Mukuhwelelenu Yehova Nzambi ‘Wampinji Niyilaaka’

‘Wabalumunaña mpinji niyilaaka. Diyi wafumishaña anyanta, diyi wadiishaña nawa anyanta wanta.’—DAN. 2:21.

MUKWAKULA NENUDI?

Indi yileñaleña niwuprofwetu washikijewa dehi wamwekeshaña ñahi nawu Yehova hiMukwakuhemba Mpinji Muneni?

Chituneluki netu Yehova diyi Nzambi ‘wampinji niyilaaka’ kukutuleñela kwiladi?

Muloñadi mpinji yatanjikayi Yehova chiyabulilaña kuhimpika nayuma yinakumwekana mukaayi hela yuma yatoñojokañawu antu?

1, 2. Chumanyi chinakumwekesha nawu Yehova diyi weluka chendaña mpinji?

 YEHOVA NZAMBI waloñesheli njila yakwilukilamu mpinji henohu kanda yaleñi muntu. Hefuku damuchiwana dakuleña, Nzambi wahosheli nindi: “Haluzwizu lwahewulu hekali yuma yakutoñeka, kulonda kwambula nimwaana niwufuku; yakekali niyayinjikijilu, niyayilaaka, niyamafuku, niyanyaka.” (Kutach. 1:14, 19, 26) Kwesekeja nakufuukula kwaYehova chumichi chazatikili.

² Kufuma tuhu hayina mpinji nikulelu, asayantisiti anakañanyi kulumbulula chendaña mpinji. Mukanda wumu wahosha nawu: “Mpinji hichuma chimu chakañanya kwilukawu antu mukaayi. Kwosi muntu wunateli kulumbulula chendaña mpinji.” Ilaña Yehova weluka chikupu chendaña mpinji. Muloña yena ‘diyi wawumbili mawulu . . . Diyi wawumbili iseki wadituñili.’ Nawa cheñi Yehova ‘kufumisha kutachi washimunaña jakunsa kufumisha kushankulu washimunaña yichidi kanda ayikoñi.’ (Isa. 45:18; 46:10) Hamuloña wakufwila kukeña kumukuhwelela nikukuhwelela Izu dindi Bayibolu, tutalenu hayileñaleña nihawuprofwetu washikijeweli wunakumwekesha nawu Yehova diyi Mukwakuhemba Mpinji Muneni.

YILEÑALEÑA YATUKWASHAÑA KUMUKUHWELELA MUKWAKUHEMBA MPINJI MUNENI

3. Indi yileñaleña yamwekeshaña ñahi nawu yalondelaña mpinji chikupu?

³ Yuma yayivulu yaleñayi Yehova, yitwamonaña niyitwambulaña kumona yalondelaña chikupu mpinji. Chakutalilahu, tuyuma twanyanya twatenañawu nawu maatomu twazataña hohu chakadi kuleka. Makoloku azatishañawu mumatuña amavulu azatikaña namaatomu hiyalwezaña hela sekondi yimuku hela chakwila munahiti yihita yayaaka 80. Cheñi ñendelu yamapulaneti  nitutumbwa yalondelaña mpinji chiwahi. Chineli ayitanjika chachiwahi mwiwulu yakwashaña antu kwiluka yilaaka nichakwenda. Yehova, Nleñi wayuma yahembaña mpinji chikupu, diyi ‘wasweja kunyiña nikutakalala nañovu’ nawa twatela kumushimeka.—Tañenu Isaya 40:26.

4. Indi mpinji yaleñelawu muyileñaleña yamwekeshaña ñahi maana akwetiyi Nzambi?

⁴ Yuma yikweti wumi yalondelaña mpinji. Nyitondu yayivulu nianyama alondelaña mpinji yayileñelawu mukachi kawu. Atujila amavulu eluka mpinji yakufuma kwituña dimu nakuya kwituña dikwawu. (Yere. 8:7) Antu niwena akweti jinkoloku munyitu yawu, yambulawu muyibalu yamaora 24 mwaana niwufuku. Neyi mukwakwenda yenda matuña amavulu mundeki, mukuhita mafuku amavulu hakwili yatachiki kwiluka mpinji chiwahi. Eñañi, yuma yayivulu yaleñayi yalondelaña mpinji yamwekeshaña maana niñovu yikwetiyi Nzambi ‘wampinji niyilaaka.’ (Tañenu Masamu 104:24.) Mwamweni, Mukwakuhemba Mpinji Muneni wasweja maana niñovu yabadika. Tunateli kukuhwelela netu Nzambi nateli kushikija nkeñelu yindi!

WUPROFWETU WASHIKIJEWA DEHI WAKOLESHAÑA CHIKUHWELELU

5. (a) Munjilanyi yimu hohu mutunateli kwilukila chihandilu chawantu chakumbidi? (b) Muloñadi Yehova chinateli kutulejelayi yuma yakamwekana nimpinji hiyakamwekena?

⁵ Yileñaleña yatudizishaña yuma yayivulu kutalisha ‘hayililu yabulaña kumwekana’ yaYehova, ilaña hiyakulaña malwihu alema adi neyi, Indi chihandilu chawantu chakekala ñahi kumbiduku? (Rom. 1:20) Hakwila twakuli ilu lwihu, twatela kutaña hayuma yashimunayi Nzambi Mwizu dindi Bayibolu. Neyi tuyitaña nakashinshi, twawanaña wuprofwetu washikijeweli chikupu hampinji yatoñweluwu. Yehova nateli kushimuna yuma yakamwekana muloña welukilaña chadimu yuma yakamwekana kumbidi. Kubombelahu, yuma yashimuna Nsona yashikijewaña mumpinji muloña Yehova Nzambi diyi wakojejaña yuma kuzatika kwesekeja nankeñelu yindi nimpinji yapimayi.

6. Chumanyi chinakumwekesha nawu Yehova wakeñaña nindi tutiyishi kushikijewa kwawuprofwetu wamuBayibolu?

⁶ Yehova wakeñaña akwakudifukula indi kwiluka wuprofwetu wamuNsona kulonda tuhetelumu. Hela chakwila Nzambi hamonaña mpinji neyi chitwayimonañaku, neyi yashimuna nindi hampinji yakanaña nikanaña kwakamwekana chuma, wazatishaña nhoshelu yaswayi kutiya. (Tañenu Masamu 90:4.) Chakutalilahu, mukanda waChimwekeshu wahosha hadi ‘añelu awana’ ‘aloñeshelawu dehi mpinji yimu niifuku dimu nikakweji kamu nimwaka wumu’ yibalu yampinji yitweluka dehi. (Chim. 9:14, 15) Neyi tumona wuprofwetu chiwashikijeweli hampinji yatoñweluwu, chikutukwasha kumukuhwelela chikupu Nzambi ‘wampinji niyilaaka’ niIzu dindi. Tutalenu hayakutalilahu yantesha.

7. Indi kushikijewa kwawuprofwetu waYeremiya kutalisha haYerusalema niYuda kwamwekeshaña ñahi nawu Yehova hiMukwakuhemba Mpinji Muneni?

⁷ Tusambilenu kutala hachuma chamwekeni munkulakanji yamwaka wa 7 B.C.E. “Mumwaka wamuchiwana waYehoyakimi mwana kaYosiya mwanta wawaYuda,” izu daMukwakuhemba Mpinji Muneni, “denjili kudi Yeremiya dakutena antu ejima amuYuda.” (Yere. 25:1) Yehova washimwini nindi Yerusalema akamujilumuna nawa aYudeya amwituña daYuda akaya kuBabiloni. Neyi anayi dehi ‘akamukalakela mwanta wakuBabiloni nyaka makumi atanu nayedi.’ Mashidika awakaBabiloni ajilumwini Yerusalema mu 607 B.C.E., nawa aYudeya akuYuda ayitwalili kuBabiloni. Hanu dinu chumanyi chamwekeni hakumana kwayaaka 70? Yeremiya waprofweteli nindi: “Yehova nahoshi nindi, Neyi nyaka yaBabiloni makumi atanu nayedi yinawani dehi, nakayihempula, nakakoña izu dami dadiwahi  dinahosheli nenu dakuyifuntisha kwenakunu.” (Yere. 25:11, 12; 29:10) Iwu wuprofwetu washikijeweli hampinji yatoñweliyi, dikwila nawu mu 537 B.C.E. helili aMediya nawaPeresi ayumbuku aYudeya muBabiloni.

8, 9. Indi wuprofwetu waDanyeli wahosha hakwinza kwaMesiya nikutachika kwaWanta wamwiwulu wamwekeshaña ñahi nawu Yehova hiNzambi ‘wampinji niyilaaka’?

⁸ Tushinshikenu hawuprofwetu wukwawu wahosha hadi antu jaNzambi akushankulu. Henohu kunashali yaaka yiyedi hakwila aYudeya afumi muBabiloni, Nzambi washimwini kuhitila mudi kaprofwetu Danyeli nindi Mesiya wakamwekana neyi munahiti dehi yaaka 483 hanyima yakuhana lushimbi lwakutuñulula Yerusalema. Mwanta wakuMediya naPeresi waheni ilu lushimbi mu 455 B.C.E. Chimwahitili yaaka 483, mu 29 C.E. Yesu wakuNazareta amuwayishili naspiritu yajila hefuku damupapatishiluwu nawa wekalili Mesiya. *—Nehe. 2:1, 5-8; Dan. 9:24, 25; Luka 3:1, 2, 21, 22.

⁹ Ichi dinu talenu Nsona chijashimwini kutalisha haWanta. Wuprofwetu wamuBayibolu washimwini nawu Wanta wawuMesiya wakatachika kuyuula mwiwulu mu 1914. Chakutalilahu, Bayibolu yashimwini ‘chinjikijilu’ chakumwekana kwaYesu nawa yahosheli nawu hayina mpinji kwakekala kukala nankashi hanu hamaseki muloña Satana akamuhaña mwiwulu. (Mat. 24:3-14; Chim. 12:9, 12) Kubombelahu, wuprofwetu wamuBayibolu wateneni yoyeniyi mpinji, ya 1914, ‘hashikijeweli mpinji yatoñweluwu yawakamatuña’ nawa hatachikili kuyuula Wanta mwiwulu.—Luka 21:24; Dan. 4:10-17. *

10. Yumanyi yakamwekana kumbidi hampinji yakutoñola dehi?

¹⁰ Chuma chakamwekana kumbidi ‘hilukadi lweneni’ lwashimwiniyi Yesu. Kufumahu, hakasinsa Chiyuulu Chekombakaji Dimu Danyaaka. Tunateli kukuhwelela netu yumiyi yakahita mumpinji. Hampinji yadiñayi Yesu hamaseki, Yehova wadiña watoñola dehi ‘itañwa nimpinji’ yakamwekenamu yumiyi.—Mat. 24:21, 36; Chim. 20:6.

“KWATILENU MAFUKU AKUHITA MAANA”

11. Chineli tuneluki netu tunakushakama ‘mumpinji yakukuminina,’ twatela kwiladi?

¹¹ Chineli tuneluki netu Wanta watachika dehi kuyuula nawa netu tunakushakama ‘mumpinji yakukuminina,’ twatela kwiladi? (Dan. 12:4) Antu anakumona yihuñu chiyinakusweja mukaayi ilaña anakukañanya kwiluka nawu yumiyi yinakushikija wuprofwetu wamuBayibolu wahosha hamafuku akukuminina. Atoñojokaña nawu ifuku dimu ituña damba kajilumuka nawa akuhwelelaña nawu nfulumendi jawantu jakaleta ‘kuwunda nikukiñewa.’ (1 Tesa. 5:3) Indochu etu? Neyi tuneluki netu tunakushakama mumafuku akukuminina chikupu  etuña daSatana, kwila tuzatisha mpinji yinashaluku kulonda tumukalakeli Nzambi ‘wampinji niyilaaka’ nikukwasha antu kulonda amwiluki nehi? (2 Tim. 3:1) Twatela kuzatisha mpinji yetu chiwahi.—Tañenu Aefwesesa 5:15-17.

12. Yumanyi yitukudizilaku kumazu ahosheliyi Yesu kutalisha kumafuku aNowa?

¹² ‘Kukwatila mafuku akuhita maana’ kwakala nankashi mudinu ituña mwenzala yuma yahuwañeshaña. Yesu wasoñamishili nindi: ‘Chochichadiña hamafuku aNowa, dichi chakela nihakenzayi Mwana kamuntu.’ Indi mafuku aNowa adiña ñahi? Wuprofwetu washimwini nawu ituña dahayina mpinji dadiñi kwakwihi nakumana. Hayina mpinji, antu atama ateleli kufwa nadibaji deneni. Hakwikala “mukwakushimuna kuloña,” Nowa washimwini nsañu yaNzambi kudi antu ahayina mpinji. (Mat. 24:37; 2 Pet. 2:5) Ilaña, “adiilaña, anwinaña, asumbwilaña, asumbwishilaña, . . . nichenjili dibaji nakuyikumpula wejima wawu, wena kuchiluka nehi.” Dihafumini Yesu kusoñamisha atumbanji twindi nindi: “Babalenu, muloña mpinji yimukubula kutoñojoka diyi yakenzayi Mwana kamuntu.” (Mat. 24:38, 39, 44) Twatela kwikala neyi Nowa, bayi neyi antu adiñuku mumafuku induku. Chumanyi chikutukwashaku kwikala ababala?

13, 14. Chumanyi chitwatela kwanuka hadi Yehova chikutukwasha kumukalakela nakashinshi hampinji yitunakutalila kwinza kwaMwana kamuntu?

¹³ Hela chakwila Mwana kamuntu wakenza hampinji yitunabuli kwiluka, twatela kwanuka netu Yehova diyi Mukwakuhemba Mpinji Muneni. Mpinji yatanjikayi hiyahimpikaña nayuma yinakumwekana mukaayi hela yuma yatoñojokañawu antuku. Yehova diyi wendeshaña mpinji niyuma yamwekanaña kulonda yashikiji nkeñelu yindi. (Tañenu Danyeli 2:21.) Yishimu 21:1 yatulejaña nawu: “Muchima wamwanta wekala muchikasa chaYehova neyi tupila twameji, wawuteñululaña kwonsu kwanakeñiyi.”

¹⁴ Yehova nateli kuyuula yuma yamwekanaña kulonda kushikija nkeñelu yindi hampinji yatoñolayi. Yuma yinakufuma muyuma yayivulu yinakuhimpika mukaayi yinakumwekesha nawu wuprofwetu wunakushikijewa, sweje-e kutalisha hamudimu wakushimwina nsañu yayiwahi yaWanta waNzambi. Toñojokenu chakañenyi chiyuulu chaSoviet Union niyuma yafuminumu. Antu amakwawu akuhweleleli nawu iku kuhimpika kweneni munfulumendi kukamwekana mukunyakashana. Hela chochu, hamuloña waniku kuhimpika, nsañu yayiwahi anakuyishimwina mumatuña amavulu mwakanishiluwu mudimu wetu hakusambila. Dichi, tukwatilenu mafuku akuhita maana kulonda tumukalakeli nakashinshi Nzambi ‘wampinji niyilaaka.’

KUHWELELENU MPINJI YATANJIKAYI YEHOVA

15. Tunateli kumwekesha ñahi chikuhwelelu neyi kudi yuma yinahimpuwu mukuloñesha?

¹⁵ Hakwila nawu tutwalekuhu kushimwina mudimu wetu waWanta munanu mafuku, twatela kukuhwelela mpinji yatanjikayi Yehova. Yuma yinakuhimpika mukaayi yikutuleñela kuhimpa njila yitwashimwinañamu mudimu wetu wakwilisha atumbanji. Kuloñesha kwaYehova mpinji yikwawu kunateli kuhimpa ntanjikilu kulonda atukwashi mumudimu wetu wawakwakushimwina aWanta. Twamwekeshaña netu twamukuhwelela Nzambi ‘wampinji niyilaaka’ kuhitila mukwovwahila kuhimpa kudi kwejima hampinji yitunakulondela Mwanindi, “mutu wachipompelu.”—Efwes. 5:23.

16. Muloñadi chitwatela kukuhwelela netu Yehova wakatukwasha hampinji yatelela?

¹⁶ Yehova wakeñaña nindi tulombeña kudi yena namuchima wejima nakukuhwelela netu ‘wukutukwasha hitukumona kukala.’ (Heb. 4:16) Komana chumichi hichinakumwekesha nawu watukeña hamuntu hamuntuku? (Mat. 6:8; 10:29-31) Twamwekeshaña  chikuhwelelu chetu mudi Yehova Nzambi kuhitila mukulomba wukwashu mpinji yejima nikuzata kwesekeja nakulomba kwetu nikulondela wunlomboli windi. Kubombelahu, twalombelañaku akwetu akakwitiya.

17, 18. (a) Chumanyi chakakoñayi Yehova kudi ayilumbu jindi katataka? (b) Muhetwinyi wutwatela kutondolwela?

¹⁷ Ayinu bayi neyi himpinji ‘yakuzeya muchikuhweleluku,’ ilaña himpinji yakwikala nachikuhwelelu chakola. (Rom. 4:20) Chilumbu chaNzambi, Satana hamu niantu jindi afwilaña kulekesha mudimu wenkeliyi Yesu atumbanji twindi kushilahu ninetu. (Mat. 28:19, 20) Hela chakwila Diyabolu watulukukaña, twamwiluka Yehova netu ‘hiNzambi wamumi, diyi Chamwinu chawantu, ejima, wasweja kwamwina akwakukuhwelela.’ Diyi “weluka kupulwisha akwakumwakama mukweseka.”—1 Tim. 4:10; 2 Pet. 2:9.

¹⁸ Katataka Yehova yajilumuni dinu ituña datama. Hela chakwila hiyatuleja wunsahu wejima jiikaku nawa hituneluki mpinji yakamwekana yumiyuku, tweluka netu hampinji yindi yatoñolayi, Kristu wakajilumuna ayilumbu jaNzambi nawa wanta waYehova akawujilika. Dichi tukuluwañesha nankashi neyi tukañanya kwiluka ‘mpinji niyilaaka’ yitunakushakamamu hayinu mpinji. Bayi tufwa mumuhetu wakutoñojoka netu ‘yuma yejima chochiyekala, neyi chiyadiñi hatachi haleñeluwu yumaku.’—1 Tesa. 5:1; 2 Pet. 3:3, 4.

‘IKALENU NAMUCHIMA WAKUCHIÑILILA’

19, 20. Muloñadi chitwatela kwikalila namuchima wakumuchiñilila Yehova?

¹⁹ Kufuukula kwaYehova Nzambi kwafuukwililiyi antu kwatachi kwabombelelumu kutwalekahu nakudiza hadi Nzambi nihayileñaleña yindi. HaMukwakutaŋisha 3:11 hahosha nawu: “Nzambi wela dehi yuma yejima yiikali nalubanji hayilaaka yayu, washa dehi nawa mpata yamunu mwishina munyichima yawu, hela chochu, muntu wakañanya dehi kushinshika mwaya mudimu waNzambi waneliyi kufumisha kutachi ndo nikunsa.”

²⁰ Tunateli kuzañalala hakwiluka netu Yehova hahimpa nkeñelu yindi kutalisha kudi etu antuku. (Mal. 3:6) Kudi Nzambi “hikwekala kubalumuka, hela mwevulu wakushetumukaku.” (Yak. 1:17) Mpinji yindi hiyanateli kuyiluka kudi antu apimaña mpinji, chidi neyi kunyeñumuka kwesekuku. Yehova ‘hiMwanta wahaya nyaka.’ (1 Tim. 1:17) Dichi twatela ‘kuchiñilila Nzambi yawamwinu wetu.’ (Mika 7:7) Eñañi, “dikoleshenu, dikwatishenu munyichima yenu, enu ejima mwamuchiñejaña Yehova.”—Mas. 31:24.

[Tumazu twaheshina]

[Malwihu aKuzatisha haKudiza]

[Mwevulu wudi hefu 19]

Danyeli wakuhweleleli kushikijewa kwawuprofwetu wamulejeluwu kudi Nzambi

[Mwevulu wudi hefu 21]

Komana mwazatishaña chiwahi mpinji nakwila nkeñelu yaYehova?