Monenu Maluwi Adi Muwufwinda Nenu Anateli Kukola

“Antu akusumbula nukuyileja; hiyami nukuyilejaku, anayileji kudi Mwanta.”—1 KOR. 7:10.

MUNATELI KULUMBULULA?

Indi Nzambi wabombaña ñahi adisumbula hamu?

Indi aeluda anateli kukwasha ñahi akwaKristu anakumona yinzeñeli mumaluwi?

Twatela kumona ñahi maluwi?

1. Indi akwaKristu atoñojokaña ñahi hansañu yamaluwi nawa muloñadi?

 AKWAKRISTU neyi hiyakudisumbula, asanyikaña kumesu aNzambi, kusanyika kwamuchidiwu kwalema nankashi. (Mukwa. 5:4-6) Chineli diyi Ntachiki yamaluwi, Yehova ‘wayibomba’ amayala nawambanda adi mumpanda yamaluwi. (Maku 10:9) Iyi mpanda yalema kumesu aNzambi hela chakwila ituña dikweti nshimbi jahosha hamaluwi. Ambuña Yehova atela kutoñojoka nawu maluwi himpanda yaletaña antu hamu hela chakwila adisumbwili henohu ekala dehi akwakudifukula hela nehi.

2. Malwihwinyi itukuhanjekahu muchinu chibaaba?

² Mumaluwi mwatiyañanañawu mwekalaña muzañalu weneni. Hanu dinu tunateli kwila ñahi neyi mumaluwi mudi wufwinda? Komana maluwi azeya anateli kukola cheñi? Wukwashwinyi wunateli kutambwila antu adi maluwi mudi muwufwinda?

MWAKEKALA MUZAÑALU TAHINDI CHINEÑI?

3, 4. Chumanyi chikumwekana neyi muntu yafuukula mwaheña hakutonda mukwawu wakudisumbula nindi?

³ Neyi maluwi awakwaKristu atwalekahu, amuzañaleshaña Yehova nikumulemesha. Neyi afumpika, amuneñeshaña nankashi. MukwaKristu mujiki wunakukeña kwiñila mumaluwi nateli kwikala namaluwi amawahi neyi yalondela nshimbi jaNzambi. Ilaña, neyi muntu yatonda muntu wakudisumbula nindi chatama wukudokwela makala akesi. Chakutalilahu, atwansi amakwawu atachikaña kudiluka henohu kanda ashiki hachipimu chakwiñila mumaluwi. Antu amakwawu akeñelaña ambanda niamayala haIntaneti nakutemukila maluwi amonaña jomisha mbaña. Amakwawu avulumunaña chikupu hampinji yakudiluka ilaña adisumbulaña, hela chochu hiyadilemeshaña nankashi hakutachika maluwi awuku.

 ⁴ AkwaKristu amakwawu hiyasumbula hela kusumbuka ‘mudi Mwanta hohuku’ nawa amonaña yinzeñeli yavula kumona yisaka yawantu ambokelamu munsakililu. (1 Kor. 7:39) Neyi dikukala kumunakumona, lombenu kudi Nzambi kulonda yoyanakeni nikuyikwasha. Nzambi hamanishaña kukala hamuloña wayuma yakoñeli muntu kunyimaku, ilaña wakwashaña antu abalumukaña mumuchima kuumika kweseka kunakumonawu. (Mas. 130:1-4) Ikalenu namuchima wakutwalekahu kumuzañalesha nawa ‘muzañalu waYehova wakekala ñovu yenu.’—Nehe. 8:10.

NEYI MUMALUWI MUDI WUFWINDA

5. Kutalisha hamaluwi adi mukukala, yitoñojoka yamuchidinyi yatela kutondolwelawu akwaKristu?

⁵ Antu amonaña yihuñu mumaluwi awu anateli kudihula nawu: ‘Komana nateli kutwalekahu namaluwi ami adi mukukala? Mutenowu nadi kuhimpa yuma kulonda nisumbuli hela nisumbuki namuntu wacheñi!’ Akutachika kutoñojoka jakwambuka, ‘kulonda afumi mumpompa! Kwila tudiseña nehi? Hela chakwila hosi muloña washimunawu muNsona wakudiseñelahu, kwila twambuka nehi kulonda nitachiki kudiluñisha cheñi?’ Chatela atoñojokeña muniyi njila hela kufwikija chatela kwikala yuma, akwaKristu atela kuzatila hakukala kukwetuwu kuhitila mukulomba wukwashu kudi Nzambi nikwilamu.

6. Lumbululenu mazu ahosheliyi Yesu, asonekawu haMatewu 19:9.

⁶ Neyi mukwaKristu yafuukulahu kudiseña nateli kwikala wakasunuka hela hanateli kukasunuka nakwiñila cheñi mumaluwi kwesekeja nachahosha Nsonaku. Yesu wahosheli nindi: ‘Muntu wukuseña iñodindi, chiña namuloña wawuvumbi hohu; neyi wukumuseña chakadi muloña wawuvumbi hakusumbula wacheñi, neli wuvumbi.’ (Mat. 19:9) “Wuvumbi” wabombelamu kwila wujila namuntu wabula kwikala mwinikweyi ninshidi jikwawu jawuvumbi jomisha mbaña. Dichi twatela kutoñojokahu chikupu nikulombela hansañu yakudiseña neyi chakwila hakachi kenu hosi wuneli wuvumbi.

7. Indi antu akutoñojoka nawudi neyi akwaKristu adiseña?

⁷ Neyi antu adiseña chikumwekesha nawu wuspiritu wawu hiwudi chiwahuku. Kapostolu Pawulu wehwili lwihu lwalema nindi: ‘Neyi muntu weluka wanyi kuyuula mwitala dindi yomweni, indi chipompelu chaNzambi wukuchihemba ñahi?’ (1 Tim. 3:5) Neyi wejima wawu aditenaña nawu hiyakwaKristu ilaña anakañanyi kuhemba maluwi awu, antu akutoñojoka nawu awa antu hiyazatishaña yuma yatañishañawuku.—Rom. 2:21-24.

8. Chumanyi chinateli kuleñela akwaKristu adisumbula kwambuka hela kudiseña?

 ⁸ Neyi adisumbula apapatishewa anakufwila kwambuka hela kudiseña, chakadi muloña wamunsona, wuspiritu wawu wudi chiwahi wanyi. Dikwila nawu wumu hela wonsu wawu hiyanakulondela nshimbi jamuNsonaku. Neyi ‘amukuhwelela Yehova namuchima wawu wejima,’ kwosi chuma chikuyileñela adiseñuku.—Tañenu Yishimu 3:5, 6.

9. Indi akwaKristu amakwawu atambwilaña wulokwinyi hamuloña wakudiwunjika munsañu jamaluwi?

⁹ Maluwi amavulu amwekanaña neyi akufwa, akolaña cheñi mukuhita kwampinji. AkwaKristu abulaña kulusukila kudiseña neyi anakumona kukala mumaluwi avula kushakama chiwahi nankashi. Talenu chuma chinateli kumwekana muchisaka mudi antu ayaña munsakililu yamboka-mboka. Kapostolu Petulu wasonekeli nindi: “Mwomumu ninenu ambanda, shakamenu nakwovwahila anfumu jenwenu aweni; kulonda, hela amu anabuli kwovwahila mazu, akayikoki chakadi mazu, nanochu chakushakamawu añodi jawu; chakumonawu chimukushakama nawoma chakubula kubajama.” (1 Pet. 3:1, 2) Eñañi, neyi mwinikwindi yekala nayililu yayiwahi, wabula kwitiya nateli kudiza chalala. Kuhemba maluwi amuchidiwu kwamulemeshaña Nzambi nawa kwaheteshaña eyala namumbanda nianyana.

10, 11. Kukalanyi kunateli kumwekana mumaluwi nawa chumanyi chinateli kukuhwelelayi mukwaKristu?

¹⁰ Hamuloña wakukeña kumuzañalesha Yehova, akwaKristu ajiki amavulu atondaña muntu wakudisumbula nindi wapapatishewa. Hela chochu, yuma yamwekanaña yinateli kuleñela muntu kuhimpa. Chakutalilahu, mpinji yikwawu mwinetu wamumaluwi nateli kuluwankana muyitoñojoka. Mpinji yikwawu, mwinetu nateli kwikala mukwakushimwina wazeya hanyima yakudisumbula. Chakutalilahu: Linda, * mukwaKristu wadikita nawa mama yawantu wadihana, wamweni chamutombokeleluwu kudi nfumwindi wapapatishewa nakutwalekahu kukosomona yuma yabula kwesekana naNsona nawa amuhañili. Chumanyi chatela kwilayi mukwaKristu neyi maluwi amana munjila yamuchidiwu?

¹¹ Munateli kudihula nenu: ‘Nitwalekuhu kuhemba maluwi ami hela chakwila inakumona yinzeñeli?’ Kwosi muntu watela kuyileja mwakwilila. Ilaña kudi yuma yikuyileñela mubuli kudileka neyi mumaluwi mudi wufwinda. Iyala hela mumbanda wamutiyaña Nzambi woma womikaña kweseka kwamwekanaña mumaluwi adi muwufwinda kulonda yekali nachinleji chachiwahi walema kudi Nzambi. (Tañenu 1 Petulu 2:19, 20.) Kuhitila muspiritu niIzu dindi, Yehova wakwashaña mukwaKristu wazataña nañovu kulonda yakoleshi maluwi adi muwufwinda.

ANATELI KUYIKWASHA

12. Aeluda akutumona ñahi neyi tuyila netu atukwashi?

¹² Neyi munakumona kukala mumaluwi enu, bayi mushintajala kuya kudi akwaKristu apama kulonda ayikwashuku. Aeluda akweti mudimu wakubiña anyikoku nawa akuyikwasha chiwahi kuzatisha kufumba  kwamuNsona. (Yil. 20:28; Yak. 5:14, 15) Bayi mutoñojoka nenu neyi muholokela kunyendu yawaeluda nakulomba wukwashu wakuspiritu nikuhanjeka hakukala kumunakumona mumaluwi enu mukusawukaku. Aeluda akusweja kuyilemesha neyi ayimona munakufwila kumuzañalesha Nzambi.

13. Kufumbanyi kudi ha 1 Akorinda 7:10-16?

¹³ Neyi aeluda ayila nawu akwashi akwaKristu ambokelamu munsakililu, azatishaña kufumba kwaPawulu, wasonekeli nindi: “Antu akusumbula nukuyileja; hiyami nukuyilejaku, anayileji kudi Mwanta; nindi mumbanda bayi aleka nfumwinduku. Neyi wukumuleka, ashakami kwindi wujiki; mukunkulwayi akundami cheñi kudi nfumwindi; niiyala bayi aseña iñodinduku. . . . Eyi mumbanda, wukwiluka ñahi, hamwaha wukuhandisha nfumweyi? Hela eyi iyala, wukwiluka ñahi, hamwaha wukuhandisha iñodeyi?” (1 Kor. 7:10-16) Wenowu muzañalu wutwatiyaña neyi mukwetu wamumaluwi wabula kwitiya yenza mukudifukula kwalala!

14, 15. Yumanyi yikukojeja mukwaKristu kwambuka nawa muloñadi kulomba nikutoñojokahu nankashi chikwalemena?

¹⁴ Kukalanyi kunateli kuleñela mumbanda mukwaKristu ‘kwambuka nanfumwindi’? Amakwawu ambukaña muloña anfumu jawu akaanaña kuyikwasha mumushikila. AkwaKristu amakwawu ambukaña hamuloña wakuyihumpula nankashi hela kuyikaanisha kwila yuma yakuspiritu.

¹⁵ Muntu yomweni watela kufuukulahu kwambuka hela kushakama. Hela chochu, muntu wudi mumaluwi wapapatishewa watela kulomba nikutoñojokahu chiwahi. Chakutalilahu, komana wabula kwitiya wamukaanishaña chikupu kwila yuma yakuspiritu tahindi mukwaKristu diyi wunaleki kudiza Bayibolu, havula kupompa nikuya nakushimwinaku?

16. Yumanyi yikukwasha akwaKristu kubula kulusukila kudiseña?

¹⁶ Chineli twalemesha wubwambu wetu naNzambi nawa twahamekaña hachawaana chamaluwi chatuleñelaña kubula kunyakala kufuukula jakudiseña. Etu ambuña aYehova, twafwilaña kulemesha ijina dindi dajila. Dichi kwila tukwata kafuta kakudiseñelahu henohu muchima wudi hadi muntu wacheñuku.—Yere. 17:9; Mal. 2:13-16.

17. Kukala kwamuchidinyi kukuleñela tuhoshi netu Nzambi natambikili kuwunda akwaKristu asumbula hela asumbuka?

¹⁷ MukwaKristu wudi mumaluwi namuntu wabula kwitiya watela kukolesha maluwi indi nankashi. Hela chochu, mukwaKristu hatela kudinka muloñaku neyi neseki chikupu kuhemba maluwi ilaña mwinikwindi wabula kwitiya nakaani  kushakama nindi. Pawulu wasonekeli nindi: “Ilaña neyi muntu wabula kwitiya nakeñi kuya, muleki ayi. Mana kwetu weyala hela wamumbanda hiyanamukasi hansañu iyuku; Nzambi natutambikili kuwunda.”—1 Kor. 7:15. *

MUCHIÑILILENU YEHOVA

18. Hela chakwila himukutwesha kuhemba maluwuku, yumanyi yayiwahi yinateli kufumamu?

¹⁸ Neyi munakukeña kumanisha kukala kwamumaluwi, lombenu kudi Yehova kulonda mumiki nawa muchiñililenuña. (Tañenu Masamu 27:14.) Toñojokenu hadi Linda itwashimuna hatachi. Hela chakwila wazatili nañovu hadi yaaka yayivulu nindi yahembi wulu windi, adiseñeli. Komana waditoñeshaña nindi wamanishileña hohu mpinji yindi? Wahosheli nindi: “Hinaditoñeshañaku. Yililu yami yahanini wunsahu wawuwahi kudi antu. Chinleji chami chitooka. Sweje-e dinu, yaaka yejimiyi yakwashili mwanetu wamumbanda kukolela muchalala. Wakulili nakwikala Chinsahu chaYehova wadihana nawa wadikita.”

19. Chumanyi chikumwekena neyi mushaku ñovu yakuhemba maluwi enu?

¹⁹ Mumbanda mukwaKristu wejina daMarilyn wazañalalaña hamuloña wakumukuhwelela Nzambi nawa wazatili nañovu hakuhemba maluwi indi. Wahosheli nindi: “Nakeñeleña kwambuka nanfumwami muloña hanyinkeleña maluku nawa wuspiritu wami wadiña hakatoña. Nfumwami wadiña eluda henohu kanda yatachiki mudimu wakuselujola wawupwapoki. Watachikili kujiñujoka kukupompa nawa twalekeli kutiyañana. Kukala kwamwekeneña hetala detu kwanleñeleli nikali kadiwoñi. Nkumininaku, natoñojokeli nami anami nawa naluwañesheleña. Twatachikili kutiyañana cheñi, kudifuukula kwachisaka nikupompa mpinji yejima. Aeluda atukwashili nankashi. Maluwi etu akoleli hama. Chimwahitili mpinji, nfumwami wekalili cheñi nakukooleka muchipompelu. Twamweni kalula ilaña mwafumini yayiwahi.”

20, 21. Kutalisha hansañu yamaluwi, yumanyi yitwatela kwila?

²⁰ Hela chakwila tudi ajiki hela tudi mumaluwi, twatela kwikala ahamuka nikumuchiñilila Yehova. Neyi mumaluwi etu mudi wufwinda, twatela kuzata nañovu kulonda tuwumanishi, nakwanuka netu ejima adi mumpanda yamaluwi “hiyadi cheñi ayeduku, adi mujimba wumu.” (Mat. 19:6) Nawa twatela kwanuka netu neyi tuumika mumaluwi mudi antu ambokela munsakililu hela mwikali wufwinda wamuchidinyi, tunateli kuzañalala neyi mwinikwetu yenza munsakililu yalala.

²¹ Hela chakwila tukweti kukala kwamuchidinyi, tufwilenu kwenda chachiwahi kulonda twipukeña ivumba dadiwahi kudi antu abula kwikala muchipompelu. Neyi maluwi etu adi muwufwinda, tulombenu nañovu, tudishinshiki munyichima yetu, kutaña Nsona chikupu nikuholokela kunyendu yawaeluda nakulomba wukwashu. Sweje-e dinu, tufwilenu kumuzañalesha Yehova Nzambi muyuma yejima nikumwekesha muchima wakuhameka hachawaana chatwinkayi chamaluwi.

[Tumazu twaheshina]

[Malwihu aKuzatisha haKudiza]

[Mazu ekoku adi hefu 10]

AkwaKristu atwalekañahu nakudinkaku mumaluwi mudi wufwinda avula kuhetelamu nankashi

[Mazu ekoku adi hefu 12]

Mpinji yejima muchiñililenuña Yehova nawa mulombenu kulonda muumiki

[Mwevulu wudi hefu 9]

Yehova wakiswilaña akwaKristu adisumbula afwilaña kukolesha maluwi awu adi muwufwinda

[Mwevulu wudi hefu 11]

Chipompelu chawakwaKristu chinateli kuyikundeja nikuyikwasha kuspiritu