“Chuma Chinakeñeleña Nachiwani”

Yaaka 15 yinahituhu, Emilia wazatileña mudimu wawupayiniya wampinji yejima. Hela chochu, wafuukwiluhu kuleka mudimu wampinji yejima. Muyaaka yantesha yinahituhu, watachikili kutoñojoka hayina mpinji yadiñayi payiniya wampinji yejima nawa wakeñeleña kutachika cheñi mudimu wakushimwina.

Ilaña mudimu wakumujimba wazatileñayi Emilia wamumanishilileña mpinji yeneni nawa chumichi chamuneñesheleña hama. Ifuku dimu, henohu nemani nawakwawu akwanyidimu, watachikili kwaboka nindi: “Chiña nazataña maora antesha!” Chachitiyiliyi mukulumpi windi wamudimu, wenjili nakumwihula neyi mwalala nakukeña yazateña maora antesha. Emilia wamulejeli nindi dichinakukeñayi. Hela chochu, hakwila nawu amwiteji chiña atiya mukanwa kamukulumpi wamudimu muloña nshimbi jakampani jahosha nawu ankoñi ejima atela kusha maana kumudimu. Iwu muheletu wadiloñesheli henohu kanda yadimoni namukulumpi wakampani nawa walombeli nindi yekali namuchima wakuwunda nikuhamuka.

Hampinji yahanjekeleñawu, Emilia walombeli mukubabala chakadi kuhita mumbadi nindi amuketuluku maora akuzata. Walumbulwilili nindi wazatishaña mpinji yindi yakunooka kuya nakukwasha antu: “Ami nidi Chinsahu chaYehova, nakwashaña antu kuspiritu. Makonu, yililu yawantu amavulu yinatami. Dichi atela kwiluka nshimbi jalala nawa nsañu yamaana yamuBayibolu yinashimwinaña yinateli kuyikwasha nankashi. Hinakukeña nyidimu yinazataña neyi nafumi kunu kumudimu yinzeyesheña kulonda nikañanyeña kuzata nañovu kunu kumudimuku, ilaña inakukeña kwikala nampinji yeneni yakukwashilamu antu. Dichi inakukeña nami nizateña hohu maora antesha.”

Mukulumpi wamudimu wadiña nakutiyilila nankashi nawa wahosheli nindi mpinji yimu niyena wakeñeleña kuzata mudimu wakukwasha atuzweñi. Wahosheli cheñi nindi: “Kwesekeja nayuma yiwunashimuni, namoni wunateli kwila muwunafuukuli. Wuneluki ntahi neyi wukutambulaña mali antesha?” Emilia nindi welukili nawa nindi neyi chinatwesheki, wukupeleshaku chihandilu chindi. Wahosheli cheñi nindi: “Chuma cheneni nankashi chinakukeña chochakwila chuma chatela kukwasha antu chikupu.” Mukulumpi wamudimu wamulejeli nindi: “Nahamekaña antu azatishaña mpinji yawu chikupu hakukwasha antu.”

Kwosi muntu wazataña haniyi kampani etejawu kuzata maora antesha. Emilia amwiteja kuzata mafuku awana hohu mumulungu. Wahayamini nankashi, muloña watachikili kutambula wufwetu weneni nankashi kubadika nfwetu yatambwileñayi hatachi! Emilia nindi: “Chuma chinakeñeleña nachiwani, ichi nateli kwikala payiniya wampinji yejima cheñi!”

Anenu mwatoñojokaña jakuhimpa chihandilu chenu kulonda mwiñili cheñi mumudimu wawupayiniya?

[Mazu ekoku adi hefu 32]

Mukulumpi wamudimu wamulejeli nindi: “Nahamekaña antu azatishaña mpinji yawu chikupu hakukwasha antu”