Luwi Lwafwomonaña Kuzuwa

KASHINAKAJI wumu wamumbanda wahilili chelili aYinsahu ayedi amwituña daNetherlands, aGeorge niManon amuwani kulonda amushimwini nsañu yayiwahi yaWanta. Wayilejeli nindi wafwishili nfumwindi nimwanindi weyala nawa wakatileña chikatu chakunana mumanuñi. Hela chakwila wawundishili muchima mwivumu hampinji yahanjekeleñawu, hakasunukili chikupu hehamaku.

Hela chochu, George wamulejeli Manon nindi afunti nachipuña chankenu kulonda amwinki ona mumbanda muloña wamwekeneña kuneña nikuhilashana nankashi. Chamutwalililuwu chipuña chankenu, mwiniitala Rie, wadihayaminini nankashi. Ilaña hanidi ifuku wadiña wakasika nayuma yikwawu, dichi afuukwiluhu kufuntaku mpinji yacheñi. Chafuntiluwu aGeorge niMonan hefuku datoñweluwu, elili tuhu dondomwene-e kuchenzelu kwosi wakwili. Hela chakwila esekeli kufunta hefuku dikwawu, hiyamuwaninuku. Atachikili kutoñojoka nawu nakuyitemuka hohu.

Ifuku dimu, George wamuwanini Rie hetala. Wadanakeneni hakubula kuhemba mpinji yadikaninuwu nawa wamulejeli nindi amutentekeli muchipatela. Wahosheli nindi: “Chuma chinelili hampinji yimwanshili, natachikili kutaña Bayibolu!” Atachikili kuhanjeka chachiwahi nikudiza nindi Bayibolu.

Chelili Rie yadizi Bayibolu, wahimpili yililu yindi yakuhilashana nawa wekalili mumbanda wukweti luwi nawa wamuzañalu. Hela chakwila washakamineña hohu mwitala hamuloña wayikatu, watachikili kushimwina yuma yadiziliyi kudi antu adiña nakumuhempula. Hamuloña wakukatakata havulileña kuya nakupompaku, ilaña watiyileña kuwana neyi amana kwetu niahela amuhempula. Hefuku dashikijiliyi yaaka 82 wayili nakupompa kupompa kwañinza nawa wapapatisheweli nakumwekesha nindi nadihani kudi Nzambi.

Chimwahitili tukweji twantesha kufuma hafwiliyi, awanini nkumbu yasonekeliyi. Muniyi nkumbu walumbulwili chineñi chatiyileñayi muwushinakaji nawa wahosheli nankashi hakwikala naluwi. Manon wahosheli nindi: “Kutaña iyi nkumbu kwanshikili hamuchima nawa nidi wamuzañalu muloña Yehova watukwashili kulonda tumwekeshi luwi kudiwu muhela.”

Eñañi, chakutalilahu chaYehova chatukwashaña kukeña antu nikuyitiyila luwi. (Efwes. 5:1, 2) Mudimu wetu wakushimwina wukusoña nyikabu neyi ‘tukukalakala mudimu waNzambi naluwi.’—2 Kor. 6:4, 6.