“Mwani Kwila Mutukwataku Mwevulu Nehi?”

Chamanini kupompa kwankambi hefuku damuchiyedi, Josué, mana kwetu wahaBeteli muMexico, wayili nakwendujola mumusumba waQuerétaro. Javier niMaru, adisumbula akuColumbia amwilili Josué nawu yayikwatuku mwevulu. Hamuloña wakwila yena niibwambu dindi Chinsahu avwalili chiwahi nawa avwalili mabaji ahakupompa, awa adisumbula ayihwili kulonda ayileji neyi anafumi kuchidika chawakashikola anakumishi hela chidika chikwawu chalema. Josué walumbulwili nindi tunafumi kukupompa kweneni kwawaYinsahu jaYehova nawa wayilejeli nindi akenzi nakupompa haMulungu.

Awa adisumbula ahosheli nawu akatiya nsonyi nankashi muloña hiyadiña nayilondu yakuvwala kuchidika chamuchidiwuku. Hela chochu, Josué wayilejeli ijina dindi ninaambala yanshiña yakasanji kamutayi hakalakelañayi.

Chimwahitili tukweji tuwana, Josué wahayamini nankashi hakutambwila mukanda wasonekeliyi Javier. Awa adisumbula ayili kukupompa kwankambi nawa haniyi mpinji akeñeleña aYinsahu jaYehova kuyendela muMexico City, mwashakamineñawu hayina mpinji. Hashimbwili wanyi Javier niMaru atachikili kudiza Bayibolu nikupompa. Chimwahitili tukweji ikumi, ekalili akwakushimwina abula kupapatishewa. Hela chakwila awa adisumbula abuukilili kumusumba waToronto, Canada, atwalekeluhu nakupama kuspiritu nawa apapatisheweli.

Nkumininaku, Josué watambwili mukanda kufuma kudi Javier mwalumbulwiliyi chaletesheli yeteji chalala. Nindi: “Henohu kanda tuyi kukupompa kwankambi, ami niñodami twashakamini hamaseki nakuhosha hansañu yakukeña wunlomboli wakuspiritu. Chitwamweni munavwali chiwahi nankashi, twelukili netu munafumi kuchidika chalema nankashi. Hakupompa kwankambi, twatiyili kuwaha nankashi hakumona chatulejeleñawu chiwahi hakushakama, nichatukwashileñawu kutaña muBayibolu niyililu yawantu enjili nakupompa. Hela chakwila twavwalili neyi akakwenda nakutala maluña, antu atulemesheli.”

Mazu ahosheliyi Mwanta wamaana Solomoni amukwashili Josué! Solomoni wasonekeli nindi: “Habudidi tumbaña mbutu jeyi nihamelela bayi wulekesha chikasa cheyuku, muloña hiwuneluki jakalumbulukaku, hela iji, hela iji, indi kwiji jejima jakawahila hamu.” (Mukwa. 11:6) Munateli kutumba mbutu kuhitila mukuzatisha mpinji yejima yimukweti kulonda muleji antu nsañu yinakundami kukupompa kwankambi kudi hambidi indi kwiji kuyitambika kumpanji yawantu amavulu? Yehova nateli kuyizatisha kulonda mukokoli antu adi nanzala nimpwila yakukeña wakuyilombola kuspiritu neyi cheliliyi Javier niMaru.—Isa. 55:1.

[Mwevulu wudi hefu 32]

Kufuma kuchimunswa nakuya kuchidilu: Alejandro Voeguelin, Maru Pineda, Alejandro Pineda, Javier Pineda niJosué Ramírez hamutayi muMexico