Nsañu Yachihandilu

‘Kajindilu’ Kitwadizili muMudimu Wetu Wajila

Washimwini Olivier Randriamora

“Neluki kusawuka hela kwikala nayuma yayivulu. Munsañu jejima anleja dehi maana akwikuta hela akwikala nanzala; nadizi [kajindilu] kwikala nayuma yayivulu . . . Natweshi kwila yuma yejima mudi Kristu wankoleshaña.”—Fwi. 4:12, 13.

AWA mazu akapostolu Pawulu atukoleshaña nankashi nañodami Oly. Kufwana Pawulu, tweluka ‘kajindilu’ kakushindamena nankashi hadi Yehova hampinji yitunakumukalakela muMadagascar.

Chelili aYinsahu jaYehova atachiki kudiza Bayibolu nawamama yaOly mu 1982, twadiña twadikwatila dehi naOly. Anami nawa natachikili kudiza Bayibolu, nkumininaku, Oly niyena watachikili kudiza. Twadisumbwili mu 1983, twapapatisheweli mu 1985 nawa hashimbwili wanyi twatachikili wupayiniya wakukwasha. Mu July 1986, twekalili apayiniya ampinji yejima.

MuSeptember 1987, twatachikili kuzata wupayiniya wadimena. Iluña datachi kutwatachikilili mudimu wetu kwadiña kumusumba waMadagascar kumujika kwabulili chipompelu. Kwekala mazanvu akushika ku 18 nimazanvu anyanya amavulu muMadagascar nawa tushidikilu nichisemwa chashiyashana. Malagasy didi idimi dazatishañawu antu ejima, ilaña antu ahoshaña idi idimi munjila jashiyashana. Dichi twatachikili kudiza idi idimi, chumichi chaleñeleli antu amunidi iluña kututambwila nachisambu.

Hakusambila nahanineña mpanji yawantu amavulu Mulungu niMulungu, chinamanisha ñodami Oly wadiña nakusakilila. Twapompeleña hohu etu ayedi. Twadiña cheñi naprogiramu yejima yakupompa kwaShikola yaTeokalatiki nañodami Oly nawa twadiña hohu nakufwikija neyi kwiji tunakuhosha namwiniitala. Twazañaleli nankashi chelili nkoñi wañinza yatwendeli nakutuleja nindi twatela kuhimpa kupompa.

Hitwatambwileña mali akudikwashamu nachu mumpinji mumpinjuku muloña nyikanda hiyavulileña kushikaku. Dichi twelukili chakuhanda natuyuma twantesha tutwadiña natu. Mpinji yimu, hitwadiña namali ashikila akwendela hakuya kukupompa kwañinzaku nawa kufuma kutwashakamineña nakuya kwakupompela hadiña makilomita 130. Twanukili mazu amawahi atulejeliyi mukwetu Chinsahu nindi: “Mulejenu Yehova hakukala kumukweti. Nawa munakuzata mudimu windi.” Dichi twalombeli nawa twafuukwiluhu kuya hamaseki. Henohu kanda tunyamuki, mana kwetu watunhempwili nawa watwinkeli mali ashikila akwendela.

MUDIMU WAMUÑINZA

MuFebruary 1991, antondeli kwikala nkoñi wañinza. Hayina mpinji, izanvu detu dadiña  nawakwakushimwina 9, apapatishewa adiña 3 nawa avareji yakupompa yashikila ku 50. Hanyima yakundizisha, twatachikili kuzatila muñinza yamusumba waAntananarivo. Mu 1993, atutemesheli kuñinza yakumusela munidi ituña. Chihandilu chawantu munidi iluña chabukila nachawantu ashakamineña mumusumba.

Hakwila nawu tushiki kuyipompelu nikumaluña kwadiña antu amakwawu, twendeleña hamaseki, mpinji yikwawu twendeleña makilomita 145 muyinkalampata nimumapidi. Twasendeleña hohu yiteli yakuzatisha yantesha. Hela chochu, neyi mumpanji yawantu amavulu yankoñi wañinza mudi chimwenu, neyi chichadiña munana mafuku, twasendeleña yuma yayivulu yakuzatisha. Ñodami Oly wasendeleña projekita, ami nasendeleña ilola dakuzatisha hakutala chimwenu.

Twavulileña kwenda makilomita akushika ku 40 hefuku hakwila nawu tushiki kuchipompelu chikwawu. Twendeleña mujimpidi, kuzambuka tuloña, nikwenda mumateshi. Mpinji yikwawu twakamineña kunsa yanjila, ilaña kakavulu twakeñeleña hakukama hanyikala yawantu. Mpinji yikwawu twehwileña antu itwambula nikwiluka netu kulonda tukaami hanyikala yawu. Chitwawana hakukaama twaloñesheleña yakudya. Ñodami Oly walombeleña ndehu nikuya kukaloña nakutaha menji. Neyi yena nayi kumenji, nalombeleña kazemba kulonda nitemi nachu nchawa. Ichi chihandilu twachihandili hadi mpinji yayilehi. Mpinji yikwawu twalandileña kasumbi wamumi, twamujahileña nikumuwahisha chiwahi.

Chitwadya twayileña nakutehuna menji akuwela. Mpinji yikwawu twakaamineña muchisambu. Neyi nvula yinakunoka, twakamineña iku tunashindameni kumbañu kulonda tubuli kuzowa muloña itala dadiña nakuvwa.

Twadiña nakushimwina antu itwashakamineña nawu. Chitwashikili kutwayileña, chisambu niluwi lwatumwekesheleluwu amana kwetu niahela akwaKristu kwatuzañalesheleña nankashi. Hamuloña wakwila ahamekeleña nankashi neyi tunayendeli, hitwanukileña yinzeñeli yitwamweneña munjilaku.

Neyi tushikena mwitala daChinsahu, twadiña nakuyikwashaku nyidimu yahetala. Chumichi chayikwashileñaku kwikala nampinji yakuzatila hamu mumudimu wamwiha. Hitwakuhweleleli kutwinka maheta hela kudya yakudya yasweja kuwaha yabuliluwu antu atutambwilileñaku.

KWENDELA MAZANVU AKWAKULEHI

Twatiyileña kuwaha kwendela mazanvu adiña kwakulehi, amanakwetu atutambwilileña nawa atwinkeleña nyidimu yayivulu yakwila. Hitwavulileña kwikala nampinji ‘yakunookaku chanteshaku.’ (Maku 6:31) Heluña dimu aYinsahu adisumbula atambikili atudizi awu aBayibolu, 40 kwitala dawu kulonda tudizi nawu. Ñodami Oly wadibombeleña namuhela nakulombola atudizi 20, ami nimana kwetu twadizishileña atudizi amakwawu 20. Twelileña chitwamanisha kudiza nakadizi wumu hohenohu tutachika kudiza nakadizi mukwawu. Hefuku dodimu twawanineñaku mpinji yakupompa, chitwaminisha kupompa twatwalekeleñahu kulombola atudizi aBayibolu. Twamanishileña kudiza nawufuku.

Chitwahempwili izanvu dikwawu, wejima wetu twanyamukili na 8 koloku nakuya kumukala wukwawu wadiña kwakwihi. Wejima wetu twavwalili yakuvwala yamajilu. Twendeli mumasaña hakuya kuniwu mukala nawa twashikili namwana. Chitwashikili,  twavwalili yakuvwala yayiwahi nawa twatachikili kushimwina kwitala nikwitala. Matala adiña antesha ilaña akwakushimwina adiña amavulu. Dichi twamanishili kushimwina munidi iluña hadi jiminiti 30. Kufumahu twayili hamukala wukwawu. Chitwamanishili kushimwina muniwu mukala, twatachikili kufunta kumukala. Mpinji yikwawu kushimwina muniyi njila kwatuneñesheleña hama. Twamanishileña ñovu nimpinji yayilehi nankashi ilaña twashimwinineña kwitala nikwitala hadi ora yimu hohu. Ilaña, aYinsahu amunidi iluña aneñeleña wanyi. Atwalekeluhu kwikala amuzañalu.

Izanvu dimu dawakwakushimwina muTaviranambo dadiña kwakwihi nahewulu dampidi. Chisaka chimu chawaYinsahu chashakamineña mwitala dakapeka kamu. Adiña nakupompela mwitala danyanya dadiña kwakwihi. Mana kwetu itwashakamineña nindi watachikili kutambika nezu dahewulu nindi, “Amana kwetu!” Muntu wumu wadiña hewulu dampidi yikwawu wakwili nindi, “Kwahola!” Mana kwetu wabidikili cheñi nindi, “Nkoñi wañinza nenzi!” Akwili nawu, “Dimu!” Amana kwetu atachikili kutemesha mazu kudi amakwawu ashakamineña kwakulehi. Neyi mukulabula kwadisu, antu atachikili kwinza kukupompa nawa antu apompeli abadikili ha 100.

KUKALA KWAÑENDELU

Mu 1996, atutemesheli kuñinza yadiña kwakwihi naAntananarivo, kunidi iluña kwadiña nankashi jimpidi. Kunidi iluña nikwena twamweni kukala kwambukaku. Nyotoka yakwendela hakuya kwiluña dacheñi yakalileña. Ifuku dimu twakeñeleña kuhempula izanvu dadiña kuBeankàna (Besakay), hadiña makilomita 240 kufuma kuAntananarivo. Hanyima yakuhanjeka nañendeshi wendesheleña motoka yanyanya, twakandamini nakuya kunidi iluña. Muniwu motoka mwadiña antu 30, amakwawu akamini hewulu damotoka amakwawu niwena akulamini kunyima yamotoka.

Neyi chichamwekeneña mpinji yejima, motoka yafwili nawa twatachikili kwenda hamaseki. Hanyima yakwenda hadi maora amavulu, kwenjili motoka wukwawu weneni. Mwadiña mwenzala antu niyakudya, ilaña ñendeshi wemeni. Twakandamini muniwu motoka hela chakwila hakushakama hadiña hosi. Chitwashikili kwakwihi nakaloña, motoka yakañenyi kuhita muloña chawu adiña nakuchiloñesha. Twatachikili cheñi kuya hamaseki nichitwashikili kukamukala kanyanya kwashakamineñawu apayiniya adimena. Hela chakwila twayilejeli netu twakenza wanyi, twatachikili kushimwina nawu hampinji yitwahembeleleña netu amanishi kuwahisha chawu nikutalila motoka wukwawu.

 Mwahitila mulungu wumu hakwila nawu motoka yikwawu yihiti nawa twatachikili kuya. Munjila mwadiña mabuku nankashi. Kakavulu twemeneña nakushinjika motoka nawa menji ashikileña mumanuñu, hampinji yitwashijikileña twadimbokeleña nankashi. Twasulukilili hakamukala kanyanya nantentemena yayeni. Hakuya kwiluña kutwayileña, twafumini muniyi njila nakuhitila mumaha mwadiminuwu losu nawa malowa ashikileña mumbunda.

Iyi diyi yadiña mpinji yatachi kushika kunidi iluña, dichi twatachikili kushimwina kudi antu azatileña mumaha mwadiminuwu losu nawa twayihwili netu atuleji kwashakamineñawu aYinsahu munidi iluña. Twazañaleli nankashi chitwelukili netu antu azatileña mwiha adiña amana kwetu.

KUKOLESHA AMAKWAWU KULONDA ATACHIKI MUDIMU WAMPINJI YEJIMA

Hayaaka yinahituhu, twazañalalaña nankashi hakumona yuma yayiwahi yinakufuma mukukolesha antu amakwawu kutachika mudimu wakushimwina mpinji yejima. Hampinji yitwanhempwili chipompelu chadiña nawapayiniya atanu nawana, twakolesheli apayiniya ejima netu ekali nachikonkwanyi chakukolesha mukwakushimwina wumu kulonda yekala niyena payiniya. Chitwayiluku hanyima yatukweji tutanu nakamu, twawanini apayiniya ampinji yejima anashiki ku 22. Ahela ayedi apayiniya, akolesheli atata jawu adiña aeluda kwikala apayiniya ampinji yejima. Awa amana kwetu akolesheli eluda mukwawu kutachika wupayiniya. Hashimbwili wanyi, iwu eluda wamuchisatu amutondeli kwikala payiniya wadimena. Nkumininaku, atachikili kuzata mudimu wamuñinza nañodindi. Indi awa aeluda ayedi? Wumu watachikili kuzata wunkoñi wañinza mukwawu wadihanini kuzata mudimu wakutuña Matala aWanta.

Twamuhamekaña Yehova ifuku dejima hakutukwasha muloña tweluka netu muñovu jetu hitukutwesha kwila chuma chidi chejimaku. Eñañi, mpinji yikwawu twazeyaña nikukatakata ilaña twazañalalaña neyi tutoñojoka hayuma yinafumi mumudimu wetu wakushimwina. Yehova diyi watwalaña hambidi mudimu windi. Tudi amuzañalu chayinu mpinji hakumukalakela neyi apayiniya adimena. Eñañi, tunadizi ‘kajindilu’ kuhitila mukushindamena hadi Yehova ‘watukoleshaña.’

[Mazu ekoku adi hefu 6]

Tunadizi ‘kajindilu’ kuhitila mukushindamena hadi Yehova

[Mapu/Nyevulu yidi hefu 4]

Madagascar, ituña datenañawu nawu Chitutu Cheneni Chichinana nawa dichitutu cheneni chamuchiwana hanu hamaseki. Mwekala iseki dankundu ninyichidi yayileñaleña yashiyashana

[Mwevulu wudi hefu 5]

Ñendelu diyi yadiña nakutukalila nankashi

[Nyevulu yidi hefu 5]

Twatiyileña kuwaha kudizisha antu Bayibolu