakadi nikujina, kutaña hela kutala nyevulu yanzekesi kwafumpaña  nshimbi yaNzambi yakwila nawu: “Jahenu yidi yenu yidi hamaseki, wuvumbi, wuzondu wamumuchima, kufwila kwila yuma yatama, kusweja kukeña yatama, nilwisu himana kwawu nakupesha.”—Kol. 3:5.

Indi neyi mukwaKristu watalahu dehi nyevulu yanzekesi kamu hela kayedi? Kukala kwindi kunateli kwesekana nakukala kweneni kwamweniyi ñimbi yamasamu Asafwi wahosheli nindi: “Hakwila ami hasheli hanti hohu nakusenuka nyendu yami munjila; nyendu yami yakeñeli kuselumuka tuhu.” Indi mukwaKristu nateli kwikala ñahi nachinleji chitooka nikuwunda naNzambi neyi wadiña nakutala nyevulu yawamayala hela ambanda adi nzekesi hela eyala namumbanda anakwila wuvumbi? Asafwi niyena chinleji chamukabishileña, wahosheli nindi: “Ankatishili mwaana wejima, ambabesheli habudidi habudidi.”—Mas. 73:2, 14.

MukwaKristu wuneli nshidi yamuchidiwu watela kwiluka nindi neli chuma chatama nawa watela kukeña wukwashu. Iwu wukwashi wawanikaña muchipompelu: ‘Neyi anawani muntu navulumuni, enu mwendaña muspiritu, mufuntishenu muntu wudi ochu naspiritu yakudizoza; babalaku hadaha nineyi akakweseka.’ (Ŋal. 6:1) Eluda mukwaKristu wumu hela ayedi anateli kumukwasha, nawa akulomba nindi ‘kulomba kwakukuhwelela kunateli kumuhandisha wakata, nawa neyi navulumuni akumwanakena.’ (Yak. 5:13-15) Antu akeñaña nawu ayikwashi kulonda aleki chaaku chakutala nyevulu yanzekesi achimona neyi kukundama kwakwihi naNzambi hichuma chachiwahi nankashi, neyi cheliliyi Asafwi.—Mas. 73:28.

Hela chochu, kapostolu Pawulu wahosheli nindi antu amakwawu avulumwini hiyabalumukili munyichima yawu ‘kuyuma yawuzondu nikuwuvumbi nikuyuma yatamaku.’ * (2 Kor. 12:21) Kutalisha hezu dachiGiriki dakwila nawu “wuzondu,” Professor Marvin R. Vincent wasonekeli nindi “hichaaku chatama nankashi chakwila yuma yawunyeñu.” Nyevulu yanzekesi yikwawu yatama nankashi kubadika yisela yawantu adi nzekesi hela eyala namumbanda anakwila wuvumbi. Hinyevulu yawunyeñu, nyevulu yanzekesi yatama nankashi munabombeli wutumwa (kudikama namukwenu iyala hela mumbanda), kuhimpa ambanda, kukama nakanyama, nyevulu yanyana yanyanya yidi nzekesi, amayala amavulu anakukama mumbanda wumu, kuyandisha ambanda, kukama mumbanda hanyima yakumukasa, hela kuyandisha muntu. Antu amakwawu amumafuku aPawulu ‘maanawu adiña mumwidima’ nawa ‘wena hiyatwesheleña kutiya nsonyi nawa cheñuku; adumbilili mukufwila kwatama, nakwila yuma yawuzondu yejima nalwisu.’—Efwes. 4:18, 19.

Pawulu wateneni cheñi “wuzondu” hamukanda waAŋalija 5:19. Nkuluñaña wumu wakuBritain wahosheli nindi izu dawuzondu datalisha “kuyuma yayivulu sweje-e kwikala nampwila yasweja yakwila wuvumbi.” Kwosi mukwaKristu wunateli kwiteja nindi iyi yuma yomisha mbaña yinashimunuwu hewulu, nyevulu yanzekesi yinakumwekesha antu anakwila wuvumbi ‘yayiwahi.’ Pawulu wakunkulwili hamukanda waAŋalija 5:19-21 nindi ‘antu elaña’ iyi yuma yazonda “hiyamba kaswana wanta waNzambuku.” Dichi, neyi muntu yekala nachaaku chakutala nyevulu yanzekesi yomisha mbaña, nyevulu yinakumwekesha antu anakwila wuvumbi, hadaha nayitali hadi mpinji yeneni nawa hanakukeña kubalumuka mumuchima nikufutumukaku, hatela kwikala muchipompelu chawakwaKristuku. Atela kumuhaña kulonda akiñi chipompelu nawa mubuli kwikala majilu.—1 Kor. 5:5, 11.

Antu amakwawu adiña nachaaku chakutalaña nyevulu yanzekesi yatama ayili nakushimuna kudi aeluda, anayikwashi kuspiritu nawa ahimpa yililu yawu chikupu. Yesu wayilembeleli akwaKristu amuSaradisa wakushankulu nindi: “Wukoleshi yuma yinashali yinakeñi kufwa, . . . anukaku chiwatambwili nimuwatiyili, wukakelumu, wubalumuki mumuchima weyi. Dichi neyi wakabula kutona, . . . hiwakeluka mpinji yinakakukasumwishaku.” (Chim. 3:2, 3) Muntu nateli kubalumuka mumuchima neyi kwiji anamufumishi mukesi.—Yuda 22, 23.

Dichi chikubadika kuwaha neyi wejima wetu tukudishiña kulonda tubuli kuswila kwakwihi naniyi yuma yafwana yawuzondu. Eñañi, twatela kutondolwela chikupu nyitapu yejima yanyevulu yanzekesi!

[Tumazu twaheshina]

[Mazu ekoku adi hefu 30]

MukwaKristu wuneli nshidi watela kwiluka nindi neli chuma chatama nawa watela kukeña wukwashu