Kalakelenu Nzambi Wasubulaña Antu

“Kumukeña Nzambi yowu kwila mwatulejañayi; mwatulejañayi himwakalaku.”—1 YOW. 5:3.

MUKWAKULA NENUDI?

Indi Satana wamwekeshaña ñahi nshimbi jaNzambi jimwekaneña neyi hichiteli?

Muloñadi chitwatela kwikalila ababala kutalisha hadi antu itwadikundaña nawu?

Chumanyi chikutukwasha kutwalekahu kwikala ashinshika kudi Nzambi wasubulaña antu?

1. Indi Yehova wamonaña ñahi kusubuka nawa wakumwekesheli ñahi kudi Adama naEvu?

 YEHOVA diyi hohu Muntu wukweti ñovu yakusubula antu. Ilaña, hayizatishaña munjila yatamaku; nawa hayuulaña nituyuma twantesha twakoñañawu ambuñinduku. Ilaña wayinka ñovu yakudifuukwila aweni, chumichi chayikwashaña kufuukula hayuma yinakukeñawu niyinakufwilawu. Chakutalilahu, Nzambi wayinkeli Adama naEvu lushimbi lumu hohu, wayikaanishili kudya ‘kumutondu wakwiluka nachu niyayiwahi niyatama.’ (Kutach. 2:17) Eñañi, adiña nakukooleka kwakwila nkeñelu yaNleñi yawu muloña adiña asubuka!

2. Muloñadi anvwali jetu atachi chajimbesheleluwu chawaana chakwikala asubuka chayinkeluwu kudi Nzambi?

² Muloñadi Nzambi chetejeleliyi anvwali jetu atachi kwikala asubuka? Wayileñeli muchifwanisha chindi nawa wayinkeli chinleji, nakuyikuhwelela nindi chineli amukeña Nleñi yawu akelaña yuma yayiwahi. (Kutach. 1:27; Rom. 2:15) Chawushona, Adama naEvu akañenyi kuhameka Mukwakuhana Wumi nikukooleka kwakwikala asubuka. Ilaña afuukwiluhu kulondela mwayilejeliyi Satana nawa ekalili nayililu yakudimena. Chatela ekali asubuka chikupu, anvwali jetu atachi adilandishili aweni nianyanawu avwalikili muwuduñu wanshidi nawa mwafumini yuma yomisha mbaña.—Rom. 5:12.

3, 4. Indi Satana wafwilaña ñahi kutudimba kutalisha hanshimbi jaYehova?

³ Neyi chakwila Satana wadimbili antu ayedi awanina, niyileñaleña yikwawu yakuspiritu, kukaana chiyuulu chaNzambi, anetu nawa nateli kutudimba. Wuchidi kuzatisha kafunta kokamu nikulelu. Wafwilaña kutudimba kulonda tutachiki kutoñojoka netu nshimbi jaNzambi jakala nawa tunakushalahu yuma yinakudiluñishawu akwetu muchihandilu. (1 Yow. 5:3) Tunateli kwikala nayitoñojoka yamuchidiwu sweje-e neyi tudikundaña nawantu akweti yitoñojoka yamuchidiwu.  Muhela wayaaka 24 wadiñijili muyililu yawuvumbi wahosheli nindi, “Kudikunda nawantu atama kwanluwañesheli nankashi, muloña natiyileña woma wakuhosha yuma yambuka nayahosheleñawu akwetu.” Hadaha ninenu munakuhita mukukala kwokumu.

⁴ Chawushona, mpinji yikwawu amabwambu atama anateli kufuma muchipompelu chawakwaKristu. Chinsahu wumu wakansi wahosheli nindi, “Kudi atwansi amakwawu muchipompelu ineluka akeñeleña kusumbula hela kusumbuka nawantu abula kwitiya. Nkumininaku, chinaswejeli kudikunda nawu natachikili kwimbujola yililu yawu. Wuspiritu wami watachikili kufunta mwishina. Hinadiluñishileña yakudya yakuspiritu hakupompaku nawa hinavulileña kushimwinaku. Haniyi mpinji natoñojokeli nami natela kuleka kudikunda nawu nawa nalekeli.” Mweluka nenu antu imwadikundaña nawu anateli kuyiluwañesha? Talenu chakutalilahu chamuBayibolu.—Rom. 15:4.

WEYILI NYICHIMA YAWU

5, 6. Indi Abisalomi wahuñumwini ñahi antu nawa kafuta kindi kazatikili?

⁵ MuBayibolu mwekala yakutalilahu yayivulu yawantu aluwañesheli akwawu. Abisalomi, mwana kaMwanta Davidi wudi hakachi kawantu aluwañesheli akwawu. Abisalomi wadiña iyala walubanji chikupu. Kufwana Satana, ichima denzeli mumuchima windi, muloña watachikili kufwila wanta watata yindi hela chakwila yena hateleleli kwikala mwantaku. * Hakufwila kuhukula wanta watata yindi, Abisalomi wakwatili kafuta kakumwekesha neyi wayikeña akwawu aIsarela hampinji yoyimu wayilejeleña mukubabala nindi chota chamwanta hichayakamenañaku. Eñañi, neyi cheliliyi Diyabolu mwitempa daEdeni, Abisalomi wadimwekesheli kudi antu neyi wadiña nakuyikwasha nawa hampinji yoyimu wadiña nakumutwambila tata yindi.—2 Sam. 15:1-5.

⁶ Komana kafuta kaAbisalomi kazatikili? Kazatikili chanti, muloña Bayibolu yahoshaña nawu: “Abisalomi hakwiya nyichima yawaIsarela amayala.” (2 Sam. 15:6) Nkumininaku, Abisalomi wakañenyi muloña wakudivwimba. Cheñi nawa, wafwili nawa wajahishili antu amavulu adiña nakumuhakwilaku.—2 Sam. 18:7, 14-17.

7. Yumanyi yitukudizila kunsañu yaAbisalomi? (Talenu mwevulu wudi hefu 14.)

⁷ Muloñadi aIsarela chashikenenuwu dakuyidimba? Hadaha akeñeleña nankashi yuma yayikaninuwu kudi Abisalomi. Indi kwiji mpolu yindi yayiwahi diyayikokweli. Hichikweti muloña nachuma chaleñeleluku, twatela kwiluka netu: Akañenyi kumwovwahila Yehova nimwanta atondeliyi. Makonu, Satana wuchidi kuzatisha antu adi neyi “Abisalomi” hakufwila kwiya nyichima yawambuña aYehova. Anateli kuhosha nawu ‘nshimbi jaYehova jakala nankashi. Talenu hadi antu ejima abulaña kumukalakela Yehova. Anakudiluñisha chikupu.’ Neyi mutiya muntu nakuhosha chamuchidiwu, komana mukutwalekahu kwikala ashinshika kudi Nzambi? Komana mukwiluka nenu ‘lushimbi lwaloña’ lwaYehova, lushimbi lwaKristu hohu dilunateli kuyisubula chikupu? (Yak. 1:25) Neyi dichimuneluki, lemeshenu ilu lushimbi nawa bayi muzatisha kusubuka kwakwikala mukwaKristu munjila yatamaku.—Tañenu 1 Petulu 2:16.

8. Yakutalilahwinyi yinakumwekesha nawu kufumpa nshimbi jaYehova hikwazañaleshaña antuku?

⁸ Satana wafwilaña nankashi kuluwañesha atwansi. Mana kwetu wudi nayaaka yakubadika ha 30 wahosheli hayuma yakoñeliyi hampinji yadiñayi kansi nindi: “Namweneña nshimbi jaYehova nami jakala nankashi bayi neyi jakiñañaku.” Chafuminumu, welili wuvumbi. Ilaña chumichi hichamuzañalesheluku. Wahosheli nindi,  “Naditwikileña muloña nikuditoñesha hadi yaaka yayivulu.” Muhela wumu wasonekeli hayuma yakosomweniyi muwunkaña, nindi: “Chinelili wuvumbi naneñeli nawa nadimweneña neyi nidi wamukunkulwayi. Munahiti dehi yaaka 19, ilaña nichidi kwanuka yuma yatama yinakosomweni.” Muhela mukwawu wahosheli nindi: “Naneñeli nankashi muyitoñojoka nikuspiritu hamuloña wakwanuka nami yililu yami yaneñesheleña antu inakeña nankashi. Kushakama chakadi nkisu yaYehova kwatama.” Satana hakeñaña enu mutoñojokeña hayuma yatama yafumaña mukwila nshiduku.

9. (a) Malwihwinyi akutukwashaku kwiluka yitoñojoka yaYehova ninshimbi jindi? (b) Muloñadi chitwatela kumwilukila Nzambi chachiwahi?

⁹ Chawushona nankashi muloña atwansi amavulu adi muchalala niakulumpi amakwawu anakumona jomisha mbaña jafumaña mukuvulumuna. (Ŋal. 6:7, 8) Dichi dihulenu nenu: ‘Komana neluka tufuta twazatishañayi Satana hakudimba antu? Komana namumonaña Yehova nami diyi Ibwambu dami chikupu, washimunaña nsañu yalala nawa wakeñaña nindi yuma yiñendeleña chiwahi? Komana nakuhweleli chikupu nami hanateli kukañanya kunyinka yuma yayiwahi nawa yinateli kunletela muzañalu chikupuku?’ (Tañenu Isaya 48:17, 18.) Hakwila nawu mwiteji chakufuma hamuchima, mwatela kumwiluka nankashi Yehova. Mwatela kumwiluka nankashi nikwiluka nenu nshimbi jamuBayibolu jamwekeshaña nawu wayikeña bayi neyi nakukeña nindi mwikaleña mumpompaku.—Mas. 25:14.

LOMBENU MUCHIMA WAMAANA NIWAKWOVWAHILA

10. Muloñadi chitwatela kufwila kumwimbujola Mwanta wakansi Solomoni?

¹⁰ Hampinji yadiñayi mukwenzi,  Solomoni walombeli nakudizoza nindi: “Ami kwami nikana kanyanya hohu hineluka hela kwidika hela kwiñilaku.” Kuhiñahu walombeli nindi amwinki muchima wamaana niwakwovwahila. (1 Any. 3:7-9, 12) Yehova wakwili kulomba kwindi kwakufuma hamuchima nawa nateli kwakula kulomba kwenu hela mudi akulumpi hela kansi. Hela chochu, Yehova hanateli kuyinka maana nikashinshi muchihayamishaku. Ilaña nateli kuyinka maana neyi mukudizaña Izu dindi nikulomba spiritu yindi yajila nikuzatisha yuma yakuspiritu yitwadizaña muchipompelu chawakwaKristu. (Yak 1:5) Eñañi, kuhitila muniyi yuma, Yehova wakwashaña ambuñindi atwansi kwikala namaana kubadika antu ejima akaanaña kufumba kwindi kubombelahu niantu atenañawu nawu “akwamaana niakwakashinshi” amukanu kaayi.—Luka 10:21; tañenu Masamu 119:98-100.

11-13. (a) Yumanyi yitwatela kudizila kumazu adi haMasamu 26:4, Yishimu 13:20, ni 1 Akorinda 15:33? (b) Munateli kuzatisha ñahi iyi nshimbi yidi muNsona?

¹¹ Hakwila nawu twiluki chichawahila kudiza Bayibolu nikutoñojoka hayuma yitwatañaña kulonda tumwiluki Yehova chikupu, talenu jinsona jinalondeluhu. Muniji nsona mudi nshimbi jinateli kutukwasha hakutonda antu akudikunda nawu: “Hinashakami hamu nawantu amaswimbuku; hinukwiñila mwaduwu akwakujinda nsañuku.” (Mas. 26:4) “Endaku nawakwamaana nineyi wakekala mukwamaana; ilaña wadikunda nawayisupi wakamwenamu jakala.” (Yish. 13:20) “Bayi ayidimbaku; kudikunda nawantu atama kwatamishaña maana amawahi.”—1 Kor. 15:33.

¹² Yumanyi yitwatela kudizila muniji nsona? (1) Yehova nakukeña nindi tutondeña chiwahi antu akudikunda nawu. Nakukeña kutukiña kumujimba nikuspiritu. (2) Antu itwadikundaña nawu atukwashaña hela kutuluwañesha nawa dichuma chamwekanaña. Nsonekelu yanawa mavasi adi hewulu yinakumwekesha nawu Yehova nakutulembelela chikupu. Munjilanyi? Awa mavasi hiyadi neyi nshimbi jinatusonekeluwu, jinakuhosha nawu “bayi mwila ichiku . . . ” Ilaña himazu alala anasonekuwu munjila yapela. Chidi neyi Yehova nakutuleja nindi: ‘Iyi diyi nsañu yalala. Chumanyi chimwatela kwila? Yumanyi yidi mumuchima wenu?’

¹³ Chineli awa mavasi asatu himazu alala anasonekuwu munjila yapela, akwashanaña mpinji yejima nawa tunateli kuyizatisha munjila jamboka-mboka. Chakutalilahu dihulenu awa malwihu: Nateli kutondolwela ñahi kudikunda nawantu ‘ajindaña chekalawu’? Munjilanyi munatela kudikundila nawantu amuchidiwu? (Yish. 3:32; 6:12) Antu amuchidinyi ‘akweti maana’ anakukeñayi Yehova nindi nidikundeña nawu? Indi ‘ayisupi’ hiyantu amuchidinyi anakukeñayi nindi niyitondolweli? (Mas. 111:10; 112:1; Yish. 1:7) ‘Yililwinyi Yayiwahi’ yinukutamisha neyi nidikundaña nawantu atama? Komana kwituña dikunatela kuwana amabwambu atama hohu? (2 Pet. 2:1-3) Munateli kwakula nenudi awa malwihu?

14. Munateli kuwahisha ñahi mpinji yaKudifukula kwaChisaka kwamelela?

¹⁴ Hanyima yakuhanjeka haniji Nsona, komana kwila mushinshika hanyikanda yikwawu yamuBayibolu yinakumwekesha yitoñojoka yaNzambi hayuma yinateli kuyikwasha nikukwasha chisaka chenu nehi? * Enu anvwali, mwatela kuhanjeka hansañu yamuchidiwu hampinji yaKudifukula kwaChisaka kwamelela. Hampinji yimukudifukulaña, mwatela kwiluka nenu munakufwila kukwasha ejima muchisaka kulonda eluki chikupu nawu nshimbi yatwinkayi Nzambi yamwekeshaña nawu watukeña. (Mas. 119:72) Eñañi, kudifukula kwamuchidiwu kwatela kukwasha ejima amuchisaka kukundama kudi Yehova nikudi wumu namukwawu.

15. Munateli kwiluka ñahi nenu munatachiki kwikala namuchima wamaana niwakwovwahila?

 ¹⁵ Munateli kwiluka ñahi nenu himukutachika kwikala namuchima wamaana niwakwovwahila? Njila yimu yidi yakwesekeja yitoñojoka yenu nayitoñojoka yawantu ashinshika akunyaka, chidi neyi Mwanta Davidi, wasonekeli nindi: ‘Natiyi kuwaha nakwila muchima weyi, eyi Nzambi yami, mwalala, nshimbi jeyi jidi mukachi kamuchima wami.’ (Mas. 40:8) Chochimu, nsoneki yaMasamu 119 wahosheli nindi: ‘Nshimbi jeyi o chinajikeña! Najitoñojokaña mwaana wejima.’ (Mas. 119:97) Kukeña kwamuchidiwu hikwenzaña hohu chakukasumwishaku. Ilaña kwenzaña hamuloña wakudiza chikupu, kulomba nikutoñojoka hayuma yimunadizi nankashi nihankisu jajivulu jimunatambwili muchihandilu chenu hamuloña wakukakela kunshimbi jaNzambi.—Mas. 34:8.

LWILENU KULONDA MWIKALI AKWAKRISTU ASUBUKA!

16. Chumanyi chitukwanukaña neyi tunakukeña kwikala asubuka chikupu?

¹⁶ Kufuma tuhu kumashiita, nyuza yazuñaña njita kulonda ekali asubuka. Ichi chinakumwekesha nawu anenu nawa mwatela kulwa chikupu kulonda mwikali akwaKristu asubuka. Mwatela kwanuka nenu, ayilumbu jenu amavulu, Satana niituña ditunakushakamamu nispiritu yafwana yetuña. Mwalwishaña cheñi nakubula kuwanina nimuchima wenu wadimbanaña. (Yere. 17:9; Efwes. 2:3) Ilaña, nawukwashu waYehova munateli kushinda. Yuma yejima yimukushinda chili yamaneni hela yanyanya, mwafumaña yuma yiyedi yayiwahi. Chatachi, mukuzañalesha muchima waYehova. (Yish. 27:11) Chamuchiyedi, chimweluka ñovu yaNzambi yabadika nankashi kutalisha ‘halushimbi lwaloña lwakusubuka,’ mukusweja kwikala nampwila yakutwalekahu kwenda ‘munjila yanyanya’ yaya kuwumi wahaya nyaka. Kumbidi, mwakadiluñisha kusubuka kwakanayi Yehova ambuñindi ashinshika.—Yak. 1:25; Mat. 7:13, 14.

17. Muloñadi chitukubulila kuneña hamuloña wakubula kuwanina kwetu nawa Yehova watukwashaña ñahi?

¹⁷ Mpinji yikwawu, wejima wetu twaluwañeshaña. (Mukwa. 7:20) Neyi muluwañesha, bayi mudimona nenu mudi amukunkulwayi hela kusweja kuneñaku. Neyi munaluwañeshi, zatilenu hachiluwa chimunakoñi, neyi chiluwa cheneni munateli kulomba wukwashu kudi aeluda amuchipompelu chenu. Yakoba wasonekeli nindi: “Kulomba [kwawu] kwakukuhwelela kukuhandisha wakata, [niYehova] wukumukolesha; neyi navulumuni akumwanakena.” (Yak. 5:15) Eñañi, mwatela kwiluka nenu Nzambi wukweti wushona nawa wayileta muchipompelu muloña wamweni chuma chachiwahi mudi enu. (Tañenu Masamu 103:8, 9.) Neyi chakwila mutwalekahu kumukuhwelela Yehova namuchima wenu wejima, hamba kayivulamenaku.—1 Kushi. 28:9.

18. Tunateli kumwekesha ñahi netu tunakulondela kulomba kwaYesu kwasonekawu haYowanu 17:15?

¹⁸ Hampinji yalombeleñayi hamu nawapostolu indi ashinshika 11 hawufuku wakukumishaku, Yesu wayilombeleleluku awa mazu itwanukaña nindi: “Wuyihembi kudi watama.” (Yow. 17:15) Yesu hakameneni hohu apostolu indiku ilaña niatumbanji twindi ejima. Dichi twatela kwiluka netu Yehova wakakula kulomba kwaYesu kuhitila mukutwakamena muyinu mpinji yakala. “[Yehova] diyi nkebu yawantu endaña mwamuwahi . . . nikuhemba mwelañawu antu indi ajila.” (Yish. 2:7, 8) Eñañi, kwikala ashinshika hichuma chakala, ilaña diyi njila yimu hohu yaya kuwumi wahaya nyaka nikukusubuka chikupu. (Rom. 8:21) Bayi mwiteja muntu wudi wejima ayiluwañeshuku.

[Tumazu twaheshina]

[Malwihu aKuzatisha haKudiza]

[Nyevulu yidi hefu 14]

Tunateli kwiluka ñahi antu adi neyi Abisalomi makonu nikudikiña kudi antu amuchidiwu?