Yehova Watuhembaña Kulonda Yakatwamwini

‘Enu anayihembi nañovu yaNzambi nakukuhwelela, kulonda akamwekeshi wamwinu hanyaka yakukuminina.’—1 PET. 1:5.

MUKWAKULA NENUDI?

․․․․․

Indi Yehova watukokaña ñahi kukudifukula kwalala?

․․․․․

Tunateli kumwiteja ñahi Yehova kutulombola kuhitila mukutufumba?

․․․․․

Munjilanyi mwatukoleshelañayi Yehova?

1, 2. (a) Chumanyi chatuleñelaña kukuhwelela netu Nzambi nateli kutukwasha kuhemba kashinshi ketu? (b) Munjilanyi mwatwilukilayi Yehova chikupu wonsu wetu?

 “MUNTU wakakakela nikunsa diyi wakahanda.” (Mat. 24:13) Awa mazu aYesu amwekeshaña hatooka nawu hakwila twakahandi mpinji yakajilumunayi Nzambi kaayi kaSatana, twatela kwikala ashinshika ndo-o nikunsa. Ilaña hichinayi mukwila nawu Yehova wakeñaña nindi tuumiki namaana etu hela nañovu jetuku. Bayibolu yatulejaña nawu: “Nzambi washinshika, hakwiteja kuyeseka chabadika muñovu jenuku; chakuyesekawu wukubuzilaku njila yakupulukila, kulonda mutweshi kukakela.” (1 Kor. 10:13) Indi awa mazu atalisha mudihi?

² Hakwila nawu Yehova yeluki chikupu nindi hiyanatweseki chabadika muñovu jetuku, watela kutwiluka hama kushilahu nikukala kutwamonaña, chitwekala niyuma yitunateli kuumika. Komana chalala Nzambi watwiluka chikupu? Eñañi. Nsona yashimunaña nawu Yehova watwiluka chikupu wonsu wetu. Weluka yuma yitwelaña mafuku ejima niyililu yetu. Nateli kwiluka niyuma yitunakutoñojoka mukachi kanyichima yetu.—Tañenu Masamu 139:1-6.

3, 4. (a) Indi yuma yamweniyi Davidi yamwekeshaña ñahi nawu Yehova washa maana hadi antu? (b) Mudimwinyi weneni wunakuzatayi Yehova makonu?

³ Komana mwalala Nzambi wayakamenaña antu akehelamu muniyi njila? Ñimbi yamasamu Davidi watoñojokeli hanilu lwihu, hampinji yahosheleñayi naYehova nindi: “Chinukushinshika mawulu eyi, himudimu wanyinu yeyi, nikakweji nitutumbwa tuwunashuku; Nami, Muntu hichumanyi, mwaka wumushi kumuchima? Hela mwana kamuntu, mwaka wumuhempuli?” (Mas. 8:3, 4) Hadaha yuma yamweniyi Davidi diyaletesheli yehuli ilu lwihu. Yehova wamweni “muntu wakumuchima windi” mudi kabinda kaJesi  nawa wamufumishili kumudimu ‘wakulondela nyikoku kulonda yamukunjiki kwikala nlomboli’ yawaIsarela. (1 Sam. 13:14; 2 Sam. 7:8) Fwikijenu chatiyili Davidi hakwiluka nindi Nleñi wakuleña kwejima washili maana kuyuma yadiña nakutoñojokayi chikupu hela tuhu wadiña kabiña wakansi.

⁴ Hitunateli kuhayamaku hakwiluka netu Yehova watwisha maana chikupu makonu. Nakupompesha ‘yuma yayiwahi yamunza yejima’ mukudifukula kwalala nawa nakukwasha ambuñindi kuhemba kashinshi kawu. (Hag. 2:7) Hakwila nawu twiluki chiwahi chinakutukwashayi Yehova kuhemba kashinshi ketu, tusambilenu kushinshika chakokañayi antu mukudifukula kwalala.

NZAMBI DIYI WATUKOKAÑA

5. Indi Yehova wakokaña ñahi antu kudi Mwanindi? Lumbululenu.

⁵ Yesu wahosheli nindi: “Kwosi muntu natweshi kwinza kudami chakadi kumukoka kudi Tata wantemesheluku.” (Yow. 6:44) Awa mazu anakumwekesha nawu hakwila twikali atumbanji twaKristu, chiña Nzambi yatukwasha. Indi Yehova wakokaña ñahi antu adi neyi anyikoku kudi Mwanindi? Wazatishaña mudimu wakushimwina nsañu yayiwahi nispiritu yajila. Chakutalilahu, hampinji yadiñayi Pawulu nimulunda nindi kamishonali muFwilipi, awanini mumbanda wejina daLidiya nawa atachikili kumushimwina nsañu yayiwahi. Nsañu yonenawu yashimunaña nawu: ‘Yehova hakwenzulula mumuchima windi, kulonda atiyi nsañu yahosheleñayi Pawulu.’ Eñañi, Nzambi wazatishili spiritu yindi kulonda yamukwashi kutiyisha nsañu, nawa yena niakwetala dindi apapatisheweli.—Yil. 16:13-15.

6. Munjilanyi mwatukokelawu wejima wetu kudi Nzambi mukudifukula kwalala?

⁶ Komana chumichi chamumwekeneni hohu Lidiya? Inehi. Neyi mudi akwaKristu adihana, anenu nawa ayikoka kudi Nzambi mukudifukula kwalala. Neyi chochamweniyi Tata yetu wamwiwulu chuma chachiwahi mumuchima waLidiya, wamweni chuma chachiwahi mudenu. Chimwatachikili kutiyilila nsañu yayiwahi, Yehova wayikwashili naspiritu yajila kulonda mutiyishi nsañu. (1 Kor. 2:11, 12) Chimwatachikili kuzatisha yuma yimwadizili, wayikwashili kulonda mwili mwaya muchima windi. Wazañaleli mumuchima windi chimwadihanini kudi yena. Eñañi, kufuma tuhu hampinji yimwatachikili kumukalakela, Yehova wayikwashaña nawa watwalekahu kuyikwasha.

7. Tweluka ñahi netu Nzambi wukutukwashaña kwikala ashinshika kudi yena?

⁷ Chineli watukwashili kutachika kumukalakela tunateli kukuhwelela chikupu netu Yehova wukutukwashaña kwikala ashinshika kudi yena. Weluka nindi neyi chochitwabulili kudiza nsañu yalala nkawetu, hitunateli kutwalekahu muchalala nkawetuku. Hampinji yayisonekeleliyi akwaKristu awayishewa, kapostolu Petulu wahosheli nindi: ‘Enu anayihembi nañovu yaNzambi nakukuhwelela, kulonda akamwekeshi wamwinu hanyaka yakukuminina.’ (1 Pet. 1:5) Awa mazu akundama kudi akwaKristu ejima nawa wonsu wetu twatela kushaku maana. Muloñadi? Muloña wejima wetu twakeñaña kutukwasha  kudi Nzambi hakwila twikali ashinshika kudi yena.

AMULEKESHELI KWILA CHUMA CHATAMA

8. Muloñadi chitunateli kwikalila muwubanji wakwila yuma yatama?

⁸ Kukala kwamuchihandilu nikubula kuwanina kunateli kutukañesha kushinshika hayuma yakuspiritu nawa tukwikala muwubanji wakwila yuma yatama chakubula kwiluka. (Tañenu Aŋalija 6:1.) Ichi dichuma chamumwekeneni Davidi.

9, 10. Indi Yehova wamulekesheli ñahi Davidi kwila chuma chatama, nawa chumanyi chatwililañayi Yehova makonu?

⁹ Hampinji yamukupishileñawu Davidi kudi Mwanta Sawulu, wamwekesheli chililu chachiwahi nankashi chakubula kumutenda ona mwanta walwisu. (1 Sam. 24:2-7) Chimwahitili kapinji kantesha, Davidi wakañenyi kudihemba. Wakeñeleña yakudya yawantu jindi nawa walombeli munjila yayiwahi kudi mukwawu kaIsarela wejina daNabali. Chelili Nabali yamutuki, Davidi wahilili chikupu nawa wayili nakumutenda Nabali niakwetala dindi ejima, dichi wakañenyi kwiluka nindi neyi wukujaha antu akadi muloña wukwikala namuloña wamashi kudi Nzambi. Ilaña Abigayili ñoda Nabali wadiñijilumu nakumulekesha Davidi kubula kwila chuma chatama. Hamuloña wakwila welukili nindi Yehova diyi wamukwashili, Davidi wahosheli nindi: “Kisu kisu Yehova Nzambi yaIsarela nakutemeshi lelu nindi wumbulakani. Maana eyi ayikiswili nkisu, nineyi aweni akukiswili nkisu, yeyi wunanlekeshi nikumwaña mashi lelu, nikuditenda nachikasa chamami aweni.”—1 Sam. 25:9-13, 21, 22, 32, 33.

¹⁰ Chumanyi chitukudizila kuniyi nsañu? Yehova wamuzatishili Abigayili kulonda yamulekeshi Davidi kwila chuma chatama. Nimakonu nateli kutulekesha kwila yuma yatama. Hanu dinu, bayi tukuhwelela netu Nzambi nateli kutemesha muntu kulonda yatulekeshi neyi hitukukeña kwila yuma yatama; nawa hitunateli kwiluka chikupu chikazatayi Nzambi hanoyu nsañu hela yuma yikwitejayi kulonda yashikiji yuma yafuukulayuku. (Mukwa. 11:5) Hela chochu tunateli kukuhwelela netu Yehova weluka chikupu chitwekala nawa nateli kutukwasha kwikala ashinshika kudi yena. Watulejaña nindi: “Nukukuleja maana nukukuleja ninjila yeyi yiwukwenda; nukukulombola nadisu dami.” (Mas. 32:8) Indi Yehova watufumbaña ñahi? Tunateli kuhetelamu ñahi? Nawa muloñadi chitwelukila chikupu netu Yehova nakulombola antu jindi makonu? Shinshikenu mukanda waChimwekeshu chiwakula awa malwihu.

YUMA YATUFUMBAÑAWU YATUHEMBAÑA

11. Indi Yehova weluka ñahi chikupu yuma yazatikaña muyipompelu yawantu jindi?

¹¹ Muchimwenu chasonekawu muChimwekeshu kapetulu 2 ni 3, Yesu Kristu walemesheluwu wahempwili yipompelu yitanu nayiyedi yakuAsia Minor. Ichi chimwenu chamwekeshaña nawu Kristu wamonaña yaaku yawantu ejima hamuntu hamuntu. Mpinji jikwawu watenaña niyuma yinakuzatika nawa watenaña antu nikuyihameka hela kuyifumba mwatelela. Chumichi chamwekeshañadi? Ichi chimwenu chalumbuluka nawu, yipompelu yitanu nayiyedi yemenañaku akwaKristu awayishewa kufuma mu 1914, nawa kufumba kwafumbiluwu iyi yipompelu kwakwashaña yipompelu yejima yawantu jaNzambi makonu mwahita iseki dejima. Dichi tunateli kuhosha netu Yehova nakulombola antu jindi chikupu kuhitila mudi Mwanindi. Tunateli kuhetelamu ñahi muniwu wunlomboli?

12. Tunateli kumwiteja ñahi Yehova kutulombola munjila?

¹² Njila yimu yitunateli kuhetela muwunlomboli waYehova wawuwahi hikudiza halwetu. Yehova watulejaña kufumba  kwakuwahi kwamuNsona kuhitila munyikanda yasonekaña izanvu danduñu wamaana nikashinshi. (Mat. 24:45) Hakwila nawu tuhetelumu, twatela kwikala nampinji yakudiza nikuzatisha yuma yitwadizaña. Kudiza nkawetu diyi njila yazatishañayi Yehova ‘hakutulombola kulonda tubuli kudimbuka.’ (Yuda 24) Komana mwadizahu dehi nsañu munyikanda yetu yamwekeni neyi kwiji asonekeleli enu? Itejenu kufumba nenu kunakufuma kudi Yehova. Chochinateli kuyichintayi ibwambu denu hachifwiji kulonda mwiluki nenu nakukeña kuyileja nsañu, Yehova nateli kuzatisha spiritu yindi yajila kuyileja enu niantu amakwawu adi neyi enu kulonda muhimpi yililu yenu. Twamwitejaña Yehova kutulombola munjila kuhitila mukwiteja wunlomboli waspiritu. (Tañenu Masamu 139:23, 24.) Chumichi chatela kutuleñela twiluki chitwadizaña.

13. Muloñadi chichawahila kushinshika hachaaku chitukweti chakudiza?

¹³ Neyi tuzatisha mpinji yeneni kuyisela hitunateli kwikala nampinji yashikila yakudiza nkawetuku. Mana kwetu wumu wahosheli nindi: “Chaswayi kutachika kujiñujoka kudiza nkawetu. Yisela yinasweji kuvula makonu kubadika chichadiña nawa yapela wuseya kubadika chiyadiña hakusambila. Yidi hayisanji yanyivwimbimbi, hakompyuta nihajinshiña. Yinatandi kwejima.” Neyi kubabala nehi, tunateli kutachika kumanisha mpinji yeneni kuyisela nkumininaku hitukwikala nampinji yakudiza nkawetuku. (Efwes. 5:15-17) Dichi wejima wetu twatela kudihula netu: ‘Kapampa kañahi kinekalaña nampinji yakudiza chikupu Izu daNzambi? Komana nadizaña hohu chiña neyi nidi nampanji hela kuloñesha nsañu yakudiza hakupompa?’ Neyi dichitwelaña hadaha tunateli kuzatisha chiwahi mpinji yitwatanjika yakudifukula kwachisaka hela yakudiza nkawetu hakwila tulemeshi chikupu maana akuspiritu atuloñeshelayi Yehova kulonda yakatwamwini.—Yish. 2:1-5.

TOMIKAÑA KUHITILA MUKUTUKOLESHA

14. Indi Nsona jamwekeshaña ñahi nawu Yehova weluka chitwatiyaña?

¹⁴ Davidi wamweni kukala kwakuvulu muchihandilu chindi. (1 Sam. 30:3-6) Mazwindi onenawu amwekeshaña nawu Yehova welukili chikupu chatiyileñayi. (Tañenu Masamu 34:18; 56:8.) Nzambi weluka chitwatiyaña anetu nawa. Yehova wakundamaña kwakwihi nanetu neyi ‘tunabaluki nyichima’ hela neyi ‘spiritu yinachikeki puchi.’ Nsañwiyi yatela kutukundeja neyi chiyamukundejeli Davidi wembili nindi: “Nukutiya kuwaha, Nukuzañalala naluwi lweyi; muloña wamweni yihuñu yami; welukili munamwenaña kukala.” (Mas. 31:7) Ilaña Yehova welaña yuma yayivulu kubadika hakumona hohu yihuñu yetu. Watukundejaña nikutukolesha. Njila yimu mwatukoleshelañayi hikupompa kwawakwaKristu.

15. Chumanyi chitwatela kudizila kuchuma chamumwekeneni Asafwi?

¹⁵ Kuwaha kumu kutwadiluñishaña hamuloña wakupompa kwamwekenaña muchuma chamumwekeneni ñimbi yamasamu Asafwi. Asafwi watachikili kujinoka kulema kwakumukalakela Nzambi muloña  wakushinshika yuma yatama yamweneñayi. Asafwi wazeyeli chikupu. Walumbulwili chatiyileñayi ñane: “Muchima wami mwivumu wadiñi nakulwisha hohu, natiyili muchima mwivumu lezu.” Kwasheli hohu hanti chiña walekeli kumukalakela Yehova. Chumanyi chamukwashili Asafwi kumona yuma munjila yayiwahi? Wahosheli nindi: “Nichineñilili mumalala aNzambi.” Watachikili kutoñojoka munjila yayiwahi hakwikala hakachi kawakwawu akwakudifukula aYehova. Welukili nindi kuluña kwaluñileñawu antu atama kwakapinji kantesha hohu, nawa Yehova wakaleta wuñanji. (Mas. 73:2, 13-22) Anetu mpinji jikwawu tunateli kutoñojoka neyi Asafwi. Kukala kutwamonaña mukanu kaayi kaSatana kunateli kutuzeyesha. Kupompa nawamana kwetu kwatuzañaleshaña nawa kwatukwashaña kumukalakela Yehova namuzañalu.

16. Chakutalilahu chaHana chinateli kutukwasha ñahi?

¹⁶ Neyi kukala kudi muchipompelu kwayikañeshaña kuya nakupompa mukwiladi? Hadaha mwalekeli kuzata mudimu wumwadiñi nawu muchipompelu nawa mwatiyaña nsonyi, indi kwiji mwatiyañanaña wanyi namana kwetu hela muhela. Neyi dimu, chakutalilahu chaHana chinateli kuyikwasha chikupu. (Tañenu 1 Samweli 1:4-8.) Anukenu nenu kukala kwadiña muchisaka namuhadi nindi Penina kwamuneñesheleña nankashi. Watiyileña kutama nankashi sweje-e dinu hampinji yayileñawu nachisaka nakuhana mulambu kudi Yehova kuShilo. Hana waneñeleña nankashi chakwila ‘wadilileña hohu kudyaña nawa nehi.’ Ilaña hetejeli chumichi chimukañeshi kudifukula kudi Yehovaku. Yehova wamweni kashinshi kindi nawa wamukiswilili.—1 Sam. 1:11, 20.

17, 18. (a) Munjilanyi mwatukoleshelañawu hakupompa kwachipompelu? (b) Mwatiyaña ñahi hakwakama kwatwakamenañayi Yehova hakwila nawu yakatwamwini?

¹⁷ AkwaKristu makonu atela kwimbujola chakutalilahu chaHana. Twatela kupompaña mpinji yejima. Neyi chitweluka, kupompa kwatukoleshaña nankashi. (Heb. 10:24, 25) Kukeña kwatukeñawu akwetu akwaKristu kwatukoleshaña. Yuma yikuhoshawu mumpanji hela hakwakulahu hakupompa yinateli kutushika hamuchima. Neyi tunakuhanjeka henohu kanda tutachiki kupompa nihakukumisha, mukwetu mukwakwitiya nateli kututiyilila chitukuhosha hela kutuleja mazu akukundeja. (Yish. 15:23; 17:17) Hampinji yitunakumwimbila Yehova kamina, tunateli kuzañalala hama. Sweje-e dinu neyi ‘tunakutoñojoka yuma yayivulu,’ dihitwakeñaña kutukolesha kwatukoleshañawu hakupompa. ‘Kukundeja kwatukundejañayi’ Yehova neyi tunayi nakupompa kwatukwashaña kuumika nikutwalekahu kwikala ashinshika.—Mas. 94:18, 19.

¹⁸ Hamuloña wakubatama mudi Yehova chatuleñelaña kutiya neyi chatiyiliyi ñimbi yamasamu Asafwi, wamwimbilili Yehova nindi: “Wunankwati kuchikasa chami chachidiilu. Wakanlombolaña, wakanlejaña.” (Mas. 73:23, 24) Twasakililaña hama hakwiluka netu Yehova watuhembaña kulonda yakatwamwini.

[Malwihu aKuzatisha haKudiza]

[Mwevulu wudi hefu 28]

Anenu nawa ayikoka kudi Yehova

[Mwevulu wudi hefu 30]

Atuhembaña kuhitila mukuzatisha kufumba kwaNzambi

[Mwevulu wudi hefu 31]

Kukolesha kwatukoleshañawu kwatukwashaña kuumika