Chileji Chakubulakana Kwahachaaka

Kubulakana Kwamwekesheli Kunuñañana niYuma Yayiwahi Yinafuukuluwu

KUBULAKANA kwahachaaka kwawaWatch Tower Bible and Tract Society of Pennsylvania kwaletaña muzañalu nankashi. Ichi dichuma chamwekeni hakubulakana kwahachaaka kwanaambala 127 kwadiñaku Hamposu, October 1, 2011! Enyi atambikiluwu afumini kumatuña ashiyashana apompeli Hetala Deneni Dakupompelahu dawaYinsahu jaYehova muJersey City, New Jersey, U.S.A.

Mana kwetu Gerrit Lösch Wamwizaza Dalombolaña washikijili izaza damuzañalu dejima. Walejeli antu apompeli afumini kumatuña 85 nindi twekala anuñañana mukaayi kejima. Kunuñañana kwamuchidiwu kwahanaña wunsahu wawuwahi nawa twamulemeshaña Yehova. Mutu wakubulakana wahosheleña hakunuñañana.

CHILEJI CHACHIWAHI CHAKUMEXICO

Mpanji yatachi yahosheleña hakunuñañana kwawantu jaYehova. Mana kwetu Baltasar Perla wehujoleli amana kwetu asatu amuchisaka chaMutayi waMexico hansañu yakubomba tusanji twanyitayi 6 twamuCentral America namutayi wamuMexico. Hamuloña wakubomba nyitayi, muchisaka chaBeteli chamuMexico mudi madimi ashiyashana akumatuña acheñi. Hamuloña wakuvula kwawakwetu akakwitiya akumatuña acheñi kunakojeji amana kwetu kudikolesha nankashi. Chidi neyi kwiji Nzambi najimi jiñinza jamatuña.

Kukala kumu kwahanjekeluwu hamuloña wakubomba nyitayi kwadiña kwakukwasha akwakushimwina kulonda abuleña kutoñojoka nawu kuloñesha kwaYehova kunayumbi chisayikila hela chakwila tusanji twanyitayi hitunakuzatika mumatuñawuku. Dichi, yipompelu yejima ayisokankesha kuIntaneti kulonda niyipompelu yejima yidi mumaluña mwabula antu amavulu yitwesheña kuhanjeka nakasanji kamutayi.

CHILEJI CHIKWAWU CHAKUJAPAN

Mana kwetu James Linton wakumutayi wamuJapan walumbulwili chakabakenuwu amana kwetu namutentanshi nidibaji deneni dakisañeni idi ituña muMarch 2011. Antaña jawaYinsahu amavulu afwili niyuma yawu yakisikili. A Yinsahu akumaluña abulili kuholokela muwubanji atuñili matala akubadika ha 3,100 nawa ahanini nyotoka yayivulu. Amana kwetu ekala muMakomiti Ajakutuñatuña azatileña mwaana niwufuku nakuloñeshela amana kwetu matala. Amana kwetu akubadika ha 1,700 adihanini kuya nakukwasha kwadiña wubanji. Akwakudihana akuUnited States ayili nakuloñesha Matala aWanta ahumokeli nawa akwakudihana 575 adihanini kuzata iwu mudimu.

Kwadiña cheñi mudimu wakukwasha amana kwetu amweni yihuñu kuspiritu nikuyikolesha. Aeluda akubadika ha 400 ayili nakuzata mudimu wakubiña kwadiña kukaankila. Luwi Lwezaza Dalombolaña lwamwekeni hakutemesha amana kwetu ayedi endelaña matuña kufuma hachishina chamukaayi kwendela maluña mwaholokeli wubanji nakuyikolesha. Mazu akukolesha ahosheleñawu aYinsahu mukaayi kejima ayikundejeleña nankashi.

 NYILOÑA YITUNAYIÑI

Izaza datiyilili nakanañachima hampinji yahosheleñayi Mana kwetu Stephen Hardy wakumutayi wakuBritain mpanji yanyiloña yitunayiñi katataka. Chakutalilahu, nfulumendi yaFrance yakeñeleña nawu izanvu dawaYinsahu amuFrance afweti tununu twamali anyisonku $82, mali akuUnited States. Iwu muloña awuketwili kudi chipompelu chaEuropean Court of Human Rights chatuyiñishili, nakuhosha nawu nfulumendi yetuña daFrance yafumpili Lushimbi 9 lwatuñili chota chaEuropean Convention, lwakiñaña nsakililu kwikala yasubuka. Mazu asonekeluwu hakuhakula amwekesheli nawu chota hichayihakwilileña aYinsahu nawu abuleña kufweta maluku, awa mazu atañewaña nawu: ‘Chimwakaanina izanvu dansakililu kudinka lusesa, kufwila kudijiyisha, kutamisha ijina dansakililu namazu akasawuntu, diyuma yakaanishawu muLushimbi 9 lwachipompelu chaEuropean Convention lwakwiteja nsakililu kwikala yasubuka.’

Chota chaECHR nichena chatuhakwililuku mumuloña wakuArmenia. Kufuma mu 1965 chota chaECHR chahakwili nawu chipompelu chaEuropean Convention hichakiñaña antu akaanaña kwiñila mudimu wawushidikaku. Mutayi Weneni, dikwila nawu chibalu cheneni nankashi chachota chaEuropean Court, chahakwili nawu chipompelu chaEuropean Convention “cheteja muntu kukaana kuzata mudimu wawushidika neyi chinleji chindi chinakumukaanisha chikupu kuzata iwu mudimu.” Kufuukula kwanichi chota kunakonkomweni ituña daArmenia nimatuña adi neyi Azerbaijan niTurkey kulemesha ilu lushimbi.

MUDIMU WAKUTUÑA

Mana kwetu Guy Pierce Wamwizaza Dalombolaña wahiñiluhu kuhosha mpanji wetejeli nindi ejima apompeli akeñeleña kutiya nsañu yamudimu wetu wakutuña muNew York State. Wedishili vidiyo yinakumwekesha mudimu wunakuzatawu muWallkill, Patterson, nawa chayinu mpinji analandi maluña muWarwick nimuTuxedo, New York. MuWallkill, itala dakukama dakatataka akadimanisha mu 2014 nawa mwakekala tupeka tukwawu twakubadika ha 300.

Anafuukuli cheñi kutuña matala heluña damumbaka yaWarwick deneni damahekita 100. Mana kwetu Pierce nindi: “Hela chakwila tuneluki wanyi nkeñelu yaYehova kutalisha heluña daWarwick, ilaña tukutwalekahu nakutuña hanidi iluña muloña tunakukeña kutuntulwila chishina chamutayi chamukaayi chawaYinsahu jaYehova kunidi iluña.” Tunafuukuli cheñi kuzatisha iluña deneni damahekita 20 didi makilomita 10 kukabeta kaluwunda kaWarwick hitwakasha makina niyuma yakuzatisha hakutuña. Mana kwetu Pierce nindi: “Neyi anatwiteji dehi kutachika kutuña, tunakufwila kumanisha kutuña mudimu wakutuña muyaaka yiwana hohu. Neyi tunamanishi, twakalandisha matala adi muBrooklyn.”

Mana kwetu Pierce wehwili nindi: “Komana Izaza Dalombolaña dinajimbaluku nawu lukadi lweneni ludi kwakwihi?” Wakwili nindi: “Inehi. Neyi lukadi lweneni lutushintakesha, chikawaha nankashi, chikasweja kuwaha!”

BABALENU NAMUTUPA WABULUMAÑA

Mana kwetu Stephen Lett, membala mukwawu Wamwizaza Dalombolaña wahosheli hansona ya 1 Petulu 5:8 nindi: ‘Babalenu, tonenu; mukwankunyi nenu Diyabolu wudi nakuya nakutambatamba nakukeñekeña akudyayi, neyi mutupa wabulumaña.’ Mana kwetu Lett wahosheli nindi yililu yayivulu yekala namutupa yamwekeshaña nawu chakutalilahu chaPetulu chamutelela Diyabolu chikupu.

Chineli anyitupa akola nawa atemukaña nankashi kubadika antu, bayi tweseka kumuzuñisha hela kumutemuka Satana muñovu jetuku. Twatela kulomba wukwashu kudi Yehova. (Isa. 40:31) Mutupa webaña kanyama, dichi bayi twikalaña mumwidima wakuspiritu mwabuyilañayi Satanaku. Chochajahañayi mutupa atunyama hela mwana kañala wunakami niSatana hakweti luwuku muloña nakukeña kutujaha. Neyi mutupa nekuti dehi, wukwiluka nikwiluka neyi hadiña  kanyamaku, ‘nikukuminina’ kwawantu akwatañayi Satana kuspiritu ‘kwabadikaña kutama hadiñuwu hakusambila.’ (2 Pet. 2:20) Dichi twatela kumwimika Satana mushindu nikukakela chikupu kunshimbi jamuBayibolu jitwadizaña.—1 Pet. 5:9.

LEMESHENU ILUÑA DIMUKWETI MWITALA DAYEHOVA

Nhoshi mukwawu, Samuel Herd Wamwizaza Dalombolaña wahosheli nindi: “Wonsu wetu tukweti iluña mwitala daYehova.” AkwaKristu ejima akweti iluña “mwitala” daNzambi hela netu mutembeli yakuspiritu, ntanjikilu yakudifukwilamu kudi Nzambi kushindamena hefutu damulambu waYesu. Hiiluña ditwatela kulemesha muloña hikukooleka kweneni. Kufwana Davidi, twafwilaña ‘kushakama mwitala daYehova mafuku ejima itukwikala nawumi.’—Mas. 27:4.

Mana kwetu Herd wahosheli hansañu yidi muMasamu 92:12-14 nakwihula nindi, “Komana Yehova watukwashaña kusoña nyikabu?” Wakwili nindi: “Nzambi watuhembaña chiwahi, watukiñaña nikutwinka menji atuuta achalala muparadisa yakuspiritu. Dichi twatela kumuhameka.” Mana kwetu Herd wakonkomweneni izaza cheñi nindi, “Twatela kuzañalala hakwikala mwitala daYehova, bayi hakapinji kanteshaku ilaña haya yaaka.”

AKWAKRISTU ALEMESHA IZU DANZAMBI

Mana kwetu David Splane, Wamwizaza Dalombolaña niyena walumbulwili mumpanji yalondeleluhu nindi akwaKristu alala alemeshaña Izu daNzambi. Muyaaka nkulakaji yatachi, akwaKristu amanishili kukala kwavulumukili hansañu yakwalamisha kuzatisha Izu daNzambi. (Yil. 15:16, 17) Ilaña antu aditeneneña nawu hiyakwaKristu amunkulakaji yamuchiyedi adizishiluwu maana awaGiriki atachikili kulemesha maanawu kubadika Nsona. Nkumininaku, amakwawu atachikili kuleta yitoñojoka yaWakulumpi jamuChechi nijawanyanta amuRoma nakuyihisha hantañishilu yamuBayibolu, nakutandisha ntañishilu yayivulu yakutwamba.

Mana kwetu Splane walumbulwili iyi nsañu nachakutalilahu nindi, Yesu washimwini nindi akwaKristu alala awayishewa akatwalekahu kwikala hamaseki nawa akahakwilañaku chalala. (Mat. 13:24-30) Hitunateli kushimuna jiika netu adiña awayishewaku. Hela chochu, hadi yaaka yayivulu, antu amavulu anakaani  ntañishilu yakutwamba niyaaku. Hakachi kawu hadiña Mukulumpi wamabishopu Agobard wakuLyon wadiñaku munkulakaji yamu 9, Peter waku Bruys, Henry wakuLausanne niValdès (hela, Waldo) adiñaku munkulakaji yamu 12, John Wycliffe wadiñaku munkulakaji yamu 14, William Tyndale wadiñaku munkulakaji yamu 16, niHenry Grew niGeorge Storrs adiñaku munkulakaji yamu 19. A Yinsahu jaYehova makonu anakutwalekahu kukakela kunshimbi jamuNsona nawa eluka nawu Bayibolu dihashindamena chalala. Dihanafumi Izaza Dalombolaña kusakula nsona yaYowanu 17:17 kwikala nsona yetu yachaaka cha 2012 yinakuhosha nawu: ‘Mazu eyi hinsañu yalala.’

KUHIMPIKA KWAKUWAHI KWAKUDIZISHA NIKUZATA MUDIMU

Nsañu yabidikiluwu kudi Mana kwetu Anthony Morris Wamwizaza Dalombolaña walumbulwili hakuhimpika kudi hadi amishonali niapayiniya adimena. Kutachika muSeptember 2012, maShikola aKudiza Bayibolu awakwaKristu Adisumbula akatachika mumatuña atondawu. Nkeñelu yaShikola yaGileyadi anayihimpi. Kutachika chaaka chinamani muOctober, ejima anakudizishawu haGileyadi chiña adi dehi mumudimu wampinji yejima chidi neyi amishonali abulahu dehi kuya kuGileyadi, apayiniya adimena, ankoñi endaña, hela amana kwetu ahaBeteli. Ejima akahita muniyi shikola akayizatishaña kukolesha antu jaNzambi hatusanji twanyitayi, mudimu wakwenda hela kuyitemesha kumaluña kudi antu amavulu kunateli kukoleshawu yipompelu kulonda yiyeña mumudimu wakushimwina.

Apayiniya adimena amakwawu akayitemeshaña kumaluña kwabula antu amavulu amunyikala nakushimwina. Kutachika haJanuary 1, 2012, amana kwetu anahiti muShikola Yakudiza Bayibolu Yawamana Kwetu Ajiki niShikola yaKudiza Bayibolu yawakwaKristu Adisumbula akayizatishaña neyi apayiniya adimena hakapinji kantesha nikuyitemesha kumaluña akwakulehi kwabula hela kudi akwakushimwina antesha nakuzatilaku. Akuzataña neyi apayiniya adimena hadi chaaka chimu nakushika kuyaaka yisatu. Ana akazataña chiwahi, akayitonda kwikala apayiniya adimena ampinji yejima.

Twazañaleli nankashi hakubulakana kwahachaaka kwamu 2011. Tunakulomba netu Yehova yakiswili iyi ntanjikilu kulonda tusweji kushimwina nikunuñañana nawamana kwetu kulonda tuleti mpuhu nikalemesha hejina dindi.

[Chikasha/Nyevulu yidi hefu 18]

KUYILUKA CHIWAHI

Hakubulakana hadina cheñi chibalu chakwihujola antuluwa amomi atanu adi hakachi kawantuluwa atanu nawana asumbwiluwu kudi amamembala aMwizaza Dalombolaña. Muhela Marina Sydlik, Edith Suiter, Melita Jaracz, Melba Barry, nimuhela Sydney Barber ashimwini chadiziluwu chalala nikutachika mudimu wampinji yejima. Wonsu wawu alejeli izaza nsañu yayiwahi yakabula kulalamenawu, nsañu jawanfumu jawu ninkisu jadiluñishiluwu nawanfumu jawu. Hakunkulula iyi progiramu yayiwahi, izaza dembili kamina naambala 86, kanakuhosha nawu: “Ambanda Ashinshika, Ahela akwaKristu.”

[Nyevulu]

(Hewulu) Daniel niMarina Sydlik; Grant niEdith Suiter; Theodore niMelita Jaracz

(Heshina) Lloyd niMelba Barry; Carey niSydney Barber

[Mapu yidi hefu 16]

(Neyi munakukeña kumona ntanjikilu yejima talenu mumukanda)

Nyitayi 6 yabombeluwu nakwikala mumakasa amutayi waMexico

MEXICO

GUATEMALA

HONDURAS

EL SALVADOR

NICARAGUA

COSTA RICA

PANAMA

[Mwevulu wudi hefu 17]

Mwevulu wunakumwekesha chishina chamukaayi chawaYinsahu jaYehova chinakutuñawu muWarwick, New York