Twalekenuhu Kushimwina Nakunyakashana
Twalekenuhu Kushimwina Nakunyakashana
‘Shimunaku mazu nakunyakashana.’—2 TIM. 4:2.
MUNATELI KULUMBULULA?
․․․․․
Muloñadi akwaKristu amunkulakaji yakusambila chashimwininuwu nakunyakashana?
․․․․․
Tunateli kutwalekahu ñahi kwikala atona?
․․․․․
Muloñadi chitukuswejela kushimwina nakunyakashana nsañu yaWanta makonu?
1, 2. Malwihwinyi anakuhosha hamudimu wutukweti ‘wakushimuna mazu nakunyakashana’?
ANTU akweti mudimu wakupulwisha mawumi awantu azataña nakunyakala. Chakutalilahu, akwakujima kesi atemukilaña kunamwekani wubanji; muloña elukaña nawu mawumi awantu adi hakatoña.
2 Etu aYinsahu jaYehova, twafwilaña kukwasha antu kulonda akapuluki. Dihafumaña hitukudikita nankashi mumudimu wakushimwina nsañu yayiwahi yaWanta. Hela chochu, hitwashimwinaña swayi-swayi chakadi kutoñojokaku. Hanu dinu kapostolu Pawulu watalishili mudihi hakuhosha nindi: ‘Shimunaku mazu nakunyakashana’? (2 Tim. 4:2) Tunateli kushimwina ñahi nakunyakashana? Nawa muloñadi chitwatela kuzatila mudimu wetu nakunyakashana?
MULOÑADI CHITWATELA KUSHIMWINA NAKUNYAKASHANA?
3. Chumanyi chikafumamu neyi antu eteja hela akaana nsañu yaWanta?
3 Neyi mutoñojoka nenu mudimu wetu wakushimwina wunateli kupulwisha mawumi awantu, mukwikala namuchima wakufwila kuleja antu nsañu yayiwahi. (Rom. 10:13, 14) Izu daNzambi dahoshaña nawu: “Chinakamwila muntu watama nami Chalala wakafwa; neyi wakabalumuka aleka nshidi yindi hakwila yuma yaya muwuñaji nakuloña, . . . chalala wakahanda hakafwaku. Hiyakamwanukila nawa nshidi jindi janavulumuniyi niyimuku.” (Ezek. 33:14-16) Eñañi, Bayibolu yalejaña antu atañishaña akwawu nsañu yaWanta nawu: “Wukudamwina eyi aweni niantu akukutiya.”—1 Tim. 4:16; Ezek. 3:17-21.
4. Muloñadi akwakusekesha chakojejeleluwu mudimu wakushimwina awuzati nakunyakashana muyaaka nkulakaji yakusambila?
4 Hakwila twiluki chaleñeleli Pawulu yamukoleshi Timotewu nindi yashimwini nakunyakashana, tutalenu nsañu yikwawu yinadikumashani namutu wansona. Twatañaña nawu: ‘Shimunaku mazu nakunyakashana nihanawahi nihanabuli kuwaha, kumina dakushimuna ho-o; konkololaku, hosholaku, konkomwenaku, nakudiwunjika nawu nikuyileja. Muloña mwaka wamba kenza akaleka kutiyilila kuleja kwalala; akaheta matu owaña, akadivulishila ankuluñaña aya mwaya kufwila kwawu kwatama; akatotomona nsañu yalala kumatu awu.’ (2 Tim. 4:2-4) Yesu washimwini nindi kwakenza akwakusekesha. (Mat. 13:24, 25, 38) Chenjiluwu akwakusekesha, Timotewu wazatili mudimu ‘wakushimwina mazu’ nimuchipompelu kulonda akwaKristu abuli kuyihuñumuna nantañishilu yakutwamba yatiyakeneña kuwaha. Mawumi awantu adiña hakatoña. Ndochu makonu?
5, 6. Nsañwinyi yahoshañawu antu itwawanaña mumudimu wetu?
5 Akwakusekesha anakufuma mukudifukula kwalala anavuli nankashi nawa anamwañelumu. (2 Tesa. 2:3, 8) Ntañishilwinyi yinakuwa antu kumatu makonu? Mumatuña amavulu ntañishilu yakwila nawu yuma yadinjilili yayeni yinasweji nankashi munsakililu. Hela chakwila asayantisiti diwu avula kuhosha nawu yuma yadinjilili yayeni, iyi ntañishilu yinasweji nankashi munsakililu nawa yinakukojeja antu kudiwula Nzambi niakwawu antu. Ntañishilu yikwawu yinasweji yidi yakwila nawu Nzambi hatukeñaku; anetu nawa kwila tumukeña nehi. Muloñadi iyi ntañishilu chiyinakukokwela antu amavulu nakuyikamika tulu twakuspiritu? Iyi ntañishilu yejima yinakojeji antu kukuhwelela nawu, ‘Wunateli kwila chuma chidi chejima muloña hiyakakusompeshaku.’ Eñañi, iyi diyi ntañishilu yinakuwa antu amavulu kumatu.—Tañenu Masamu 10:4.
6 Ilaña kudi njila jikwawu munakuyuwilawu antu kumatu. Antu amakwawu ayaña kumachechi akeñaña antañishi ayilejaña nawu, ‘Hichikweti muloña nayuma yiwelañaku, Nzambi wakukeña.’ Atupristu niantañishi owaña antu kumatu kuhitila mukuyileja nawu yidika, Yawija niyifwikija yaletaña nkisu yaNzambi. Antu alejañawu elukaña wanyi nawu anakuholokela mwibuku. (Mas. 115:4-8) Ilaña neyi tukuyihindwisha kulonda ashiki hakutiya nsañu yalala yamuBayibolu, akutambwila nkisu yaWanta waNzambi.
INDI KUSHIMWINA NAKUNYAKASHANA KWATALISHA MUDIHI?
7. Tunateli kumwekesha ñahi muchima wakudikita nakunyakashana?
7 Mukwakuladika wamaana washaña muchima hamudimu windi muloña mawumi awantu adi hakatoña. Mumudimu wetu wawakwaKristu, twadikitaña nakunyakala kuhitila mukusha maana hamudimu wetu, chidi neyi kutoñojoka hakukala, hamalwihu hela hansañu yinateli kuzañalesha antu itwawanaña mwiha. Kwatukwashaña cheñi kuleka kuzata nyidimu yikwawu kulonda twendeli antu akweti mpwila yakutiya nsañu.—Rom. 1:15, 16; 1 Tim. 4:16.
8. Yumanyi yinabombeli mukushimwina nakunyakashana?
8 Kushimwina nakunyakashana kwabombela cheñi kutwamijaku yuma yalema. (Tañenu Kutachika 19:15.) Chakutalilahu, toñojokenu chimukwila neyi ayileja nawu yuma yatwalawu nakupima yinenzi, dichi ndotolu yayitambika nikuyitambika mukasanji kindi nakuyikonkomwena nindi: “Yaleyi! Yikatu yeyi yinakukeñeka kuzatilahu swayi-swayi. Neyi muhita tuhu kakweji kamu kuzatilahu nehi, wukufwa.” Himukuvumbuka lufuchi nakwidika hanji neyi mukwakujima kesi anatambikuwu kunamwekani wubanjuku. Ilaña mukutiya mukuyilejayi, kufumahu dinu himukuya kumukala nakutoñojoka hachuma chimukuzatilahu swayi.
9. Muloñadi chitukuhoshela netu Pawulu washimwinini nakunyakashana muEfwesesa?
9 Tunateli kudizila kudi Pawulu wadikitili kuhitila mukutaña nsañu yalejeliyi aeluda muEfwesesa kutalisha hamudimu wakushimwina nsañu yayiwahi muwuloñu waAsiya. (Tañenu Yililu 20:18-21.) Hadaha kufuma hefuku datachi dashikiliyi, watachikili kuhitamu kajinji hamatala hamatala nakuleja antu nsañu yayiwahi. Cheñi nawa, hadi yaaka yiyedi walondejeleña ndandanda ‘yakuhana mpanji mushikola yaTiranusa hefuku hefuku.’ (Yil. 19:1, 8-10) Eñañi, kudikita kwaPawulu kwamwekeneña muyuma yakoñeleñayi. Mutambi ‘wakudikita mudimu wetu nakunyakala’ bayi neyi hichisenda cheneni chikutuzeyeshaku. Hela chochu, twatela kutwamijaku mudimu wakushimwina muchihandilu chetu.
10. Muloñadi chitukuzañalela hakwiluka netu akwaKristu azatili nakunyakashana muyaaka 100 yinahituhu?
10 Henohu chaaka cha 1914 kanda chishiki, izanvu Dawatudizi aBayibolu datachikili mudimu wakushimwina nsañu yayiwahi, chuma cheliluwu chamwekeshaña mwatalisha kushimwina nakunyakashana. Hela chakwila adiña makombakaji antesha hohu awakwakushimwina akola, elukili nawu mpinji yinakehi nawa adikitili mudimu wakushimwina nsañu yaWanta nañovu. Adiña nansañu yayiwahi yasonekeluwu muyipapilu yansañu yayivulu nawa amwekesheleña nyivwimbimbi yawulombu yateneneñawu nawu “Photo-Drama of Creation.” Yumiyi, yayikwashili kushimwina nsañu yayiwahi kudi antu amavulu. Neyi hiyadiña namuchima wakunyakala hakushimwinaku, mutenowu hitwadi kutiya nsañu yaWantaku, netuku?—Tañenu Masamu 119:60.
BABALENU KUCHINA MWAKENDA KAZEYA
11. Yumanyi yinakojeji amakwawu kuzeya nankashi?
11 Yuma yahuwañeshaña yinateli kuluwañesha muntu kubula kutoñojoka nindi mudimu wakushimwina walema nankashi. Ituña daSatana dafwilaña kutwisha mumpompa kulonda tufwileña yuma yakumujimba niyuma yikwawu. (1 Pet. 5:8; 1 Yow. 2:15-17) Antu amakwawu atwamijiluku mudimu waYehova azeyeli chikupu. Chakutalilahu, mukwaKristu wamunkulakaji yayaaka yakusambila wejina daDemasi wadiña ‘mukwakukalakela hamu’ naPawulu, ilaña Demasi wahuwankeni nayuma yadinu ituña datama. Chatela yatwalekuhu kusha muchima hakukolesha mana kwindi wadiñi mukukala, Demasi wamutemukili Pawulu.—Fwile. 23, 24; 2 Tim. 4:10.
12. Kukoolekanyi kutukweti chayinu mpinji, nawa kukoolekanyi kutwakekala naku haya nyaka?
12 Neyi tunakukeña kutwalekahu kudikita nakunyakashana, twatela kutondolwela chaaku chakukeña kudiluñisha chikupu muchihandilu. Twatela kuzata nañovu kulonda ‘tukwatishi kuwumi, wowumi walala chikupu.’ (1 Tim. 6:18, 19) Chakadi nikujina munakuhweleli nenu wumi wahaya nyaka muchiyuulu chaWanta waNzambi hamaseki wakatwinka kukooleka kwakuzata nyidimu yayiwahi haya nyaka. Ilaña kukooleka kutukweti chayinu mpinji kwakukwasha antu kulonda akapuluki haAmagedoni kwakekalaku cheñi wanyi.
13. Chineli twekala dehi akwaKristu, chumanyi chikutukwasha kwikala atona?
13 Chineli antu amavulu mukaayi adi mutulu twakuspiritu, chumanyi chikutukwasha kwikala atona? Twatela kwanuka netu anetu nawa hampinji yimu twakamini mumwidima. Ilaña atuhidwishili, nawa Kristu watutoñekela chejeji neyi chashimwiniyi Pawulu. Ichi tukweti kukooleka kwakulejaku antu yuma yitwadiza. (Tañenu Aefwesesa 5:14.) Chahosheliyi awa mazu, Pawulu wasonekeli nindi: ‘Dichi babalenu mumukwendela. Bayi mwendaña neyi antu abula maanaku, endenu neyi akwamaana. Kwatilenu mafuku akuhita maana, muloña himwaka watama.’ (Efwes. 5:15, 16) Hela tunakushakama mudinu ituña datama, twatela ‘kwikala nampinji’ yakuzata nyidimu yikutukwasha kwikala atona kuspiritu.
TUNAKUSHAKAMA MUMPINJI YAKALA
14-16. Muloñadi chitukuswejela kushimwina nakunyakashana nsañu yaWanta makonu?
14 Mpinji yejima mudimu wawakwa Kristu awuzataña nakunyakashana, ilaña ichi twatela kuwuzata swayi-swayi. Kutachika mu 1914, yinjikijilu yashimunawu Mwizu daNzambi yinakumwekana. (Mat. 24:3-51) Antu anakushakama nawoma chikupu. Hela chakwila kwadiña kutuña yitiyañenu katataka, matuña amaneni achidi nanyitenda nzumbu yakushika ku 2,000 yinakukeña kwasawu munjita. Akwanshimbi ashimunaña nawu kakavulu nyitenda nzumbu “yinakujimbala.” Komana nyitenda nzumbu yikwawu yidi mumakasa awayilumbu? Antu ahoshaña nawu antu ejima anateli kuyijilumuna nanjita yinateli kuvulumunayi chilumbu. Bayi neyi njita diyatiyishaña antu woma hohuku.
15 Chileji chamu 2009 chashimunawu kudi The Lancet niUniversity College London chahosha nawu, “Kubalumoka kwampepela dichuma cheneni nankashi chinakuleta wubanji kudi antu.” Chahosheli nawu: “Yuma yinakufuma mukubalumoka kwampepela yikaleta kukala hadi antu amavulu muyaaka yinakwinza nawa yakasha mawumi awantu amavulu nankashi hakatoña.” Maluña amavulu akakisika nayuma yidi neyi kwinzala kwatuluñalwiji, yaña, mabaji, nyisoñu, mahurricane ninjita yinakuzuñawu hamuloña wakukeha kwamaheta. Eñañi, majita niwubanji yinakuleta wuzweñi.
16 Antu amakwawu anateli kutoñojoka nawu njita jinakwasawu kuzatisha nyitenda nzumbu jakashikija wuprofwetu wahosha “hachinjikijilu.” Ilaña antu amavulu hiyeluka mwatalisha ichi chinjikijiluku. Twatachikili dehi kumona ichi chinjikijilu, chinakumwekesha nawu mwalala Kristu wamwekana dehi nawa kukuma kwadinu ituña keña kushiki. (Mat. 24:3) Tunamoni chikupu yuma yayivulu yinakumwekesha chinjikijilu chamuwuprofwetu. Ayinu diyi mpinji yatela kuhindukawu antu mutulu twakuspiritu. Tunateli kuyihindwisha kuhitila mukuyishimwina.
17, 18. (a) Indi “mpinji” yitunakushakamamu yatukwashaña ñahi? (b) Yumanyi yikuleñela antu kuhimpa yitoñojoka yawu nakwiteja nsañu yaWanta?
17 Kunashali hohu mpinji yantesha yakumwekeshelamu netu twamukeña Yehova nikumanisha mudimu wakushimwina wutunakuzata munanu mafuku akukuminina. Mazu ahosheli Pawulu kudi akwaKristu amunkulakaji yakusambila muRoma anateli kutukwasha nikulelu akwila nawu: “Muneluki dehi mpinji yakuhinduka mutulu hiyikuya nakupandakana; muloña katataka kuhanda kwetu kunaswili dehi kwakwihi, hitwetiyili kwadiña kwakulehi.”—Rom. 13:11.
18 Yuma yashimwinuwu nawu yakamwekana mumafuku akukuminina yinateli kukojeja muntu kusha maana kuyuma yakuspiritu. Antu amakwawu ashaña maana kuyuma yakaankilañawu antu neyi amona nawu nfulumendi yawantu yinakañanyi kumanisha wuzweñi, njita yanyitenda nzumbu, madombu hela yuma yakisañana iseki. Amakwawu ashaña muchima kuyuma yakuspiritu neyi muchisaka chawu mumwekana yuma yidi neyi tunkati, kudiseña hela afwisha muntu akeñawu. Chitwaya nakushimwina, twafwilaña kukwasha antu amuchidiwu.
CHALEÑELELI ATACHIKI KUDIKITA NAÑOVU
19, 20. Indi kwiluka mpinji yitunakushakamamu kunakojeji ñahi akwaKristu amavulu kuhimpa chihandilu chawu?
19 Hamuloña wakwiluka mpinji yitunakushakamamu kunakojeji akwaKristu amavulu kudikita mudimu wakushimwina. Chakutalilahu, atwansi adisumbula akuEcuador afuukwiluhu kupelesha chihandilu chawu hanyima yakutiyilila kuprogiramu yakupompa kwadimena kwefuku dimu kwadiña mu 2006 kwahosheleña nawu “Hembenu Disu Denu Nakutala Mumu Ho-o.” Asonekeli yuma yabulileña kukeñawu, mutukweji tusatu hohu afumini mwitala datupeka twakukaama tusatu nakuya mwitala dakapeka akukama kamu hohu, alandishili yuma yikwawu nakufweta nyikudi. Hashimbwili wanyi atachikili wupayiniya wakukwasha nawa etejeli mwayilejeliyi nkoñi wañinza kuya nakuzatila kuchipompelu kwadiña kukaankila.
20 Mana kwetu wakuNorth America wasonekeli nindi: “Ami niñodami twayili kukupompa kwañinza mu 2006, henohu hahita dehi yaaka 30 kufuma hatupapatishiluwu. Hakufunta kwitala hanyima yaprogiramu, twatachikili kuhanjeka chitwatela kuzatisha kufumba kwahosheleña hakupelesha chihandilu chetu. (Mat. 6:19-22) Twadiña namatala asatu, iluña hakutuña matala, nyotoka yayiwahi, watu nimotoka mutwakamineña neyi tunakuya nakuhema. Hamuloña wakutoñojoka netu twamwekeneña neyi akwaKristu ayisupi, twafuukwiluhu kutachika mudimu wampinji yejima. Mu 2008 twatachikili kuzata hamu namwanetu wamumbanda mudimu wawupayiniya wampinji yejima. Wenowu muzañalu wutwatiyaña hakuzatila hamu nawamana kwetu! Twayili nakuzatili kwadiña kukaankila. Cheñi, tunakundami kwakwihi naYehova hamuloña wakumukalakela. Twazañalala nankashi hakumona muzañalu watiyañawu antu neyi atiya nikwiluka chalala chaMwizu daNzambi.”
21. Chumanyi chitwatela kwiluka chikutukwasha kudikita nañovu?
21 Tuneluki chuma chikukeña kumwekena adinu ituña datama, “ifuku dakusompesha nikujilumuka kwawantu asekeshaña Nzambi.” (2 Pet. 3:7) Hamuloña wakwiluka Izu daNzambi twekalaña namuchima wakushimwina neyena kwinza kwehuñu deneni niituña dadiha. Twatwalekañahu kwikala neyena deneni dakuleja antu yuma yakamwekana kumbidi. Tukumwekesha netu twamukeña Nzambi nankashi niakwetu antu neyi tuzata iwu mudimu swayi-swayi.
[Malwihu aKuzatisha haKudiza]
