“Babelenu Iluñi dawaFwarisi”

Yesu wasoñamishili atumbanji twindi nindi: “Babelenu iluñi dawaFwarisi, wowu wufwikiji.” (Luka 12:1) Awa mazu akusoñamisha ahosheliyi Yesu ayisonekeli cheñi kudi Matewu nawa watukwasha kwiluka nawu wahishileña “ntañishilu” yawaFwarisi.—Mat. 16:12.

Mpinji yikwawu, Bayibolu yazatisha “iluñi” hela yisiti kuyuma yinateli kutamisha muntu. Chakadi nikujina, ntañishilu yawaFwarisi niyililu yawu yaleñeleli antu adiña nakuyitiyilila kwila yuma yatama. Muloñadi ntañishilu yawaFwarisi chiyataminini?

1 Afwarisi adeteleña hantulu nawu aloña, nawa asekesheleña atuzweñi.

Yesu wahosheli haniyi yililu yawu yatama muchishimu chindi chimu. Wahosheli nindi: “KaFwarisi hakwimana nakudilombela mumuchima windi nindi, Eyi Nzambi, nakusakilili chinabuli kwikala neyi antu acheñi, akwanyilami, aheña, ayibumbi, hela tuhu neyi iwu nsonkeshi iwu. Najiñaña nanzala yakuleka kudya hamulungu kayedi, hamulungu kayedi; nalambulaña yamwikumi yayuma yinahetaña yejima. Ilaña nsonkeshi hakwimana kwakulehi, kumona jakufumbula mesu indi atali kwiwulu nehi; ilaña hakudetola hantulu yindi nindi, Eyi Nzambi, antiyili luwi, ami mukwanshidi.”—Luka 18:11-13.

Yesu wahamekeli yililu yaniwu nsonkeshi yakudikehesha, wamulejeli nindi: “Nukuyileja nami, yeniwu muntu diyi wakunkumukili kwitala dindi nakuyiña, bayi iwu mukwawuku; muloña muntu wukuditohesha akamukehesha, ilaña muntu wukudikehesha akamutohesha.” (Luka 18:14) Hela chakwila ansonkeshi ayilukili nawu hiyadiña nakashinshuku, Yesu wakeñeleña kukwasha antu atiyilili yuma yatañishileñayi. Ansonkeshi ayedi aMatewu naZakewu ekalili atumbanji twindi.

Indi neyi tutachika kutoñojoka netu twayibadika akwetu hamuloña wawuswa watwinkayi Nzambi hela kukooleka kutukweti indi kwiji hamuloña wayiluwa nikuzeyazeya kwawakwetu? Bayi tutoñojokaña muniyi njilaku muloña Nsona yahosha nawu: “Kukeña kwadiwunjikaña, kukweti niluwi; kukeña hikwahetaña ichimaku, kukeña hikwadinkaña wantaku; hikwaditoheshañaku; hikwelaña chuma chabula kutelaku; hikwakokwelaña kwindi hohuku; hikwanyakalaña kuzuwaku; hikwafuukwilaña mukwawu chuma chatamaku; hikwazañalalaña nayuma yabula kuloñaku, kwazañalalaña nansañu yalala.”—1 Kor. 13:4-6.

Twatela kwikala nayililu neyi yadiña nakapostolu Pawulu. Hanyima yakuhosha nindi “Kristu Yesu wenjili munu mwishina nakwamwina akwanshidi,” Pawulu wabombeleluhu nindi: “Hadi akwanshidi, yami nabadikahu.”—1 Tim. 1:15.

Malwihu akutoñojokahu:

Komana neluka nami nidi mukwanshidi nawa nateli hohu kupuluka hamuloña waluwi lwaYehova lwabadika? Komana namona yaaka yayivulu yinazati nakashinshi, kukooleka kunukweti mukuloñesha kwaNzambi hela wuswa wami neyi nabadika akwetu?

 2 Afwarisi akeñeleña kutiyisha akwawu kuwaha kuhitila mukudimwekesha hatooka nawu aloña. Akeñeleña kuya mpuhu nikuyitumba majina alema.

Ilaña Yesu wasoñamishili nindi: “Nyidimu yawu yejima ayililaña yowu kwila nawu ayimoni, kudi antu, enda atohesha nyikanda yakumahamawu, ninyikundulu yakumahinawu. Kuyawija akeña kushakama halema, nimumashikola akeña kushakama hamatanda alema. Akeña kuyimwosha kuwulandilu, akeña kuyitena kudi antu nawu Rabi.” (Mat. 23:5-7) Yililu yawu yambukili chikupu nayililu yaYesu. Hela chakwila wadiña Mwana kaNzambi wawanina, wadiña wadizoza hama. Chelili iyala wumu yamuteni nindi “muwahi,” Yesu wahosheli nindi: “Wukuntenenadi neyi muwahi? Hosi muwahuku, chiña Nzambi hohu.” (Maku 10:18) Hampinji yikwawu, Yesu wawelesheli nyendu yawatumbanji twindi, dichi wayinkeli atumbanji twindi chakutalilahu chachiwahi chakudizoza.—Yow. 13:1-15.

MukwaKristu walala watela kuzatila akwawu akakwitiya. (Ŋal. 5:13) Sweje-e dinu antu anakukeña kwikala ankoñi muchipompelu atela kuzatila akwawu. Chidi chachiwahi ‘kukeña mudimu wakutala akwenu,’ ilaña mwatela kufuukulahu kuzata iwu mudimu wakukwasha antu amakwawu chakufuma hamuchima. Iwu ‘mudimu’ bayi neyi hichifulu chakutuumbakenahuku. Amana kwetu azataña neyi aeluda atela kwikala ‘adizoza mumuchima,’ neyi chadiñayi Yesu.—1 Tim. 3:1, 6; Mat. 11:29.

Malwihu akutoñojokahu:

Komana mwakeñaña antu akweti yifulu muchipompelu, muloña munakukeña nenu akayinki chifulu hela kukooleka kukwawu? Komana nafwilaña hohu kuzata nyidimu yaNzambi kulonda añiluki nikunhameka? Komana nakeñaña kudimwekesha kudi akwetu?

 3 Antu akañenyeña kulondela Nshimbi hamuloña wayidika nitushidikilu twawaFwarisi.

Nshimbi yamwinkeluwu Mosi yalumbulwileña chateleleluwu aIsarela kudifukula kudi Yehova. Hela chochu, hiyayilejeli yuma yejima yateleleli kulondelawuku. Chakutalilahu, Nshimbi yakaanishili antu kuzata haSabata, ilaña hiyalumbulwili chikupu nyidimu yateleleli kutazawu nikubula kuzataku. (Kwid. 20:10) Dihafumini aFwarisi kuleta yidika nitushidikilu twawu muloña atoñojokeli nawu Nshimbi jaYehova hijashimwini yuma yayivuluku. Hela chakwila Yesu wakaanini yidika yawaFwarisi, ilaña walondeleleña Nshimbi jamwinkeluwu Mosi. (Mat. 5:17, 18; 23:23) Welukili chaletesheli Nzambi yashuku Nshimbi. Yesu welukili chahosheleña Nshimbi nawa nindi Nzambi wakeñeleña antu amwekesheña luwi niwushona. Wadiña nakuyitiyila luwi hela chakwila atumbanji twindi amuneñesheleña. Chakutalilahu, hela chakwila walejeli apostolu indi asatu kutona nikusoñama hefuku damukwatiluwu, ilaña akamineña mutulu. Hela chochu, wayitiyilili luwi nakuyileja nindi: “Chalala spiritu yinakeñi, ilaña mujimba wunazeyi.”—Maku 14:34-42.

Malwihu akutoñojokahu:

Komana nafwilaña kutuña nshimbi jakala nikukanjikija antu kulonda ajovwahileña? Komana nakeñaña nami akwetu elaña yuma yikubula kutweshawu kwila?

Toñojokenu chaambu chadiña hantañishilu yaYesu nayawaFwarisi. Kuduhu yuma yimwatela kuzatilahu kulonda mwikali neyi Yesu? Neyi munayiwani, kwila muzatilahu nehi?

[Mwevulu wudi hefu 28]

A Fwarisi avwalileña tuyikasha twanyanya mwadiña nsona.—Mat. 23:2, 5

[Nyevulu yidi hefu 29]

Kwambukaku nawaFwarisi adeteleña hebwambu, aeluda akwaKristu akalakelaña akwawu nakudizoza

[Mwevulu wudi hefu 30]

Komana mudi naluwi neyi Yesu tahindi mwakeñaña akwenu kwila yuma yikubula kutweshawu?