Malwihu Kufuma Kudi Antañi

Indi kufwa kwawantu jaNzambi ashinshika ‘kwalema ñahi kumesu aYehova’?

▪ Ñimbi yamasamu wonenenuwu wembili nindi: ‘Kufwa kwawantu jindi ashinshika kwalema kumesu aYehova.’ (Mas. 116:15) Wumi wawakwakudifukula alala aYehova ejima walema nankashi kumesu indi. Ilaña mazu adi muMasamu 116 hiyanakuhosha hakufwa kwamuntu wumuku.

Hakuhana mpanji yakufwa kwamukwaKristu, bayi mukunjika mazu adi haMasamu 116:15 kudi muntu wunafuku, hela chakwila nafwi nakashinshi kumesu aYehova. Muloñadi? Muloña mazu añimbi yamasamu atalisha mwamuvulu. Atalisha mukwila nawu Nzambi hanateli kwiteja antu jindi ashinshika ejima kufwaku muloña wayimonaña nindi alema.—Talenu Masamu 72:14; 116:8.

Mukanda waMasamu 116:15 watukana nawu Yehova haketeja izanvu dawambuñindi ashinshika kudifumisha hamaseki chikupuku. Nsañu yamakonu yamwekeshaña nawu tunomiki kweseka niyihuñu yasweja, wunsahu wunakumwekesha nawu Nzambi haketeja nindi atujilumunuku.

Chineli Yehova wasweja ñovu nawa wakashikija nkeñelu yindi, hanateli kwiteja ayilumbu kutujiyishaku. Muloña neyi Nzambi yayiteja, ayilumbu jindi akudeta hebwambu nawu asweja ñovu kumubadika, ilaña hichinateli kuzatikaku! Nawa nkeñelu yaYehova yakwila nawu antu ashinshika akashakama hamaseki hiyadi kushikijewaku, ilaña chumichi kwila chimwekana nehi. (Isa. 45:18; 55:10, 11) Muloña kumukalakela Yehova mudimu wajila hamaseki wukumana neyi antu ejima atela kudifukula mulubanza lwatembeli yindi yeneni yakuspiritu yahamaseki ayijilumuna! Nawa hikunateli kwikala antu akuswana ‘maseki amaha,’ dikwila nawu antu aloña akashakamaña hanu hamaseki nakutalila chiyuulu ‘chamawulu amahaku.’ (Chim. 21:1) Kubombelahu, neyi antu ayijilumunahu ejima hamaseki, Chiyuulu chaKristu Chayaaka Ikombakaji chikekalaku wanyi.—Chim. 20:4, 5.

Ijina daNzambi dikutama nawa antu akutachika kumujinoka neyi yeteja ayilumbu jindi kukomba izanvu dawantu jindi ejima hamaseki. Chumichi chikutamisha Chiyuulu chaYehova chaWanta Wakuleña Kwejima. Cheñi, hamuloña wakudilemesha yomweni nijina dindi dajila, Yehova kwila yeteja izanvu dawantu jindi ashinshika kudijilumunaku. Toñojokenu hachumiche: Chineli Nzambi ‘wuñanji windi hiwukweti hiwaheñelaku,’ hakakañanya kupulwisha izanvu dawantu jindi amukalakelaña nakashinshuku. (Kuhit. 32:4; Kutach. 18:25) Cheñi nawa, kujilumuna izanvu dawambuñindi hiyakwiteja Mwizu daNzambuku: “Muloña Yehova hakayishiya antu induku nanochu chatoha ijina dindi.” (1 Sam. 12:22) Eñañi, “Yehova wukuumba antu indi wanyi, hela kushiya wuswana windi hakawushiyaku.”—Mas. 94:14.

Twazañalala nankashi hakwiluka netu antu jaYehova hiyakayijilumuna hamasekuku. Dichi, tumwekeshenu kashinshi kudi Nzambi nakukuhwelela muchikaninu chakanayi nindi: “Hikwakekala chitwa, chakachilawu nawu akukatishi nachu, chakakolaku. Madimi ejima akakunyamukila nawu akusompeshi, wakayitanyisha. Weniwu diwu wuswana wawambuña Yehova, nikuloña kwawu kunafumi kudami.”—Isa. 54:17.

[Mazu ekoku adi hefu 22]

Nzambi haketeja nindi antu jindi ayijilumunuku