Munakwanuka?

Komana mwatañili nakanañachima yibaaba yakatataka yaKaposhi Kakutalila? Talenu neyi mukutwesha kwakula awa malwihu:

Chumanyi chitukudizila kuchakutalilahu chaSolomoni chakusoñamisha?

Nzambi wamukiswilili Mwanta Solomoni nawa wamuzatishili. Solomoni walekeli kulondela nshimbi jaNzambi muchiyuulu chindi. Wasumbwili mwana kaFwaro musenji, kuhiñahu wasumbwili ambanda amavulu, nawa wetejeli ambanda asenji kumuhuñumuna nakutachika kudifukula kwakutwamba. Twatela kubabala kuchina twakenda kekala nayililu hela yaaku yatama. (Kuhit. 7:1-4; 17:17; 1 Anya. 11:4-8)—12/15, mafu 10-12.

Muloñadi chitwatela kwovwahila nshimbi jamuBayibolu?

Antu ovwahilaña nshimbi jamuBayibolu ekalaña nachinleji chitooka nawa chisaka chawu chakolaña. (Mas. 19:8, 11) Hakwila antu adiwulaña nshimbi jamuBayibolu amonaña yinzeñeli.—1/1, mafu 8, 9.

Muloñadi akwaKristu chayipapatishilañawu nawa muntu nateli kwila ñahi hakwila nawu yapapatishewi?

Kupapatishewa kwaleñelaña akwaKristu kwikala nawubwambu wawuwahi naNzambi. (1 Pet. 3:21) Mukulomba kwakanka wetu, twadihanaña kudi Yehova nawa twamukanaña kwila mwaya kukeña kwindi muchihandilu chetu chejima. Hanyima yakudihana kwakanka wetu mukulomba, twadihanaña hatooka kuhitila mukupapatishewa.—4/1, mafu 16, 17.

Muloñadi chitukuhoshela netu kufuma muyaaka nkulakaji yakusambila nakutwalekahu hanu hamaseki hekalaña akwaKristu alala awayishewa?

Muchishimu chaYesu chahosha ‘hatidiku’ ‘nimatahu,’ “mbutu yayiwahi” yemeneneñaku “anyana kawanta.” (Mat. 13:24-30, 38) Matahu akulilili hamu natidiku nakushika nimpinji yakumuna. Hela chakwila hitukutwesha kwiluka antu amakwawu emeneneñaku izanvu datidikuku, ilaña tuneluki netu nikulelu adi kwoku.—1/15, ifu 7.

Hinyi watemesheli “katumbwa” kalombweli akwamaana?

Wadiña muntu wakeñeleña nankashi nindi Yesu amujahi dikwila nawu Satana Diyabolu. Satana wakeñaña kutiyakesha kutwamba, madombu nikujahañana. Dihafumini Yesu hakumutena nindi ‘sakutwamba nawa tata yantwambi,’ nawa “wadiña mbanji kufumisha kutachi.” (Yow. 8:44)—4/1 ifu 29.

Yumanyi yikutukwasha kutondolwela chaaku chakwikala nechima?

Iyi diyuma yinateli kutukwasha: Twatela kwikala namuchima wakukeña nikukeña amana kwetu, kudikunda nawamana kwetu, nikufwila kwila yuma yayiwahi, ‘nikuzañalala nawakwakuzañalala.’ (Rom. 12:15)—2/15, mafu 16-17.

Indi Anasi atenawu muNsañu Yayiwahi hampinji yamusompesheleñawu Yesu hinyi?

Hampinji yamwesekeleñawu Yesu, Anasi amuteneni nawu ‘kapristu muneni.’ (Luka 3:2) Wakalakeli mudimu wawukapristu muneni kutachika mu 6 hela 7 C.E. ndo-o nikwakwihi na 15 C.E., hamulekesheluwu mudimu weniwu nawa watwalekeluhu kuya mpuhu chikupu muIsarela.—4/1 ifu 9.

Neyi tunakufumba muntu, nshimbinyi jitwatela kwanuka?

Ilukenu kukala kwakweni. Bayi mulusuka hakwakulaku. Dizozenu kuhitila mukuzatisha Izu daNzambi. Neyi chinatwesheki zatishenu nyikanda yanduñu wamaana nikashinshi. Bayi mufuukwilaña akwenuku.—3/15, mafu 7-9.

Yesu walejeli antiyilili indi nindi ayi jikilomita jiyedi. (Mat. 5:41) Komana watalishili mudihi?

Hayina mpinji muIsarela, Aroma ayuulileña muIsarela akanjikijileña antu kuyizatila nyidimu. Dichi Yesu chakonkomweneniyi antiyilili jindi nindi ayi jikilomita jiyedi, wayilejeleña nindi azateña nyidimu yamuchidiwu yayinkeleñawu akwanfulumendi chakubula kuhila.—4/1, ifu 9.