Nsañu Yachihandilu

“Muchikasa Cheyi Chachidiilu Mudi Yakutiyisha Nachu Kuwaha Haya Nyaka”

Washimwini Lois Didur

Kapampa kañahi kimwahoshahu dehi mazu akwila nawu, ‘Chiña nafuukwili wanyi muniyi njila’? Hanyima yakuzata mudimu wampinji yejima hadi yaaka 50, kwosi chuma chatama chammwekeneni hamuloña wakwikala kuchikasa chaYehova chachidiilu. Wundenu niyilumbulwili.

NAVWALIKILI mu 1939 nawa nakulilili mumukala waSaskatchewan, mwituña daCanada, hamu nawamana kwami niahela awana. Twatiyileña kuwaha kushakama munidi iluña dampata yesekana yanyitondu yantesha. Ifuku dimu, aYinsahu jaYehova enjili nakuhanjeka nawatata, dichi nayihwili neyi Nzambi wukweti ijina. Atulejeli ijina daYehova haMasamu 83:18. Chumichi chanleñeleli nikali nampwila yakumwiluka Nzambi nankashi niIzu dindi.

Hayina mpinji, anyana amunyikala adiña nakutañila shikola mukapeka kamu kushika nimumañu 8. Endeleleña hatuwalu nikwenda hamaseki yintampu yayivulu hakuya kushikola. Anvwali jawanyana amunoyu nkambi diwu adiña nakuyinka antañishi yuma yakudikwasha nachu. Chaaka chimu, anvwali jami diwu enkeluwu mudimu wakushakama nantañishi wamuha, John Didur, mwitala detu.

Chakadi ami kwiluka, iwu mukwenzi niyena wadiña nampwila yakudiza Izu daNzambi. Haniyi mpinji nakinkili manuñu munsañu jamatuña nachiyuulu, muloña atata niwena diyuma yakeñeluwu. John wakwili chiwahi nindi: “Kwosi muntu wudi nawuswa wakuyuula akwawu antu. Nzambi hohu diyi wunateli kuyuula antu.” Iyi nsañu yanyinkeli mpwila yakuhanjeka hayuma yayivulu.

Chineli John wavwalikili mu 1931, watiyileña nyabu yanjita yabileñawu antu. Chavulumukili Njita muKorea mu 1950, John wehwileña antu amavulu ayaña kumachechi chaleñeleleña ayeña kunjita. Wonsu wawu ahosheleña nawu akwaKristu atela kuya kunjita. Nkumininaku, wehwili aYinsahu jaYehova lwihu  lwolumu. Amulejeli nsañu yamuNsona chemikiluwu akwaKristu akusambila mushindu hansañu yanjita. John amupapatishili mu 1955. Chaaka chalondeleluhu, anami nawa ampapatishili. Mwayedi wetu twakeñeleña kumukalakela Yehova nawumi niñovu jetu jejima. (Mas. 37:3, 4) Mu July 1957, aJohn ansumbwili.

Ifuku dakwanakana kudisumbula kwetu kakavulu datuwanineña hakupompa kwankambi. Twatiyileña kuwaha kwikala hakachi kawantu amavulu alemesha maluwi. Kupompa kwetu kwatachi kwanyuza kwadiña mu 1958. Muwutanu wetu twayili namotoka kuNew York City kufuma kuSaskatchewan. Twendeli hadi mulungu wamukuma nampinji yamwaana, nawufuku twakamineña mumatenti. Twazañaleli nankashi chelili mana kwetu itwaweni mumusumba waBethlehem, Pennsylvania, yatutambiki kupumwina kwitala dindi adini ifuku. Chisambu chatumwekesheleliyi chatukwashili kushika muNew York City tunakumwekana wunyonji. Iku kupompa kweneni kwatusañumwini twikali nampwila chikupu yakumukalakela Yehova! Neyi chasonekeliyi ñimbi yamasamu nindi, “muchikasa cheyi chachidiilu mudi yakutiyisha nachu kuwaha haya nyaka.”—Mas. 16:11.

WUPAYINIYA

Chimwahitili chaaka chimu mu 1959, twatachikili wupayiniya nawa twashakamineña mukaditala kanyanya katufumbu kadiña hewulu dampidi muSaskatchewan. Hewulu dampidi, twamweneña maluña amavulu nawa maluña amakwawu dimutwayileña nakushimwina.

Ifuku dimu, twatambwilili mukanda wawuwahi kufuma kukasanji kamutayi. Nanyakeli kuya kwazatilileña amwanta wami aJohn namazembi. Hamukanda atulejeli nawu anatutondi kwikala apayiniya adimena nawa tukuzatilaña kuRed Lake, Ontario. Hamuloña wakubula kwiluka kudi idi iluña, twanoneli mapu nakutala kudi idi iluña.

Ilaña yayo-o, idi iluña dambukili neluña kutwafumini. Twayili mwamweni mumavunda mwadiña jimbaka janyanya jatuñiluwu kwakwihi nanyigoti yawuru. Chitwakeñeleña itala mwakushikena hefuku datachi, kamwana kamumbanda katiyili chitwahanjikeleña nantuñi nindi. Kayili nakuleja amama yidi nindi kudi antu anakukeña itala, amama yindi atwinkeli itala mutwakamini adina ifuku. Kadidi kadiña mukapeka kamajilu kaheshina. Chikwachili, twashikili kutwayileña, twaweni itala dayishimi datupeka tuyedi mwakadi nyipayipi yamenji niyitwamu, mwadiña hohu chifoyu mwakubutwila kesi kakutatisha mukapeka. Twalandili yuma yantesha mumasitolu mwalandishañawu yuma yazatishawu dehi nawa twatachikili kwinjilila.

Kufuma kutwadiñi nakushika kwadiña chipompelu hadiña makilomita 209. Ankoñi amavulu azatileña munyigoti yawuru afumini kuEurope nawa akeñeleña nawu tuyinki maBayibolu mwidimi dawu. Hashimbwili wanyi, twatachikili kudizisha atudizi aBayibolu 30 apamineña chiwahi. Mutukweji tutanu nakamu, chipompelu chanyanya chatachikili.

Nfumwa mumbanda wumu itwadizishileña watemesheli nshiña kudi kapristu nindi yenzi nakumulumbulwila ñodindi neyi chakwila yuma yitwamudizishileña yaheña. Chenjiliyi, kapristu wahosheli nindi twatela kutañisha nsañu Yawanzambi Asatu niyuma yikwawu. Ona mumbanda wanoneli Bayibolu yawu yawaKatolika nakumwila kapristu nindi yashimuni hasonekawu nsañu yahosheleñayi. Kapristu wazukumwini Bayibolu kwishinadi damesa, nindi kwosi nsañu yatela kulumbululayuku. Hakuya, wahosheli muchiUkraine nindi atuhañi mwitala nawa bayi twakadata cheñi mwendu hetala dawuku. Welukili wanyi nindi anfumwami aJohn watiyileña chiUkraine.

Hashimbwili wanyi, twafumini kuRed Lake muloña anfumwami aJohn akeñeleña kuyidizisha mudimu wamuñinza. Chimwahitili chaaka chimu, henohu aJohn anakuhana mpanji yachipapatishu hakupompa kwankambi,  ona iyala niyena wadiña hakachi kawantu ayileña nakupapatishewa. Chuma cheliliyi kapristu chamukojejeli yatachiki kuditañila muBayibolu.

KUDIKITA MUMUDIMU WAKWENDA

Mumudimu wakwenda muñinza, twazañaleleña kushakama hamu nayisaka yambokamboka. Twadilukili chikupu nawamana kwetu akweti matala mutwakamineña nikuhanjeka. Mpinji yimu, twakamineña mutupeka twahewulu mutuuta keki. Nabudidi nankashi, wukutiya muhela wakashinakaji neñili wumweneni mukapeka ketu nakubutula kesi hakadijiku kanyanya. Yeñija nimbashila nakutatisha menji akuwela. Nadizili yuma yayivulu yelileñayi wumweneni nawa nakalemesha.

Mudimu wakwenda wankwashili kukundama kwakwihi naYehova. Muñinza yimu mumusumba waAlberta mwadiña mbaka yamugoti yadiña kwakulehi Kukabeta Kaluwunda, kwashakamineña muhela wumu. Indi kuloñesha kwaYehova kwamukwashileña ñahi iwu muhela wadiña kwakulehi? Chimwahita tukweji tutanu nakamu, twayileña nandeki nakuzatilaku mulungu wumu nikupompa nindi, neyi chitwelileña nachipompelu chamumusumba weneni. Ichi chamwekesheleña nawu Yehova wakamenaña nyikoku yindi yejima.

Twahanjekeleña nawamana kwetu niahela amavulu atutambwilileña kumatalawu. Ichi chañanukishaña chamukunkulu chatachi chanyinkeluwu anfumwami aJohn, chadiña chikasha chachiwahi chenzeli to-o nayipapilu. Twahanjekeleña chikupu nawamabwambu munyikanda, kuzatisha iyi yipapilu. Ichi chikasha chanyikanda nachikeña nankashi.

Hampinji yitwadiña muñinza muToronto, mana kwetu wahaBeteli yamuCanada watemesheli nshiña neyi tunateli kuya kuBeteli. Wakeñeleña nindi tumwakuli mpinjinyi? “Neyi chinatwesheki kumadiki!” Chikwachili twamwakwili.

KUZATILA HABETELI

Mpinji yejima yatwinkeleñawu mudimu wacheñi twamweneña yuma yashiyashana yakutiyisha nachu kuwaha yafumaña kuchikasa chaYehova. Twatiyileña kuwaha nichitwayili kuBeteli mu 1977. Kudikunda nawamana kwetu niahela awayishewa kwatukwashili kwiluka yililu yambokamboka yikwetuwu nichalemeshawu Izu daNzambi.

HaBeteli hatutiyishileña kuwaha. Chakutalilahu, twashileña yikowelu yetu muyisweku bayi mumapakumunaku nawa twayileña kuchipompelu chimu. Kubombela hamudimu wunazatileña, natiyileña kuwaha kutwala antu enjileña haBeteli. Nayilejeleña mudimu wazatañawu haBeteli, nikutiya chahosheleñawu amana kwetu enyi nikwakula malwihu enhwileñawu.

Yaaka yahitili swayi, mu 1997, aJohn ayitambikili kuya kuShikola yawaMamembala aKometi yaMutayi kuPatterson, New York. Chakumishiluwu, atulejeli nawu tuyi nakuzatila kuUkraine. Atulejeli nawu tutoñojokuhu chikupu nikulombelahu. Nawufuku, twafuukwiluhu netu tukuya.

CHUMA CHIKWAWU CHAHIMPIKILI MUUKRAINE

Twafumini hakupompa kweneni kwanyuza muSt. Petersburg, Russia, mu 1992, nikwadiña muKiev, Ukraine, mu 1993. Iku kupompa kwatunuñili kudi amana kwetu Akumusela waEurope. Itala mwatwinkeluwu kukama muLviv, Ukraine, dadiña hetala damuchiyedi detala dadikulu. Lubanza lwamatahu antesha twalumweneneña hanjanina nawa hadiñi ikombu weneni wuchinana niayadi amavulu. Twatiyileña neyi tudi hamukala wetu kuSaskatchewan. Twashakamineñahu antu 12. Hefuku hefuku, twanyamukileña budidi nankashi nakuketula musumba hakuya nakuzata haBeteli.

Twatiyileña ñahi kushakama muUkraine? Twahetelelumu nankashi hakuhanjeka nawamana kwetu amavulu ahitili mukweseka, alekesheluwu kushimwina  niakasiluwu. Ilaña chikuhwelelu chawu chadiña chakola. Chitwayihameka, ahosheleña nawu, “Twamuyandilileña Yehova.” Hiyatoñojokeleña nawu Yehova wayinatili chisayikilaku. Nikulelu, neyi wumusakilila mana kwetu hachuma chachiwahi chineliyi, yena wukwakula nindi, “Musakilili Yehova,” amwekeshaña nawu diyi Nsulu wayuma yayiwahi yejima.

MuUkraine, antu amavulu endaña hamaseki hakuya nakupompa, iyi diyi mpinji yahanjekañawu nikudikolesha. Endaña hadi ora yimu hela kubadikahu. Mumusumba waLviv mudi yipompelu yakubadika ha 50, yipompelu 21 yazatishaña Itala deneni daWanta. Hamulungu, twatiyaña kuwaha hakumona amana kwetu chasukumukañawu hakwinza nakupompa.

Nyichima yashakamineña mwivumu neyi tudi nawamana kwetu niahela, akweti yililu yayiwahi nimuchima wakukwasha akwawu. Neyi nikañanya kutiya jinakuhoshawu hamuloña wakubula kwilukisha idimi nawa nichidi kudiza, awundishaña muchima. Neyi anakuntala amwekeshaña yuma yikukeña kuhoshawu.

Chakutalilahu chinakumwekesha nawu amana kwetu adikuhwelela chikupu chamwekeni hakupompa kwanyuza muKiev mu 2003. Twayili hachitesheni cheneni chamasuwa chaheseki hitwamweni kakansi kamumbanda hikakwinza kudi etu nakuhosha wumweneni naku, “Najimbali. Ankaka awambanda nayimoni wanyi kwaduwu.” Iwu kansi wamumbanda wamweni mabaji itwavwalili nawa welukili nindi tudi aYinsahu. Iwu mwana wadiña wahamuka nawa hadililuku. Iñoda nkoñi wañinza itwadiña nindi wamusendeli nakumutwala kuDipatimenti yaYajimbala mwibulu. Iwu kansi wadiweni cheñi nawankaka yindi. Nazañaleli nankashi hachikuhwelelu chadiña naniwu kansi, hela chakwila hadiña antu amavulu nankashi.

Amana kwetu afumini kumatuña amavulu enjili kuUkraine muMay 2001 hakuhana mutayi wetu wawuha kudi Yehova. Hanyima yakutiya mpanji yadimena mwibulu Hamulungu nantetemena, amana kwetu amavulu enjili nakutala Beteli yayiha yatuñiluwu. Hinamba kavulamena idi ifukuku! Natiyili kuwaha hakumona amana kwetu endeleña chiwahi wumweneni. Naswejeli kuhameka hakumona yuma yakutiyisha kuwaha yafumaña mukumuzatila Nzambi.

KUHIMPIKA KWENENI

Chawushona, mu 2004, anfumwami aJohn ayiweni nachikatu chakansa. Twayili kuchipatela kuCanada. Mpinji yatachi yazatishiluwu yitumbu yañovu nankashi yamuzeyesheli nankashi nawa washakamini nyilungu yantesha muchilombu mwadiña ayeji akata nankashi. Oku kukooleka, watachikili kutiyaku chiwahi. Hela chakwila wakañenyeña kuhosha, wahamekeleña namesu antu ejima enjileña nakumuhempula.

Ilaña yikatu yamwimakeneni, wafwili chilaaka chahiñiluhu. Natiyili neyi ananketuli mutu. Ami nianfumwami aJohn twamuzatilili Yehova hamu namuzañalu. Nukwila ñahi ami nshona? Nafuukwiluhu kufunta kuUkraine. Natiyaña kuwaha hakukeña kwammwekeshelaña amana kwetu niahela amuchisaka chaBeteli nimuchipompelu.

Kwosi mpinji yitwatachikili kuditoñesha hachuma chitwafuukwili muchihandilu chetu. Muchihandilu chetu tunadiluñishi chikupu nawa tukweti amabwambu amawahi. Neluki nami kuchidi yuma yayivulu yinatela kwiluka kutalisha hakuwaha kwaYehova nawa nafwilaña kumukakela haya nyaka muloña nawani chikupu ‘yuma yakutiyisha nachu kuwaha kuchikasa chaYehova chachidiilu.’

[Mazu ekoku adi hefu 6]

“Kwosi mpinji yitwatachikili kuditoñesha hachuma chitwafuukwili muchihandilu chetu”

[Mwevulu wudi hefu 3]

Hefuku ditwadisumbwili nawanfumwami aJohn

[Mwevulu wudi hefu 4]

Henohu nidi payiniya wadimena kuRed Lake, Ontario

[Mwevulu wudi hefu 5]

Nidi nawanfumwami aJohn muUkraine, 2002