Mwafumbaña Munjilanyi?

Ayilejahu dehi kufumba antu amakwawu? Chakutalilahu ayihulahu dehi malwihu adi neyi: ‘Nukwila ñahi? Niyi kunichi chidika tahindi nehi? nateli kuzata iwu mudimu? kudikunda naniwu muntu kulonda twakadisumbuli?’

Antu akweti kashinshi anateli kuyihula nawu muyikwashuku kufuukula hayuma yinateli kukolesha wubwambu wawu nawamabwambu jawu, chisaka, hela naYehova. Kwakula kwenu kukushindamena hanka? Mwelaña ñahi neyi munakufumba antu? Hela chakwila oyu nsañu yapela hela yakala, mukanda waYishimu 15:28 wahosha nawu: “Muchima wamukwakuloña watoñojokaña chachiwahi mwakwakwila.” Talenu nshimbi jitanu jamuBayibolu chijinateli kuyikwasha hakufumba muntu.

1 Ilukenu Kukala Kwakweni.

“Muntu welaña wuchidi kanda atiyi chachiwahi hakwakula, chamuleñelaña niwusupi ninsonyi.”—YISH. 18:13.

Hakwila nawu tufumbi muntu chiwahi, chiña tusambila kwiluka kukala kukwetiyi owu muntu wunakukeña nindi tumukwashi nichinakutoñojokayi. Chakutalilahu: Neyi muntu yayitemeshela nshiña nindi mumuleji njila yatela kuzatishayi kulonda yenzi kwitala denu, chumanyi chimwatela kwiluka hakwila nawu mumukwashi? Komana mukumuleja njila yayiwahi yatela kuzatishayi chakadi kwiluka heluña hadiyi? Inehi! Munjila yoyimu, hakwila nawu mufumbi muntu chiwahi mwatela kwiluka “iluña” kwadiyi hanoyu mpinji, dikwila nawu mwatela kwiluka kukala kukwetiyi nichinakutoñojokayi muntu wunakukeña wukwashu. Kudihu kukala kukutukañesha kulonda tubuli kwakula chiwahi? Neyi hituneluki kukala kwejimaku, tunateli kuleja muntu nsañu yikumuleñela yasweji kuluwankana.—Luka 6:39.

Ilukenu Nsañu Yinasandujoliyi. Chikuwaha neyi mumwihula muntu wunakukeña wukwashi malwihu adi neyi: “Nshimbinyi jamuBayibolu jiwunateli kuzatisha haniku kukala kuwukweti?” “Yumanyi yayiwahi hela yatama yikufuma mukuzatisha nsañu yimukweti?” “Nsañwinyi yimunasandujoli?” “Indi antu adi neyi aeluda amuchipompelu, anvwali jenu, hela muntu wayidizishaña Bayibolu, anayikwashi ñahi?”

Ñakwilu yanawa malwihu yikutukwasha kwiluka chinazatiyi iwu muntu nañovu kulonda yamanishi kukala kukwetiyi. Nawa cheñi, kufumba kwetu kukushindamena hansañu yamufumbawu dehi akwetu. Cheñi tunateli kwiluka neyi owu muntu nakukeña hohu nindi mukwakumufumba ‘yamuwi kumatu’ nansañu yinakukeña kutiyayi.—2 Tim. 4:3.

  2 Bayi Mulusuka Hakwakulaku.

“Antu ejima anyakali kutiya, alabi kuhosha, alabi kuzuwa.”—YAK. 1:19.

Tunateli kulusuka mukuhosha hamuloña wakufwila kumukwasha. Komana chikuwaha kwakula muniyi njila sweje-e neyi hitunasandujoli chikupu haniyi nsañu yitunakuhanjekahuku? Mukanda waYishimu 29:20 wahosha nawu: “Muntu wanyakalaña kuhosha wamumona dehi? Hela chisupi akumukuhwelelaku ntahi, bayi dinu yenaku.”

Dichi mwatela kuwundisha muchima mwivumu kulonda mwiluki nenu yuma yejima yimukuhosha yinesekani nankeñelu yaNzambi. Dihulenu nenu, ‘Komana yitoñojoka “nispiritu yamunu mwishina” diyinaleteshi nitoñojoki muniyi njila?’ (1 Kor. 2:12, 13) Anukenu nenu mwatela kubombelahu chuma chikwawu hakufumba muntu. Kapostolu Petulu, chelukiliyi nindi mudimu wamwinkeluwu Yesu wadiña wakala nankashi, wamulejeli Yesu nindi: “Chinjila Mwanta. Bayi wakamona yumiyuku.” Chumanyi chitukudizila kumazu ahosheliyi Petulu? Neyi tubula kubabala, hela tuhu muntu wukweti kashinshi ‘hakuta muchima kuyuma yaNzambuku, wukuta muchima kuyuma yawantu.’ (Mat. 16:21-23) Chachiwahi kutoñojoka henohu kanda tuhoshi! Cheñi nawa, yuma yitweluka hiyikwesekana namaana aNzambuku, netuku?—Yoba 38:1-4; Yish. 11:2.

3 Fwilenu Kuzatisha Izu daNzambi.

“Hinelaña chuma chakanka wamuku, ilaña nahoshaña mazu awa mwomwanlejeluwu kudi Tata.”—YOW. 8:28.

Munateli kuhosha nenu, “Neyi nadiñeyi, chiña neli . . . ”? Hela chakwila muneluki njila yakwakwilamu, mwatela kudizila kuchakutalilahu chatushililiyi Yesu chakudikehesha nikudizoza. Wadiña namaana abadika chikupu nawa welukili yuma yayivulu kubadika antu ejima, ilaña wahosheli nindi: “Hinahoshi chakumuchima wamami awenuku; Tata . . . diyi nanleji munukuleja antu, nimunukuhosha.” (Yow. 12:49, 50) Ntañishilu yaYesu nikufumba kwindi kwashindameneneña hankeñelu yaTata yindi.

Chakutalilahu, haLuka 22:49 twatañañahu nawu atumbanji twaYesu amwihwili kulonda yayileji neyi atela kuzuña hampinji yadiñayi kwakwihi nakumukwata. Kambanji wumu wazatishili mpoku yakabali. Talenu nsañu yidi hamukanda wukwawu waMatewu 26:52-54 yinakuhosha nawu hela tuhu haniyi mpinji, Yesu wamukwashili chikupu iwu kambanji kutoñojoka hankeñelu yaYehova. Hamuloña wakwiluka nshimbi yidi haKutachika 9:6 niwuprofwetu wamuMasamu 22 niIsaya 53, Yesu wafumbileña antu munjila yayiwahi nawa wahandishili mawumi awantu nakumuzañalesha Yehova.

  4 Zatishenu Nyikanda Yanduñu waMaana niKashinshi.

“Indi nduñu washinshika wukweti maana, anenkuwu kudi nkaka yindi mudimu wakuhemba mukala windi, akenkaña akwetala dindi yakudya yawu hayinkelañawu hayinkelañawu, hinyi?”—MAT. 24:45.

Yesu watonda izanvu danduñu dakuhwelelayi daloñeshaña yakudya yakuspiritu. Neyi munakufumba nikukwasha muntu hayuma yalema, komana mwasandujolaña chikupu munyikanda yashindamenaña haBayibolu?

MuWatch Tower Publications Index niWatchtower Library * asonekañamu nsañu yayivulu nankashi yinateli kutukwasha. Tukuluwañesha nankashi neyi tudiwula nsañu yidi muniyi nyikanda! Asonekamu nyitu yansañu yamboka-mboka, niyibaaba yayivulu yinateli kukwasha muntu wunakukeña wukwashu. Komana mweluka chikupu chakukwasha antu kulonda asandujoleña nshimbi yamuBayibolu nikutoñojoka Hezu daNzambi? Neyi chochelukañayi muntu heluña hadiyi nikwiluka kunakuyayi kuzatisha ikina daGPS ninyikanda yakusandujolelamu yinateli kumukwasha muntu kumona munjila mwadiyi nikwiluka chakutwalekahu kwenda munjila yaya kuwumi.

Aeluda amavulu adizishaña akwakushimwina chakusandujola muyibaaba kuhitila mukuzatisha Index hela Watchtower Library, nakukwasha amana kwawu niahela kutoñojoka haNsona. Kuzata muniyi njila kwakwashaña akwakushimwina kwiluka chakumanisha kukala nikwikala nachaaku chakusandujola nikushindamena hayuma yakuspiritu yatuloñeshelayi Yehova. Chelawu mwenimu, ‘afumbaña yitoñojoka yawu, enjilila dehi kwambula yayiwahi nayatama.’—Heb. 5:14.

5 Bayi Mufuukwila Akwenuku.

“Antu ejima akadisendela yiteli yawu, iwu nachindi, iwu nachindi.”—ŊAL. 6:5.

Muntu wejima watela kudifuukwila yomweni kulonda yeluki kufumba kwatela kuzatishayi. Yehova watwinka wuswa wakudifuukwila neyi chakwila tukulondela nshimbi jindi hela nehi. (Kuhit. 30:19, 20) Kukala kukwawu kwamwekanaña kwakojejaña muntu kuzatisha nshimbi jajivulu jamuBayibolu nawa muntu wunakulomba wukwashu diyi watela kudifuukwila. Kwesekeja nakukala kunamwekani hela yaaka yikwetiyi muntu wunakukeña wukwashu, twatela kudihula netu, ‘Komana mwalala nidi nawuswa wakwakula ilu lwihu?’ Kukala kukwawu atela kukumanisha kudi aeluda muchipompelu hela neyi wunehuli hikansi, watela kuya kudi anvwali jindi.

[Tumazu twaheshina]

[Chikasha/Mwevulu wudi hefu 8]

Yuma Yimwatela Kwila Hakudifukula kwaChisaka

Komana kwila musandujola hayuma yimwatela kudiza hakudifukula kulonda muwani ñakwilu yamalwihu ayihulawu antu katataka nehi? Yibaaba yamuchidinyi nawa nshimbinyi jamuBayibolu jinateli kukwasha muntu wunakwihula malwihu amuchidiwu? Chakutalilahu, mana kwetu hela muhela nateli kuyihula nindi mumukwashuku hansañu yakudiluka namuhela hela namana kwetu kulonda akadisumbuli. Neyi munakuzatisha Index hela Watchtower Library, sandujolenu nsañu yinakundami kunyitu yimunakuhoshahu. Chakutalilahu, muIndex munateli kutala hamutu wunakuhosha nawu “Kudiluka” hela “Maluwi.” Kuhiñahu sandujolenu hanyitu yanyanya yinesekani nayibaaba. Hampinji yimunakutala hanyitu yamaneni, mwatela kushinshika cheñi hamutu wunakuhosha nawu “Talenu cheñi,” wunakuhosha jiika hanoyu nsañu yimunakusandujola.

[Chikasha chidi hefu 9]

Hamuloña wayuma yatuloñeshelañayi Yehova mukuloñesha kwindi, twafumbaña nikutambwila kufumba kwakuwahi. Mukanda waMukwakutañisha 12:11 wahosha nawu: “Mazu awakwamaana adi neyi nyumba yakwendesha nachu añombi, mazu ashimunañawu aSayishimu amuyota adi neyi mbwambu jakupopa chachiwahi, himazu akufuma kudi kabiña wumu hohu.” Neyi chochazatishileñawu “nyumba yakwendesha nachu añombi” hakubiña atunyama, kufumba muntu munjila yakukeña nawa yayiwahi kwalombolaña antu ashinshika munjila yayiwahi. “Mbwambu jakupopa chachiwahi” jakoleshaña itala. Chochimu, kufumba muntu munjila yayiwahi kunateli kumukwasha. Antu akweti maana ‘afwilaña,’ hela atiyaña kuwaha “mazu ashimunañawu” amwekeshaña maana akufuma kudi “kabiña wumu hohu,” Yehova.

Mwimbujolenu Kabiña hakufumba muntu. Eñañi, tukweti kukooleka kwakutiyilila nikufumba munjila yayiwahi kala mpinji. Neyi kufumba kwetu kukushindamena hanshimbi jamuBayibolu, kufumba kwetu kukwikala kwakuwahi nawa muntu itunakufumba wukuhetelamu nankashi.