Kufuma Munkalaña Jetu

Kwendela Hamu Nawakwakwenda

“KWILA niya nakushimwina kwitala nikwitala nehi!” Atudizi aBayibolu amavulu amaha dichatoñojokañawu hansañu yakuya nakushimwina kudi antu abula kwilukawu. Ilaña awa mazu ayihosheli kudi nhoshi wakuluka yitembi nawa ntañishi waBayibolu wateneneñawu nawu mukwakwenda.

Antañi amavulu amagazini yaZion’s Watch Tower afumini mumachechi adiña nampwila yakudikunda nawantu alejeleña akwawu chalala chamuBayibolu. Iyi magazini yalejeleña antañi kukeñakeña antu adiña nachikuhwelelu neyi chawu kulonda atachiki kupompa mpinji yejima nakudiza Bayibolu. Kutachika mu 1894, aWatch Tower Society atachikili kutemesha añimenu akwakwenda ayileña nakumona mazanvu awantu akeñeleña nawu ayendeli. Atachikili kuyitena nawu akwakwenda, awa amana kwetu adiña apama nawa adikita ayitondeleña hamuloña wakwikala adizoza, kwiluka nsañu yamuBayibolu, kwiluka kuhosha nikutañisha chiwahi nikukuhwelela mwifutu danyiloña. Lwendu lwawu lwadiña hohu lwamafuku ayedi. Atudizi aBayibolu amavulu dihatachikileñawu kuya mwiha nakuhana yipapilu yakutambika nachu antu kwinza nakutiya mpanji yawantu amavulu yamukwakwenda. Chelili nahani dehi mpanji yindi namelela hashikola, Mana kwetu Hugo Riemer, wekalili membala Wamwizaza Dalombolaña, wakwili malwihu amuBayibolu kushika nimukachi kawufuku. Hela chakwila wazeyeli ilaña wazañaleli, wahosheli nindi kupompa “kwawahili nankashi.”

Aka Kaposhi Kakutalila kashimwini nawu mukwakwenda wazataña “mudimu weneni” wakutuña “amwitala dachikuhwelelu” kuhitila mukupompela mumatala awakwakwitiya. Atudizi aBayibolu afumineña mukamwihi enjileña nakutiya jimpanji nikuhanjeka hampinji yakwihula niñakwilu. Kufumahu amwekesheleña chisambu kudi akwawu akwaKristu. Henohu wuchidi kankaña, Maude Abbott wayileña nakutiya kumpanji yantentemena, neyi anakumishi wonsu wawu enjileña kumesa yayilehi yadiña hanji. “Aloñesheleña yakudya yayiwahi nankashi, yidi neyi mbiji yañulu, tusumbi twakukaña, nyichidi yejima yamankendi, mapayi niyindanda! Antu ejima adiileña munakeñeluwu, chiyashika 2 koloku, twapompeleña nakutiya kumpanji yikwawu.” Ilaña wahosheli nindi, “Haniyi mpinji ejima anoñokeleña.” Mana kwetu washimbwili mumudimu wawakwakwenda Benjamin Barton wahosheli nindi, ‘Neyi nadiileña yakudya yayiwahi yanyinkeleñawu, kachi nafwa dehi.’ Mukuhita kwampinji, mukanda wafumini kuchishina kuBrooklyn walejeli ahela apama nawu chikuwaha neyi ejima akwikala namuchima wakumuloñeshela mukwakwenda “hefuku hefuku, yakudya yapela” kulonda “yabuleña kunoñoka.”

Akwakwenda akulukili yitembi muntañishilu nimukuzatisha machati niyakutalilahu hela yuma yikwawu yakwashileña antu kwikala nampwila yakutiya. Jimpanji jaMana kwetu R. H. Barber ‘jatiyakeneña chiwahi chikupu.’ Nhoshelu yaMana kwetu W. J. Thorn yadiña “neyi yankakulula wakushankulu.” Ifuku dimu henohu nakwendesha motoka yindi yaModel A Ford, Shield Toutjian washikeneni kubidika nindi, “Imanaku!” Yakiluka nimumotoka, yaya ninakwanda nkenu, hohenohu yatachika nikumudizisha ibwambu dindi hayuma yaleñayi Yehova.

Mudimu wamukwenda waleteli kukala nankashi, sweje-e kudi antu adiñuku hayina mpinji. Amakwawu  chayikalilili nankashi hakuhimpa nkeñelu yamudimu wawu. Ayilejeli nawu atachiki kutwaminina mumudimu wakushimwina kwitala nikwitala. Kaposhi Kakutalila kaMarch 15, 1924 kahosheli nawu “mudimu weneni” wawakwaKristu alala “wadiña wakushimuna nsañu yawanta. Iwu diwu mudimu wayitemeshelañawu akwakwenda.”

Chidi neyi akwakwenda amakwawu atiyili kuwaha wanyi, muloña alekeli mudimu wakwenda, amakwawu aneñeli atachikili kukokola antu jawu. Mana kwetu Robie D. Adkins nindi mukwakwenda wumu wadiña nhoshi wamuwahi wadilili chikupu nindi: “Ami kwami neluka hohu kushimwina hachinañamu. Kwila niya nakushimwina kwitala nikwitala nehi!” Mana kwetu Adkins nindi: “Namumweni cheñi hakupompa kweneni mu 1924 muColumbus, Ohio. Wamwekeneña kuneña chikupu, wemeni nkawindi muwulelu wakamutondu, kukeña kudikunda nawamana kwetu amavulu adiña namuzañalu nehi. Kufuma hayina mpinji, hinamumwenuhu cheñuku. Hashimbwili wanyi, wafumini mukuloñesha.” Ilaña, “amana kwetu amavulu adiña namuzañalu ahitileña nanyikanda munyotoka yawu,” ayileña nakushimwina chikupu kwitala nikwitala.—Yil. 20:20, 21

Akwakwenda amavulu hela chakwila adiña nawoma neyi ana akandamishiluwu mumasuwa, ashili nyichima yawu hamudimu. Mukwakwenda wumu wahosheleña chiGerman Maxwell G. Friend (Freschel) wasonekeli hamudimu wakushimwina kwitala nikwitala nindi, “Iwu mudimu wamukwenda waletaña nkisu halwendu.” Mukwakwenda John A. Bohnet washimwini nindi amana kwetu amavulu ashili muchima nankashi hakushimwina nsañu yaWanta. Wahosheli nindi, antu amavulu nankashi “adiña neyena chikupu dakukalakala iwu mudimu.”

Amana kwetu ashinshika akwakwenda anatukwashi mweneni hama hadi yaaka yayivulu. Chinsahu wumu wunakalakali yaaka yayivulu Norman Larson nindi: “Kufuma tuhu kuwansi, nachimoni neyi mudimu wawakwakwenda walema nankashi nawa mwafumaña wuloku. Azatili mudimu weneni wakunkwasha.” Kushika nikulelu, ankoñi endaña adihana nawa ashinshika anakukwasha akwawu akakwitiya kuhosha nawu, “Tunateli kuya kwitala nikwitala!”

[Mazu ekoku adi hefu 32]

Natiyili kuwaha chinamweni mukwakwenda nenzi!

[Mwevulu wudi hefu 31]

Benjamin Barton mu 1905 wemeni mapampa 170 halwendu lwindi

[Mwevulu wudi hefu 32]

Walter J. Thorn wadiña mukwakwenda, amuteneneña nawu Papi muloña wadiña nayililu neyi yatata yawantu

[Mwevulu wudi hefu 32]

J. A. Browne amutemesheli kuJamaica mumudimu wakwenda muma 1902 nakukolesha tumazanvu 14

[Mwevulu wudi hefu 32]

Mudimu wamukwenda wakolesheleña chikuhwelelu, wanuñañesheleña akwaKristu nikukundamisha amana kwetu kukuloñesha