“Muntwinyi Inukutiyami Woma?”
“Muntwinyi Inukutiyami Woma?”
“Hela antu akumbutula njita mwenimu dimu nukukuhwelela.”—MAS. 27:3.
KWESEKEJA NANAWA MAVASI, CHUMANYI CHIKUYIKWASHAKU KWIKALA AHAMUKA?
1. Indi Masamu 27 akutukwasha kwilukadi?
MULOÑADI mudimu wetu wakushimwina chiwunakutohelaku hela chakwila yuma yinakusweja kutaminaku mwituña? Muloñadi chitwazatishilaña mpinji yetu niñovu henohu antu amavulu anakumona kukala kwansañu jamali? Tunateli kutwalekahu ñahi kwikala namuchima wakuhamuka henohu antu amavulu anakuchina yuma yakamwekana kumbidi? Kamina konenewa kembiliyi Mwanta Davidi, kasonekawu muMasamu 27, kanakuli awa malwihu.
2. Woma waleñelaña muntu kwiladi nawa chumanyi chitwatela kukuhwelela?
2 Davidi watachikili idi isamu namazu akwila nawu: “Yehova diyi chejeji chami, diyi wamwinu wami; muntwinyi inukwakamami? Mudi Yehova dimu mwakolela wumi wami indi muntwinyi inukutiyami woma?” (Mas. 27:1) Woma wazeyeshaña muntu chakwila hakutwesha kwila chumaku. Ilaña muntu wamukuhwelela Yehova wekalaña wahamuka nawa hatiyaña womaku. (1 Pet. 3:14) Neyi Yehova yekala mpwembu yetu, ‘tukushakama chazo-o, twakamona kumwena kwakubula kutiya woma wayuma yatama.’ (Yish. 1:33; 3:25) Muloñadi?
“YEHOVA DIYI CHEJEJI CHAMI, DIYI WAMWINU WAMI”
3. Munjilanyi mwekalilayi Yehova chejeji chetu nawa chumanyi chitwatela kwila?
3 Nkinji yakwila nawu “Yehova diyi chejeji chami” yamwekeshaña nawu Yehova watoneshaña mesu etu nikutufumisha mumwidima wakuspiritu. (Mas. 27:1) Chejeji chatukwashaña kumona wubanji hela malola adi munjila ilaña hichafumishaña iyi yuma munjilaku. Twatela kutondolwela wubanji wutwamonaña. Munjila yoyimu, Yehova watulejaña yuma yinakumwekana mukaayi. Watulejaña wubanji wamukanu kaayi. Watwinkaña nshimbi jajiwahi jamuBayibolu jatukwashaña ilaña twatela kuzatisha yuma yitwadizaña. Neyi twila mwenimu, tukwikala namaana nankashi kubadika ayilumbu jetu hela antañishi jetu.—Mas. 119:98, 99, 130.
4. (a) Muloñadi Davidi chahosheleliyi namuzañalu nindi: “Yehova diyi . . . wamwinu wami”? (b) Mpinjinyi yamba kekalayi Yehova wamwinu wetu?
4 Mazu aDavidi adi haMasamu 27:1 anakumwekesha nawu watela wanukili chamupulwishiluwu kudi Yehova kunyima. Chakutalilahu, Yehova wamupulwishili “kwikabu damutupa nikwikabu dabera.” Yehova wamwinkeli cheñi ñovu yakushinda Goliyati chikelamu cheyala. Nkumininaku, Mwanta Sawulu wakeñeleña kumwasa Davidi iyoña, ilaña Yehova wamupulwishili muyuma yejimiyi. (1 Sam. 17:37, 49, 50; 18:11, 12; 19:10) Dihafumini Davidi kuhosha namuzañalu nindi: “Yehova diyi . . . wamwinu wami”! Yehova wakekala cheñi wamwinu kudi antu jindi neyi chekaliliyi kudi Davidi. Munjilanyi? Kuhitila mukupulwisha ambuñindi “kuyihuñu oyu yeneni” yinakwinza.—Chim. 7:14; 2 Pet. 2:9.
ANUKENU YUMA YAYIWAHI YAYIMWEKENENI
5, 6. (a) Yitoñojoka yetu yatukwashaña ñahi kwikala namuchima wakuhamuka? (b) Indi yuma yayikoñeleliyi Yehova antu jindi yayikoleshaña ñahi?
5 Chuma cheneni chikutukwasha kwikala ahamuka achisoneka haMasamu 27:2, 3. (Tañenu.) Davidi wanukili kukala kwamumwekeneni kwamupulwishiluwu kudi Yehova. (1 Sam. 17:34-37) Yumiyi yamwinkeli ñovu yakuumika hela tuhu kukala kweneni kwadi kumuholokela. Anenu mwekalaña nañovu neyi mutoñojoka hakukala kwayimwekeneni? Chakutalilahu, mwalombahu dehi chikupu hakukala kweneni kwayiholokeleli nakumona Yehova chayinkeliyi maana hela ñovu yakuumika kweseka? Hela munateli kwanuka chamanini kukala kwayikañesheleña kuzata mudimu wakushimwina namuzañalu hela chimwekalili nakukooleka kweneni kwakuzata mudimu waNzambi? (1 Kor. 16:9) Ichi munakutiya ñahi neyi mwanuka yuma yayimwekeneni? Komana yumiyi hiyinateli kuyileñela mwiluki nenu Yehova nateli kuyikwasha kumanisha hela kuumika kukala kweneni hela yihuñu yinateli kuyiholokela nehi?—Rom. 5:3-5.
6 Tunateli kwila ñahi neyi nfulumendi yeneni yinakwati kafuta kakukeña kujilumuna kuloñesha kwawaYinsahu jaYehova? Makonu antu amavulu aneseki nawu akujiyishi ilaña anakañanyi. Neyi twanuka chayikwashiliyi Yehova antu jindi kunyima chikutukwasha kuumika yuma yikatumwekena kumbidi.—Dan. 3:28.
SWEJENU KUKEÑA KUDIFUKULA KWALALA
7, 8. (a) Kwesekeja naMasamu 27:4, chumanyi chehwiliyi Davidi kudi Yehova? (b) Indi tembeli yeneni yaYehova hichumanyi nawa antu adifukulaña ñahi hatembeli yeniyi?
7 Kukeña kutwakeña kudifukula kwalala dichuma chikwawu chalema chatukwashaña kwikala ahamuka. (Tañenu Masamu 27:4.) Mumafuku aDavidi, tabanaka diyadiña ‘itala daYehova.’ Davidi yomweni diyi waloñesheli yuma yakuzatisha kutembeli yeneni yatuñiliyi mwanindi Solomoni. Chimwahitili yaaka, Yesu washimwini nindi antu hiyakakakelaña hetala dimu dajila dakiswililiyi Nzambi nindi didi iluña dakudifukwila kwalala kwetejañayi Yehovaku. (Yow. 4:21-23) Kapostolu Pawulu washimwini muAheberu kapetulu 8 kushika ku 10 nindi tembeli yeneni yakuspiritu yatachikili kuzatika hampinji yamupapatishiluwu Yesu mu 29 C.E., hadiheniyi yomweni kwila nkeñelu yaYehova. (Heb. 10:10) Iyi tembeli yeneni yakuspiritu hintanjikilu yaloñeshayi Yehova kulonda wejima wetu twikali nawuselewa waNzambi kuhitila mukukuhwelela ifutu danyiloña daYesu. Twadifukulaña ñahi muniyi tembeli? Kuhitila mukulomba ‘nikukundama kwakwihi namuchima walala, nakukuhwelela kwakweni’; nikushimwina hayuma yitwachiñejaña chakadi woma; nikukwasha nikukolesha akwetu akwakudifukula hampinji yitunakupompa nihakudifukula kwachisaka. (Heb. 10:22-25) Chikuhwelelu chetu chikukolelaku neyi twikala namuchima wakusakilila hantanjikilu yakudifukula kwalala munanu mafuku akukuminina akala.
8 Mukaayi kejima, ambuña aYehova ashinshika anakudikita nankashi mumudimu wakushimwina, kudiza madimi amaha, nikuya nakuzatila kumaluña kudi kukankila kwawakwakushimwina aWanta. Yililu yawu yamwekeshaña nawu kufwana ñimbi yamasamu, amwihulaña Yehova chuma chimu. Akeñaña kudiluñisha kuwaha kwaYehova nikuzata mudimu windi wajila hichikweti muloña nayuma yinateli kuyimwekenaku.—Tañenu Masamu 27:6.
KUHWELELENU MUWUKWASHU WANZAMBI
9, 10. Indi mazu achikaninu adi haMasamu 27:10 atalisha mudihi?
9 Mazu aDavidi amwekeshaña nawu wakuhweleli muwukwashu waYehova hakuhosha nindi: “Neyi tata namama akunshiya, Yehova wukuntambula.” (Mas. 27:10) Nsañu yashimunawu mu 1 Samweli kapetulu 22 yinakumwekesha nawu anvwali jaDavidi hiyamushili nkawinduku. Ilaña, antu amavulu makonu amonaña ilamba hamuloña wakuyikaana kudi antaña jawu. Hela chochu, antu amonaña yihuñu yamuchidiwu atambwilaña wukwashu nikukiñewa muchipompelu chawakwaKristu.
10 Chineli Yehova wudi namuchima wakukwasha ambuñindi ashiyañawu, komana kwila yayikwasha neyi aholokela muyihuñu yikwawu nehi? Chakutalilahu, neyi tunakwakamena hanjila yakukeñela chisaka chetu yuma yakumujimba, kwila tumukuhwelela Yehova netu wukutukwasha nehi? (Heb. 13:5, 6) Weluka kukala kwamonañawu ambuñindi ashinshika niyuma yakeñañawu.
11. Neyi tumukuhwelela Yehova chikuleñela antu kwiladi? Shimunenu chakutalilahu.
11 Talenu chuma chamumwekeneni Victoria, kadizi waBayibolu wakwituña daLiberia. Cheliliyi hakukeña kupapatishewa, iyala wamusumbwili wamutemukili nakumushila anyana asatu. Hela chakwila hadiña netala nawa hazatileñaku, watwalekeluhu kupama kuspiritu. Chapapatisheweliyi Victoria, mwanindi wamumbanda wayaaka 13 wanoneli chikwama chamali amavulu. Hakwila nawu nyichima yawu yibuli kubakuka, afuukwiluhu kubula kuchinda mali anoneluwu. Ayili swayi kudi mushidika waholweli chikwama chamali. Wayilejeli nindi neyi antu ejima adiña ashinshika neyi aYinsahu jaYehova, mukaayi kejima mwadi kuwaha nawa mwadi kuwunda. Victoria wamutañilili ona mushidika muBayibolu hayikaninu yaYehova yahosha hetuña dadiha. Hamuloña wakashinshi kindi, ona mushidika wamwinkeluhu Victoria mali amavulu hamali anoneliyi. Eñañi, kukuhwelela muñovu jaYehova kwakwashaña aYinsahu jaYehova kutuña ijina dadiwahi dakwikala ashinshika.
12. Neyi tutwalekahu kumukalakela Yehova hela chakwila tudi muwuzweñi twamwekeshañadi? Shimunenu chakutalilahu.
12 Fwikijenu chatiyiliyi Thomas, mukwakushimwina wabula kupapatishewa wakuSierra Leone. Watachikili kuzata mudimu wawuntañishi hashikola yeneni ilaña hatambwili wufwetu windi kwakwihi nachaaka chimuku sampu nichawahishiluwu yipapilu yindi. Thomas wateleleli kwiladi henohu kanda yatambuli wufwetu windi wakahanayi kumukudi watambwiliyi kushikola? Amutambikili kudi kapristu, wadiña mukulumpi washikola nakumwihujola. Kapristu wahosheli nindi yuma yakuhwelelawu aYinsahu jaYehova yambukili nanshimbi jashikola. Wamukakejeli Thomas kutondahu chuma chimu, mudimu hela yuma yakuhwelelayi muBayibolu. Thomas walekeli mudimu chakadi kutambula wufwetu wazatililiyi kwakwihi nachaaka nawa watachikili mudimu wukwawu, wakuloñesha yisanji nijinshiña. Neyi chitunamoni muchakutalilahu niyakutalilahu yidi neyi iyi, chihandilu chawuzweñi chakojejaña antu amakwawu kufwa mutentu, ilaña Nleñi yetu waleñeli yuma yejima watwakamenaña nawa twamukuhwelela muloña Wakiñaña antu jindi.
13. Indi mudimu wakushimwina Wanta wunakutohelaku ñahi mumatuña mwasweja wuzweñi?
13 Mumatuña amavulu mwasweja wuzweñi, akwakushimwina aWanta ayiluka nawu adikitaña nankashi. Muloñadi? Kasanji kamu kamutayi kasonekeli nawu: “Eni matala amavulu etejaña kudiza Bayibolu azataña wanyi nawa ekalaña nampinji yeneni yakudiza nampinji yamwaana. Amana kwetu niwena ashimwinaña mpinji yeneni. Antu, sweje-e ana anakushakama mumaluña atama, adimwenaña kapu nawu tunakushakama mumafuku akukuminina; muloña amonaña yuma yatama yinakumwekana.” Mishonali wumu wunazati hadi yaaka yakubadika ha 12 mwituña mwalombolañawu akwakushimwina atudizi aBayibolu haavareji yawantu asatu hamuntu wasonekeli nindi: “Chineli akwakushimwina amavulu akweti chihandilu chapela nawa kwosi yuma yayihuwañeshaña, akweti mpinji yeneni yakuya nakushimwina nikudizisha antu Bayibolu.”
14. Munjilanyi mwakiñilañayi Nzambi izaza deneni?
14 Yehova washiika nindi wakakwasha antu jindi nikuyikiña nikuyipulwisha wonsu wawu kumujimba nikuspiritu nawa twatela kumukuhwelela. (Mas. 37:28; 91:1-3) Izaza dawantu dakapuluka ‘yihuñu yasweja’ dakatoha nankashi. (Chim. 7:9, 14) Idi izaza dejima hamu, akadikiña kulonda dakabuli kujiya mumafuku ejima anashaluku akukuminina. Akayinka yuma yejima yinateli kuyikwasha kulonda akomiki nikukiña wubwambu wawu naYehova. Mumpinji yakukuminina yalukadi lwasweja, Yehova wakakiña antu jindi.
“NLEJI MUNJILA YEYI, EYI YEHOVA”
15, 16. Twahetelañamu ñahi neyi tulondela nshimbi jaNzambi? Shimunenu chakutalilahu.
15 Neyi tunakukeña kwikala ahamuka, twatela kutwalekahu kudizishewa naNzambi. Awa mazu anesekani nakulembelela kwaDavidi nindi: “Nleji munjila yeyi, eyi Yehova; nlomboli chachiwahi muwendelu walumbuluka, muloña akwakuñeba adi kwoku.” (Mas. 27:11) Kwila yuma kwesekeja naniku kulomba chinayi mukwila nawu twatela kutiyilila nshimbi jamuBayibolu jitwatambwilaña mukuloñesha kwaYehova nikujizatisha. Antu amavulu afweta nyikudi yejima hamuloña wakuzatisha kufumba kwahoshaña hakwikala nachihandilu chapela nawa anahetelumu munyaka yamakonu yinakali mali. Chatela ekaleña nachitelu chakwikala nayuma yayivulu yinakubula kukeñawu, wena asha muchima hakutohesha mudimu wawu wakushimwina. Dichi twatela kudihula netu, ‘Komana nanyakalaña kuzatisha yuma yejima yinatañaña muBayibolu nimunyikanda yezanvu danduñu wamaana nikashinshi, hela chakwila hichuma chakala?’—Mat. 24:45.
16 Neyi tumwiteja Yehova kulonda yatudizisheña nikutulombola munjila yaloña, hitwakatiyaña womaku. Chelili payiniya wampinji yejima muUnited States yakeñi mudimu watela kukwasha chisaka chindi chejima kutwalekahu namudimu wampinji yejima, mukulumpi windi wamudimu wamulejeli nindi nateli kwikala nanichi chifulu neyi yekala nadigili yakushikola yamusukula. Neyi yenu alejeluwu chamuchidiwu, komana mwadi kuditoñesha nenu chiña nasambilili kutaña shikola yahewulu bayi kufwila mudimu wampinji yejimaku? Chimwahitili nyilungu, ona mukulumpi amuhañili mudimu nawa mukulumpi mukwawu wamwihwili mana kwetu nindi yamuleji yuma yakeñeleñayi kwila. Wamulejeli nindi yena niñodindi adiña ankoñi ampinji yejima awaYinsahu jaYehova nawa akeñeleña kutwalekahu namudimu wawu. Henohu mana kwetu kanda yahoshi mazu amakwawu, iwu mukulumpi wahosheli nindi: “Neluka nami enu mwambuka chikupu nawakwenu! Hampinji yadiñawu atata hakafwilu, akwenu akakwitiya ayedi enjileña nakuyitañila atata Bayibolu hefuku hefuku. Nadihoshesheli mumuchima nami neyi nakekalahu nakukooleka kwakukwasha Chinsahu chaYehova, nakamukwasha.” Chikwachili, iwu mana kwetu amwinkeli wowuna mudimu wabulili kumwinkawu kudi ona mukulumpi wahañiluwu mudimu. Eña, neyi tutwamijaku Wanta muchihandilu chetu, Yehova wukukoña yuma yejima yatukanayi yakutwinka yuma yakumujimba.—Mat. 6:33.
CHIKUHWELELU NIKUCHIÑEJA HIYUMA YALEMA NANKASHI
17. Chumanyi chikutukwasha kutalila yuma yakamwekana kumbidi nachikuhwelelu?
17 Davidi walumbulwili cheñi hakulema kwachikuhwelelu nikuchiñeja hakuhosha nindi: “Neyi nabuli kwitiya nami nukumona kuwaha kwaYehova munu mwituña dawakwakuhanda, Mutenowu jinakumi dehi.” (Mas. 27:13) Eñañi, neyi kuchiñeja kwatwinkañayi Nzambi nikwikala namuchima wakulemesha nsañu yidi muMasamu 27 nehi, mutenowu kwosi chuma chitwadi kwila! Dichi, tutwalekenuhu kulomba nachikuhwelelu netu atwinki ñovu nawa atupulwishi hampinji yitukumonaña yuma yakala kushika nikuAmagedoni.—Tañenu Masamu 27:14.
[Malwihu aKuzatisha haKudiza]
[Mwevulu wudi hefu 23]
Davidi wekalileña nañovu hakwanuka chamupulwishileñawu kudi Yehova
[Mwevulu wudi hefu 25]
Komana twamonaña wuzweñi wamali netu himpinji yakutoheshelamu mudimu wetu wakushimwina?
