“Ami Nidi Nenu”
“Ami Nidi Nenu”
‘Amavulu akaya nakutambatamba, nikwiluka kwakweni kwakavula.’—DAN. 12:4.
MUKWAKULA NENUDI?
Indi ‘kwiluka kwakweni’ anakwiluki ñahi makonu?
Indi antu anakwiteja chalala ‘anavuli’ ñahi?
Kwiluka kwakweni ‘anakuvulishi’ ñahi?
1, 2. (a) Tuneluki ñahi netu Yesu wudi nawatumbanji twindi chayinu mpinji nawa wakekala nawu kumbidi? (b) Kwesekeja naDanyeli 12:4, wulokwinyi wafumaña mukudiza Nsona chikupu?
DIFWIKIJENU muneñili muParadisa. Chimwahinduka, mujimba wunasoboloki nawa mudi nañovu yakuzata nyidimu. Himunakutiya mabinjila hela nyisoñuku. Yikatu yimwatiyileña yejima yinamani. Yiidi yenu yejima yinakuzata chiwahi nankashi, munakumona, munakutiya, munakwepula ivumba, munakutiya neyi munakwati hela munakunki chuma nikudiluñisha hakudya. Mudi nañovu jajivulu kumujimba, munakuzañalala hakuzata, mudi nawamabwambu amavulu nawa kwosi yuma yimunakwakamena. Iyi diyi nkisu yimwakadiluñisha neyi Wanta waNzambi wunatachiki dehi kuyuula. Kristu Yesu, Mwanta watondawu, wakakiswila antu jindi nikuyileja maana akumwiluka Yehova.
2 Yehova wakekala nawambuñindi ashinshika hampinji yakazatañawu mudimu wakudizisha antu mukaayi kejima. Nzambi niMwanindi anakwashi ambuñawu ashinshika hadi yaaka yayivulu. Henohu kanda yayi kwiwulu, Yesu walejeli atumbanji twindi ashinshika nindi wakekala nawu. (Tañenu Matewu 28:19, 20.) Hakwila nawu awa mazu akoleshi chikuhwelelu chetu, tushinshikenu hamukuku wumu wamazu wawuprofwetu wonenayi Nzambi wasonekeluwu muBabiloni wakushankulu yaaka 2,500 yinahituhu. Kaprofwetu Danyeli wasonekeli kutalisha ‘hampinji yakukuminina’ yitunakushakamamu nindi: ‘Amavulu akaya nakutambatamba, nikwiluka kwakweni kwakavula.’ (Dan. 12:4) Kwesekeja nayuma yinakumwekana makonu, izu dachiHeberu dabalumunawu “kutambatamba” daya mukwila nawu kushinshika chiwahi. Mukutambatamba mwafumaña wuloku wawuwahi nankashi. Ejima adizaña Nsona chikupu elukaña Izu daNzambi dalala nawa doloka. Iwu wuprofwetu wahosha cheñi nawu antu amavulu akashika ‘hakwiluka kwakweni.’ Cheñi, kwiluka kwakweni kwakavula. Antu amavulu akashika hakwiluka nawa akalejaña akwawu. Chitukuhanjekaña hakushikijewa kwaniwu wuprofwetu, tukwiluka netu Yesu wudi nawatumbanji twindi makonu nawa Yehova nakushikija chikupu yuma yejima yakaniniyi.
‘KWILUKA KWAKWENI’ ANAKWILUKI
3. Chumanyi chamwekeni hanyima yakufwa kwawapostolu?
3 Chafwiluwu apostolu, akwakusekesha ashimwinuwu afumini hadi akwaKristu alala enjili nawa atandili neyi kesi. (Yil. 20:28-30; 2 Tesa. 2:1-3) Hadi yaaka yayivulu kufuma hafwiluwu, antu abulili kwiluka Bayibolu niantu aditeneneña nawu hiyakwaKristu hiyashikili ‘hakwiluka kwakwenuku.’ Hela chakwila ahosheleña nawu akuhwelela nsañu yamuNsona, akulumpi jamuKristendomu atañishileña nsañu jakutwamba hela netu ‘ntañishilu yawandemoni’ yamusawulaña Nzambi. (1 Tim. 4:1) Antu amavulu ayishili mumwidima wakuspiritu. Ntañishilu yawakwakusekesha yabombelelumu ntañishilu yakutwamba yakwila nawu Nzambi wekala Musatu, wumi hiwafwañaku nawa antu ahaña mukesi kahelu haya nyaka.
4. Indi izanvu dawakwaKristu muma 1870 datachikili ñahi kusandujola ‘kwiluka kwakweni’?
4 Hela chochu, muma 1870, chimwahitili yaaka makumi awana henohu ‘mafuku akukuminina’ kanda atachiki, kadizanvu kanyanya kawakwaKristu ashinshika muPennsylvania, U.S.A., kenjileña hamu nakudiza chikupu Bayibolu nikusandujola kulonda ashiki ‘hakwiluka kwakweni.’ (2 Tim. 3:1) Aditeneneña nawu Atudizi aBayibolu. Awantu ‘hiyadiña akwamaana niakwakashinshi’ ateneniyi Yesu nindi akayijinda iyi nsañuku. (Mat. 11:25) Adiña antu adizoza akeñeleña chikupu kwila nkeñelu yaNzambi. Adiña nakulomba, kutaña chiwahi nikuhanjeka nikutoñojoka hayuma yadizileñawu muNsona. Cheñi, esekejeleña nsañu yamuBayibolu nansañu yasonekeleñawu ansoneki amakwawu asandujoleleña neyi chasandujoleleñawu wena. Mukuhita kwampinji, awa Atudizi aBayibolu elukili chalala chajiyamini hadi yaaka yayivulu.
5. Muloñadi chasonekeleluwu matilakiti ateneneñawu nawu The Old Theology?
5 Hela chakwila Atudizi aBayibolu azañaleli nayuma yadizileñawu, ilaña hiyadeteleña hebwambu nayuma yelukiluku nawa hiyalejeleña antu yuma yayiha yadiziluwuku. (1 Kor. 8:1) Ilaña asonekeli matilakiti amavulu ateneneñawu nawu The Old Theology. Akeñeleña nawu antañi eluki chalala chamuNsona chasonekawu muBayibolu. Matilakiti atachi ahosheleña nawu “atañeña nsañu yikwawu yikuyikwashaku kudiza Bayibolu, kulonda aleki tushidikilu twejima twakutwamba nakwiluka ntañishilu yanyaka yaMwanta wetu niyawapostolu.”—The Old Theology, Na. 1, April 1889, ifu. 32.
6, 7. (a) Nsañwinyi yalala yinatukwashuwu kwiluka kufuma muma 1870? (b) Nsañwinyi yalala yayitiyishaña nankashi kuwaha kudiza?
6 Tunakudiza nsañu yayiwahi nankashi yavumbwili kadizanvu kanyanya yaaka yakubadika 100 yinahituhu. * Iyi nsañu yalala hiyidi neyi twanu hela nsañu yatela kudibechawu akwansakililuku. Hinsañu yalala yazañaleshaña antu nawa yapulwishaña yatukwashaña kwikala nachihandilu chachiwahi nikwikala namuchima wakuchiñeja. Yatukwashaña kumwiluka Yehova, yililu yindi yayiwahi ninkeñelu yindi. Yashimunaña cheñi mudimu wukwetiyi Yesu, chenjililiyi hamaseki nichafwililiyi nimudimu wunakuzatayi chayinu mpinji. Iyi nsañu yalala yalema yalumbulula chetejelayi Nzambi kutama, chitwafwilaña, chitwatela kulomba nichakwikala namuzañalu.
7 Tunateli kwiluka mwatalisha wuprofwetu ‘wajindiluwu’ hadi yaaka yayivulu ilaña ichi wunakushikijewa munanu mafuku akukuminina. (Dan. 12:9) Iwu wuprofwetu wabombelamu wuprofwetu wejima wamuNsona sweje-e wamuNyikanda yaNsañu Yayiwahi nimumukanda waChimwekeshu. Yehova natukwashi kwiluka yuma yitwabulili kumona namesu chidi neyi chamuswanyikiluwu Yesu, njita yavulumukili mwiwulu nichamunatiluwu Satana hamaseki. (Chim. 12:7-12) Nzambi natwinki cheñi kashinshi kakwiluka yuma yitunakumona yidi neyi njita, nyitentanshi, yipupu, nzala yakapwelendendi niantu atama anakukojeja ‘nyaka yinu kwikala yakala.’—2 Tim. 3:1-5; Luka 21:10, 11.
8. Hinyi itwahamekaña kutalisha hayuma yitunakumona nikutiya?
8 Ichi tuneluki nsañu yalejeliyi Yesu atumbanji twindi nindi: “Mesu amonaña yuma yimwamonañenu anakooleki. Nukuyileja nami, atuprofwetu amavulu nawanyanta ankanu akeñelaña nawu amoni yuma yimwamonañenu, hiyayimwenuku; akeñelaña nawu atiyi yuma yimwatiyañenu, hiyayitiyiluku.” (Luka 10:23, 24) Twatela kumuhameka Yehova Nzambi hakutwinka wuswa wakumona nikutiya yumiyi. Nawa twazañalala muloña “nkwashi” hela netu spiritu yaNzambi yajila, ayitemeshaña kulonda yilomboleña atumbanji twaYesu “mwahita nsañu yalala yejima.” (Tañenu Yowanu 16:7, 13.) Dichi tulemeshenu ‘kwiluka kwakweni’ nikulejaku akwetu.
‘AMAVULU’ ANASHIKI ‘HAKWILUKA KWAKWENI’
9. Mbilanyi yadiña muchibaaba chamuKaposhi Kakutalila kamu April 1881?
9 MuApril 1881, henohu yaaka yiyedi kanda yimani kufuma hasonekeluwu Kaposhi Kakutalila katachi, ayinu magazini yabidikili nawu anakukeña akwakushimwina 1,000. Ichi chibaaba chahosheli nawu: “Ejima akutwesha kuhana mpinji yeneni kumudimu waMwanta, kudi chuma chitunafuukuli . . . , hayumiyi: Netu mwiñili munyisumba yamaneni hela yanyanya, kushika hanakumini ñovu yenu, nakushimwina neyi aKolopota hela Akwakushimwina, keñenu mumaluña ejima antu anateli kwikala akwaKristu, nawa mukuwanamu antu amavulu akweti mpwila yakumuzatila Nzambi, bayi yakwikala namaanaku; chimwayiwana yilejenu kulema kwaluwi lwaTata Yetu nikuwaha kwezu Dindi.”
10. Indi antu elili ñahi nambila yakukeña akwakushimwina ampinji yejima?
10 Iyi mbila yamwekesheli nawu Atudizi aBayibolu elukili nawu akwaKristu alala akweti mudimu walema wakushimwina nsañu yayiwahi. Ilaña naambala yawakwakushimwina ampinji yejima 1,000 yakeñeleñawu yashikilili wanyi, muloña kwenjili hohu Atudizi aBayibolu antesha hayina mpinji. Antu amavulu elukili chalala nawa etejeli iwu mutambi chelili atachiki kutaña matilakiti hela magazini. Chakutalilahu, hanyima yakutaña chibaaba chamuKaposhi Kakutalila nikamukanda kasonekeluwu kudi Atudizi aBayibolu mu 1882 ntañi wumu wamuLondon, England, wasonekeli nindi: “Mwani anleji chakushimwina ninsañu yinatela kushimwina kulonda nizati iwu mudimu wunakukeñayi Nzambi nindi wuzatiki.”
11, 12. (a) Nkeñelwinyi yitukweti yadiña nawakolopota? (b) Indi akolopota atachikileña ñahi “mazanvu” hela yipompelu?
11 Mu 1885, Atudizi aBayibolu 300 azatileña mudimu wawukolopota. Awa ankoñi ampinji yejima adiña nankeñelu neyi yitukweti, yakwilisha atumbanji twaYesu Kristu. Ilaña, azatishileña njila jambuka najitunakuzatisha. Makonu, twadizishaña muntu wumu Bayibolu hampinji yimu, nakumuleja mwakwilila. Kufumahu hitukumutambika kadizi waBayibolu kulonda yatachiki kudikunda nachipompelu chatuñewa dehi. Ilaña hayina mpinji, akolopota ahanineña nyikanda nikupompesha hamu izanvu dawantu akweti mpwila nakudiza Nsona. Chatela adizisheña muntu hamuntu, atachikili ‘mazanvu,’ hela netu yipompelu.
12 Chakutalilahu, mu 1907, izanvu dimu dawakolopota dapalañeneni mumusumba wumu nakukeña antu adiña nanyikanda yaMillennial Dawn (yateneneñawu cheñi nawu Studies in the Scriptures). Kaposhi Kakutalila kashimwini nawu: “Awa [antu akweti mpwila] ayipompesheleleña mumatalawu mutumazanvu twanyanya. Kolopota wumu wahanineña mpanji Hankeñelu yaNzambi Yahaya Nyaka hefuku daMulungu dejima nawa haMulungu walondeleleñahu wayilejeleña nindi apompeña mpinji yejima.” Mu 1911, amana kwetu atachikili kuzatisha njila yikwawu. Ankoñi endaña 58 adimena atachikili kuhana jimpanji kudi antu amavulu muUnited States nimuCanada. Awa amana kwetu asonekeleña majina nimakeyala awantu amwekesheleña mpwila enjileña nakutiya jimpanji nawa ayilejeleña nawu ahumañaneña mumatala kulonda ekali “mazanvu.” Mu 1914, mukaayi kejima mwadiña yipompelu Yawatudizi aBayibolu 1,200.
13. Yumanyi yinayizañaleshi kutalisha hansañu ‘yakwiluka kwakweni’ makonu?
13 Makonu, mukaayi kejima mudi yipompelu yakushika ku 109,400 nawa amana kwetu niahela 895,800 anakuzata mudimu wawupayiniya. Kwakwihi nawantu akushika kutununu 8 anashiki hakwiteja ‘kwiluka kwakweni’ nawa anakukwizatisha muchihandilu chawu. (Tañenu Isaya 60:22.) * Chumichi chinakutuzañalesha hama, muloña Yesu wahosheli nindi atumbanji twindi “akayihela kudi antu ejima” kukoola ijina dami. Wahosheli cheñi nindi atumbanji twindi akayikabisha, akayikasa nikuyijaha. (Luka 21:12-17) Hela chakwila Satana niandemoni jindi niantu akwakukañesha anakuyikuzañesha, antu jaYehova anakudiluñisha chikupu mumudimu wakwilisha atumbanji. Makonu, anakushimwañena “mwahita matuña ejima mwashakamawu antu,” anakushimwina mumaluña ataata niatuuta nankashi, mumapidi, muyinkalampata, munyisumba nimunyikala mudi antu antesha. (Mat. 24:14) Anakuzata iwu mudimu muloña Nzambi diyi wunakuyikwasha.
‘KWILUKA KWAKWENI’ KUNAKUVULILAKU
14. Indi ‘kwiluka kwakweni’ anakwiluki ñahi kuhitila munyikanda?
14 ‘Kwiluka kwakweni’ kunakuvula hamuloña wawantu amavulu anakushimwina nsañu yayiwahi. Kunavuliluku cheñi kuhitila munyikanda yapulintañawu. MuJuly 1879, Atudizi aBayibolu asonekeli magazini yateneneñawu nawu Zion’s Watch Tower niHerald of Christ’s Presence. Iyi magazini, ayipulintili kudi kampani yakwituña nawa yapulintileña makopi 6,000 muEngilishi. Charles Taze Russell wadiña nayaaka 27 amutondeli kwikala mukwakuhituluka munsañu yasonekeleñawu hamu Nawatudizi aBayibolu atanu apama ahanineña nyikanda. Chayinu mpinji Kaposhi Kakutalila anakukisoneka mumadimi 195. Iyi magazini anakuyihana nankashi kudi antu mwahita iseki dejima nawa anakupulinta makopi 42,182,000 hakaposhi hakaposhi. Magazini yaAwake! diyinasinsumu yapulintañawu makopi 41,042,000 mumadimi 84. Cheñi, hachaaka hachaaka twapulintaña nyikanda nimaBayibolu kwakwihi natununu 100.
15. Indi mali azatishañawu hakupulinta afumaña kudihi?
15 Iwu mudimu weneni wakwashewaña nayawana yamali ahanañawu mukudikeñela. (Tañenu Matewu 10:8.) Antu akweti makampani apulintaña azañalalaña muloña eluka nawu makina, yipapilu, wulombu, niyuma yikwawu yazatishañawu hakupulinta yakola wuseya. Mana kwetu walandaña yuma yakuzatisha kumapulinta mukaayi kejima nindi: “Akwakuselujola enzaña nakutala mapulinta etu adihayaminaña hakutiya nawu makina amakonu anakupulinta nyikanda yayivulu ayilandaña nayawana yamali ahanañawu mukudikeñela. Azañalala cheñi hakumona ankoñi ahaBeteli hiyatwansi nawa azataña namuzañalu.”
ISEKI DAKAWANINA KUMWILUKA NZAMBI
16. Indi ‘kwiluka kwakweni’ kukweti nkeñelwinyi?
16 Kudi nkeñelu yayiwahi yinakuleñela ‘kwiluka kwakweni’ kuvulileñaku. Nzambi wakeñaña “antu ejima nindi ahandi, eluki nsañu yalala chikupu.” (1 Tim. 2:3, 4) Yehova nakukeña antu eluki chalala kulonda adifukuleña chiwahi nawa akatambwili nkisu yindi. Kuhitila mukutiyakesha ‘kwiluka kwakweni,’ Yehova napompeshi akwaKristu ashinshika awayishewa ashalahu. Nakupompesha cheñi “izaza deneni,” ‘dakunyuza yejima, dakunyichidi yejima, dakumatuña ejima, dakumadimi ejima’ dikweti kuchiñeja kwakushakama hamaseki haya nyaka.—Chim. 7:9.
17. Chineli kudifukula kwalala kunakutohelaku, kunakumwekesha chumanyi?
17 Chineli kudifukula kwalala kunatoheluku hadi yaaka 130 yinahituhu, hichinjikijilu chinakumwekesha nawu Nzambi niMwanta windi watondewa, Yesu Kristu, adi nawambuña Yehova hamaseki, anakuyilombola nikuyikiña nikuyipompesha nikuyidizisha. Iwu wuya hambidi wunakumwekesha chikupu nawu yuma yakanayi Yehova yakashikijewa. “Iseki dejima dakawanina kumwiluka Yehova, neyi chabutaña meji hakaluñalwiji.” (Isa. 11:9) Yenoyu nkisu yakatambwilawu antu!
[Tumazu twaheshina]
^ Mukuhetelamu neyi mutala DVD yaJehovah’s Witnesses—Faith in Action, Part 1: Out of Darkness niJehovah’s Witnesses—Faith in Action, Part 2: Let the Light Shine.
^ Talenu mukanda waUkusesema kwa kwa Esaya—Ulubuuto lwa Bantu Bonse 2, ifu 320
[Malwihu aKuzatisha haKudiza]
[Mwevulu wudi hefu 6]
Atudizi aBayibolu akusambila adiña adizoza akeñeleña chikupu kwila nkeñelu yaNzambi
[Mwevulu wudi hefu 7]
Yehova walemeshaña nyidimu yenu yakukwasha antu kulonda ‘amwiluki chikupu’ Nzambi
