Twatela Kuzañalala Nakuchiñeja Kwetu
Twatela Kuzañalala Nakuchiñeja Kwetu
‘Twachiñejaña wumi wahaya nyaka, watukaninuwu kudi Nzambi wabulaña kutwesha kutwamba, hadiñi nyaka yamunyima yejima yichidi kanda.’—TIT. 1:2.
TUHITULUKENUMU
․․․․․
Muloñadi chitukuhoshela netu mwiwulu mwekalaña muzañalu neyi wawayishewa yatwalekahu nakashinshi ndo-o nikukufwa?
․․․․․
Indi kuchiñeja kwawanyikoku acheñi kwendelaña ñahi hamu nakwawawayishewa?
․․․․․
Hakwila nawu kuchiñeja kwetu kushikijewi, yililwinyi ‘yakushakama nakujila’ ‘ninyidimu yakumwakama Nzambi’ yitwatela kumwekesha?
1. Indi kuchiñeja kwatwinkayi Yehova kwatukwashaña ñahi kuumika?
YEHOVA ‘hiNzambi wahanaña kuchiñeja.’ Dichahosheliyi kapostolu Pawulu, wabombeleluhu nindi Yehova nateli ‘kuyinka muzañalu nikuwunda kwejima mukukuhwelela kwenu, kulonda kuchiñeja kwenu kusweji ñovu yaspiritu yajila.’ (Rom. 15:13) Neyi kuchiñeja kwetu kusweja, tunateli kuumika kukala kwejima kukutumwekena, muloña nyichima yetu yinenzali namuzañalu nikuwunda. AkwaKristu amakwawu anateli kwikala nakuchiñeja kudi neyi ‘chikuñu chakwimikisha nachu watu chawumi, chalala nawa chakola’ neyi chikwetuwu akwaKristu awayishewa. (Heb. 6:18, 19) Kuchiñeja kwetu kudi neyi chuma kutwatela kukwata neyi tunaholokeli muyihuñu, chuma chikutukwasha kubula kujinoka hela kubula chikuhwelelu.—Tañenu Aheberu 2:1; 6:11.
2. Kuchiñejanyi kuyedi kukwetuwu akwaKristu makonu, nawa muloñadi “anyikoku acheñi” chakeñelawu kuchiñeja kwawawayishewa?
2 AkwaKristu anakushakama muyinu mpinji yakukuminina asha muchima hakuchiñeja kuyedi. Ashalahu ‘akamukanka kanyanya kawanyikoku’ kawakwaKristu awayishewa akweti chikuhwelelu chakutambwila wumi wakabulaña kufwa wamwiwulu, nawa akekala anyanta niatupristu hamu naKristu muWanta windi. (Luka 12:32; Chim. 5:9, 10) “Izaza deneni” nankashi ‘danyikoku yacheñi’ dikweti chikuhwelelu chakushakama haya nyaka muparadisa hamaseki nawa Wanta wawuMesiya diwakayiyuulaña. (Chim. 7:9, 10; Yow. 10:16) Anyikoku yacheñi atela kwiluka nawu hakwila akapuluki chiña atwalekahu kukwasha chikupu ‘amana kwaKristu’ awayishewa achidi hamaseki. (Mat. 25:34-40) Awayishewa akatambwila wuloku wawu ilaña kuchiñeja kwachiñejañawu anyikoku acheñi kukashikijewa. (Tañenu Aheberu 11:39, 40.) Tusambilenu kushinshika hakuchiñeja kwayinkawu awayishewa.
“KUCHIÑEJA KWAKUUMI” KWAWAKAKRISTU AWAYISHEWA
3, 4. Indi akwaKristu awayishewa ‘avwalikaña ñahi chachiha nakuchiñeja kwakuumi,’ nawa akweti kuchiñejanyi?
3 Kapostolu Petulu wasonekeleli akwaKristu awayishewa nyikanda yiyedi nawa wayiteneni nindi “atondewa.” (1 Pet. 1:1) Wahosheli nsañu yayivulu yakuchiñeja kwakuwahi kwenkawu kamukanka kanyanya kanyikoku. Mumukanda windi watachi, Petulu wasonekeli nindi: “Amukiswili Nzambi yaMwanta wetu Yesu Kristu, yowu Tata yindi watuvweli chachiha tukwati kukuchiñeja kwakuumi nakusañuka kwaYesu Kristu mudi afu, mwaya luwi lwindi lwasweja. Watuvweleli niwuswana wakatokaña, wakadi kujilola, wabulaña kujimuka, wanayiswekeluwu enu mwiwulu; enu anayihembi nañovu yaNzambi nakukuhwelela, kulonda wamwinu wukukeña kumwekeshawu hanyaka yakukuminina. Mwomu mwazañalelaña.”—1 Pet. 1:3-6.
4 Naambala yantesha yawakwaKristu atondawu kudi Yehova akayuulila hamu naKristu munfulumendi yaWanta wamwiwulu ‘avwalikaña chachiha’ kulonda ekali anyana kaNzambi atondewa naspiritu. Ayiwayishaña naspiritu yajila kulonda akekali anyanta niatupristu hamu naKristu. (Chim. 20:6) Petulu washimwini nindi ‘kuvwalika kwakuha’ kwayinkaña “kuchiñeja kwakuumi,” kwateneniyi nindi ‘hiwuswana wakatokaña, wakadi kujilola, wabulaña kujimuka’ wayiswekelawu “mwiwulu.” Iku kuchiñeja kwakuwahi ‘kwayizañaleshaña nankashi’ awayishewa akweti kuchiñeja kwakuumi. Hakwila nawu akahetelumu muniku kuchiñeja, chiña ekala ashinshika.
5, 6. Muloñadi akwaKristu awayishewa chatela kuzatilawu nañovu kulonda akatambwili wuloku wamwiwulu?
5 Mumukanda windi wamuchiyedi, Petulu walembeleli akwaKristu awayishewa nindi ‘adikwatishi nakukolesha kutambika kwayitambikiluwu nikutonda kwayitondeluwu.’ (2 Pet. 1:10) Atela kudishaku nankashi kulonda ekali nayililu yawakwaKristu yidi neyi chikuhwelelu, kumwakama Nzambi, kudikunda nikukeñañana. Petulu nindi: “Neyi yumiyi yikwikala mudenu nakuvulilamu, yikuyilekesha kwikala ankopi, hela akwakubula kusoña nyikabu.”—Tañenu 2 Petulu 1:5-8.
6 Nsañu yalejeliyi aeluda atondeluwu naspiritu muchipompelu chamuyaaka nkulakaji yakusambila chakuFwiladelifwiya muAsia Minor, Kristu asañwiluwu wahosheli nindi: ‘Chiwunahembi mazu akuumika kwami, ami nawa nakakuhemba wakabuli kumona mpinji yamba kenza nakushika mumpata yamunu mwishina yejima, yakuyeseka antu ashakama hamaseki. Nukwinza swayi; kwataku chiwudi nachu mbe, kulonda abuli kukutambula chibaaba cheyi.’ (Chim. 3:10, 11) Neyi mukwaKristu wawayishewa yaputola, hakutambwila ‘chibaaba chakulema chakalepukaña’ chakanawu atondewa ashinshikaña ndo-o nikukufwaku.—1 Pet. 5:4; Chim. 2:10.
MUWIÑILILU WAKWIÑILA MUWANTA
7. Kuchiñejanyi kwakuwahi kwashimwiniyi Yuda mumukanda windi?
7 Muchaaka cha 65 C.E., mana kwaYesu wakuwanamu Yuda wasonekeleli akwawu akwaKristu awayishewa mukanda, wayiteneni nindi “atambikewa.” (Yuda 1; esekejenu Aheberu 3:1.) Wakeñeleña kuyisonekela mukanda kushindamena hansañu yalema yawamwinu ‘yamawaninu’ yawakwaKristu atambikawu muWanta waNzambi wamwiwulu. (Yuda 3) Hela chakwila wadiña nansañu yikwawu yakeñeleña kuyilejayi, hakunkulula mukanda windi wawihi, wahosheli hakuchiñeja kwakuwahi kukwetuwu akwaKristu awayishewa, wasonekeli nindi: “Kudi yena natweshi kuyihemba mubuli kudimbuka, natweshi kuyiimika kwamwekana lubanji lwakulema kwindi, namuzañalu wasweja, chakadi himwatamina; kudi Nzambi wumu hohu, yowu Chamwinu chetu, kwokudi Yesu Kristu Mwanta wetu, kwikali kulema, niwukeleñi, niwanta, niñovu; nihelili nyaka yichidi kanda, nikatataka, nihaya nyaka.”—Yuda 24, 25.
8. Kwesekeja naYuda 24, chumanyi chinakumwekesha nawu mwiwulu mwekalaña muzañalu neyi wawayishewa namwekeshi kashinshi ndo-o nikukufwa?
8 Eña, akwaKristu awayishewa ashinshika hamuntu hamuntu atela kubabala kuchina akenda kahuwankana nakujilumuka. Kuchiñeja kukwetuwu kwashindamena haBayibolu kudi kwakwila nawu Yesu Kristu wakayisañula mudi afu, nakwimana kumesu aNzambi namuzañalu weneni munyijimba yakuspiritu yawanina. Neyi mukwaKristu wawayishewa yafwa nakashinshi, dikwila nawu ‘akamusañula namujimba waspiritu’ nawa “akamusañula nakubula kutoka . . . , nakulema.” (1 Kor. 15:42-44) ‘Neyi mwiwulu mwekalaña muzañalu weneni hakumona mukwanshidi wumu nabalumuki mumuchima,’ toñojokenu hamuzañalu watiyañawu muchipañu chamwiwulu hakumona mana kwaKristu wawayishewa naspiritu yafwa nakashinshi. (Luka 15:7) Yehova niyileñaleña yakuspiritu yashinshika akazañalela hamu nawawayishewa wunatambwili wuloku ‘namuzañalu weneni.’—Tañenu 1 Yowanu 3:2.
9. Indi awayishewa ashinshika ‘ayinkaña ñahi chikupu’ wuloku wakwiñila muWanta, nawa kuchiñeja kwamuchidiwu kwayikwashaña ñahi awayishewa achidi hamaseki?
9 Munjila yoyimu, Petulu wasonekeleli akwaKristu awayishewa nindi neyi atwalekahu kwikala ashinshika, ‘akayinka chikupu nikuyenzulwila muwiñililu wakwiñila chachiwahi muwanta wahaya nyaka, waMwanta wetu yowu Chamwinu Yesu Kristu.’ (2 Pet. 1:10, 11) ‘Akayinka chikupu’ wuloku wakwiñila mwiwulu nawa yililu yawu yawakwaKristu yakatoñeka neyi chejeji. Hakuhosha nindi ‘akayinka chikupu,’ Petulu wateneneña nkisu jajivulu jakatambwilawu ejima anomiki hakutemuka lufuchi lwakutambula wumi. Awayishewa akazañalala nankashi neyi anuka hachihandilu chawu chakashinshi. Kuchiñeja kwamuchidiwu kwayikwasha nankashi akwaKristu awayishewa achidi hamaseki ‘kudikwatisha munyichima yawu kulonda atwalekuhu kuzata nyidimu.’—1 Pet. 1:13.
‘HASHINDAMENA KUCHIÑEJA’ KWANYIKOKU YACHEÑI
10, 11. (a) Kuchiñejanyi kwatalilañawu anyikoku acheñi? (b) Indi kuchiñeja kwakushakama hamaseki kwendelaña ñahi hamu naKristu ‘nihakumwekesha anyana kaNzambi’?
10 Kapostolu Pawulu wasonekeli hakuchiñeja kwalema kukwetuwu “anyana kaNzambi” atondewa naspiritu “akuswana chimu” naKristu. Washimwini cheñi kuchiñeja kwakuwahi kwayinkawu antu amavulu anyikoku yacheñi kudi Yehova nindi: ‘Kuleña kwejima kwawantu kwachiñililaña nakudihudika chamba kamwekana anyana kaNzambi awayishewa. Muloña kuleña kwejima chikwelili kwakuhemesha, hichakudikeñelaku, chiña mwomwaya muchima wanowu wakwilili chochochu, kushindamena hakuchiñeja. Kulonda kuleña kwakweni kufumi muwuduñu wakutoka kwiñili muwaana wawanyana kaNzambi wowu waana walema.’—Rom. 8:14-21.
11 “Kuchiñeja” kwamuchidi wawantu akuheni kudi Yehova hampinji yayikaniniyi nindi wakayipulwisha kudi “kapela mukulu,” Satana Diyabolu, kuhitila ‘mulubutu’ lwachikaninu. (Chim. 12:9; Kutach. 3:15) Yesu Kristu diyi wadiña ‘lubutu’ lwatachi. (Ŋal. 3:16) Kuhitila mukufwa nikusañuka kwindi, Yesu walili chikuku chakola chakuchiñeja kwamuchidi wamuntu nawa wakayikuula kunshidi nikufwa. Iku kuchiñeja kwendelaña hamu ‘nakumwekana kwanyana kaNzambi.’ Awayishewa alemeshawu diwu adi muchibalu chamuchiyedi ‘chalubutu.’ ‘Akayimwekesha’ nawu hiyanyanta hampinji yakamukwashawu Kristu kujilumuna ituña datama daSatana. (Chim. 2:26, 27) Chumichi chakaleñela anyikoku acheñi anafumi mulukadi lweneni kupuluka.—Chim. 7:9, 10, 14.
12. Kumwekesha awayishewa kwakahetesha ñahi muchidi wamuntu?
12 ‘Yileñaleña’ yawantu yakatiya kuwaha Muchiyuulu Chayaaka Ikombakaji chaKristu. Haniyi mpinji, “anyana kaNzambi” alemeshawu akayimwekesha chikupu hampinji yakekalawu naKristu neyi atupristu, nakukwasha antu kulonda akaheteli mwifutu damuloña damulambu waYesu. Chakatachika kuyuula Wanta waNzambi hamaseki, ‘yileñaleña’ yawantu yakakulika kuwuduñu wanshidi nikufwa. Mukuhita kwampinji, antu ovwahila ‘akafuma muwuduñu wakutoka.’ Neyi akatwalekahu kumwovwahila Yehova Muyaaka Ikombakaji nihampinji yakweseka kwakukumisha kwakekala kukumana kwayaaka ikombakaji, majinawu akayisoneka ‘mumukanda wawumi’ haya nyaka. Akeñila “muwaana wawanyana kaNzambi wowu waana walema.” (Chim. 20:7, 8, 11, 12) Eñañi, iku kuchiñeja kwalema nankashi!
TWATELA KWIKALA NAMUCHIMA WAKUCHIÑEJA
13. Indi kuchiñeja kwetu kwashindamena hankahi nawa Kristu akamumwekesha mpinjinyi?
13 Nyikanda yiyedi yonenewa yasonekeliyi Petulu mudi nsañu yatela kukwasha awayishewa nianyikoku acheñi kulonda ekaleña namuchima wakuchiñeja. Walumbulwili nindi kuchiñeja kwawu hikwashindamena hanyidimu yawuku, ilaña haluwi lwaYehova lwenzala wushona. Wasonekeli nindi: ‘Babalenu nawa twamijenuku kuchiñeja kwenu chikupu haluwi lwakayiletelawu hakamwekanayi Yesu Kristu.’ (1 Pet. 1:13) Kristu akamumwekesha chakenzayi nakusomwena atumbanji twindi ashinshika nikuhana wunsompeshi waYehova wakubabesha antu atama.—Tañenu 2 Atesalonika 1:6-10.
14, 15. (a) Hakwila twikali namuchima wakuchiñeja, twatela kusha muchima hachumanyi? (b) Indi Petulu wafumbili nindidi?
14 Hakwila twikali namuchima wakuchiñeja, twatela kusha maana ‘hefuku daYehova’ dinakwinza. Dakajilumuna “mawulu” akatataka, hela netu chiyuulu chawantu, ‘niiseki’ dinakwimenaku antu atama ‘niyuma yejima’ yatama yekalamu. Petulu wasonekeli nindi: ‘Mwatela kwikala antu amuchidinyi . . . , nakutalila nakukeña nankashi chakenza ifuku daNzambi dakasuñunuka mawulu hakabutukawu kesi, dakasuñunuka yuma yejima neyena dakesi.’—2 Pet. 3:10-12.
15 “Mawulu” ‘nimaseki’ akatataka akayijilumuna nakusinsishahu “mawulu amaha [nfulumendi yaWanta waKristu] niiseki dadiha [antu akashakamaña heseki dadiha], mwakekala kuloña neyi chakaniniyi.” (2 Pet. 3:13) Petulu wayifumbili chikupu kushindamena ‘hakutalila’ hela kwikala namuchima wakuchiñeja ichi chikaninu chetuña dadiha nindi: “Dichi enu akwetu twakeña chimwatalilaña yumiyi, dikwatishenu kulonda akayiwani munashakami chachiwahi zo-o, chakadi ihuji, nakubula hakuyinkela muloña kumesu indi.”—2 Pet. 3:14.
TWATELA KWENDELA HAMU NAKUCHIÑEJA KWETU
16, 17. (a) Yililwinyi ‘yakushakama nakujila’ ‘ninyidimu yakumwakama Nzambi’ yitwatela kumwekesha? (b) Indi yuma yitwachiñejaña yakashikijewa ñahi?
16 Twatela kwikala namuchima wakuchiñeja nikwila yuma yendelaña hamu nakuchiñeja kwetu. Twatela kutoñojoka hawuntu wetu chiwudi kuspiritu. Mazu akwila nawu ‘kushakama nakujila’ atalisha ‘mukushakama chalumbuluka mukachi kawakamatuña,’ kuhitila mukwikala nayililu yayiwahi. (2 Pet. 3:11; 1 Pet. 2:12) Twatela ‘kukeñañana.’ Dikwila nawu twatela kuzata nañovu kulonda twikali anuñañana nawamana kwetu mukaayi kejima kushilahu niamana kwetu amuchipompelu chetu. (Yow. 13:35) ‘Nyidimu yakumwakama Nzambi’ hinyidimu yamwekeshaña nawu tukweti wubwambu wawuwahi naYehova. Dikwila nawu twatela kulomba chakufuma hamuchima, kushilahu nikutaña Bayibolu hefuku hefuku, kutonkamenamu chikupu mukudiza, kudifukula kwachisaka nikushimwina chikupu ‘nsañu yayiwahi yaWanta.’—Mat. 24:14.
17 Wonsu wetu twatela kwikala nayililu yayiwahi yamuzañaleshaña Yehova nawa wakatupulwisha hampinji ‘yakasuñunuka’ adinu ituña datama. Neyi twikala antu amuchidiwu, kuchiñeja kwetu kwakashikijewa, ‘kuchiñeja wumi wahaya nyaka, watukaninuwu kudi Nzambi wabulaña kutwamba, hadiñi nyaka yamunyima yejima yichidi kanda.’—Tit. 1:2.
[Malwihu aKuzatisha haKudiza]
[Mwevulu wudi hefu 22]
AkwaKristu awayishewa ‘avwalikaña chachiha nakuchiñeja kwakuumi’
[Mwevulu wudi hefu 24]
Ikalenu nakuchiñeja kwakuumi muchisaka chenu
