“Yehova” Wapompeshaña Chisaka Chindi
“Yehova” Wapompeshaña Chisaka Chindi
‘Nayilembeleli nami muhembi kunuñañana kwaspiritu.’—EFWES. 4:1, 3.
MUKULUMBULULA NENUDI?
Indi wunlomboli waNzambi wukweti nkeñelwinyi?
Tunateli ‘kuhemba ñahi kunuñañana kwaspiritu’?
Chumanyi chikutukwasha ‘kudikokweja muntu namukwawu’?
1, 2. Yumanyi yafuukulayi Yehova kutalisha kudinu iseki niantu?
NEYI mutiya izu dakwila nawu chisaka mwatoñojokañadi? Mwatoñojokaña hadi antu adikeña nawa amuzañalu? Mwatoñojokaña hadi antu anakuzatila hamu kulonda eli chuma chinakukeñawu? Indi kwiji mwatoñojokaña nenu hiluña dadiwahi mwakukulishila nikudizishila nikuhanjeka hayuma yimunakutoñojoka? Hadaha mwatoñojokaña hayuma iyi sweje-e neyi mukweti chisaka. Yehova diyi Watachikili chisaka. (Efwes. 3:14, 15) Wafuukwili nindi yileñaleña yindi yejima yamwiwulu niyahamaseki yikali yakiñewa, yidikuhweleli chikupu nikwikala yanuñañana.
2 Chavulumwinuwu, antu hiyatwalekeluhu kwikala muchisaka chaNzambi chayileñaleña yamwiwulu niyahamasekuku, ilaña kufuukula kwaYehova hikwajiyiluku. Wamba kawanisha Paradisa yakekala heseki dejima nawanyana kaAdama naEvu. (Kutach. 1:28; Isa. 45:18) Yehova waloñesha yuma yejima kulonda kushikija nkeñelu yindi. Yuma yejima yaloñeshayi twayitañaña mumukanda wamuBayibolu waAefwesesa, wahosha nankashi hakwikala anuñañana. Tushinshikenu hamavasi aniwu mukanda nikumona chitwatela kwendela hamu nankeñelu yaYehova yakunuñañesha yileñaleña yindi yejima.
WUNLOMBOLI NIMUDIMU WUWAZATAÑA
3. Wunlomboli washimunawu haAefwesesa 1:10 hiwunlombolinyi nawa chibalu chatachi chatachikili kuzatika mpinjinyi?
3 Mosi walejeli aIsarela nindi: “Enu aIsarela; Yehova Nzambi yetu hiYehova wumu hohu.” (Kuhit. 6:4) Yuma yejima yakoñañayi Yehova yamwekeshaña nawu kufuukula kwindi kwalala. Dichi, ‘hampinji yakawanina nyaka yatoñolayi,’ Nzambi wakaloñesha ‘wunlomboli,’ dikwila nawu, ntanjikilu yindi yakunuñañeshelamu yileñaleña yindi yejima yikweti maana. (Tañenu Aefwesesa 1:8-10.) Muniwu wunlomboli mudi yibalu yiyedi. Chibalu chatachi chapompeshaña chipompelu chawawayishewa chakaya mwiwulu nawa chakekala mumakasa aYesu Kristu Mutu wawu wakuspiritu. Ichi chibalu chatachikili haPentekosta 33 C.E. hatachikiliyi Yehova kupompesha antu akayuula chimu naKristu mwiwulu. (Yil. 2:1-4) Chineli awayishewa ayitena kuloña kwakutambwila wumi kushindamena hefutu danyiloña damulambu waKristu, eluka chikupu nawu ‘hiyanyana kaNzambi’ atondewa.—Rom. 3:23, 24; 5:1; 8:15-17.
4, 5. Chibalu chamuchiyedi chinakuzata mudimwinyi?
4 Chibalu chamuchiyedi chapompeshaña antu ejima akashakamaña muParadisa hamaseki akayuulewaña naWanta waKristu wawuMesiya. “Izaza deneni” didekala muchibalu chatachi chanidi izanvu. (Chim. 7:9, 13-17; 21:1-5) Muchiyuulu Chekombakaji Dimu Dayaaka, izaza deneni dakadibomba hamu nawantu amavulu akasañulawu. (Chim. 20:12, 13) Toñojokenu hakukooleka kutwakadiluñisha hakudimona nawantu akasañuka! Kunsa yayaaka ikombakaji, ‘yuma yahamaseki’ akayeseka kakukumishaku. Antu akamwekesha kashinshi diwu akekala ‘anyana kaNzambi’ hamaseki.—Rom. 8:21; Chim. 20:7, 8.
5 Makonu, yibalu yejima yiyedi yawunlomboli waNzambi, yamwiwulu niyahamaseki yinakuyilaku hambidi. Hanu dinu, tunateli kwovwahila ñahi wunlomboli waNzambi hamuntu hamuntu?
‘HEMBENU KUNUÑAÑANA KWASPIRITU’
6. Indi Nsona yahosha nawudi hansañu yakudikunda kwawakwaKristu nawakwawu?
6 Nsona yahoshaña nawu akwaKristu atela kudipompesha hamu. (1 Kor. 14:23; Heb. 10:24, 25) Ilaña hichinayi mukwila nawu, atela kushakama heluña dimu neyi chelañawu antu ayaña kuchisankanu hela kumabulu angunjaku. Kudi yuma yikwawu yitwatela kwila hakwila nawu twikali anuñañana. Tunateli kunuñañana neyi tuzatisha nshimbi jaYehova nikwiteja spiritu yaNzambi yajila kutufumba.
7. Indi ‘kuhemba kunuñañana kwaspiritu’ kwatalisha mudihi?
7 Hela chakwila Yehova wayitena anyanindi awayishewa kuloña anyikoku acheñi niwena nindi hiyamabwambu jindi aloña kushindamena hefutu damulambu waKristu, mukachi ketu mwamwekanaña tuyikonkojola hamuloña wakwila wonsu wetu tunakushakama hamaseki mwituña damakonu. (Rom. 5:9; Yak. 2:23) Neyi yikonkojola yadiñaku wanyi mutenowu ninsona jahosha ‘hakuditiyilila wumu namukwawu’ chiña kwosi. Tunateli kushakama ñahi chachiwahi nawakwetu akakwitiya? Twatela kwikala namuchima ‘wakudizoza kwejima nikwovwaha.’ Pawulu wakonkomweneni cheñi nindi twatela ‘kusha muchima hakuhemba kunuñañana kwaspiritu, nakudikasa mwonji wakuwunda.’ (Tañenu Aefwesesa 4:1-3.) Kuzatisha iku kufumba kwabombelamu kutiyilila munakutuleja spiritu yaNzambi nikuyiteja kulonda yisoñi mukabu mudetu. Iwu mukabu waletaña kuwunda mukachi kawantu, wambukaku nanyidimu yakumujimba, yambulaña antu.
8. Indi nyidimu yakumujimba yaletaña ñahi wufwinda?
8 Talenu ‘nyidimu yakumujimba’ chiyaletaña wufwinda. (Tañenu Aŋalija 5:19-21.) Wuvumbi wambulaña muntu wunakuwili naYehova nichipompelu nawa wujila wambulaña anyana kudi anvwali jawu niadisumbula anabuli muloña kudi enikwawu. Wuzondu wamumuchima watamishaña wubwambu wamuntu naNzambi niantu amukeña. Neyi munakukeña kulamika yuma yiyedi hamu naweñi, chiña yejima yikala yitooka hakwila nawu yilamati. Kwikala nayililu yawukapwa nsonyi kwamwekeshaña nawu himwalemesha nshimbi jaNzambi jaloñaku. Iyi nyidimu yejima yakumujimba yambulaña antu adikeña nawa adambulaña naNzambi. Yililu yamuchidiwu hiyesekana nayililu yaYehovaku.
9. Tunateli kwiluka ñahi neyi chakwila ‘tukusha muchima hakuhemba kunuñañana kwaspiritu’?
9 Dichi wejima wetu twatela kudihula netu: ‘Komana inakuzata nañovu kulonda “nishi muchima hakuhemba kunuñañana kwaspiritu, nakudikasa mwonji wakuwunda”? Chumanyi chinelaña neyi namoni kukala? Komana nalejaña antu amavulu hakukala kunikweti kulonda ekali kukabadi kami? Komana nakeñaña nami aeluda amanishili kukala kulonda ami nibuli kuya nakudimona namuntu itwadivulumuna nindi kulonda tudanakeni? Komana nayitemokaña antu inadivulumwini nawu kuchina nakenda kahosha nawu hakukala kutukweti kuhitila mukwendela halehi?’ Neyi tunakwila yumiyi mwalala tunakukoña yuma kwesekeja nankeñelu yaYehova yakupompesha cheñi yuma yejima hamu mudi Kristu?
10, 11. (a) Muloñadi chichalemena kushakama mukuwunda nawamana kwetu? (b) Yumanyi yitwatela kwila kulonda tushakami mukuwunda nikutambwila nkisu yakuspiritu?
10 Yesu wahosheli nindi: “Dichi neyi wudi nakutwala mulambu weyi kukameña, kwenoku hiwukwanuka neyi nidi namuloña namana kwami, shiyaku mulambu weyi kwenoku kukameña, wuyi wusambili kutiyañana namana kweyi; winzi dinu nakuhana mulambu weyi. Tiyañana swayi nachilumbu cheyi.” (Mat. 5:23-25) Yakoba wasonekeli nindi ‘mukabu wakuloña awukuwaña mukuwunda, aañulaña kuloña.’ (Yak. 3:17, 18) Dichi hitunateli kutwalekahu kwila yuma yaloña neyi tukañanyaña kumanisha yikonkojolaku.
11 Chakutalilahu, mumatuña mwekala njita, mapesenti 35 amaluña hiyadimañamu kudi andimuku muloña watupata. Neyi kapata kavuma, andimi ashiyaña mahawu, antu amunyikala akañanyaña kuwana mwakuhandila, munyisumba nimwena mwekalaña nzala. Munjila yoyimu, tukukañanya kupama kuspiritu neyi tukweti tuyaaku twatela kuleta wufwinda nawamana kwetu. Ilaña neyi tukudanakenaña swayi-swayi nikwilila akwetu kakawahi, tunateli kushakama nawakwetu mukuwunda nawa tukutambwila nkisu yakuspiritu.
12. Indi aeluda anateli kutukwasha ñahi kwikala anuñañana?
12 Kubombelahu, ‘yamukunkulu mudi antu’ yatukwashaña kwikala anuñañana. Atwinkawu kulonda atukwasheñaku kwikala ‘anuñañana mukwitiya kwakukuhwelela.’ (Efwes. 4:8, 13) Neyi tukuzatilaña hamu nawaeluda mumudimu wajila nikutambwila kufumba kwatufumbañawu kushindamena Hezu daNzambi, dikwila nawu anakutukwasha kupaminaku kulonda tuvwali wuntu wawuha. (Efwes. 4:22-24) Neyi anakuyifumba, komana mwamonaña nenu Yehova diyi wunakuyikwasha kulonda mwakaheti wumi mwituña dadiha dakayuulewaña naMwanindi? Enu aeluda, komana mwakwashaña akwenu kulonda akeñili mwituña dadiha?—Ŋal. 6:1.
“DIKOKWEJENU MUNTU NAMUKWAWU”
13. Chumanyi chikufumamu neyi tukañanya kutiyilila kufumba kudi haAefwesesa 4:25-32?
13 Mukanda waAefwesesa 4:25-29 washimuna yaaku yitwatela kutondolwela chikupu. Yaaku yeniyi yabombelamu kutwamba, kuzuwa hela kukatala nikuhosha mazu atama chatela tuhosheña mazu amawahi anateli kukolesha akwetu. Neyi muntu yakañanya kutiyilila iku kufumba, wukuneñesha spiritu yaNzambi, muloña spiritu yajila hiñovu yanuñañeshaña antu. (Efwes. 4:30) Neyi tuzatisha mazu asonekeliyi cheñi Pawulu anateli kuleta kuwunda nikunuñañana mukachi ketu, wasonekeli nindi: “Lekenu ndulu yejima, nindombu, nikuzuwa, nimapumba, nikutukana, ninkunyi yejima. Dikokwejenu muntu namukwawu; ikalenu namuchima wawushona; danakenenu muntu namukwawu neyi chayanakenenuwu kudi Nzambi mudi Kristu nawa.”—Efwes. 4:31, 32.
14. (a) Indi mazu akwila nawu ‘dikokwejenu’ atalisha mudihi? (b) Chumanyi chikutukwashaku kudikokweja?
14 Izu dakwila nawu ‘dikokwejenu’ damwekeshaña nawu mpinji jikwawu hitwadilaña kakawahuku nawa datwanukishaña nawu twatela kuzatila haniku kukala kutukweti. Dichi twatela kudifumba kulonda tumoneña netu yitoñojoka yawakwetu yalema kubadika yetu. (Fwi. 2:4) Hadaha mazu itunakukeña kuhosha akukojeja akwetu kutachika kuseha hela akutumona nawu tudi namaana, komana chumichi chikumwekesha nawu tunakudikokweja? Neyi tutoñojokela chadimu henohu kanda tuhoshi chikutukwashaku ‘kudikokweja.’
CHAKUMWEKESHA KUKEÑA NIKALEMESHA MUCHISAKA
15. Mazu aPawulu adi haAefwesesa 5:28 ahosha hadi Kristu chahembeleñayi chipompelu atalisha mudihi?
15 Bayibolu yesekeja wubwambu wukwetiyi Kristu nachipompelu nawubwambu wekala hakachi kawantu adisumbula. Chakutalilahu chaKristu, chamwekeshaña nawu iyala watela kukeña nikwakamena ñodindi, mumbanda niyena watela kwovwahila chikupu nfumwindi. (Efwes. 5:22-33) Pawulu hakusoneka nindi: ‘Mwomumu niamayala niwena akeñi añodi jawu aweni neyi chakeñawu nyijimba yawu,’ wahosheleña hachumanyi hakuhosha nindi “mwomumu”? (Efwes. 5:28) Mazu ahosheliyi, ahosha hadi ‘Kristu wakeñeli cheñi chipompelu, hakudihanahu yomweni, . . . achiweleshi namenji amazu.’ Eñañi, iyala watela kusha muchima hakukwasha chisaka chindi kuspiritu kulonda yendeleña hamu nankeñelu yaYehova yakupompesha yuma yejima hamu cheñi mudi Kristu.
16. Yumanyi yafumañamu neyi anvwali azata nyidimu yayinkawu yamuNsona muyisaka yawu?
16 Anvwali atela kwanuka nawu akweti mudimu wayinkawu kudi Yehova. Chawushona, antu amavulu makonu, ‘hiyadikeña mwasemwakenawuku.’ (2 Tim. 3:1, 3) A tata jawantu amavulu abulaña kukwasha yisaka yawu, anyana diwu ayandilañamu. Dihafumini Pawulu kufumba akwaKristu atata jawantu nindi: “Bayi muvulokaña anyanenu azuwuku; yilelenuña nakuyibabesha nikuyikonkomwena mudi [Yehova].” (Efwes. 6:4) Muchisaka hohu dimwadizilañawu anyana chakumwekesha kukeña nikulemesha akulumpi. Anvwali alejaña chiwahi anyanawu yumiyi ovwahilaña wunlomboli waYehova. Neyi tukumwekeshaña kukeña muchisaka chetu nakuleka madombu nikuzuwa nikutukana, dikwila nawu tunakudizisha anyanetu yuma yalema yakumwekeshelamu kukeña nikulemesha anlomboli. Chumichi chikuyileñela anyanawu kwiñila mwituña dadiha dakanayi Nzambi.
17. Twatela kwiladi kulonda tumukañeshi Diyabolu?
17 Twatela kwanuka netu Diyabolu, waleteli wufwinda hatachi mukaayi kejima, wukutwalekahu kutukañesha kwila nkeñelu yaNzambi. Antu amavulu mukaayi anakwila nkeñelu yaSatana kuhitila mukudiseña, kusawula maluwi kuhitila mukushakama hamu chakadi kudisumbula nikwiteja maluwi awutumwa. Hitwembujolaña yililu hela yaaku yinakumwekeshawu antu makonuku. Twatela kumwimbujola Kristu. (Efwes. 4:17-21) Dichi, anatukonkomweni ‘kumanyeka yitwa yaNzambi yejima’ kulonda tumukañeshi Diyabolu niandemoni jindi chiwahi.—Tañenu Aefwesesa 6:10-13.
‘ENDENUÑA NAKUKEÑA’
18. Chumanyi cheneni chaletaña kunuñañana mudi akwaKristu?
18 Kukeña dichuma cheneni chaletaña kunuñañana mudi akwaKristu. Neyi tusweja kukeña “Mwanta wumu,” ‘Nzambi wumu’ niamana kwetu, dikwila nawu tunashi muchima ‘hakuhemba kunuñañana kwaspiritu, nakudikasa mwonji wakuwunda.’ (Efwes. 4:3-6) Yesu walombeli hansañu yakukeña nindi: “Hinukukumina dakuyilombela wena hohuku; ilaña nukulombela niwena akunkuhwelela namazu awu; kulonda wejima wawu akekali wumu, neyi chiwekala eyi Tata mudami ninami mudeyi; kulonda niwena akekali mudetu, . . . Nayileji ijina deyi kulonda adiluki, namba kayilejadu nawa kulonda akadiluki; kulonda kukeña kuwankeñeli nachu kwakekali mudi wena ninami nakekali mudi wena.”—Yow. 17:20, 21, 26.
19. Chumanyi chimunakufwila kwila?
19 Neyi tudi nakukala mumuchima wetu hamuloña wakubula kuwanina, kukeña kukutuleñela kulomba kudi Nzambi neyi chalombeliyi ñimbi yamasamu nindi: ‘Wunyinki muchima wumu hohu wakwakama ijina deyi.’ (Mas. 86:11) Dichi twikalenu namuchima wakukañesha yililu yaDiyabolu yakukeña kutufumisha kudi Tata yetu wukweti kukeña nikudi antu akeñayi. Dikitenu chikupu kulonda mwikali “akwakwimbujola Nzambi, neyi anyana akeñewa. Endenu nakukeña,” muchisaka, mumudimu wakushimwina nimuchipompelu.—Efwes. 5:1, 2.
[Malwihu aKuzatisha haKudiza]
[Mwevulu wudi hefu 29]
Wukushiya mulambu windi hakameña, wukusambila kuya nakutiyañana namana kwindi
[Mwevulu wudi hefu 31]
Enu anvwali, dizishenu anyanenu kwikala nakalemesha
