Muloñadi Chitwatela Kutwamijilaku Mudimu Wayehova?

“Kanwa kami kakushimuna nikuloña kweyi, niwamwinu weyi mwaana wejima.”—MAS. 71:15.

MUKWAKULA NENUDI?

Muloñadi Nowa, Mosi, Yeremiya niPawulu chasambililuwu kumukeña Yehova muchihandilu chawu?

Chumanyi chikuyikwasha kwiluka yuma yimwatela kwila muchihandilu chenu?

Muloñadi chimunakufwila kutwamijilaku mudimu waYehova?

1, 2. (a) Neyi muntu yadihana kudi Yehova, chumanyi chamwekeshañayi? (b) Tunateli kuhetelamu ñahi neyi tutoñojoka hakufuukula kwaNowa, Mosi, Yeremiya niPawulu?

 NEYI mudihana nawa mwikala kambanji kaYesu wapapatishewa, dikwila nawu munakoñi chuma chabadika kulema nankashi. Kudihana kudi Nzambi hichuma chalema chimwatela kufuukulahu enu aweni. Chidi neyi munakuhosha nenu: ‘Yehova, inakukeña wikala Mwanta wami muchihandilu chami chejima. Nidi kambuñeyi. Inakukeña wunleji chinatela kuzatisha mpinji yami, yuma yinateli kutwamijaku, nichinatela kuzatisha maheta niyawana yinikweti.’

² Neyi mudi akwaKristu adihana, chumichi dichimwamukanini Yehova. Tunayihameki hakufuukula muniyi njila, mwafuukwili chuma chachiwahi nankashi. Chineli muneteji nenu Yehova diyi Mwanta wenu, mwatela kuzatisha ñahi mpinji yenu? Chakutalilahu chaNowa, Mosi, Yeremiya nikapostolu Pawulu chinateli kutukwasha kwakula ilu lwihu. Wejima wawu adiña ambuña aYehova adihana chikupu. Yuma yamwenuwu diyi tunakumona ninetu. Yuma yafuukwiluwu yamwekesheli yuma yalemesheluwu muchihandilu chawu nawa yinateli kutukwasha kwiluka chitunakuzatisha mpinji yetu.—Mat. 28:19, 20; 2 Tim. 3:1.

HENOHU DIBAJI KANDA DINZI

3. Indi mafuku etu anesekani ñahi namafuku aNowa?

³ Yesu wesekejeli mafuku aNowa namafuku etu. Wahosheli nindi “Chadiñi hamafuku aNowa, dichi chakela nihakenzayi Mwana kamuntu.” Antu “adiilaña, anwinaña, asumbwilaña, asumbwishilaña, nikwifuku deñililiyi Nowa muwatu, nichenjili dibaji nakuyikumpula wejima wawu, wena kuchiluka nehi.” (Mat. 24:37-39) Antu amavulu makonu ashaña maana kuyuma yakumujimba ilaña kumpinji yitunashikumu ashañaku maana wanyi. Hiyashaña maana kunsañu yakusoñamisha  yashimwinañawu antu jaNzambuku. Antu amavulu atoñojokaña nawu Nzambi hamba kajilumuna antu atamaku neyi chatoñojokeleñawu antu amumafuku aNowa. (2 Pet. 3:3-7) Indi Nowa wazatishili ñahi mpinji hela chakwila antu akaanineña kutiyilila kunsañu yindi?

4. Indi Nowa wazatishili ñahi mpinji yindi hanyima yakumwinka mudimu kudi Yehova nawa muloñadi?

⁴ Chelili Nzambi namuleji dehi chuma chakakoñayi nikumuleja mudimu wateleleli kuzatayi, Nowa watuñili watu kulonda kupulwishilamu antu niatunyama. (Kutach. 6:13, 14, 22) Nowa washimwini cheñi hawunsompeshi waYehova wadiña kwakwihi nakwinza. Kapostolu Petulu wamuteneni nindi “mukwakushimuna kuloña,” chinakumwekesha nawu Nowa wazatili nañovu hakukwasha antuñi nindi kulonda eluki yuma yadiña kwakwihi nakuyimwekena. (Tañenu 2 Petulu 2:5.) Komana munatoñojoki nenu chadi kwikala chachiwahi neyi chakwila Nowa nichisaka chindi ashili maana kumudimu wakuselujola, kuheta chikupu kubadika akwawu, hela kwikala nachihandilu chachiwahi chikupu? Inehi! Hamuloña wakwiluka yuma yadiña kwakwihi nakumwekana, atondolweleli chuma chidi chejima chadi kuyiluwañesha.

YUMA YAFUUKWILIYI MWANA KAMWANTA WAMUEJIPITU

5, 6. (a) Shikola yatañiliyi Mosi yadi kumuleñela kuzata nyidimu yamuchidinyi? (b) Muloñadi Mosi chakaanininiyi kuzata nyidimu yamuEjipitu?

⁵ Tutalenu cheñi chakutalilahu chaMosi. Wakulilili muchipañu chamuEjipitu nawa amuhembeli kudi mwana kaFwaro wamumbanda. Hakwikala kalamba wakansi amudizishili shikola ‘mwaya maana amuEjipitu.’ (Yil. 7:22; Kwid. 2:9, 10) Shikola yadiziliyi yadi kumukwasha kuzatila muchota chaFwaro. Wateleleli kwikala nachifulu cheneni nankashi munfulumendi yadiñaku hayina mpinji, ichi chifulu chadi kumuleñela yekali nayuma yayiwahi nankashi nikumulemesha chikupu. Komana Mosi wafwilileña kwikala naniyi yuma?

⁶ Hamuloña wayuma yamudizishiluwu anvwali jindi iku wuchidi kansi, Mosi watela welukili yuma yakaniniyi Yehova ankakulula jindi Abarahama, Isaka niYakoba. Mosi wakuhweleleli nankashi muniyi yikaninu. Watela watoñojokeli chikupu hachihandilu chindi chakumbidi nihakashinshi kindi kudi Yehova. Chelili mpinji yakufuukulahu yishiki yakwikala kalamba wamuEjipitu hela kwikala ñamba wamuIsarela, chumanyi chatondeliyi? Mosi watondeluhu ‘kumona ihuñu chimu nawantu aNzambi, nakuleka kuluña mpinji yantesha nachiseki chanshidi.’ (Tañenu Aheberu 11:24-26.) Nkumininaku, walondeleli wunlomboli waYehova nakuzatisha chihandilu chindi munjila yayiwahi. (Kwid. 3:2, 6-10) Muloñadi Mosi chakoñeleliyi muniyi njila? Muloña wakuhweleleli yikaninu yaNzambi. Welukili nindi yuma yamuEjipitu hiyadi kumuheteshaku. Eñañi, chimwahitili kapinji kantesha wuna muza awujilumwini nayipupu ikumi yafumini kudi Nzambi. Munamoni chuma chatela kudizilaku ambuña aYehova ejima adihana makonu?  Chatela tusheña maana kuyikonkwanyi hela kuyuma yidi yejima yamukanu kaayi, twatela kusha maana hakwila yuma yakeñañayi Yehova nikumudimu windi.

YEREMIYA WELUKILI YUMA YAKAMWEKANA KUMBIDI

7. Indi yuma yamumwekeneni Yeremiya yinesekani ñahi nayinakutumwekena?

⁷ Muntu mukwawu watwamijiluku mudimu waYehova wadiña Yeremiya. Yehova wamulejeli kaprofwetu kindi Yeremiya kuya nakushimwina nsañu yawusompeshi kudi antu adiña nakusekesha muYerusalema nimuYuda. Yeremiya washakamineña “mumafuku akukuminina.” (Yere. 23:19, 20) Welukili chikupu nindi kaayi mwashakamineñayi hikakutwalekahuku.

8, 9. (a) Muloñadi Baruki chateleleli kuhimpayi yitoñojoka yindi? (b) Chumanyi chitwatela kutoñojokahu neyi hitukufuukulahu?

⁸ Yumanyi yabulili kukoñayi Yeremiya hamuloña wakumukuhwelela Yehova? Hakeñeleña kuheta yuma yayivulu mudina ituña dadiña kwakwihi nakujilumukaku. Chumanyi chadi kufumamu neyi washili maana kuniyi yuma? Ilaña Baruki, nsoneki yaYeremiya, watachikili kwikala nayitoñojoka yambukaku. Dichi, Nzambi wamoneneni Yeremiya nakumuleja nsoneki yindi nindi: “Tiya chinatuñi nakachisanda chinatumbi nakachibwita; kafwampi ituña dejima. Yehova nindi, Wudi nakukeñakeña yuma yeyi yamaneni tahindi? Bayi wuyikeñakeñaku. Tiya ami nakaleta katama hadi antu ejima. Ilaña wumi weyi nakakwinkawu wakekala neyi chuma chakupupa kunjita mwejima muwakaya.”—Yere. 45:4, 5.

⁹ Hituneluki jiika ‘yuma yamaneni’ yadiña nakufwilayi Barukuku. * Ilaña tuneluki netu yina yuma hiyadi kutwalekahuku, yajilumukili chelili aBabiloni ashindi Yerusalema mu 607 B.C.E. Munamoni yuma yitwatela kudizilaku? Twatela kufuukulahu chiwahi hakwikala nayuma yakumujimba yakudikwasha nachu hayinu mpinji. (Yish. 6:6-11) Komana chikuwaha kumanishila mpinji yetu niñovu kuyuma yahakapinji kantesha? Hela chochu, kuloñesha kwaYehova kunakutwalekahu kufuukula chadimu kutuña Matala aWanta amaha, nyitayi yayiha ninyidimu yikwawu yamukuloñesha kwetu. Hela chochu, iyi nyidimu yambuka chikupu muloña yatwalaña mudimu waWanta hambidi. Dichi, chikuwaha neyi antu jaYehova adihana atwamijañaku nyidimu yamuchidiwu hampinji yinakufuukulawu. Komana muneluki chikupu mumuchima wenu nenu ‘munakusambila kukeña wanta nikuloña kwaYehova’?—Mat. 6:33.

“NAYIFUUKULAÑA NAMI HIWUZONDU HOHU”

10, 11. (a) Yumanyi yalemesheliyi Pawulu henohu kanda yekali mukwaKristu? (b) Muloñadi Pawulu chahimpililiyi chihandilu chindi?

¹⁰ Ichi dinu tutalenu chakutalilahu chakukumishaku chaPawulu. Henohu kanda yekali mukwaKristu, antu ejima atoñojokeleña nawu wakekala nachihandilu chachiwahi nankashi kumbidi. Wadizili nshimbi jawaYudeya nantañishi wumu watiyakeni nankashi hayina mpinji. Amwinkeli mudimu weneni nankashi kudi kapristu muneni kaYudeya. Nawa wadiña nakuyilaku hambidi chikupu munsakililu yawaYudeya kubadika akwawu amavulu. (Yil. 9:1, 2; 22:3; 26:10; Ŋal. 1:13, 14) Ilaña Pawulu wahimpili chihandilu chindi chelukiliyi nindi Yehova walekeli kukiswila munza wawaYudeya.

¹¹ Pawulu welukili nindi kuzata mudimu mumpinji yawaYudeya hikwadiña kwalema kumesu aYehovaku nawa hikwadi kuyishikija kudi kwejimaku. (Mat. 24:2) Iwu wadiña kaFwarisi watachikili kwesekeja yuma yelukiliyi kunyima nayuma yadiziliyi kutalisha hankeñelu yaNzambi nihamudimu wawakwaKristu wakushimwina, yuma  yamweneñayi hakusambila nindi yalema watachikili kuyimona nindi ‘hiwuzondu hohu.’ Pawulu walekeli mudimu wazatileñayi munsakililu yawaYudeya nawa wadihanini nawumi windi wejima hanu hamaseki kumudimu wakushimwina nsañu yayiwahi.—Tañenu Fwilipi 3:4-8, 15; Yil. 9:15.

SHINSHIKENU YUMA YIMWALEMESHA

12. Yumanyi yatwamijiluku Yesu hanyima yakupapatishewa?

¹² Nowa, Mosi, Yeremiya, Pawulu niantu amakwawu azatishili mpinji niñovu yawu mumudimu waYehova. Twatela kwimbujola chakutalilahu chawu chachiwahi. Hela chochu, Yesu diyi chakutalilahu chachiwahi chawambuña aYehova ejima adihana. (1 Pet. 2:21) Hanyima yakupapatishewa, Yesu wazatishili chihandilu chindi chejima hanu hamaseki kumudimu wakushimwina nsañu yayiwahi nikumulemesha Yehova. Dichi mukwaKristu wuneluki nindi Yehova diyi Mwanta windi watela kutwamijaku mudimu wakumukalakela Yehova muchihandilu chindi. Komana dichuma chimwatwamijaku? Tunateli kumukalakela ñahi Yehova chikupu hampinji yoyimu nikuzata nyidimu yikwawu yakumujimba?—Tañenu Masamu 71:15; 145:2.

13, 14. (a) AkwaKristu ejima adihana anayikoleshi kwila chumanyi? (b) Yumanyi yinateli kudiluñishawu antu jaNzambi?

¹³ Hadi yaaka yayivulu kuloñesha kwaYehova kwakoleshaña akwaKristu kutoñojoka nikulombela chikupu hamudimu wawupayiniya. Hamuloña wayuma yamboka-mboka yamonañawu, ambuña aYehova amakwawu ashinshika hiyatweshaña kuzata mudimu wakushimwina nakushikija maora 70 hakakwejuku. Chumichi bayi chiyineñeshaku. (1 Tim. 5:8) Indochu enu? Komana mukukañanya kuzata mudimu wawupayiniya?

¹⁴ Toñojokenu hamuzañalu wadiluñishiluwu antu jaNzambi amavulu hampinji yaChanukishu chinu chaaka. MuMarch, apayiniya akukwasha adiña nakukooleka kwakufuukulahu aweni neyi chakwila atela kuzata maora 30 hela 50 mumudimu wamwiha. (Mas. 110:3) Yihita yawantu amavulu azatili mudimu wawupayiniya wakukwasha nawa yipompelu yayivulu yazañaleli nankashi. Komana kwila muhimpa ndandanda yenu kulonda muzateñaku mudimu wawupayiniya nikwikala namuzañalu nehi? Neyi mukwaKristu wadihana yazataku wupayiniya wazañalalaña nankashi nawa nateli kuhosha nindi, “Yehova, nazatili hakumina ñovu jami jejima mumudimu weyi.”

15. Chikonkwanyi chamuchidinyi chatela kwimikayi mukwaKristu wakansi kutalisha hakutaña shikola yakumujimba?

¹⁵ Neyi mudi kwakwihi nakumanisha shikola, hadaha mwakola kumujimba nawa mukweti nyidimu yantesha hohu. Komana mwatoñojokahu chikupu hakutachika wupayiniya wampinji yejima? Chakadi nikujina, antañishi jenu akuhwelela nawu kutaña shikola yahewulu hichuma chachiwahi nankashi chakayikwasha kumpinji yakumbidi. Hela chochu, wena akuhwelela hohu muyuma yamukaayi nimumali abulaña kushimbula. Ilaña neyi mumukalakela Yehova dikwila nawu munakufwila chikonkwanyi chachiwahi nankashi nawa chahaya nyaka. Nawa mukwimbujolaña chakutalilahu chachiwahi chaYesu. Kufuukula muniyi njila kukuyiletela muzañalu. Kukuyikiña. Nawa mukumwekesha nenu kwosi chuma chikuyikañesha kumukalakela Yehova.—Mat. 6:19-21; 1 Tim. 6:9-12.

16, 17. Malwihwinyi itwatela kudihula kutalisha hanyidimu yakumujimba niyuma yikwawu yitwafwilaña?

¹⁶ Ambuña aNzambi amavulu makonu azataña maora amavulu kulonda akeñeli yisaka yawu yuma yakumujimba. Ilaña amakwawu azataña maora amavulu kubadika atela kuzatawu. (1 Tim. 6:8) Dinu ituña daletaña yuma yamboka-mboka yatuleñelaña tukuhweleleña netu twatela  kulanda yuma yejima yayiha yedikaña muloña hitunateli kushakama chakadi iyi yumaku. Ilaña akwaKristu alala hiyetejaña ituña daSatana kuluwañesha yuma yalemeshawuku. (1 Yow. 2:15-17) Indi aleka dehi kuzata nyidimu yakumujima, komana kuduhu njila yayiwahi yatela kuzatishilamu mpinji yawu kubadika mudimu wawupayiniya, nikutwamijaku mudimu waYehova muchihandilu chawu?

¹⁷ Ambuña aYehova ejima adihana atela kudihula nawu: Chumanyi chinalemesha nankashi muchihandilu chami? Komana natwamijaku mudimu waWanta? Komana nembujolaña yililu yaYesu yakudihana? Komana inakulondela kufumba kwaYesu kwakutwalekahu kumulonda? Komana kwila nihimpa ndandanda yami kulonda nizatuku chikupu mudimu wakushimwina Wanta hela nyidimu yikwawu yamukuloñesha? Hela chakwila chihandilu chami chayinu mpinji chinakunkañesha kudikita chikupu, komana natwalekuhu kwikala naspiritu yakudihana?

‘KUFWILA KWILA NIKUKOÑAMU’

18, 19. Mwatela kulombela hayumanyi nawa muloñadi kulomba chikunateli kumuzañaleshela Yehova?

¹⁸ Twazañalalaña hakumona iyena dikwetuwu antu jaNzambi. Hela chochu, amakwawu hiyanateli kwikala nampwila yakuzata wupayiniya hela nawu hiyanashikili kuzata iwu mudimuku hela chakwila kwosi yuma yinateli kuyikañesha. (Kwid. 4:10; Yere. 1:6) Chumanyi chimwatela kwila neyi mwatoñojokaña mwenimu? Komana kwila mulombelahu haniku kukala nehi? Eñañi mwatela kulomba. Pawulu walejeli akwawu akwakwitiya nindi Yehova diyi “wakoñaña mudenu nimuchima wakukeña kwila, nikwila kwakweni, mwakutiyayi yena kuwaha.” (Fwi. 2:13) Neyi himukweti mpwila yakudikita chikupu mumudimu wakushimwinaku, mulombenu Yehova kulonda yayinki mpwila niñovu yakuzata iwu mudimu.—2 Pet. 3:9, 11.

¹⁹ Nowa, Mosi, Yeremiya, Pawulu niYesu wejima wawu adiña amayala adihana. Azatishili mpinji niñovu jawu hakushimwina nsañu yaYehova yakusoñamisha. Hiyetejeli yuma yidi yejima kuyiluwañeshaku. Chineli kukuma kwadinu ituña kudi mukamwihi, wejima wetu twadihana kudi Nzambi twatela kwiluka netu tunakutwalekahu kuzata nañovu hakwimbujola iyi yakutalilahu yayiwahi yamuNsona. (Mat. 24:42; 2 Tim. 2:15) Neyi twila mwenimu, tukumuzañalesha Yehova nawa akatukiswila.—Tañenu Malaki 3:10.

[Tumazu twaheshina]

[Malwihu aKuzatisha haKudiza]

[Mwevulu wudi hefu 21]

Antu hiyashili maana kunsañu yakusoñamisha yashimwinineñayi Nowaku

[Mwevulu wudi hefu 24]

Komana munatoñojokuhu chikupu hakutachika mudimu wawupayiniya wampinji yejima?