Wunfukeji Hichinjikijilu Chatama Chakwilukilaku Mpinji Yitunashikumu!

‘Chitwadiñi ashinshika, aloña, akadi hakutwinkela muloña.’—1 TESA. 2:10.

WANENU ÑAKWILU YANIYI YIKUMA:

․․․․․

Yumanyi yitukudizila kudi Delila, Abisalomi niYudasi Isakaroti afukejeleli akwawu?

․․․․․

Tunateli kumwekesha ñahi kashinshi neyi kamwekesheliyi Jonatani niPetulu?

․․․․․

Tunateli kwikala ñahi nakashinshi kudi enikwetu nikudi Yehova?

1-3. (a) Chinjikijilwinyi chinakumwekesha mpinji yitunashikumu nawa munabombeli yumanyi? (b) Malwihwinyi asatu itukwakula?

 CHUMANYI cheliluwu aDelila, Abisalomi niYudasi Isakaroti? Wonsu wawu hiyadiña ashinshikaku, Delila hamwekesheli kashinshi kudi iyala wamukeñeli Nsompeshi Samisonuku. Abisalomi hamwekesheli kashinshi kudi tata yindi, Mwanta Daviduku; Yudasi niyena hamwekesheli kashinshi kudi Mwanta windi, Yesu Kristuku. Yuma yakoñeluwu wonsu wawu yashili akwawu muwufwinda! Indi yuma yakoñeluwu yinatukundami ñahi?

² Nsoneki wumu wahosheli nindi wunfukeji wudi hakachi kayaaku yinasweji nankashi makonu. Chumichi hichatela kutuhayamishaku. Hakushimuna chinjikijilu ‘chakukuma kwanyaka yamakonu,’ Yesu wahosheli nindi: “Amavulu . . . akadifukeja nikuhelañana.” (Mat. 24:3, 10) Izu ‘dawunfukeji’ dalumbuluka nawu “kusha, hela kuhana muntu mumakasa achilumbu, kuzatisha makasu hela kubula kushinshika. Kubula kushinshika kunakumwekesha nawu tunakushakama ‘mumafuku akukuminina’ nawa Pawulu washimwini nindi antu akekala ‘abula kashinshi, . . . anfukeji.’ (2 Tim. 3:1, 2, 4) Ansoneki anyikanda niajifilimu avula kusoneka nsañu yawunfukeji munyikanda nimujifilimu nakuyimwekesha neyi yayiwahi nawa yamwekeshaña kukeña, ilaña yumiyi yakatishaña kumuchima. Eñañi, yililu yamuchidiwu hichinjikijilu chakwilukilaku mpinji yitunashikumu!

³ Yumanyi yitukudiza muBayibolu hadi antu abulili kumwekesha kashinshi kunyima? Antu amuchidinyi itwatela kwimbujola amwekesheli kashinshi kudi akwawu? Twatela kwikala ashinshika kudanyi? Tuhanjekenuhu.

 ANTU AKUNYIMA AFUKEJELELI AKWAWU

4. Indi Delila wamufukejeleli ñahi Samisoni, nawa muloñadi chuma chakoñeliyi chichataminini nankashi?

⁴ Tusambilenu kutala hadi kavuba Delila, akeñeluwu chikupu kudi Nsompeshi Samisoni. Samisoni wakeñeleña kwasa njita nawaFwilistinu nakulwila antu jaNzambi. Hadaha hamuloña wakwiluka nawu Delila hamukeñeli Samisoni nankashuku, amayala atanu awaFwilistinu amwinkeli Delila mali amavulu kulonda yayileji kajindilu kamwinkeleña Samisoni ñovu jabadika kulonda amujahi. Iwu nfukeji Delila watambwili mali amwinkeluwu ilaña wesekeli kufuñununa kafuta kaSamisoni mapampa kasatu, wakañenyi. Watwalekeluhu nakumukakeja “namazu indi, hakumushinjila.” Nkumininaku, “yena yotiya nikumuchima bwi neyi kufwa hohu.” Yamuleja nikumuleja nindi kanda yatewuleñahu dehi nsuki, neyi yatewula ñovu jikumumana. * Chelukiliyi, Delila wamukaamikili Samisoni hamakata indi nawa walejeli antu nindi amutewuli nsuki, kufumahu wamuhanini kumakasa awayilumbu jindi kulonda amwili mwakeñeleñawu. (Ansomp. 16:4, 5, 15-21) Wakoñeli chuma chatama nankashi! Hamuloña walwisu, Delila wamufukejeleli muntu wamukeñeli nankashi.

5. (a) Indi Abisalomi wamufukejeleli ñahi Davidi, nawa chuma chakoñeliyi chamumwekeshelidi? (b) Indi Davidi watiyili ñahi chelili Ahitofweli yekali nfukeji?

⁵ Tutalenu cheñi nfukeji Abisalomi. Hamuloña wakusweja ichima, wafwilileña kuhukula itanda datata yindi, Mwanta Davidi. Abisalomi wasambilili ‘kwiya nyichima yawamayala amuIsarela’ nakutwamba neyi wayikeña, nikuyikana yuma yakutwamba nikuhosha mazu akukeña akutwamba. Wayikwatileña nikuyipwepujola neyi kwiji wayikeñeli chikupu nikuyakamena. (2 Sam. 15:2-6) Abisalomi wamuzeyesheli Ahitofweli mukwakumuleja Davidi maana wakuhweleleliyi, niyena wekalili nfukeji nawa wadiña hakachi kawakwakudikaña. (2 Sam. 15:31) Mumukanda waMasamu 3 ni 55, Davidi walumbulula chaneñeliyi hamuloña wakumwimakena kudi antu atama. (Mas. 3:1-8; tañenu Masamu 55:12-14.) Abisalomi wamwekesheli kasawuntu hakudiwula chiyuulu chaNzambi kuhitila mukukwata kafuta kakukeña kuhukula itanda dawanta kudi muntu atondeluwu kudi Yehova kwikala mwanta. (1 Kushi. 28:5) Nkumininaku, iwu nfukeji wakañenyi nawa Davidi watwalekeluhu kuyuula neyi wawayishewa waYehova.

6. Indi Yudasi wamufukejeleli ñahi Yesu, nawa ijina daYudasi aditenaña nawudi makonu?

⁶ Toñojokenu chuma chamukoñeluwu Kristu kudi Yudasi Isakaroti. HaPaseka yakukumishaku yadiiliyi Yesu nawapostolu indi 12, wayilejeli nindi: “Nukuyileja chalala nami hadi mwinenu wumu wukunfukeja.” (Mat. 26:21) Chikwelili wufuku, Yesu wayilejeli aPetulu, Yakoba niYowanu mwitempa daÑesemani nindi: ‘Talenu, wukunfukeja wudi kwakwihi.’ Hohenohu, Yudasi hakwinza mwitempa nezaza dawantu, “hakwinza kudi Yesu, hakumwila nindi, Kolenu Rabi. Hakumupwepujola.” (Mat. 26:46-50; Luka 22:47, 52) Yudasi ‘wafukejeleli mashi akadi muloña’ nakumuhana Yesu kudi ayilumbu jaKristu. Indi Yudasi wafwili hamali wamulandishili Yesu mali añahi? Wamulandishili namali asiliva 30! (Mat. 27:3-5) Kufuma tuhu hayina mpinji ijina daYudasi aditenaña nawu “nfukeji,” sweje-e muntu wafukejelaña ibwambu dindi akeñayi. *

7. Yumanyi yitunadizili kudi (a) Abisalomi niYudasi (b) Delila?

 ⁷ Yumanyi yitunadizili kuniyi yakutalilahu yakutusoñamisha? Abisalomi niYudasi afwili chatama muloña afukejeleli awayishewa aYehova. (2 Sam. 18:9, 14-17; Yil. 1:18-20) Antu akatwalekahu kwanuka ijina daDelila nawu nfukeji nawa wamwekesheli kukeña kwakutwamba! (Mas. 119:158) Dichi bayi twikala nayaaku yalwisu hela yakudikeñaku, muloña chumichi chikutuleñela kujimbesha wuselewa waYehova! Twatela kudizilaku chuma cheneni chikutukwasha kutondolwela chaaku chakubula kushinshika.

IMBUJOLENU ANTU ADIÑA ASHINSHIKA

8, 9. (a) Muloñadi Jonatani chadikasililiyi kumwovwahila Davidi? (b) Tunateli kumwimbujola ñahi Jonatani?

⁸ Bayibolu yahosha cheñi hadi antu amavulu adiña ashinshika. Tusambilenu kuhanjeka hadi antu ayedi kulonda twiluki yuma yitukudizilaku, tukutachika namuntu wamwekesheli kashinshi kudi Davidi. Hadaha Jonatani, wedi waMwanta Sawulu diyi wateleli kwikala mwanta muIsarela. Yehova wamutondeli Davidi nindi diyi wakekala mwanta muIsarela. Jonatani wetejeli mwafuukwiliyi Nzambi. Hamutiyilili Davidi ichima neyi kwiji hichilumbu chinduku. Ilaña, ‘muchima waJonatani wadikasili namuchima waDavidi hamu mbe’ nindi wakamwovwahilaña. Wamwinkeli Davidi yakuvwala nimpoku yindi yakabali niwuta wamukunji nimuya windi, dikwila nawu wamulemesheli nindi himwanta. (1 Sam. 18:1-4) Jonatani wazatili nañovu yejima kulonda ‘yamukoleshi Davidi,’ washili wumi windi hakatoña hakumwimenaku Davidi kudi Sawulu. Jonatani wamulejeli Davidi nindi: “Eyi wakekala mwanta waIsarela ami nakakukuma munyima.” (1 Sam. 20:30-34; 23:16, 17) Dihafumini Davidi kumwekesha wushona nikukeña kuhitila mukwimba kamina kawushona chelili Jonatani nafwi dehi.—2 Sam. 1:17, 26.

⁹ Hichamukalilili Jonatani kumwovwahila Daviduku. Wamwovwahilili chikupu Mwanta, Yehova nawa wamukwashili chikupu Davidi awayishiluwu kudi Nzambi. Nikulelu, neyi hiyanatwinki kukooleka muchipompeluku, twatela kwikala namuchima wakukwasha amana kwetu anatonduwu kutulombola.—1 Tesa. 5:12, 13; Heb. 13:17, 24.

10, 11. (a) Muloñadi Petulu chatwalekeleluhu kwikala washinshika kudi Yesu? (b) Tunateli kumwimbujola ñahi Petulu nawa chumanyi chitwatela kwila?

¹⁰ Tuhanjekenu cheñi hachakutalilahu chachiwahi chakapostolu Petulu, wasanyikili nindi wakekala washinshika kudi Yesu. Chelili Kristu yahosheli munkinji hakukonkomweni hansañu yakukuhwelela mumusunyi nimashi indi akeñeleña kulambulayi, atumbanji amavulu ahosheli nawu awa mazu akala nawa amushili.  (Yow. 6:53-60, 66) Yesu hakuyila apostolu indi 12 nindi: “Ninenu nawa keña muyi kwenu, tahindi?” Petulu hohu diyi wakwili nindi: “[Mwanta], tukuya kudinyi? Eyi yeyi wukweti mazu awumi wahaya nyaka. Tunetiyi, tuneluki netu eyi yeyi Wajila waNzambi.” (Yow. 6:67-69) Komana chinayi mukwila nawu Petulu welukili nsañu yejima yahosheliyi Yesu yakuhana mulambu Windi? Hadaha welukili wanyi. Hela chochu, Petulu wadikasili mumuchima windi kwovwahila Mwana kaNzambi wawayishewa.

¹¹ Petulu hatoñojokeli nindi hadaha Yesu naluwukili mukuhosha, chimwahita mpinji, wukwanuka nawa wukwolola nsañu yahoshayuku. Inehi, Petulu wadizozeli nawa welukili nindi Yesu wadiña ‘namazu awumi wahaya nyaka.’ Nikulelu, twelaña ñahi neyi chakwila tutaña nsañu yakala hela yinaambuki chikupu nayuma yitweluka munyikanda yetu yawakwaKristu yasonekañayi ‘nduñu washinshika’? Chatela tutoñojokeña netu iyi ntañishilu akayihimpa kulonda yakesekani nayitoñojoka yetu, twatela kwiluka muyinatalishi.—Tañenu Luka 12:42.

IKALENU ASHINSHIKA KUDI MWINIKWENU

12, 13. Indi muntu nateli kumufukejela ñahi mukwawu wamumaluwi nawa muloñadi chitukuhoshela netu yaaka yikwetiyi muntu hiyikumuleñela kwila chumichuku?

¹² Wunfukeji hichililu chatama nankashi chakwila neyi chiñila muchisaka chawakwaKristu hela muchipompelu chaletaña wufwinda. Dichi, tutalenu hayuma yatela kutukwasha kwikala ashinshika kudi enikwetu nikudi Nzambi yetu.

¹³ Wuvumbi hiwunfukeji wumu watama nankashi. Chivumbi wafumpaña kashinshi kindi kudi mwinikwindi nakutachika kusha muchima windi wejima hadi muntu wacheñi. Muntu anahayikuwu washalaña makasa munshiñu nakumona yinzeñeli. Chumanyi chaleñelaña antu aswejeli kudikeña adihayiki? Chumichi chatachikaña neyi eyala namumbanda aleka kuditiyila mpwila. Nkuluñaña weluka nsañu jakuhanda kwawantu Gabriella Turnaturi walumbulwili nindi “wunfukeji wenzaña neyi adisumbula aleka kwila yuma yatela kukolesha maluwi awu.” Hela tuhu adisumbula akula dehi niwena adihayikaña. Chakutalilahu, iyala wumu wayaaka 50 waseñeli ñodindi washakaminiyi nindi mumaluwi hadi yaaka 25 nakusumbula mumbanda wacheñi wakewukililiyi. Antu amakwawu ahoshaña nawu dichelañawu antu neyi anashikiji yaaka yamuchidiwu. Hela chochu, chatela tutoñojoki netu hichuma chakala kutondolwela, kubula kashinshi kudi mwinikweyi chatama nawa hikufukeja. *

14. (a) Indi Yehova watiyaña ñahi neyi muntu yafukejela mwinikwindi? (b) Indi Yesu wahosheli nindidi hansañu yakubula kashinshi mumaluwi?

¹⁴ Indi Yehova watiyaña ñahi neyi muntu yashiya mwinikwindi chakadi muloña wamuNsona? Nzambi yetu ‘wahela kudiseña,’ wakonkomwena chikupu antu akabishaña enikwawu nikuyihayika. (Tañenu Malaki 2:13-16.) Kufwana Tata yindi, Yesu watañishili nindi muntu hatela kuhayika mwinikwindi chakadi muloñaku nikumwekesha neyi kwosi chuma chamwekana.—Tañenu Matewu 19:3-6, 9.

15. Indi adisumbula atela kukolesha ñahi kashinshi kawu kudi enikwawu?

¹⁵ Indi adisumbula anateli kwikala ñahi nakashinshi kudi enikwawu? Izu daNzambi dahoshaña nawu: “Luñaku nañodeyi [hela nfumweyi] wakuwukwenzi weyi,” dahosha cheñi nawu, “Shakamaku nakuzañajala nañodeyi [hela nfumweyi] wakeña.” (Yish. 5:18; Mukwa. 9:9) Hampinji yinakushinakajilawu hamu, atela ‘kusha  maana’ niyitoñojoka hamaluwi awu. Dikwila nawu atela kudakamena wumu namukwawu, kwikala nampinji yakushakama hamu, nikudikunda chikupu. Atela kusha maana hakuhemba maluwi awu nikukolesha wubwambu wawu naYehova. Cheñi nawa, adisumbula atela kudizila Bayibolu hamu, kuzatila hamu mwiha mpinji yejima, nikulombela hamu nkisu jaYehova.

IKALENU ASHINSHIKA KUDI YEHOVA

16, 17. (a) Indi kashinshi ketu kudi Nzambi kanateli kwikala ñahi mukweseka muchisaka nimuchipompelu? (b) Chakutalilahwinyi chinakumwekesha nawu kwovwahila lushimbi lwaNzambi lwakubula kudikunda nantaña ahañawu munateli kufuma yuma yayiwahi?

¹⁶ Muchipompelu mwekalaña antu akoñeli nshidi yeneni nawa ayizuwilili ‘nañovu hansañu oyu, kulonda akoli mukwitiya kwakukuhwelela.’ (Tit. 1:13) Amakwawu ayihañili muchipompelu hamuloña wayililu yawu yatama. Ilaña ‘antu etejaña kufumba,’ kwayikwashaña kwikala akola cheñi kuspiritu. (Heb. 12:11) Twatela kwiladi neyi ntaña yetu hela ibwambu detu anamuhañi muchipompelu? Twatela kumwekesha kashinshi kudi Nzambi bayi kudi muntu anahañuwuku. Yehova nakututala kulonda amoni neyi tunakwovwahila lushimbi lwindi lwakubula kudikunda namuntu wahañawu.—Tañenu 1 Akorinda 5:11-13.

¹⁷ Tutalenu chakutalilahu chimu chinakumwekesha yuma yayiwahi yafumañamu neyi chisaka chovwahila lushimbi lwaYehova lwakubula kudikunda nantaña yawu wahañawu. Mukwenzi wumu wadiña kunsa yakuloñesha hadi yaaka yakubadika hekumi, mpinji yejimiyi atata yindi, amama yindi niamana kwindi awana ‘hiyadibombeleña’ ninduku. Mpinji jikwawu, wakeñeleña kuzatila hamu nawu, ilaña yayo-o, wonsu wawu akaanini chikupu kudikunda nindi. Chamufuntishiluwu muchipompelu, wahosheli nindi watiyileña kutama hakubula kudikunda nachisaka chindi, sweje-e nawufuku neyi wudi nkawindi. Wetejeli nindi neyi wahanjekeleña nachisaka chindi hela chanti, mutenowu hadi kufuntaku. Hamuloña wakubula kuhanjeka nawantaña jindi hela chantesha, nikufwila chikupu kudikunda nawu dichuma chamuletesheli kwikala cheñi nawubwambu wawuwahi naYehova. Toñojokenu hanichi chakutalilahu neyi mudi mukweseka kwakufumpa lushimbi lwaNzambi lwakubula kuhanjeka nawantaña jenu ahañawu.

18. Chineli tunahituluki hayakutalilahu yawantu ashinshika niabulili kashinshi, chumanyi chimukwila?

¹⁸ Tunakushakama mwituña munenzali antu abula kashinshi nawa anfukeji. Hela chochu, muchipompelu chawakwaKristu mudi antu akweti chakutalilahu chachiwahi chitwatela kwimbujola. Chihandilu chawu chayihoshelañaku namazu akwila nawu: ‘Enu aweni mudi ayinsahu, niNzambi nawa hichinsahu, chitwayililaña enu akwetu mwetiya, chitwadiñi ajila, aloña, akadi hakutwinkela muloña.’ (1 Tesa. 2:10) Wejima wetu twatela kwikala ashinshika kudi Nzambi nikudi akwetu antu.

[Tumazu twaheshina]

[Malwihu aKuzatisha haKudiza]

[Mwevulu wudi hefu 10]

Petulu wadiña washinshika kudi Mwana kaNzambi wawayishewa hela chakwila akwawu amukaanini