‘Mwana Neteji Kumumwekesha Tata Yindi’
‘Mwana Neteji Kumumwekesha Tata Yindi’
“Hikwekala nawa wamwiluka Tataku, amwiluka kudi Mwana hohu, nimuntu anetejiyi Mwana kumumwekeshelayi.”—LUKA 10:22.
MUKWAKULA NENUDI?
․․․․․
Muloñadi chitukuhoshela netu Yesu diyi hohu wateleleli kumumwekesha Tata yindi?
․․․․․
Indi Yesu wamumwekesheli ñahi Tata yindi kudi antu?
․․․․․
Munateli kumwimbujola ñahi Yesu hakumumwekesha Tata yenu kudi antu?
1, 2. Lwihwinyi lwayikalilaña antu amavulu nawa muloñadi?
‘INDI Nzambi hinyi?’ Ilu lwihu lwayikalilaña antu amavulu. Chakutalilahu, hela chakwila akwaKristu amavulu eluka nawu Nzambi wekala Musatu, antu amavulu chayikalilaña kwiteja ntañishilu yamuchidiwu. Nsoneki wumu nawa mukulumpi wansakililu wahosheli nindi: “Iyi ntañishilu yayikalila nankashi antu. Muloña kudi yuma yikwawu yakañanyaña kwilukawu antu.” Cheñi nawa, antu akuhwelela nawu yuma yadinjilili yayeni ahoshaña nawu Nzambi kwosi. Ahoshaña nawu yileñaleña yayiwahi yejima yasefukili hohu. Hela chochu, chatela yakaani nindi Nzambi kwosi, Charles Darwin wahosheli nindi: “Antu hiyakweti wuswa wakwiluka chikupu yuma yejima yahoshaña hadi Nzambuku.”
2 Hela chakwila akuhwelela yuma yashiyashana, antu amavulu ehulaña nawu kwiji dinu Nzambi wekala kwoku indi kwiji. Chakañanyawu kuwana ñakwilu yalala, amavulu alekaña kwihujola malwihu atela kuyikwashaku kumwiluka Nzambi. Eñañi, Satana “naputishi mesu ayitoñojoka yawantu abula kwitiya.” (2 Kor. 4:4) Dihanafumi antu amavulu kushala muwufuku wakubula kumwiluka Tata, Nleñi wayuma yejima!—Isa. 45:18.
3. (a) Hinyi watumwekeshela Nleñi? (b) Tukuhanjeka hamalwihwinyi?
3 Hela chochu, antu atela kumwiluka Nzambi. Muloñadi? Muloña antu atambikaña ‘hejina daYehova’ diwu akahanda. (Rom. 10:13) Hakwila nawu muntu yatambiki hejina daNzambi, chiña yeluka nindi Yehova Himuntu. Yesu Kristu wayilejeli atumbanji twindi iyi nsañu yalema. Wayimwekesheleli Tata yindi. (Tañenu Luka 10:22.) Muloñadi Yesu chatwesheleliyi kumumwekesha Tata kubadika antu ejima? Indi Yesu wamumwekesheli ñahi? Nawa tunateli kumwimbujola ñahi Yesu hakumumwekesha Tata yetu kudi antu? Tuhanjekenu hanawa malwihu.
YESU KRISTU DIYI HOHU WATELA KUMUMWEKESHA
4, 5. Muloñadi chitukuhoshela netu Yesu hohu diyi watela kumumwekesha Tata yindi?
4 Yesu diyi hohu wateleleli kumumwekesha Tata yindi. Muloñadi? Muloña henohu yuma yejima yikweti wumi kanda ayileñi, Yesu, chileñaleña chakuspiritu wadiña mwiwulu neyi “Mwana kaNzambi wumu hohu.” (Yow. 1:14; 3:18) Wadiña nachifulu cheneni nankashi. Henohu yileñaleña yikwawu kanda ayileñi, iwu Mwana amukeñeli nankashi kudi Tata yindi, wamwilukili nawa welukili yililu Yindi. A Tata yawantu naMwanindi atela atiyañeneña nankashi nawa hamuloña wakushakama hamu hadi yaaka yayivulu adikeñeli nankashi. (Yow. 5:20; 14:31) Iwu Mwana welukili chikupu yililu yaTata yindi!—Tañenu Akolose 1:15-17.
5 Tata yawantu wamwinkeli Mwana chifulu chakwikala mukwakumuhoshelaku, hela netu “Izu daNzambi.” (Chim. 19:13) Dichi Yesu hohu diyi wateleleli kumumwekesha Tata yindi kudi antu. Dihafumini nsoneki waNsañu Yayiwahi Yowanu kumulumbulula Yesu, “Izu,” nindi diyi “wekala muntulu yaTata.” (Yow. 1:1, 18) Awa mazu azatishiliyi, anakumwekesha nawu Yowanu wanukili kashidikilu kazatishileñawu antu hayina mpinji hakudya. Mwenyi washakamineña hamu namukwawu mwenyi muchitwamu chimu. Neyi ashakama hamu akutachika kuhanjeka. Mwana niyena hakwikala “muntulu yaTata yindi,” wahanjekeleña chikupu naTata yindi.
6, 7. Indi wubwambu wadiña hadi Tata yawantu naMwanindi watwalekeluhu ñahi?
6 Wubwambu wadiña hakachi kaTata yawantu naMwanindi watwalekeluhu. Mwana wekalili ‘mukalawenu waNzambi wamutiyishilaña kuwaha hefuku hefuku.’ (Tañenu Yishimu 8:22, 23, 30, 31.) Dichi twatela kuhosha netu wubwambu wawu wakoleli muloña azatilileña hamu nawa haniyi mpinji Mwana wembujolileña yililu yaTata yindi. Chaleñeluwu yileñaleña yikwawu yikweti maana, Mwana wamumweni Yehova chakameneneñayi yileñaleña yejima nawa waswejeli kwimbujola yililu yaNzambi.
7 Nihampinji yajinokeliyi Satana wuswa waYehova wakuyuula, Mwana wadizili chamwekeshañayi Yehova kukeña, wuñanji, maana niñovu hampinji yamweniyi kukala. Chakadi nikujina, chumichi chamukwashiluku Yesu kuumika yihuñu yamweniyi mumudimu windi wakushimwina hamaseki.—Yow. 5:19.
8. Indi Nsañu Yayiwahi yatukwashaña ñahi kwiluka yililu yaTata?
8 Hamuloña wakusweja kudikunda naYehova, Mwana wamulumbulwili Tata yindi chiwahi kubadika antu ejima. Kwosi muntu wadi kutukwasha kumwiluka Tata yindi kubadika kushinshika hayuma yatañishiliyi niyakoñeliyi Mwana weyala wavwalika kankawindi, netuku? Chakutalilahu, toñojokenu chichadi kutukalila kwiluka mwatalisha izu “dakukeña” neyi tuditaña hohu mudikishonali. Ilaña, neyi tutoñojoka hansañu yayiwahi yasonekeluwu kudi ansoneki aNsañu Yayiwahi yahosha hamudimu waYesu nichahembeleñayi antu, tunateli kwiluka nankashi mwatalisha mazu akwila nawu “Nzambi diyi kukeña.” (1 Yow. 4:8, 16) Kwatukwashaña cheñi kwiluka yililu yaNzambi yikwawu yamwekesheliyi Yesu kudi atumbanji twindi hampinji yadiñayi hamaseki.
YESU CHAMUMWEKESHELIYI TATA YINDI
9. (a) Munjilanyi jiyedi mwamumwekesheleliyi Yesu Tata yindi? (b) Shimunenu chakutalilahu chinakumwekesha nawu Yesu wamumwekesheli Tata yindi kuhitila muntañishilu yindi.
9 Indi Yesu wamumwekesheli ñahi Tata yindi kudi atumbanji twindi nikudi antu amakwawu akekala atumbanji kumbidi? Wamumwekesheli munjila jiyedi: kuhitila muntañishilu nimuyililu yindi. Tusambilenu kushinshika hantañishilu yaYesu. Yuma yatañishileñayi Yesu atumbanji twindi yamwekesheli chikupu nawu welukili maana aTata yindi niyitoñojoka ninjila jindi. Chakutalilahu, Yesu wamufwanishili Tata yindi namuntu wukweti anyikoku wayaña nakukeñakeña mukoku wumu wunajimbali. Yesu wahosheli nindi neyi mwini mukoku yawana mukoku wajimbala, “wukuzañalala namukoku owu chakubadika awa makumi atanu nawana natanu nawana abulili kupwapuka.” Indi ichi chishimu chatalishili mudihi? Yesu walumbulwili nindi: “Muchima waTata yenu wudi mwiwulu hanakeñi mwana wanyanya wudi neyi iwu kunoñaku.” (Mat. 18:12-14) Chumanyi chimukudizila kudi Yehova kunichi chishimu? Hela chakwila mpinji yikwawu mwatoñojokaña nenu mudantu amukunkulwayi hohu nawa nenu kwosi wayanukaña, Tata yenu wamwiwulu wayikeña nawa wayakamenaña. Kudi yena wayimonaña neyi “mwana wanyanya.”
10. Indi Yesu wamumwekesheli ñahi Tata yindi kuhitila muyililu yindi?
10 Yesu wamumwekesheli cheñi Tata yindi kudi atumbanji twindi muyililu yindi. Chelili kapostolu Fwilipu yamwili Yesu nindi: “Tuleji Tata,” Yesu wahosheli nindi: ‘Muntu wunanmonami namoni Tata.’ (Yow. 14:8, 9) Talenu yuma yakoñeliyi Yesu yinakumwekesha yililu yaTata yindi. Chelili mukwambumba yamulembeleli Yesu nindi yamuuki, Yesu wamukwatili iwu iyala “wazemoka dehi namusoñu wambumba,” nakumuleja nindi: “Neteji, tookaku.” Chamuukiluwu, mukwambumba welukili nindi Yehova diyi wamukwashili Yesu. (Luka 5:12, 13) Cheñi, chafwiliyi Lazaru, atumbanji atela amweni wushona wukwetiyi Yehova chelili Yesu “hakudishishimuna muspiritu, atiya nikukala” “hakudila.” Hela chakwila Yesu welukili nindi wukumusañula Lazaru, waneñeli hakumona antaña jaLazaru niamabwambu jindi anakudila. (Yow. 11:32-35, 40-43) Anenu nawa mukweti nsona yamuBayibolu yimwakeñesha yayikwashaña kumona luwi lwaTata yetu lwamwekeneni muyuma yakoñeliyi Yesu.
11. (a) Hampinji yatookesheliyi Yesu mutembeli, wamwekeshelidi hadi Tata yindi? (b) Indi nsañu yaYesu yakutookesha mutembeli yatukoleshaña ñahi?
11 Hanu dinu, mukuhoshahu ñahi hachuma cheliliyi Yesu chakutookesha mutembeli? Fwikijenu yuma yamwekeni: Yesu hakushinta chikoti chanfuña, hakuhaña antu alandishileña añombi nianyikoku. Hakumwaña mali awakwakuhimpa nakuhinona jimesa. (Yow. 2:13-17) Ichi chuma cheneni cheliliyi chakojejeli atumbanji kwanuka mazu awuprofwetu ahosheliyi Mwanta Davidi nindi: “Iyena dinatiyilaña itala deyi kumuchima dinañudyi.” (Mas. 69:9) Hamuloña wakwimika mushindu, Yesu wamwekesheli muchima wakuhakwilaku kudifukula kwalala. Komana muniyi mpanji munamonumu chililu chaTata yindi? Yatwanukishaña nawu Nzambi wukweti ñovu yeneni nankashi yakumanisha yuma yatama yejima hamaseki nawa wukweti mpwila yakukoñamu. Chuma chakoñeliyi Yesu kutalisha hayuma yatama chinakumwekesha chatiyañayi Tata yindi hakumona yuma yatama yinakusweja hamaseki makonu. Chumichi chatukoleshaña neyi tunakumona yinzeñeli.
12, 13. Chumanyi chitukudizila kudi Yehova hanjila yakamenenumu Yesu atumbanji twindi?
12 Tutalenu chakutalilahu chikwawu chinakumwekesha Yesu chakameneniyi atumbanji twindi. Atwalekeluhu nakutadika nawu hinyi watela kwikala mukulumpi. (Maku 9:33-35; 10:43; Luka 9:46) Hamuloña wakushakama naTata yindi hadi yaaka yayivulu, Yesu welukili chatiyañayi Yehova yindi hakumona antu akweti yaaku yamuchidiwu yakudinka wanta. (2 Sam. 22:28; Mas. 138:6) Yesu wanukili nindi Satana Diyabolu wamwekeshahu dehi yililu yamuchidiwu. Iwu muntu mukwalwisu wakeñeleña nankashi mpuhu nichifulu. Yesu waneñeli nankashi hakumona yililu yakudinka wanta hiyikutanda mudi atumbanji twindi adizishiliyi. Antu atondeliyi kwikala apostolu niwena adiña nanichi chililu. Amwekeshili yililu yakudinka wanta nihefuku dakukumishaku Yesu kwikala hamaseki. (Luka 22:24-27) Ilaña Yesu watwalekeluhu nakuyikwasha munjila yayiwahi, nakukuhwelela nindi ifuku dimu akembujola yililu yindi yakudizoza.—Fwi. 2:5-8.
13 Munamoni Tata yindi chamukwashiliyi Yesu hakukwasha atumbanji twindi mumesu awunda kulonda aleki yililu yawu yatama? Munamumoni Tata yindi muyililu yamwekesheliyi Yesu nimumazu ahosheliyi nindi hashiyaña antu jindi hela chakwila anakuputola chamuchidinyuku? Chineli tuneluki yililu yikwetiyi Nzambi, komana kwila tubalumuka mumuchima neyi tunaluwañeshi nehi?
MWANA WADITEJELELI KUMUMWEKESHA TATA YINDI
14. Indi Yesu wadimwekesheli ñahi nindi wadihanini kumulumbulula Tata yindi namuchima wumu?
14 Anyuuli amavulu awukatu akakejaña antu jawu kuyovwahila nawa ayishiyaña muwufuku kuhitila mukubula kuyileja nsañu yatela kuyikwasha. Ilaña, Yesu walejeleña antu nsañu yelukiliyi yakundama kudi Tata yindi, nawa wamumwekesheli chikupu kudi antu. (Tañenu Matewu 11:27.) Cheñi Yesu wayinkeli atumbanji twindi “kashinshi kakumwiluka yena walala; [kulonda atweshi kumwiluka] yena walala,” Yehova Nzambi. (1 Yow. 5:20) Indi chumichi chatalisha mudihi? Yesu wakwashili atumbanji twindi kulonda eluki yuma yatañishileñayi hadi Tata yindi. Hamuswekeleña Tata yindi kuhitila mukutañisha yuma yakonda yidi neyi ntañishilu Yawanzambi Asatuku.
15. Muloñadi Yesu chabulililiyi kuleja atumbanji twindi nsañu yejima yakundama kudi Tata yindi?
15 Komana Yesu walumbulwili nsañu yejima yelukiliyi hadi Tata yindi? Inehi, hayilejeli nsañu yayivulu yelukiliyuku. (Tañenu Yowanu 16:12.) Muloñadi? Muloña hayina mpinji atumbanji twindi ‘hiyadi kutwesha kwiluka’ nsañu yejimaku. Neyi chalumbulwiliyi Yesu, atumbanji adi kuyilumbulwila nsañu yayivulu neyi “nkwashi” nenzi dikwila nawu spiritu yajila, yakayileja ‘mwahita nsañu yalala yejima.’ (Yow. 16:7, 13) Neyi chochabulaña anvwali akweti maana kuleja anyanawu yuma yejima sampu anakuli, Yesu niyena wahembeleli nindi atumbanji apami nakushika hakwiluka nsañu yakundama kudi Tata yindi. Yesu welukili nindi yuma yikwawu akutwesha kutiya wanyi.
MWIMBUJOLENU YESU KUHITILA MUKUKWASHA ANTU KULONDA AMWILUKI YEHOVA
16, 17. Muloñadi chitukuhoshela netu tunateli kumumwekesha Tata yetu kudi antu?
16 Neyi mwadiluka namuntu chikupu nawa mwakeña yililu yikwetiyi, komana kwila mulejaku antu amakwawu kulonda amwiluki iwu muntu nehi? Hampinji yadiñayi hamaseki, Yesu wahosheleña hadi Tata yindi. (Yow. 17:25, 26) Komana ninetu tunateli kumwimbujola hakumumwekesha Yehova kudi antu?
17 Neyi chitunahanjekuhu, Yesu wamwilukili Tata yindi chikupu kubadika antu amakwawu. Dihafumini hakuleja antu nsañu yikwawu yelukiliyi nikukwasha atumbanji kulonda ekali nakashinshi kakwiluka chikupu yililu yaNzambi. Chineli Yesu natukwashuku, komana hitunamwiluki Tata yetu kubadika antu amavulu makonuku? Twatela kumwekesha muchima wakusakilila muloña Yesu wadiheni kutumwekeshela Tata yindi kuhitila muntañishilu niyililu yindi. Twatela kuzañalala hakumwiluka Tata yetu. (Yere. 9:24; 1 Kor. 1:31) Chineli tunadikiti chikupu kukundama kwakwihi naYehova, niyena nakundami kudi etu. (Yak. 4:8) Anetu nawa tunateli kulejaku akwetu yuma yitunadizi. Tunateli kuyileja ñahi?
18, 19. Tunateli kumumwekesha ñahi Tata yetu kudi antu? Lumbululenu.
18 Twatela kumwimbujola Yesu kuhitila mukumumwekesha Tata yetu munhoshelu nimuyililu yetu. Twatela kwanuka netu antu amavulu itwawanaña mwiha hiyamwiluka Nzambi chekalayuku. Ntañishilu yakutwamba yinayikañeshi kumwiluka Nzambi chiwahi. Tunateli kuyileja yuma yitweluka hejina daNzambi, yuma yafuukwilayi antu nihayililu yindi neyi chayishimunawu muBayibolu. Kubombela, tunateli kuhanjeka nawakwetu akwakwitiya nsañu yamuBayibolu yamwekeshaña yililu yaNzambi munjila yitwabulili kwiluka. Muniyi njila, niwena anateli kuhetelamu.
19 Komana hitwatela kumumwekesha Tata yetu kuhitila muyililu yetu hampinji yitunakufwila kumwimbujola Yesuku? Neyi antu amona nawu twamukeña Kristu kuhitila muyililu yetu, akukundama kudi Tata yetu nikudi Yesu. (Efwes. 5:1, 2) Kapostolu Pawulu watukolesheli nindi ‘twikali akwakumwimbujola neyi chamwimbujoleliyi Kristu.’ (1 Kor. 11:1) Tukweti kukooleka kweneni kwakukwasha antu kulonda amwiluki Yehova kuhitila muyililu yetu yayiwahi. Eñañi, wejima wetu twatela kumwimbujola Yesu kuhitila mukumumwekesha Tata yetu kudi antu.
[Malwihu aKuzatisha haKudiza]
