Komana Munakumwekesha Kulema Kwayehova?

‘Twamwekeshaña lubanji lwakulema kwaYehova neyi chibanjilu.’—2 KOR. 3:18.

MUKWAKULA NENUDI?

Hela chakwila hitwawaninaku, tunateli kumulemesha ñahi Yehova?

Indi kulomba nikupompa kwawakwaKristu kwatukwashaña ñahi kumwekesha kulema kwaNzambi?

Chumanyi chikutukwasha kutwalekahu kumulemesha Yehova?

1, 2. Muloñadi chitwatela kukuhwelela netu tunateli kwimbujola yililu yaYehova?

 WEJIMA WETU twafwana anvwali jetu muyuma yimu. Dichi hitwahayamañaku neyi tutiya muntu yaleja mwana weyala nindi, ‘Eyi wafwana atata yeyi.’ Mwana wamumbanda anateli kumuleja nawu, ‘Eyi wañanukishaña amama yeyi.’ Nawa anyana avula kwimbujola yuma yelañawu anvwali jawu. Indochu etu? Komana tunateli kumwimbujola Tata yetu wamwiwulu, Yehova? Hela chakwila kanda tumumoneñahu dehi, tunateli kumona yililu yindi yayiwahi kuhitila mukudiza Izu dindi, kushinshika hayileñaleña yindi nikutoñojoka nankashi haNsona sweje-e hansañu ninyidimu yakoñeliyi Mwana kaNzambi, Yesu Kristu. (Yow. 1:18; Rom. 1:20) Anetu nawa tunateli kumwekesha kulema kwaYehova.

² Henohu Adama naEvu kanda ayileñi, Nzambi welukili chikupu nindi antu akelaña mwaya kukeña kwindi, kumwekesha yililu yindi nikumulemesha. (Tañenu Kutachika 1:26, 27.) Etu akwaKristu, twatela kumwekesha yililu yaNleñi yetu watuleñeli. Neyi twila mwenimu, tukwikala nakukooleka kwakumwekesha kulema kwaNzambi hichikweti muloña nachisemwa chetu, shikola yitwataña hela chitachi chetuku. Muloñadi? Muloña “Nzambi haakaminaña antu kumesuku; hakwila munyuza yejima, muntu wamwakamaña yena, welaña mwaloña, amutiyaña kudi Nzambi kuwaha.”—Yil. 10:34, 35.

3. Indi akwaKristu atiyaña ñahi hampinji yinakumukalakelawu Yehova?

³ AkwaKristu awayishewa amwekeshaña kulema kwaYehova. Kapostolu Pawulu onenenuwu naspiritu wasonekeli nindi: “Hakwinza etu ejima twamwekeshaña lubanji lwakulema kwaMwanta [Yehova] neyi chibanjilu, namesu akadi kubuta; twenda tubalumuka neyi chekalayi Mwanta, tufuma kulubanji lumu, tuya nikulubanji lukwawu.” (2 Kor. 3:18) Chelili kaprofwetu Mosi yafumi kuMpidi yaSinayi iku nasendi malola hakusoneka  Nshimbi Ikumi, kumeswindi kwatoñekeleña neyi chejeji muloña Yehova wahosheli naMosi. (Kwid. 34:29, 30) Hela chakwila akwaKristu kanda amoneñahu dehi chuma chamuchidiwu nawa kumesu awu hikwatoñekaña neyi chejejuku, azañalalaña nankashi neyi alejaku antu hadi Yehova, hayililu yindi nihayuma yayiwahi yakanayi antu. Kufwana yibanjilu yayikuñu yakekema yakushankulu, awayishewa nialunda nawu achiñejaña kushakama hamaseki amwekeshaña kulema kwaYehova muchihandilu chawu nimumudimu wakushimwina. (2 Kor. 4:1) Komana munakumwekesha kulema kwaYehova muyililu yenu nimunyidimu yimwazataña neyi akwakushimwina aWanta ampinji yejima?

TWAFWILAÑA KUMWEKESHA KULEMA KWAYEHOVA

4, 5. (a) Kufwana Pawulu, kukalanyi kutwamonaña? (b) Indi nshidi yatuluwañeshaña ñahi?

⁴ Hakwikala ambuña Yehova, twatela kumulemesha nikuhameka Nleñi yetu chikupu muyuma yejima yitwelaña. Hela chochu, kakavulu yuma yitwafwilaña kwila hidiyi yitwelañaku twaluwañeshaña hela chakwila twakeñaña kwila yuma yayiwahi. Pawulu niyena wadiña naniku kukala. (Tañenu Aroma 7:21-25.) Pawulu walumbulwili muloña wutwekalila naniku kukala wejima wetu nindi: “Muloña antu ejima anavulumuni, anakañanyi kushika mwashikila kulema kwaNzambi.” (Rom. 3:23) Eñañi, kuhitila mukuswana nshidi jaAdama, muchidi wamuntu wekala muwuduñu ‘wanshidi yidi neyi Mwanta.’—Rom. 5:12; 6:12.

⁵ Hanu dinu nshidi hichumanyi? Hichuma chejima chambuka chikupu nayililu yaYehova, njila jindi, nshimbi jindi ninkeñelu yindi. Nshidi yatamishaña wubwambu wamuntu naNzambi. Nshidi yakojejaña muntu kupusa chikonkwanyi, neyi chochalwezañayi chibinda kanyama nansewu. Tunateli kuputola mumushikila hela chakuluwukila. (Kuch. 15:27-31) Nshidi yajiyama nankashi mudi antu nawa yayambulaña kudi Nleñi yawu. (Mas. 51:5; Isa. 59:2; Kol. 1:21) Dichi, antu amavulu adambula chikupu kudi Yehova nawa akañanyaña kwikala nakukooleka kweneni kwakumwekesha kulema kwaNzambi. Chakadi nikujina, nshidi hichikatu cheneni chinakuyandisha antu.

6. Hela chakwila hitwawaninaku, tunateli kumulemesha ñahi Nzambi?

⁶ Hela chakwila tudi akwanshidi, Yehova ‘hiNzambi watwinkaña kuchiñeja.’ (Rom. 15:13) Watuloñeshela njila yakujiminamu nshidi, kuhitila mwifutu damuloña daYesu Kristu. Neyi tukuhwelela muniwu mulambu, hitukwikala cheñi ‘muwuduñu wanshiduku,’ ilaña tukwikala nakukooleka kwakumwekesha kulema kwaYehova. (Rom. 5:19; 6:6; Yow. 3:16) Kwikala nawubwambu wawuwahi naNzambi kukutuleñela kwikala nankisu yaYehova hayinu mpinji nawa kumbidi twakekala awanina nikutambwila wumi wahaya nyaka. Hela chakwila hitwawaninaku, tukweti kukooleka kweneni kwakutumona kudi Nzambi neyi antu anateli kumwekesha kulema kwindi!

KUMWEKESHA KULEMA KWANZAMBI

7. Chumanyi chitwatela kwiluka hakwila nawu tumwekesheña kulema kwaNzambi?

⁷ Hakwila nawu tumwekeshi chikupu kulema kwaNzambi, twatela kwiluka yiluwa yetu. (2 Kushi. 6:36) Twatela kwiluka yiluwa yetu nikuzata nañovu kulonda tuyileki hakwila nawu tutweshi kumulemesha Nzambi chikupu. Chakutalilahu, neyi tunaholokeli mumuhetu wanshidi yakutalaña nyevulu yanzekesi, twatela kwiluka netu tunakukeña wukwashu wakuspiritu nawa twatela kwihula aeluda kulonda atukwashi. (Yak. 5:14, 15) Ichi dichuma chatachi chitwatela kwila neyi tunakukeña kumulemesha Nzambi. Hakwikala akwakudifukula aYehova, twatela kutwalekahu kudishinshika nankashi kulonda tumoni neyi yililu yetu yinesekani nanshimbi jindi jaloña. (Yish. 28:18; 1 Kor. 10:12) Hichikweti muloña nayiluwa yetuku, twatela kutwalekahu  kuyitondolwela kulonda tumwekesheña kulema kwaNzambi.

8. Hela chakwila hitwawaninaku, chumanyi chitwatela kwila?

⁸ Yesu diyi hohu wakoñeli yuma yamuzañalesheleña Nzambi nawa wamwekesheli kulema kwaNzambi munjila yayiwahi. Hela chakwila hitwawanina neyi Yesuku, twatela kufwila kwimbujola chakutalilahu chindi. (1 Pet. 2:21) Yehova wamonaña chitwadikitaña nichitwafwilaña kuyilaku hambidi nawa watukiswilaña hakufwila chikupu kumulemesha.

9. Indi Bayibolu yakwashaña ñahi akwaKristu afwilaña kwila mwaya kukeña kwaNzambi?

⁹ Izu daYehova dasonekewa dinateli kutukwasha kwiluka chitwatela kumwekesha chikupu kulema kwaNzambi. Kudiza chikupu Nsona nikutoñojoka hansañu yitunatañi muBayibolu kunateli kutukwasha hama. (Mas. 1:1-3) Kutaña Nsona mpinji yejima kukutukwasha kuyilaku hambidi. (Tañenu Yakoba 1:22-25.) Kwiluka nsañu yamuBayibolu dikwakoleshaña chikuhwelelu chetu nawa kwatukwashaña kutondolwela nshidi yahamesu bwi-i nikumuzañalesha Yehova.—Mas. 119:11, 47, 48.

10. Indi kulomba kunateli kutukwasha ñahi kumukalakela Yehova chikupu?

¹⁰ Hakwila nawu tumwekeshi kulema kwaNzambi, twatela cheñi ‘kukakela mukulomba chakadi kuzeya.’ (Rom. 12:12) Twatela kulomba netu Yehova yatukwashi kulonda tumukalakeli munjila yakeñañayi. Dichi twatela kumulomba spiritu yindi yajila, kwikala nachikuhwelelu chakola, kutwinka ñovu jikutukwasha kutondolwela kweseka, nikutwinka wuswa ‘wakulumbulula mazu ansañu yalala mwayawu mwayawu.’ (2 Tim. 2:15; Mat. 6:13; Luka 11:13; 17:5) Neyi chochashindamenañayi mwana hadi tata yindi, anetu nawa twatela kushindamena hadi Tata yetu wamwiwulu, Yehova. Neyi tulomba netu yatukwashi kulonda tumukalakeleña chikupu, twatela kukuhwelela netu wukutukwasha. Bayi tutoñojoka netu kulomba kwetu kunateli kumuhilishaku. Ilaña twatela kumushimeka mukulomba, kumusakilila, kukeña wukwashu windi sweje-e neyi tunaholokeli mukweseka nikumulomba kulonda yatukwashi kumukalakela munjila yakulemesha ijina dindi dajila.—Mas. 86:12; Yak. 1:5-7.

11. Indi kupompa kwachipompelu kwatukwashaña ñahi kumwekesha kulema kwaNzambi?

¹¹ Nzambi wenka ‘nduñu wamaana nikashinshi’ mudimu wakuhemba nyikoku yindi yalema. (Mat. 24:45-47; Mas. 100:3) Izanvu danduñu dakeñaña nankashi kukwasha akwawu akakwitiya kulonda amwekesheña kulema kwaYehova. Kupompa kwatukwashaña kuhimpa chihandilu chetu etu akwaKristu, neyi chochatela kukeheshayi ‘mukwakuchima’ yakuvwala yetu kulonda yitushikili chiwahi. (Heb. 10:24, 25) Dichi twatela kushikaña swayi kukupompa, neyi twikala nachaaku chakulaba, hitunateli kuhetela muyuma yejima yatutañishañawu yikutukwasha kwikala ambuña Yehova alumbulukaku.

TUMWIMBUJOLENU NZAMBI

12. Tunateli kumwimbujola ñahi Nzambi?

¹² Neyi tunakukeña netu tumwekesheña kulema kwaYehova, twatela ‘kumwimbujola Nzambi.’ (Efwes. 5:1) Njila yimu yakumwimbujolelamu Yehova yidi yakutoñojoka neyi chatoñojokañayi yena. Neyi twila yuma yitunakukeña chamuneñeshaña hama nawa tunateli kudokwela makala akesi hamutu. Chineli ituña ditunakushakamamu dinakuyuulewa naniwu watama, Satana Diyabolu, twatela kuzata nañovu kulonda tuheli yuma yahelayi Yehova nikukeña chikupu yuma yakeñayi. (Mas. 97:10; 1 Yow. 5:19) Twatela kukuhwelela chikupu netu, njila yimu yayiwahi yakumukalakelamu Nzambi yidi yakwila yuma yejima kulonda tumulemeshi yena.—Tañenu 1 Akorinda 10:31.

13. Muloñadi chitwatela kuhelela nshidi nawa chumichi chikutuleñela kwiladi?

¹³ Yehova wahela nshidi anetu nawa twatela kuyihela. Neyi tuhela nshidi,  tukutondolwela chikupu kwila yuma yatama yinateli kutuleñela tuputoli. Chakutalilahu, twatela kutondolwela chikupu chililu chakusekesha, muloña hinshidi yikutuleñela tukañanyi kumulemesha Nzambi. (Kuhit. 13:6-9) Dichi twatela kutondolwela chikupu akwakusekesha hela muntu watwambaña nindi himana kwetu ilaña welaña yuma yamusawulaña Nzambi. Hela chakwila hiyantaña jetu, twatela kuyitondolwela. (1 Kor. 5:11) Kwosi chuma chitukuhetelamu neyi tufwilaña kuyifwisha namuloña akwakusekesha hela antu amakwawu akeñaña kuwana nyiloña mukuloñesha kwaYehovaku. Wuspiritu wetu wunateli kwikala muwubanji neyi tutachika kutaña nsañu jawu jabula kushikilamu, chili ajisoneka munyikanda chili jidi haIntaneti.—Tañenu Isaya 5:20; Matewu 7:6.

14. Neyi tukufwilaña kumwekesha kulema kwaNzambi, tukwikala nayililu yamuchidinyi nawa muloñadi?

¹⁴ Kumwekesha kukeña hinjila yimu yayiwahi yakumwimbujolelamu Tata yetu wamwiwulu. Eñañi, kufwana yena twatela kukeñañana. (1 Yow. 4:16-19) Kukeña kutwamwekeshaña hakachi ketu kwatumwekeshaña nawu tudi atumbanji twaYesu nawa ambuña aYehova. (Yow. 13:34, 35) Hela chakwila nshidi yitwaswana mpinji yikwawu yinateli kutuleñela kubula kukeñañana, twatela kutondolwela ichi chaaku nikukeña antu mpinji yejima. Neyi tukumwekeshaña kukeña nikwikala nayililu yidi neyi yaNzambi chikutukwasha kutondolwela yuma yatama nikubula kwila nshidi.—2 Pet. 1:5-7.

15. Indi kukeña kukutuleñela kwikala nawubwambu wamuchidinyi nawakwetu?

¹⁵ Kukeña kwatuleñelaña kwilila antu yuma yayiwahi. (Rom. 13:8-10) Chakutalilahu, neyi twakeña eni kwetu hitunateli kwila wuvumbi namuntu wacheñuku. Neyi twakeña aeluda nikulemesha nyidimu yawu, chinateli kutukwasha kuyovwahila nikulondela wunlomboli wawu. Anyana akeña anvwali jawu ayovwahilaña nikuyilemesha nawa hiyayihoshaña yuma yakasawuntuku. Neyi twakeña akwetu antu, hitukuyimonaña netu amukunkulwayi hela kuyihosha munjila yakasawuntuku. (Yak. 3:9) Nawa aeluda akeña nyikoku yaNzambi ayihembaña munjila yayiwahi nankashi.—Yil. 20:28, 29.

16. Indi kumwekesha kukeña kukutukwasha ñahi mumudimu wetu wakushimwina?

¹⁶ Twatela cheñi kumwekesha chililu chakukeña mumudimu wakushimwina. Hamuloña wakumukeña Yehova chikupu, hitukutiya kutama neyi antu akaana hela adiwula nsañu yitwashimwinañaku. Ilaña tukutwalekahu kushimwina nsañu yayiwahi. Kukeña kwatuleñelaña kuloñesha chachiwahi nikudikita chikupu mumudimu wakushimwina. Neyi chakwila twamukeña Nzambi chikupu niakwetu, hitukumona mudimu wakushimwina Wanta neyi himudimu hohu wutwatela kuzataku. Ilaña tukumonaña neyi hikukooleka kweneni hama nawa tukuwuzataña namuzañalu.—Mat. 10:7.

TWALEKENUHU NAKUMULEMESHA YEHOVA

17. Twahetelañamu ñahi hakwiluka netu twakañanyaña kushika mwashikila kulema kwaNzambi?

¹⁷ Antu amavulu mukaayi amonaña nawu kukoña nshidi kwatama wanyi, ilaña etu tweluka netu kwatama. Chumichi chatuleñelaña kwiluka netu twatela kuzata nañovu kulonda tubuli kwikala nayaaku yakuputola. Kwiluka netu tudi akwanshidi kwatukwashaña kudizisha chinleji chetu kulonda chituyuuleña neyi tutachika kutoñojoka hakwila nshidi muyitoñojoka nimumuchima wetu. (Rom. 7:22, 23) Mwamweni, tunateli kwikala azeya, ilaña Nzambi nateli kutukolesha kulonda twileña yuma yaloña hampinji yidi yejima.—2 Kor. 12:10.

18, 19. (a) Chumanyi chatukwashaña kulwa nawaspiritu atama? (b) Chumanyi chitwatela kufuukulahu kwila?

¹⁸ Neyi tunakukeña kumulemesha Yehova,  twatela cheñi kulwa nawaspiritu atama. Chitwa chetu chakuspiritu chatwinkayi Nzambi chatukwashaña nankashi. (Efwes. 6:11-13) Satana wazataña nañovu kulonda yahukuli kalemesha katela kuya hohu kudi Yehova. Diyabolu cheñi nakutwalekahu kuzata nañovu kulonda yakisañani wubwambu wetu naYehova. Ilaña Satana watiyaña kumuchima bwi-i neyi etu niyihita yawamayala niambanda nianyana tuhemba kashinshi ketu nikumulemesha Nzambi. Dichi tutwalekenuhu kumutuumbakesha Yehova neyi yileñaleña yamwiwulu yahosheli nawu: “Eyi Yehova wetu, eyi Nzambi yetu, wunateli kutambula kulema nimpuhu niñovu. Muloña yeyi waleñeli yuma yejima kulonda yili mwaya muchima weyi; dichi chiyekala, dichi chayileñeluwu.”—Chim. 4:11.

¹⁹ Tufwilenu kutwalekahu kwikala namuchima wakumulemesha Yehova. Watiyaña kuwaha hakwiluka nindi ambuñindi ashinshika amavulu anakuzata nañovu kulonda amwimbujoleña nikumwekesha kulema kwindi. (Yish. 27:11) Twatela kumwimbujola Davidi wahosheli nindi: “Nukukusakilila namuchima wami wejima, eyi Mwanta, eyi Nzambi yami, nukutohesha ijina deyi haya nyaka.” (Mas. 86:12) Twatalilaña ifuku ditwamba kamwekesha kulema kwaYehova munjila yawanina nikumushimeka haya nyaka. Muchidi wawantu wovwahila wakamwekesha kulema kwindi munjila yawanina. Komana munakumwekesha kulema kwaYehova Nzambi hayinu mpinji nikukuhwelela nenu kumbidi mwakamulemeshaña haya nyaka?

[Malwihu aKuzatisha haKudiza]

[Nyevulu yidi hefu 27]

Komana munakumwekesha kulema kwaYehova muniji njila?