Malwihu Kufuma Kudi Antañi
Malwihu Kufuma Kudi Antañi
Indi Wanta Wañovu Mukaayi waAnglo-America wekalili mpinjinyi wanta wamuchitanu nachiyedi muwuprofwetu wamuBayibolu?
▪ Chimwenu chamukishi weneni chachikuñu chamweniyi Mwanta Nebukaneza hichemenañaku mawanta añovu ejima amukaayuku. (Dan. 2:31-45) Chemenañaku hohu nfulumendi jitanu jayuulili kufuma mumpinji yaDanyeli nawa jazuñishili nankashi antu jaNzambi.
Kulumbulula kwaDanyeli kwamukishi wachikuñu kwamwekeshaña nawu Wanta Wañovu Mukaayi waAnglo-America wakafuma muRoma, bayi neyi wakashinda Romaku. Muniwu mukishi, Danyeli wamweni chikuñu chatachikilili kunyendu nakushika kumadachilu nikunyinu. (kumadachilu ninyinu, chikuñu chakubomba newumba.) * Kulumbulula kunakumwekesha nawu Wanta wañovu Mukaayi waAnglo-America wakafuma kuRoma dikwila nawu kunyendu yachikuñu. Ichi dichuma chamwekeni. Ituña daBritain dafumini muWanta waRoma, datachikili kwikala wanta wañovu kukumana kwayaaka yamuma 1700. Nkumininaku, ituña daUnited States of America dekalili munza wakola nankashi. Hela chochu, wanta wañovu mukaayi wamuchitanu nachiyedi washimunawu muwuprofwetu wamuBayibolu wadiña kanda wutachiki. Muloñadi? Muloña Britain nituña daUnited States adiña kanda atachiki kuzatila hamu. Chumichi chamwekeni haNjita Yatachi yaMukaayi.
Hayina mpinji, ‘anyana kawanta’ adikitileña nankashi sweje-e muUnited States. Nawa mudimu wakushimwina awulombweleleña muBrooklyn, New York. (Mat. 13:36-43) Antu amwizanvu dawawayishewa adiña nakushimwina mumatuña ayuulileñawu kudi Wanta waBritain. Hampinji yaNjita Yatachi Mukaayi, Britain niAmerica atachikili kudikunda nankashi hakuzuña nawayilumbu jawu. Hamuloña wakwila njita yaleñeleli Britain niUnited States kusweja kwikala nachaambu, atachikili kuzuñisha cheñi mbutu ‘yamumbanda’ yatondawu kudi Nzambi, alekesheli kuzatisha nyikanda yasonekeleñawu nawa ejima alombweleña mumudimu wakushimwina ayishili mukaleya.—Chim. 12:17.
Dichi kwesekeja nansañu yawuprofwetu wamuBayibolu, wanta wañovu wamuchitanu nachiyedi hiwatachikili kukumana kwayaaka yamuma 1700 helili ituña daBritain disweji ñovuku. Ilaña dekalili nañovu kukutachika kwefuku daMwanta. *
[Tumazu twaheshina]
^ Iwumba dakubomba nachikuñu demenañaku nyitayi yekala muniwu Wanta Wañovu Mukaayi waAnglo-America. Hayaaka yinahituhu, idi iwumba dinaleñeli iwu wanta wañovu kubula kwikala nañovu neyi chiwatela kwikala.
^ Iku kulumbulula kunalumbululi chikupu nsañu yidi hefu 57 parakalafu 24, mumukanda waChibemba waUkusesema kwa kwa Daniele ninsañu yidi hachati hamafu 56 ni 139.
[Mwevulu wudi hefu 19]
Amana kwetu atanu naasatu afumini hachishina chaWatchtower ayishili mukaleya muJune 1918
