Kufuma Munkalaña jetu

“Inakudiluñisha Mudimu Wami WawuKolopota Hefuku Hefuku”

MU 1886, nyikanda yaMillennial Dawn, Volume I nkulakaji yimu, ayifumishili muBible House (Beteli) muAllegheny, Pennsylvania, U.S.A., yakukasa nakuyitwala kumusumba waChicago, Illinois. Mana kwetu Charles Taze Russell wakeñeleña kuhana iyi nyikanda yayiha mumasitolu mwalandishañawu nyikanda. Kampani yimu yeneni muUnited States yalandishileña nyikanda yahoshaña hansakililu yetejeli kutambula nyilumba yanyikanda yaMillennial Dawn nawu ayilandishiluku. Chimwahitili nyilungu yiyedi, nyikanda yejima ayifuntishili kuBible House.

Chatiyakeni nawu, ntañishi wumu wansakililu waya mpuhu wahilili nankashi hakumona nyikanda yaMillennial Dawn anayitanjiki hamu nanyikanda yindi. Watachikili kulendumoka nindi neyi iyi nyikanda akubula kuyifumishamu, wukuleja akwawu antañishi asendi nyikanda yawu niyuma yikwawu nakuyilandishila kwacheñi. Mwini kampani waneñeli hakufuntisha nyikanda yaMillennial Dawn. Haniyi mpinji, adiña aleja dehi antu amavulu muyipapilu yansañu nawu akenzi nakulanda. Ilaña ayilumbu ahitili kumbadi nakusanda chitiyañenu. Hanu dinu antu adiña nampwila yakudiza chalala atambwili ñahi iwu mukanda wawuha?

Akolopota neyi chayiteneneñawu apayiniya hayina mpinji, azatili mudimu weneni nankashi. * Mu 1881, mukaposhi kaZion’s Watch Tower ashimwini nawu anakukeña akwakushimwina ampinji yejima 1,000 atela kutandisha nyikanda yashindamena haBayibolu. Hela chakwila akolopota adiña antesha hohu, ilaña atandishili mbutu yachalala munyikanda kwejima. Mu 1897, kwakwihi nachihita chimu chanyikanda yaMillennial Dawn ayiheni nawa akolopota diwu aheni nyikanda yayivulu. Amavulu hakachi kawu atambwileña kadishelenyi kanti kakudikwasha nachu neyi ahana Kaposhi Kakutalila hela mukanda.

Indi awa akolopota ahamuka adiña anyi? Amakwawu atachikili nawansi, amakwawu henohu akula dehi. Amavulu adiña ajiki hela adisumbula akadi nyana nawa yisaka yayivulu yatachikili wukolopota. Akolopota ampinji yejima azatileña maora amavulu, akolopota akukwasha azatileña ora yimu hela ayedi hefuku hefuku. Bayi neyi ejima adiña akola hela nachihandilu chapela chakuzataku wukolopotaku. Ilaña hakupompa kweneni kwamu 1906, ejima adiña nampwila ayilejeli nawu “hiyatela kwikala ataña nankashi hela kwiluka nankashi yuma hela asweja maana hela kuhosha neyi kañeluku.”

 Muyitutu yejima, antu akalakalaña nyidimu yamaneni. Mana kwetu wumu wahosheli nindi muyaaka yitanu nayiyedi wahanini nyikanda yakushika ku 15,000. Hela chochu, wahosheli nindi, “hineñilili mudimu wawukolopota kulonda nilandisheña nyikandaku, ilaña nadiña chinsahu chaYehova nikuhakwilaku nsañu yalala.” Kudi kwejima kwahitileñawu akolopota, atumbileñaku mbutu yachalala nawa izanvu dawatudizi aBayibolu dadiña nakutohelaku.

Akulumpi jansakililu ayisupishileña akolopota, nakuyitena nawu akwakulandisha nyikanda. Watch Tower yamu 1892 yahosheli nawu: “Antu antesha hohu diwu elukili antu alala amwimeneneñaku mwanta nikwiluka kalemesha kamonañayi Mwanta mudi antu adizoza nawa adihanaña.” Neyi chahosheliyi kolopota wumu, chihandilu chawakolopota ‘hichadiña chapelaku.’ Hakwenda azatishileña nkwabilu jakola nituluwasha. Neyi chakwila mali akala, akolopota ahimpileña nyikanda nayakudya. Hanyima yakuhumisha itañwa mwiha, azeyeleña ilaña awa akwakushimwina afuntileña mumatenti nikumatala awu namuzañalu. Itemba dawaKolopota, motoka yadiña nakaditala kayikwashileñaku kuhemba mpinji nimali. *

Kutachika haKupompa Kweneni kwadiñaku mu 1893 muChicago, muprogiramu yeniyi mwadiña nichibalu chawakolopota adimena. Muchibalu chenichi ashimwineña yuma yamweneñawu, njila jazatishileñawu hakushimwina nikufumba kwakuwahi. Mana kwetu Russell ifuku dimu walejeli akwakushimwina adikitileña nindi nantentemena atela kudya yakudya yayivulu, namwaana anwa mayeli nawa neyi kunataati nankashi adileña ayisikilimu.

Akolopota akeñeleña akwawu akuzata nawu hela akushimwina nawu adikasileña muponda wakunduluka. Akolopota amaha azatileña nawakwakushimwina akuluka yitembi. Ateleleli kuyidizisha muloña kolopota wamwiha wahosheli nakuzala hakuhana mukanda nindi, “Komana himunakukeña iyi nyikandaku?” Chamuzañalu mwiniitala watambwili iyi nyikanda nawa nkumininaku wekalili muhela wapapatishewa.

Mana kwetu wumu wahosheli nindi, ‘Komana natela kuleka mudimu wami wawuwahi kulonda nihani $1,000 (mali akuAmerica) kuniwu mudimu hachaaka tahindi nitachiki mudimu wawukolopota?’ Amulejeli nawu Mwanta wukusakilila yuma yejima yiyedi, ilaña kuhana mpinji yeyi kudi Mwanta kukuleta nkisu jajivulu nankashi. Mary Hinds wamweni mudimu wawukolopota nindi “hinjila yayiwahi yakwililamu yuma yayiwahi kudi antu amavulu nankashi.” Alberta Crosby wahosheli nindi: “Inakufwila kukeña mudimu wawukolopota ifuku niifuku.”

Makonu, antu amavulu apama kuspiritu anakuzata mudimu wawukolopota achidi kwanuka iheta dawu dakuspiritu. Neyi muchisaka chenu kwosi wazatahu dehi wukolopota hela wupayiniyaku, kwila mutachikilahu muchisaka chenu nehi? Anenu nawa munateli kukeña mudimu wakushimwina mpinji yejima ifuku niifuku.

[Tumazu twaheshina]

[Mazu ekoku adi hefu 32]

“Hiyatela kwikala ataña nankashi hela kwiluka nankashi yuma hela asweja maana hela kuhosha neyi kañeluku”

[Mwevulu wudi hefu 31]

Kolopota A. W. Osei muGhana, muma 1930

[Nyevulu yidi hefu 32]

Hewulu Kolopota Edith Keen niGertrude Morris muEngland, muma 1918; heshina: Stanley Cossaboom niHenry Nonkes muUnited States, akweti yikasha mwakadi yuma mwasendeleluwu nyikanda yahaninuwu