Yehova Weluka Chakupulwisha Antu Jindi

‘Yehova weluka chakupulwisha akwakumwakama mukweseka.’—2 PET. 2:9.

MULOÑADI CHITUNATELI KUKUHWELELA NETU YEHOVA:

․․․․․

Welukaña mpinji yikamwekana yuma hakwila nawu yashikiji yuma yafuukulayi?

․․․․․

Wakazatisha ñovu jindi kulonda yakakwashi antu jindi?

․․․․․

Weluka chikamwekana yuma hampinji yalukadi lwasweja?

1. Yumanyi yikamwekana hampinji ‘yalukadi lwasweja’?

 WUNSOMPESHI waNzambi wakujilumuna kaayi kaSatana wukenza chakukasumwisha. (1 Tesa. 5:2, 3) Chikenza “ifuku daYehova deneni” antu hamaseki akekala mulukadi lwalweni. (Zef. 1:14-17) Dakekala ifuku dayihuñu chikupu. Yikekala mpinji yalukadi ‘lwakwila kufumisha kukutachika kwetuña kushika nikulelu, kanda alumonañahu dehi.’—Tañenu Matewu 24:21, 22.

2, 3. (a) Chumanyi chakamonawu antu jaNzambi hampinji ‘yalukadi lwasweja’? (b) Yumanyi yatela kutukolesha kutalisha hayuma yikamwekana kumbidi?

² Chikela neyi “lukadi lwasweja” hilukuya nakumana, antu jaNzambi akayilukuka kudi “Gogi wamwituña daMagogi.” Haniyi mpinji, ‘chendu cheneni chanjita yasweja kuvula’ chakalukuka antu jaNzambi “neyi ivu dikubuta ituña wi-i.” (Ezek. 38:2, 14-16) Kwosi chipompelu chawantu chikatwesha kwamwina antu jaYehova. Nzambi hohu diyi wakayipulwisha. Indi antu jaYehova akeladi neyi hiyakujaha ayilumbu jawu?

³ Neyi wudi kambuña aYehova, komana wakuhwelela neyi Yehova wakapulwisha antu jindi hampinji yalukadi lwasweja? Kapostolu Petulu wasonekeli nindi: ‘Yehova weluka chakupulwisha akwakumwakama mukweseka, weluka kusweka abula kuloña mukubabesha kulonda akashiki kwifuku dakusompesha.’ (2 Pet. 2:9) Kutoñojoka hanyidimu yaYehova yakunyima yakupulwisha kunateli kutukolesha hayuma yikamwekana kumbidi. Tushinshikenu hayakutalilahu yisatu yikutuleñela kukuhwelela ñovu yaYehova yakupulwisha antu jindi.

KUPULUKA DIBAJI DAMUKAAYI KEJIMA

4. Mudimwinyi wakeñekeleña kuzatewa henohu Dibaji kanda dinzi?

⁴ Chatachi shinshikenu hansañu yaDibaji damumafuku  aNowa. Hakwila nawu chuma chafuukwiliyi Yehova chishikijewi, chadiña chalema kuhemba mpinji. Mudimu walema wakutuña watu wateleleli kumana nawa Nowa wateleleli kwiñija atunyama muwatu henohu dibaji kanda. Nsañu yamumukanda waKutachika yamwekeshaña nawu Yehova hamulejeli Nowa kutuña watu mwaka dinu yafuukuluhu mpinji yakaletayi dibajuku. Nzambi wadi kuleta Dibaji chakubula kwakama nindi mudimu wakutuña watu wukulaba. Henohu kanda yamuleji Nowa nsañu yakutuña watu, Nzambi wadiña watoñola dehi mpinji yakuleta Dibaji. Tuneluki ñahi chumichi?

5. Chumanyi chashimwiniyi Yehova hansañu yasonekawu haKutachika 6:3, nawa mwakanyi washimwiniyi chumichi?

⁵ Bayibolu yatulejaña nawu Yehova washimwini chuma chafuukwiliyi mwiwulu. Kwesekeja naKutachika 6:3, wahosheli nindi: ‘Spiritu yami hiyikakabakanaña namuntu nyaka yejimaku, muloña niyena kwindi himuntu hohu, ilaña nyaka yindi yakashika munyaka nkulakaji namakumi ayedi.’ Bayi neyi watalishili kuyaaka yikahandaña antuku. Yehova wateneneña mpinji yakafumishayi antu ejima atama hamaseki. * Chineli Dibaji datachikili mu 2370 B.C.E., tunateli kuhosha netu Nzambi washimwini chumichi mu 2490 B.C.E. Hayina mpinji Nowa wadiña nayaaka 480 yakusemuka. (Kutach. 7:6) Chimwahitili yaaka 20, muchaaka cha 2470 B.C.E., ‘Nowa wavweli Shemi’ kuhiñahu wavweli Hami niYafweta. (Kutach. 5:32) Kwasheli yaaka kwakwihi nankulakaji hakwila Dibaji ditachiki, ilaña Yehova wadiña kanda yamuleji Nowa mudimu walema wateleleli kuzatayi hakupulwisha chisaka chawantu. Nzambi wadi kuhembelela nakushika mpinjinyi hakwila yamuleji Nowa?

6. Mpinjinyi yamulejeluwu Nowa kutuña watu kudi Yehova?

⁶ Chakadi nikujina Yehova wahembeleli hadi yaaka yayivulu hakwila yamuleji Nowa yuma Yakeñeleña kwilayi. Muloñadi chitukuhoshela muniyi njila? Nsañu yonenawu yamwekeshaña nawu anyana kaNowa adiña akula dehi nawa adiña asumbula dehi hampinji yamulejeluwu Nowa kudi Nzambi kutuña watu. Yehova wamwilili nindi: “Munatiyañani naneyi nukukoleshamu; wakeñila muwatu, nineyi, nianyaneyi, niñodeyi, niañodi jawanyaneyi hamu naneyi.” (Kutach. 6:9-18) Chamwekana neyi Nowa amwinkeli mudimu wakutuña watu henohu kunashali dehi yaaka 40 hela 50 hakwila nawu Dibaji ditachiki.

7. (a) Indi Nowa nichisaka chindi amwekesheli chikuhwelelu munjilanyi? (b) Kwasheli mafuku añahi hakwila Nzambi yamuleji Nowa nindi Dibaji keña ditachiki?

⁷ Hampinji yatuñileñawu watu, Nowa nichisaka chindi atela adiña nakudihula chakashikijayi Nzambi chuma chafuukwiliyi nimpinji yakatachika Dibaji. Hela chakwila elukili wanyi yuma yejimiyi, hiyalekeli kutuña watuku. Nsona yashimuna nawu: “Dichi cheliliyi Nowa; mwejima mwamulejeliyi Nzambi dimu mweliliyi.” (Kutach. 6:22) Nkumininaku Yehova wamulejeli Nowa nindi kunashali mafuku atanu nayedi hakwila Dibaji ditachiki nawa Nowa nichisaka chidi adiña nampinji yeneni yakwiñija tunyama muwatu. Dichi yuma yejima ayiloñesheli chiwahi chelili makela amwiwulu enzunuki “mwaka washikiliyi Nowa munyaka makulakaji atanu nadimu, mukakweji kamuchiyedi, mwifuku damwikumi nakatanu nakayedi dakakweji.”—Kutach. 7:1-5, 11.

8. Indi nsañu yaDibaji yatuleñelaña ñahi kukuhwelela chikupu netu Yehova weluka kupulwisha antu jindi?

⁸ Nsañu yaDibaji yamwekeshaña hatooka to-o nawu Yehova hiMukwakuhemba  mpinji nawa Mukwakupulwisha. Chitunakuswila kwakwihi nakukuma kwanyaka yinu, tunateli kukuhwelela netu yuma yejima yafuukulayi Yehova yikashikijewa hampinji yindi yatoñolayi, ‘hetañwa hela mpinji’ yayeni.—Mat. 24:36; tañenu Habakuki 2:3.

AYIPULWISHILI HAKALUÑALWIJI KACHINANA

9, 10. Indi Yehova wazatishili ñahi antu jindi hakwila amashidika awaEjipitu afwi mumuhetu?

⁹ Nsañu yaDibaji yinatudizishi nawu Yehova weluka chakuhemba mpinji kulonda yashikiji yuma yafuukulayi. Chakutalilahu chamuchiyedi chitukudiza chamwekeshaña chuma chikwawu chikutuleñela kumukuhwelela Yehova netu wapulwishaña antu jindi: Wakazatisha ñovu jindi jasweja kulonda yakashikiji yuma yafuukulayi. Eñañi, Yehova wukweti ñovu yakupulwisha ambuñindi nawa mpinji yikwawu wayizatishili kulonda ayilumbu jindi afwi mumuhetu. Dicheliliyi hampinji yalubwiliyi aIsarela muwunduñu muEjipitu.

¹⁰ A Isarela afumini muEjipitu hadaha adiña antu akushika kumamiliyoni asatu. Yehova wamulejeli Mosi kuyilombola munjila yaletesheli Fwaro yatoñojoki nindi anajimbali. (Tañenu Kwidika 14:1-4.) Fwaro welukili wanyi nindi anayiti muhetu, walombweli amashidika indi kulonda akupishi adiña anduñu jindi nakuyijikilila haKaluñalwiji Kachinana. Amwekeni neyi kwosi kwakutemukila. (Kwid. 14:5-10) Kafwampi aIsarela hiyadiña muwubanji wudi wejimaku. Muloñadi? Muloña Yehova wadiña kwakwihi nakuyamwina.

11, 12. (a) Indi Yehova wayikwashili ñahi antu jindi? (b) Chumanyi chafuminumu, nawa iyi nsañu yatudizishañadi hadi Yehova?

¹¹ “Chishimi chevu” chalombweleña aIsarela chayili kunyima yawu nakujikilila amashidika aFwaro adiña nakuyilondela nakuyisha mumwidima. Hela chochu, ichi chishimi chayitoñekeleli aIsarela chejeji muchihayamisha. (Tañenu Kwidika 14:19, 20.) Nkumininaku Yehova wambwili kaluñalwiji hakachi nampepela yañovu yakumusela, “womishili kaluñalwiji  hikukwikala maseki awuma.” Chakadi nikujina hahitili mpinji yeneni hakwila yeli mwenimu muloña nsañu yahosha nawu: ‘Chimwahitili mpinji yeneni anyana kaIsarela ayili mukachi kakaluñalwiji nakwenda hamaseki awuma.’ A Isarela endeleña chovu chikupu kubadika makalu anjita amashidika aFwaro. Ilaña aEjipitu hiyatwesheli kuyiwanaku muloña Yehova wadiña nakuyilwila aIsarela. “Wakabakesheli njita yawaEjipitu. Wayizokweleli tufumbu twakumakalu awu, hiyakukabakana nakuyendesha.”—Kwid. 14:21-25.

¹² Chelili aIsarela ejima anazambuki dehi nakuya mwishinadi, Yehova wamulejeli Mosi nindi: ‘Ololaku chikasa cheyi hewulu dakaluñalwiji kulonda menji afunti cheñi hadi aEjipitu, nihamakalu awu, nihadi antu awu akwenda hatuwalu.’ Chelili amashidika nawu atemuki menji enjileña, “Yehova wayilukumwini aEjipitu mukachi kakaluñalwiji.” Hiyadiña nakwakutemukilaku. “Hikwasheli hoku muntu niwumuku.” (Kwid. 14:26-28) Dichi Yehova wadimwekesheli nindi wukweti ñovu yakupulwisha antu jindi mukukala kwejima.

APULUKILI KUJILUMUKA KWAYERUSALEMA

13. Nshimbinyi yaheniyi Yesu, nawa atumbanji twindi adihwileña nawudi?

¹³ Yehova weluka chikupu chikamwekana yuma hakwila nawu yashikiji yuma yafuukulayi. Iyi nsañu ayikonkomwena muchakutalilahu chamuchisatu chitukushinshika: kukuchika kwaYerusalema muyaaka nkulakaji yakusambila. Yehova wazatishili Mwanindi hakuyileja akwaKristu ashakamineña muYerusalema nimuYudeya chakupuluka henohu musumba kanda awujilumuni mu 70 C.E. Yesu wahosheli nindi: “Chimwakamona chishimashima chakaletesha mahembi, chanatenuwu kudi kaprofwetu Danyeli, chinemani dehi mwajila; . . . henohu antu akekala muYudeya akatemukili kumapidi.” (Mat. 24:15, 16) Indi atumbanji aYesu adi kwiluka ñahi nawu iwu wuprofwetu wunakujikijewa?

14. Yumanyi yamwekeni yaletesheli mazu aYesu alumbuluki chikupu?

¹⁴ Chimwahitili yaaka, mazu aYesu alumbulukili chikupu. Mu 66 C.E., amashidika awaRoma alombweleñawu kudi Cestius Gallus enjili muYerusalema nakukañesha aYudeya adiña nakudikaña. Chelili aYudeya akwakudikaña ateneneñawu nawu Atuzeloti nawu ayi nakuswama mutembeli, amashidika awaRoma atachikili kuhumuna mpwembu yatembeli. AkwaKristu ashinshika elukili chikupu mwatalishili iyi nsañu: Amashidika awusenji asendeli jimpandela jakupesha nachu (“chishimashima”) emeni mutembeli yamuYerusalema (“mwajila”). Iyi diyi mpinji yateleleli atumbanji twaYesu ‘kutachika kutemukila kumapidi.’ Hanu dinu adi kufuma ñahi mumusumba wakuchikiluwu? Chuma chakadi kukuhwelela chadiña kwakwihi nakumwekana.

15, 16. (a) Nshimbinyi yahaniniyi Yesu nawa muloñadi chichalemena kudi atumbanji twindi kuyovwahila? (b) Indi kupuluka kwetu kwakashindamena hankahi?

 ¹⁵ Chakadi muloña wudi wejima, Cestius Gallus nimashidika afumini muYerusalema. Atuzeloti atachikili kuyikupisha. Chineli amashidika afuminumu, atumbanji twaYesu awanini mpinji yakutemuka. Yesu wayilejeli chakubula kuhita mumbadi nindi ashiyi maheta awu nakutemuka chakubula kuumba mpinji. (Tañenu Matewu 24:17, 18.) Komana akeñekeleña kwila mwenimu? Eña. Chimwahitili mafuku Atuzeloti afuntili nakutachika kukanjikija antu amuYerusalema niYudeya kulonda niwena adikañi chimu nawu. Yuma yatachikili kutaminaku mumusumba chatachikiluwu mazanvu awaYudeya kulwisha nawu ayuuleña. Chakalili nankashi kutemuka mumusumba. Chafuntiluwu aRoma mu 70 C.E., antu hiyatwesheleña kutemukaku. (Luka 19:43) Antu adiña nakushintajala ayikwatili. AkwaKristu ovwahilili nshimbi jaYesu jakutemukila kumapidi apulukili. Adimweneni namesu kapu nawu Yehova weluka chakupulwisha antu jindi. Chumanyi chitukudizila kuniyi nsañu?

¹⁶ Chitunakuswila kwakwihi nampinji yalukadi lwasweja, akwaKristu atela kutiyilila nshimbi jaMwizu daNzambi nikuloñesha kwindi. Chakutalilahu kufumba kwaYesu ‘kwakutemukila kumapidi’ kukweti mukwalumbulukila makonu. Tuneluki wanyi chitwakatemuka. * Hela chochu, twakuhwelela netu Yehova wakatuleja chikupu nshimbi jindi neyi mpinji yakuyilondela yinashiki dehi. Chineli kupuluka kwetu kwashindamena hakwovwahila, chikuwaha neyi tudihula netu: ‘Novwahilaña ñahi nshimbi jahanañayi Yehova kudi antu jindi makonu? Nashintajalaña kwovwahila tahindi nanyakalaña?’—Yak. 3:17.

ANATUKOLESHI HAYUMA YIKAMWEKANA KUMBIDI

17. Indi wuprofwetu waHabakuki wamwekeshañadi kutalisha hakulukuka kwakalukukawu antu jaNzambi?

¹⁷ Ichi dinu tuhanjekenu hansañu yakulukuka kwaGogi kwatenawu hakusambila. Muwuprofwetu wadifwanaku, Habakuki wahosheli nindi: ‘Natiyili, mwivumu muzaala nikuzaala, nyivumbu yami yahenyeni nezu dinatiyili; mumafwahami mweñilili kutoka, nadiñi nakuzaala kunashakamini. Hela chochu, nukuduñumika nzo-o, nakuchiñilila ifuku dayihuñu, Nzambi wakayiwana antu akeñila mwituña dindi nanjita.’ (Hab. 3:16) Hakutiya hohu nsañu yakulukuka kwakalukukawu antu jaNzambi kwaletesheli kaprofwetu kuzaala mwivumu ninyivumbu nikubula ñovu. Chatiyiliyi Habakuki chamwekeshaña chitwakatiya hampinji yikatulukukawu kudi Gogi nialunda nindi. Hela chochu, kaprofwetu wadiwunjikili nakuhembelela ifuku daYehova deneni, nakukuhwelela nindi Yehova wakapulwisha antu jindi. Anetu nawa tunateli kumukuhwelela Yehova.—Hab. 3:18, 19.

18. (a) Muloñadi wutwatela kubula kutiyila woma ayilumbu jetu anakwinza nakutulukuka? (b) Nsañwinyi yitwakadiza muchibaaba chinalondeluhu?

¹⁸ Chakubula nikujina, iyi yakutalilahu yisatu yitunadizi yinamwekeshi nawu Yehova weluka chakupulwisha antu jindi. Wakashikija yuma yafuukulayi nikushinda ayilumbu jindi. Hakwila nawu twakapuluki ifuku daYehova deneni twatela kutwalekahu kwikala ashinshika ndo-o nikunsa. Indi Yehova watukwashaña ñahi kuhemba kashinshi ketu makonu? Iyi diyi nsañu yitukadiza muchibaaba chinalondeluhu.

[Tumazu twaheshina]

[Malwihu aKuzatisha haKudiza]

[Mwevulu wudi hefu 24]

Komana aIsarela adiña muwubanji wudi wejima kudi amashidika aFwaro?