Mukuhwelelenu Yehova Namuchima Wejima
Mukuhwelelenu Yehova Namuchima Wejima
“Eyi mwanami . . . ilukaku Nzambi yatata yeyi wumukalakeli namuchima walala chikupu.”—1 KUSHI. 28:9.
WANENU ÑAKWILU YANAWA MALWIHU:
․․․․․
Indi muchima wachifwikija hichumanyi?
․․․․․
Njilanyi yitwatela kuzatisha hakweseka muchima wetu?
․․․․․
Tunateli kumukuhwelela ñahi Yehova namuchima wejima?
1, 2. (a) Chiidinyi chamujimba chavula kutenawu muchifwikija Mwizu daNzambi? (b) Muloñadi chitwatela kwilukila mwatalisha izu dachifwikija damuchima?
IZU DANZAMBI davula kutena yiidi yamujimba wamuntu muchifwikija. Chakutalilahu, nkakulula Yoba wahosheli nindi: ‘Kumakasami hikudi ndombuku.’ Mwanta Solomoni niyena wahosheli nindi: ‘Nsañu yayiwahi yaleteshaña manji mumafwaha.’ Yehova wamulejeli Ezekeli nindi: ‘Hehama deyi nakoleshuhu dehi neyi . . . ilola kukola.’ Kapostolu Pawulu niyena amulejeli nawu: ‘Wunaleti nsañu yacheñi kumatu etu.’—Yoba 16:17; Yish. 15:30; Ezek. 3:9; Yil. 17:20.
2 Kudi chiidi chimu chamujimba chatenawu muBayibolu muchifwikija kubadika yiidi yikwawu. Dichateneniyi Hana washinshika hampinji yalombeliyi nindi: ‘Muchima wami hiwukuluña naYehova.’ (1 Sam. 2:1) Ansoneki aBayibolu atena izu damuchima kwakwihi nekombakaji munjila yachifwikija. Dichi twatela kwiluka mwatalisha izu dakwila nawu muchima muloña Bayibolu yahosha nawu twatela kuhemba muchima wetu.—Tañenu Yishimu 4:23.
INDI MUCHIMA WACHIFWIKIJA HICHUMANYI?
3. Tunateli kwiluka ñahi mwatalisha izu dakwila nawu “muchima” dasonekawu muBayibolu? Hanenu chakutalilahu.
3 Hela chakwila Izu daNzambi hidashimuna jiika mwatalisha izu dakwila nawu ‘muchimaku,’ ilaña datwinkaña kashinshi kakwiluka mudatalisha. Munjilanyi? Chakutalilahu, toñojokenu hamwevulu wawuwahi wakutuña chiwahi natumalola twatuvulu twanyanya tunasokankeshuwu hamu. Hakwila twiluki chinawutuñuwu, twatela kuswila hanyima kulonda tumoni chiwahi chinakumwekana mwevulu wejima. Munjila yoyimu, twatela kushinshika hansona jejima hasonekawu izu dakwila nawu “muchima” muBayibolu kulonda twiluki mudatalisha. Hanu dinu, muchima wachifwikija hichumanyi?
4. (a) Indi “muchima” wemenañaku chumanyi? (b) Indi mazu aYesu asonekawu haMatewu 22:37 atalisha mudihi?
4 Ansoneki aBayibolu azatishaña “muchima” hakutena muntu wejima wamukachi. Muntu wetu wamukachi wukweti yililu yidi neyi yuma yitwafwilaña, yitoñojoka, wuntu, yililu, wuswa, yuma yatusañumunaña niyikonkwanyi. (Tañenu Kuhituluka 15:7; Yishimu 16:9; Yililu 2:26.) Kwesekeja nachahosheli mukanda wumu, muchima “himuntu wejima wekala mukachi.” Mpinji jikwawu, izu dakwila nawu “muchima” hiyadilumbulula muniyi njilaku. Chakutalilahu, Yesu nindi: “Keñaku Yehova Nzambi yeyi namuchima weyi wejima, nawumi weyi wejima, namaaneyi ejima.” (Mat. 22:37) Haniyi nsona, “muchima” wemenañaku woma hela muzañalu watiyañayi muntu, mpwila, hela yitoñojoka yamuntu wamukachi. Yesu wambwili hakutena muchima, wumi nimaana kulonda yakonkomweni nindi twatela kumukeña Nzambi nayililu yetu nichitwahandaña nimuyuma yitwatoñojokaña. (Yow. 17:3; Efwes. 6:6) Ilaña neyi “muchima” anawuteni nkawawu, wemenañaku muntu wejima wamukachi.
CHITWATELA KUHEMBELA MUCHIMA WETU
5. Muloñadi chitwatela kudishaku hakumuzatila Yehova namuchima wejima?
5 Mwanta Davidi wamwanukishili Solomoni hansañu yamuchima nindi: “Eyi mwanami Solomoni, ilukaku Nzambi yatata yeyi, wumukalakeli namuchima walala chikupu, nayitoñojoka yakwovwahilamu; muloña Yehova washinshikaña nyichima yejima, welukaña yafuukulaña yitoñojoka yejima.” (1 Kushi. 28:9) Eña, Yehova diyi Wesekaña nyichima yonsu, ninyichima yetu. (Yish. 17:3; 21:2) Yuma yawanañayi munyichima yetu yinateli kukwasha hela kuluwañesha wubwambu wetu nayena nihayuma yakatumwekena kumbidi. Dichi twatela kulondela kufumba kwaDavidi kwonenewa kuhitila mukudishaku hakumuzatila Yehova namuchima wejima.
6. Chumanyi chitwatela kwanuka hansañu yakumukalakela Yehova chikupu?
6 Etu ambuña Yehova neyi tukudikitaña chikupu tukumwekesha nawu tudi nampwila yeneni yakumuzatila Nzambi namuchima wejima. Cheñi nawa, twatela kwanuka netu ituña datama daSatana ninshidi yitwavwalika nayu hiyuma yatukwataña kunyendu nawa yinateli kutukañesha kumukalakela Nzambi namuchima wumu. (Yere. 17:9; Efwes. 2:2) Hakwila twiluki netu tuchidi kumukalakela Nzambi nañovu, chakadi kufunta hanyima, twatela kudishinshika mumuchima wetu mpinji yejima. Tunateli kudishinshika ñahi?
7. Chumanyi chamwekeshaña jidi mumuchima wetu?
7 Wuntu wetu wamukachi hiwamwekanañaku, neyi chochitwabulaña kumona muchima wamutondu. Hela chochu, neyi chochahosheliyi Yesu muMpanji yahaMpidi nindi, chochamwekeshaña nyikabu kuwaha hela kutama kwamutondu, niyililu yetu yamwekeshaña muchima wetu chiwudi. (Mat. 7:17-20) Tusambilenu kutala hachuma chimu chamwekanaña.
NJILA YIMU YAKWILUKILAMU MUCHIMA WETU
8. Indi mazu aYesu asonekawu haMatewu 6:33 atukwashaña ñahi kwiluka jidi mumuchima wetu?
8 Hakusambila, mumpanji yoyimu, Yesu walejeli antiyilili indi yuma yateleli kwilawu yadi kumwekesha nawu adiña nampwila yakuzatila Yehova namuchima wejima. Wahosheli nindi: ‘Sambilenu kukeña wanta windi nikuloña kwindi, niyuma yejimiyi akayishilaku.’ (Mat. 6:33) Eñañi, yuma yitwalemeshaña muchihandilu chetu, yamwekeshaña yuma yitwafwilaña, yitwatoñojokaña nawa yitwafuukulaña mumuchima wetu. Dichi twatela kushinshika hayuma yitwalemesha muchihandilu chetu nawa diyi njila yayiwahi yakwilukilamu neyi chakwila tunakumuzatila Nzambi namuchima wejima hela nehi.
9. Indi Yesu wayilejeli nindidi amayala awaniniyi, nawa kwakula kwawu kwamwekeshelidi?
9 Hashimbwili wanyi kufuma hayilejeliyi Yesu atumbanji twindi ‘kusambila kukeña wanta,’ kudi chuma chamwekeni chamwekesheli nawu yuma yalemeshayi muntu yamwekeshaña chidi muchima windi. Nsoneki Wansañu Yayiwahi Luka watachikili kushimuna chuma chamwekeni kuhitila mukuhosha nindi Yesu ‘washili mesu indi nañovu munjila yakuya kuYerusalema’ hela chakwila welukili chuma chakamumwekena. Chayileñayi nawapostolu indi “munjila,” Yesu waweni amayala nawa wayilili nindi: ‘Inzenu mwikali atumbanji twami.’ Awa amayala etejeli kumulonda Yesu, neyi yayiteja kwila chuma chimu. Iyala wumu hakwakula nindi: ‘Nleki nisambili kuya nakajiiki tata yami.’ Mukwawu nindi: ‘Mwanta, nukukulonda; nleki nisambili kuya nakushika akwetala dami.’ (Luka 9:51, 57-61) Hadiña chaambu cheneni hakudihana kwaYesu kwakuzata namuchima wejima kubadika ana amayala aleyeli. Hakutwamijaku yalemesheluwu nakusha yuma yaWanta hanyima, amwekesheli nawu hiyamukuhweleleli Nzambi namuchima wejimaku.
10. (a) Indi atumbanji twaKristu eleña ñahi namutambi waYesu? (b) Chishimwinyi chachihi chatiliyi Yesu?
10 Kwambukaku nawantu akeñeleña kwikala atumbanji, etu tuneteji mutambi waYesu wakwikala atumbanji twindi nawa tunakumuzatila Yehova hefuku hefuku. Kwila mwenimu, chamwekeshaña chitwamukeña Yehova. Hela chakwila, tunakudikita muchipompelu, twatela kwiluka wubanji wunateli kwiñila mumuchima wetu. Hiwubanjinyi? Mumpanji yahanjikileñayi nawantu akeñeleña kwikala atumbanji, Yesu washimwini iwu wubanji nindi: “Muntu wukwila nakwati dehi kwitemwa hakutala munyima, hanateli wanta waNzambuku.” (Luka 9:62) Chumanyi chitukudizila kunichi chishimu?
KOMANA ‘TWAKAKELAÑA KUYUMA YAYIWAHI’?
11. Chumanyi chamwekeni kumudimu wandimi muchishimu chaYesu nawa muloñadi?
11 Hakwila twiluki chikupu yuma yitwatela kudizila kuchishimu chaYesu chachihi, tubombelenuhu nsañu yikwawu. Ndimi nashi muchima hakudima. Hampinji yinakudimayi, wukutwalekahu kutoñojoka nindi neyi wadiña kwitala wadi kwikala nachisaka chindi, nawamabwambu jindi nikudya, kutiyilila kutumina, nakuseha nikunooka muwulelu. Wukutachika kutoñojoka jakufunta. Chadimaku mukaba weneni, ndimi wukutachika kutoñojoka chikupu hayuma yashiyayi kwitala nawa wukubalumuka ‘nakutala yuma yakunyima.’ Hela chakwila watela kuzata nañovu henohu kanda yamanishi chituunta, iwu ndimi wukukañanya kumanisha mudimu windi. Nkaka yindi chenzayi wukuneña hakumona wukopi wandimi yindi.
12. Indi mukwaKristu makonu nateli kwikala ñahi neyi ndimi wamuchishimu chaYesu?
12 Ichi dinu tutalenu hachuma chamuchidiwu chinakumwekana makonu. Ndimi nakwimenaku mukwaKristu wejima wunakumwekana neyi nakudishaku ilaña wudi muwubanji wakuspiritu. Hakwila tutiyi chikupu, tufwikijenu mana kwetu wadikitaña nankashi mumudimu wakushimwina. Hela chakwila, wapompaña nikushimwina, ilaña washa maanindi hayuma yakwituña yamutiyishaña kuwaha. Wayifwilaña chikupu mumuchima windi. Mukuhita kwampinji, hanyima yakushimwina hadi yaaka yayivulu, mpwila yakufwila yuma yadinu ituña hiyikusweja kutanda mumuchima windi chakwila hakubalumuka nakutala ‘hayuma yakunyima.’ Hela chakwila mudimu wakushimwina wuchidi, yena kwindi ‘hanakukwatisha kumazu awumuku,’ nawa hakuleka kuzata nyidimu yakuspirituku. (Fwi. 2:16) Yehova, ‘Mwanta wakwañula,’ waneñaña neyi tubula kuumika.—Luka 10:2.
13. Yumanyi yitwatela kwila kulonda tumuzatili Yehova namuchima wejima?
13 Tunadiziluku yuma yayivulu. Chikuwaha neyi tukwikala namuchima wakuzataku nyidimu yayiwahi nawa yakuzañalesha yidi neyi kuya nakupompa nikuya mwiha. Ilaña kudi yuma yayivulu yakeñekaña hakwila tumukalakeli Yehova namuchima wejima. (2 Kushi. 25:1, 2, 27) Neyi mukwaKristu wudi nantuya yakukeña ‘yuma yakunyima,’ chidi neyi yuma yikwawu yamudinu ituña, wudi dehi muwubanji wakuluwañesha wubwambu windi naNzambi. (Luka 17:32) ‘Tunateli kwiñila muwanta waNzambi’ hohu neyi ‘tutiya kutama nayuma yatama nakukakela kuyuma yayiwahi.’ (Rom. 12:9; Luka 9:62) Wonsu wetu twatela kwanuka netu kwosi chuma chidi chejima mwituña daSatana, hela chinakumwekana neyi chatela kutukwasha hela chachiwahi, kanda chitukañesha kuzata nyidimu yaWanta namuchima wetu wejimaku.—2 Kor. 11:14; tañenu Afwilipi 3:13, 14.
IKALENU ASOÑAMA
14, 15. (a) Indi Satana nakufwila ñahi kuhuñumuna nyichima yetu? (b) Hanenu chakutalilahu chinakumwekesha nawu njila yazatishañayi Satana yafwana.
14 Kumukeña Yehova kwatusañumwini kulonda tudihani kudi yena. Kufuma hampinji yitwadihanini, etu amavulu tudi namuchima wakutwalekahu kumuzatila Yehova namuchima wejima. Hela chochu, Satana niyena nakupindashana. Nakufwila kuluwañesha nyichima yetu. (Efwes. 6:12) Hadaha, neluki nindi hitunateli kumuumba Yehova swayuku. Wazatishaña ‘mpata yamakonu’ mukubabala kulonda tubuleña kwikala nampwila yakumuzatila Nzambi chovu-chovu. (Tañenu Maku 4:18, 19.) Muloñadi chitukuhoshela netu iyi njila yamukwashaña Satana?
15 Hakwila twakuli ilu lwihu, fwikijenu mudi na 50kg yawuña mwitala, ilaña mukuhita kwamafuku wumana nikumana. Chineli muneluki nenu wuña wunamani, muya ninakulanda mufuku wacheñi. Mwikala cheñi ninawuña. Kwila nimelela, ayeta nilwiku mwivumu. Hela chochu, kwinza niikombi nakutapulamu chikasa chimu chawuña. Munateli kwiluka nenu anatapulumu? Hadaha mukwiluka wanyi. Indi neyi ifuku dikwawu yatapulamu makasa ayedi? Hadaha mukwiluka cheñi wanyi. Muloñadi? Muloña anakuzomonamu wantesha chakadi enu kwiluka. Munjila yoyimu, yuma yaluwañeshaña yamwituña daSatana yafwomonaña iyena ditukweti chovu-chovu. Neyi Satana yafwomona iyena detu, chidi neyi natwimiki mushindu kuhitila mukuzomonamu wuña wantesha mumufuku nakufwomona iyena detu dakumuzatila Yehova namuchima wejima. Neyi kusoñama nehi, mukwaKristu hakutwesha kumona chaambuku.—Mat. 24:42; 1 Pet. 5:8.
KULOMBA KUNATELI KUTUKWASHA
16. Tunateli kudikiña ñahi natufuta twaSatana?
16 Tunateli kudikiña ñahi natufuta twaSatana kulonda tumukuhweleli Yehova namuchima wejima? (2 Kor. 2:11) Kulomba kunateli kutukwasha. Pawulu wakolesheli akwawu akakwitiya nindi ‘adikañi namaana aDiyabolu akudimbana.’ Kuhiñahu wayikonkomweneni nindi: “Lombenuña . . . , mafuku ejima, nikulomba nikulembelela kwejima.”—Efwes. 6:11, 18; 1 Pet. 4:7.
17. Yumanyi yitwadizilaña kukulomba kwaYesu?
17 Hakwila tudikañi namaana aSatana, twatela kwimbujola chakutalilahu chaYesu chakulomba, chamwekesheli nawu wamukuhweleleli Yehova namuchima wejima. Chakutalilahu, talenu chasonekeliyi Luka kutalisha hakulomba kwaYesu nampinji yawufuku henohu kanda yafwi: “Hakulwisha nankashi, hakusweja kulomba.” (Luka 22:44) Yesu waswejeleña kulomba, ilaña haniyi mpinji yaholokeleliyi mukweseka kweneni, ‘waswejeli kulomba’ nankashi nawa Nzambi wakwili kulomba kwindi. Chuma cheliliyi Yesu chamwekeshaña nawu kudi mpinji yitunateli kulomba nankashi. Dichi, neyi tuholokela mukweseka kweneni nitufuta twaSatana twaswejaña, diyi mpinji yitwatela ‘kusweja’ kulomba kudi Yehova kulonda yatukiñi.
18. (a) Yumanyi yitwatela kudihula hansañu yakulomba nawa muloñadi? (b) Yumanyi yinateli kukwasha muchima wetu? (Talenu chikasha chidi hefu 16.)
18 Indi kulomba kwamuchidiwu kwatukwashaña ñahi? Pawulu nindi: ‘Mulejenu Nzambi yuma yejima yimunakeñi nakulomba, nakulembelela, nakusakilila. Kuwunda kwaNzambi kwabadika maana ejima kwakahemba nyichima yenu.’ (Fwi. 4:6, 7) Eñañi, hakwila nawu tumukuhweleli Yehova namuchima wejima, twatela kulomba nankashi mpinji yejima. (Luka 6:12) Dihulenu nenu, ‘Komana naswejaña kulomba mpinji yejima’? (Mat. 7:7; Rom. 12:12) Ñakwilu yenu yikumwekesha mpwila yimukweti yakumukalakela Nzambi namuchima wejima.
19. Chumanyi chimwatela kwila kulonda mumukuhweleli Yehova namuchima wejima?
19 Neyi chitunahanjeki, yuma yitwalemesha yinateli kutuleja yuma yalumbama mumuchima wetu. Bayi twiteja yuma yitwashiya kunyima hela tufuta twaSatana tutukañeshi kumukalakela Yehova namuchima wejimaku. (Tañenu Luka 21:19, 34-36.) Kufwana Davidi, twatwalekañahu kumulembelela Yehova kulonda ‘yatwinki muchima wumu.’—Mas. 86:11.
[Malwihu aKuzatisha haKudiza]
[Chikasha chidi hefu 16]
YUMA YISATU YAKWASHAÑA MUCHIMA WETU
Neyi chochitwafwilaña kukiña muchima wetu, kudi njila jitwatela kulondela jikutukwasha kukiña muchima wetu wachifwikija. Tushinshikenu hayuma yisatu yalema:
1 Kudya chiwahi: Kudya chiwahi kwakwashaña muchima wetu kubula yikatu. Munjila yoyimu, twatela kwiluka netu tunakudya yakudya yashikila yakuspiritu kuhitila mukudiza nkawetu, kutoñojoka chikupu hayuma yitunadizi nikuya nakupompa.—Mas. 1:1, 2; Yish. 15:28; Heb. 10:24, 25.
2 Kwovwahisha mujimba: Hakwila nawu twikali akola kumujimba, mpinji jikwawu, muchima wetu chiña wetaña nañovu. Munjila yoyimu, kudikita chikupu kuhitila mukushimwina nankashi kwakwashaña muchima wetu wachifwikija kuzata chiwahi.—Luka 13:24; Fwi. 3:12.
3 Iluña: Nyidimu yitwazataña nikushakama nawantu abula kumwakama Nzambi kwakojejaña muchima wetu wachifwikija kwikala mukukala kweneni. Hela chochu, tunateli kumanisha iku kukala kuhitila mukudikunda nawakwetu akwakwitiya, atwakamenaña namuchima wumu nawa amukuhwelela Nzambi chikupu.—Mas. 119:63; Yish. 13:20.
