Adihanini Namuchima Wumu muEcuador

MUKWENZI weyala wamwituña daItaly wadiña mukukala kweneni. Wafumini tuhu hakumanisha shikola yahewulu nawa wahitili chachiwahi nankashi, dichi antaña jindi niantañishi amulejeleña nawu yayi kushikola yamuñoñi. Henohu kanda yamanishi shikola, Bruno wadihanini kudi Yehova nakumukana nindi wakatwamijaku kwila nkeñelu yaNzambi muchihandilu chindi. Wafuukwiluhu kwiladi? Walumbulwili nindi: “Namulejeli Yehova mukulomba nami nakakolela kuchikaninu chami nawa nakamutwamijañaku. Mukulomba kwami nahosheli cheñi chakufuma hamuchima nami hinakukeña kuneña muchihandilu chamuku ilaña inakukeña nikalakaleña nyidimu yaNzambi yamboka-mboka.”

 Chimwahitili yaaka yantesha, Bruno wabuukilili kuEcuador, South America. Wahosheli nindi: “Yehova wakwili kulomba kwami munjila yakuhayamisha.” Chashikiliyi muEcuador, wadiwanini nawakwawu atwansi amavulu abuukilili kunidi iluña kulonda amukalakeli Yehova chikupu.

ATWANSI ‘ANAKUMWESEKA YEHOVA’

Kufwana atwansi amavulu mukaayi kejima, Bruno wetejeli mutambi waYehova wakwila nawu: ‘Ñesekenu mwani, mutali neyi nukubula kuyenzulwila njanina jamwiwulu, nakayihuñunwina nkisu yayivulu yakukañanya nihakuyitambwila.’ (Mal. 3:10) Hamuloña wakumukeña Nzambi, afuukwiluhu ‘kumweseka Yehova’ kuhitila mukuzatisha mpinji yawu, ñovu nimaheta kulonda akwashi mudimu wakushimwina munidi ituña mwadiña kukaankila kweneni kwawakwakushimwina aWanta.

Chashikiluwu awa akwakukalakala adihanini mumudimu wayinkeluwu, ashikeneni dakumona nawu “mbutu jajivulu jinahi dehi, ilaña akwakukalakala anakehi.” (Mat. 9:37) Chakutalilahu, Jaqueline, wakuGermany wasonekeli namuzañalu mukanda kumutayi wakuEcuador nindi: “Nazatili muEcuador hadi yaaka yakubadika hayiyedi, nidi nawatudizi aBayibolu 13 nawa hakachi kawu, awana apompaña mpinji yejima. Munazañalali wanyi hakutiya iyi nsañu?” Chantal, wakuCanada, wahosheli nindi: “Mu 2008, nabuukilili kwiluña dakuchikumu muEcuador kwadiña chipompelu chimu hohu. Chayinu mpinji, kudi yipompelu yisatu niapayiniya akubadika ha 30 kunidi iluña.  Twazañalalaña nankashi hakumona amaha anakupaminaku!” Wabombeleluhu nindi: “Chakatataka nabuukilili kumusumba Wamapidi waAndes nawa kufuma heshina kushika hewulu hadi mamita akushika ku 2,743. Muniwu musumba mudi antu akubadika ha 75,000 ilaña mudi chipompelu chimu hohu. Idi iluña dadiwahi nankashi kushimwinamu! Inakudiluñisha nankashi mumudimu wami wakushimwina.”

KUKALA KWEKALA MUKUZATA IWU MUDIMU

Kuzatila mwituña dacheñi kwakala nankashi. Atwansi amavulu amweni kukala kweneni nankashi henohu kanda abuuki. Kayla, wakuUnited States wahosheli nindi: “Mazu atama ahosheleñawu amana kwetu inalemesheli kwituña kunafumini aneñesheleña. Elukili wanyi chanleñeleli nifuukuluhu kuya nakuzatila wupayiniya kwituña dacheñi. Mpinji yikwawu nadihwileña nami, ‘Komana kufuukula kwami kudi chiwahi?’” Hela chochu, Kayla wabuukili. Walumbulwili nindi: “Kulomba chikupu kudi Yehova nikuhanjeka nawamana kwetu niahela apama kwankwashili kwiluka nami Yehova wakiswilaña antu adihanaña namuchima wumu.”

Antu amavulu chayikalilaña kudiza idimi dacheñi. Siobhan wakuIreland, wanukaña nindi: “Chankalilileña hama hakwila nawu nihoshi chuma chitiyakani. Nadizili kudiwunjika nitachika nikudiza idimi chikupu nawa nadiseheleña amaweni neyi naluwañeshi.” Anna, wakuEstonia, niyena wahosheli nindi: “Kwinjilila kushakama kwiluña ditaata nankashi nikudi lunkuñu hela kubula kuwela menji ataata hikwesekeni nakudiza chiSpanishuku. Mpinji jikwawu nakeñeleña kuleka. Nashileña hohu maana hayuma yinelileña chiwahi bayi hayuma yinakañenyeñaku.”

Kukala kukwawu kwadiña kwakwanuka antaña niamabwambu. Jonathan, wakuUnited States, wahosheli nindi: “Chinashikili natiyili chineñi nankashi hamuloña wakushiya amabwambu jami nichisaka chami. Ilaña namanishili chineñi kuhitila mukudiza Bayibolu nikuya nakushimwina. Hashimbwili wanyi, yuma yayiwahi yinamweneña mwiha niamabwambu amaha amuchipompelu inadikwatili nawu ankwashili nankashi kwikala cheñi namuzañalu.”

Kukala kwachihandilu mwituña dacheñi nikwena hikukala kukwawu. Hekwawu yuma hiyinateli kwikala neyi chiyadiña kwituña kumwafumaku. Beau,  wakuCanada, wahosheli nindi: “Neyi wudi mwituña denu chaswayi kwikala namalayiti nimenji. Ilaña kunu malayiti nimenji elaña tuhu enza mukampinji kantesha aya cheñi.” Wuzweñi, ñendelu yatama, kubula kwiluka kutaña nikusoneka dikukala kweneni kunakumwekana mumatuña awuzweñi. Ines, wakuAustria, womikaña nakukala kwamuchidiwu kuhitila mukusha maana hayililu yayiwahi yikwetuwu antu akunidi iluña. Wahosheli nindi, “Hiyantu akweti chisambu, luwi, akweti muchima wakukwasha nawa adikehesha. Sweje-e dinu, awa antu akweti mpwila yakukeña kumwiluka Nzambi.”

“NKISU YAYIVULU YAKUKAÑANYA NIHAKUYITAMBWILA”

Hela chakwila awa atwansi amavulu anakuzatila muEcuador anamwekeshi muchima wakudihana, eluka nawu Yehova “natweshi kwila chakubadika nankashi mutukulomba hela mutukutoñojoka mwejima.” (Efwes. 3:20) Eñañi, eluka nawu anatambwili “nkisu yayivulu yakukañanya nihakuyitambwila.” (Mal. 3:10) Talenu chinahoshiwu kutalisha hamudimu wawu wakushimwina:

Bruno: “Natachikili mudimu wami munu muEcuador mwiluña dadiwahi datenañawu nawu Amazon. Nkumininaku, nazatiluku mudimu wakutohesha kasanji kamutayi kamu Ecuador. Chayinu mpinji inakuzatila haBeteli. Hampinji yinadiña muItaly, nafuukwiluhu kumutwamijaku Yehova muchihandilu chami, nawa natwalekuhu kunkwasha kulonda nikali nampwila yakumukalakela mumudimu windi.”

Beau: “Nakundami kwakwihi nankashi naYehova muloña wakuzatisha mpinji yami yejima kuyuma yakuspiritu munu muEcuador. Hampinji yoyimu, nidi nakukooleka kwakuya nakutala maluña amawahi nawa dichuma chinadiña nakufwila nankashi.”

Anna: “Chineli nidi muhela mujiki, natoñojokeleña nami kwila nizata mudimu wazatañawu amishonali nehi. Ichi neluki nami nateli kuwuzata. Hamuloña wakutambwila nkisu jaYehova, inakudiluñisha kwilisha atumbanji, kutuña Matala aWanta nikukwata amabwambu amaha.”

Elke: “Hampinji yinadiña kwetu kuAustria, nalombeleña kudi Yehova nami yankwashi kulonda nikali nakadizi wumu waBayibolu. Ilaña akunu nikweti atudizi aBayibolu 15! Chinamona atudizi aBayibolu anakupama nazañalalaña nankashi.”

Joel: “Hikukooleka kweneni nankashi kwakuya nakuzatila Yehova mwituña dacheñi. Dihu hiwukumukuhwelela Yehova chikupu nawa wukumona chikupu neyi nakukiswila mudimu weyi! Muchaaka chatachi hinafumini kuUnited States, nawaninuku izanvu dawakwakushimwina 6 ilaña ichi anashiki 21. Hachanukishu twadiña 110.”

NDOCHI ENU?

Enu amana kwetu niahela atwansi, komana mudi nachihandilu chikuyiteja kuya nakuzatila kwiluña kudi kukaankila kweneni kwawakwakushimwina aWanta? Hela chochu, mwatela kutoñojokahu nankashi neyi himukufuukula kuya kwiluña damuchidiwu. Sweje-e dinu, mwatela kumukeña Yehova niantuñi nenu hakwila nawu mufuukuluhu muniyi njila. Neyi mukweti kukeña kwamuchidiwu nawa munashikilimu kuzata iwu mudimu, lombenu kudi Yehova neyi himukufuukulahu kuya nakuzatila kwituña dacheñi. Kubombelahu, hoshenu nawanvwali jenu akwaKristu niaeluda amuchipompelu hachuma chimunakukeña kwila. Neyi mwila mwenimu, ninenu nawa mukwiluka nenu munateli kuzataku iwu mudimu wajila nawa wawuwahi nankashi.

[Mazu ekoku adi hefu 3]

“Kulomba chikupu kudi Yehova nikuhanjeka nawamana kwetu niahela apama kwankwashili kwiluka nami Yehova wakiswilaña antu adihanaña namuchima wumu.”—Kayla wakuUnited States

[Chikasha/Mwevulu wudi hefu 6]

Chimwatela kudiloñesha neyi munakukeña kuzatila kwituña dacheñi

• Ikalenu nachaaku chakudiza nkawenu

• Hitulukenu muMudimu Wetu waWanta, waAugust 2011 mafu 4-6

• Hanjekenu nawantu azatilahu dehi mumatuña acheñi

• Ilukenu chisemwa ninsañu yanyaka yanodi ituña

• Tachikilenu chadimu kudiza idimi damunodi ituña

[Chikasha/Mwevulu wudi hefu 6]

Amakwawu azatilaña mwituña dacheñi adikwashaña aweni munsañu yamali kuhitila . . .

• mukuzataku tukweji twantesha mwituña dawu hachaaka hachaaka

• mukusonkesha itala hela kapeka mwakukama hela iluña dakuselujolila

• kuzatila haIntaneti

[Nyevulu yidi hefu 4, 5]

1 Jaqueline wakuGermany

2 Bruno wakuItaly

3 Beau wakuCanada

4 Siobhan wakuIreland

5 Joel wakuUnited States

6 Jonathan wakuUnited States

7 Anna wakuEstonia

8 Elke wakuAustria

9 Chantal wakuCanada

10 Ines wakuAustria