Shakamenuña Neyi Enimbu Amuwanta!

“Shakamenuña neyi enimbu.”—FWI. 1:27, ftn, NW.

MUKWAKULA NENUDI?

Anyi anateli kwikala enimbu amuWanta?

Twatela kwiladi nedimi daWanta, nsañu yanyaka ninshimbi?

Indi enimbu amuWanta amwekeshaña ñahi nawu akeña nshimbi jaNzambi?

1, 2. Muloñadi kufumba kwaPawulu kwafumbiliyi chipompelu chamuFwilipi chikwalemena nankashi?

 KAPOSTOLU Pawulu walejeli chipompelu chamuFwilipi nindi ‘chishakami mwatelela nsañu yayiwahi.’ (Tañenu Afwilipi 1:27.) Mazu achiGiriki azatishiliyi Pawulu hakutena izu ‘dakushakama’ anateli kuyibalumuna cheñi nawu “shakamenuña neyi enimbu.” Awa mazu ayikwashili nankashi antu amuchipompelu chamuFwilipi. Muloñadi? Chidi neyi musumba waFwilipi wadiña hakachi kanyisumba yatondeluwu kudi Wanta waRoma nakwinka antu amuFwilipi lusesa lwakwikala enimbu. Enimbu amuRoma adiña muFwilipi nimunyisumba yikwawu yadiña muWanta waRoma azañaleli hakuyinka lusesa nawa nshimbi jawaRoma jayikiñileña nankashi.

² Kudi chuma chayileñeleli antu adiña muchipompelu chamuFwilipi kuzañalala nankashi. Pawulu wayanukishili nindi chineli adiña akwaKristu awayishewa, wenimbu wawu wadiña “mwiwulu.” (Fwi. 3:20) Adiña enimbu amuWanta waNzambi bayi neyi amuwanta wawantuku. Dichi, atambwilileña nkisu jajivulu nikukiñewa nankashi.—Efwes. 2:19-22.

3. (a) Anyi akweti kukooleka kwakwikala enimbu amuWanta? (b) Yumanyi yitukuhanjekahu muchinu chibaaba?

³ Kufumba kwaPawulu ‘kwakushakama neyi enimbu’ kwakundama kudi antu akayuula chimu naKristu mwiwulu. (Fwi. 3:20) Awa mazu, anakundami cheñi kudi antu akayuulewa naWanta waNzambi hamaseki. Muloñadi? Muloña akwaKristu adihana ejima azatilaña Mwanta wumu, Yehova nawa atela kulondela nshimbi jojimu. (Efwes. 4:4-6) Makonu, antu azataña nañovu kulonda ayiteji kwikala enimbu mwituña dinakusumpoka maheta. Anetu nawa twatela kulemesha nankashi kukooleka kutukweti kwakwikala enimbu amuWanta. Hakwila tusweji kulemesha kukooleka kutukweti, tusambilenu kutala hayuma yatela kwilawu antu  anakukeña kwikala enimbu munfulumendi yawantu niyuma yatela kwilawu enimbu amuWanta waNzambi. Kufumahu, tukutala hayuma yisatu yitwatela kwila neyi tunakukeña kwikala enimbu amuWanta alemeshewa.

YUMA YITWATELA KWILA KULONDA TWIKALI ENIMBU

4. Indi idimi ditooka hichumanyi nawa ‘twadihoshaña’ ñahi?

⁴ Kwiluka idimi. Nfulumendi jikwawu jawantu jatuña lushimbi lwakwila nawu muntu wunakukeña kwikala mwenimbu watela kuhosha idimi dahoshañawu antu amavulu munodu ituña. Hela chakwila anayiteji dehi kwikala enimbu, antu alwishaña hadi yaaka yayivulu hakwila eluki kuhosha chiwahi odu idimi. Anateli kwiluka swayi nshimbi janodu idimi ilaña hashimbulaña nankashi hakwila eluki chakutena mazu chiwahi. Wanta waNzambi niwena wakeñaña enimbu amuWanta kudiza “idimi ditooka” datenawu muBayibolu. (Tañenu Zefwaniya 3:9.) Hidiminyi? Hichalala chahosha hadi Nzambi ninkeñelu yindi yamuBayibolu. ‘Twahoshaña’ idimi ditooka neyi tukweti yililu yayiwahi yinesekani nanshimbi jaNzambi. Enimbu amuWanta waNzambi atela kudiza swayi yuma yalema yamuBayibolu nikupapatishewa. Atwalekañahu “kuhosha” chiwahi idimi ditooka nihanyima yakupapatishewa. Munjilanyi? Wonsu wetu twatela kuzata nañovu kulonda tuzatisheña yuma yitwadizaña muBayibolu.

5. Muloñadi chitwatela kwilukila chikupu nsañu yanyaka yakuloñesha kwaYehova?

⁵ Kwiluka nsañu jetuña. Muntu wunakukeña kwikala mwenimbu munfulumendi yawantu watela kwiluka nsañu janyaka janoyu nfulumendi. Antu anakukeña kwikala enimbu amuWanta niwena atela kwiluka chikupu yuma yejima yahoshaña haWanta waNzambi. Talenu chakutalilahu chawanyana kaKora, azatileña muIsarela wakushankulu. Akeñeli nankashi musumba waYerusalema niiluña dakudifukwila nawa akeñeli kuhosha hansañu janiwu musumba. Bayi neyi malola nichamwekeneña iluña dichuma chayizañalesheluku ilaña yuma yakoñeleñawu mumusumba niheluña dakudifukwila diyayizañalesheleña. Yerusalema wadiña “mukala waMwanta muneni,” Yehova muloña dimwadifukwilileñawu kudifukula kwalala. Dimwatañishileñawu Nshimbi jaYehova. Yehova wamwekesheli luwi lwindi lwabadika kudi antu ayuulileñawu kudi Mwanta Muneni wamuYerusalema. (Tañenu Masamu 48:1, 2, 9, 12, 13.) Komana ninenu mukweti mpwila yakudiza nikulejaku antu nsañu yanyaka yakuloñesha kwaYehova kudi hamaseki? Neyi mutwalekahu kwiluka chazatikaña kuloñesha kwaNzambi nichakwashañayi Yehova antu jindi mukwiluka chikupu Wanta waNzambi.  Mukusweja kwikala nampwila yakushimwina nsañu yayiwahi yaWanta.—Yere. 9:24; Luka 4:43.

6. Muloñadi Yehova chakeñelañayi nindi twiluki nikwovwahila nshimbi jaWanta windi?

⁶ Kwiluka nshimbi. Nfulumendi jawantu jakeñaña nawu antu jawu adizi nikwovwahila nshimbi jamwituña. Dichi Yehova wakeñaña nindi tudizi nikwovwahila nshimbi jindi jalombolaña enimbu ejima amuWanta. (Isa. 2:3; Yow. 15:10; 1 Yow. 5:3) Nshimbi jawantu jaloña wanyi nawa jaheña. Ilaña, ‘nshimbi jaYehova jaloña.’ (Mas. 19:7) Komana twatiyaña kuwaha kulondela nshimbi jaNzambi nikutaña Izu dindi hefuku hefuku? Twatela kwiluka nshimbi jaNzambi hohu neyi tukudizaña nkawetu. Kwosi watela kutudizilaku.

ENIMBU AMUWANTA AKEÑA NSHIMBI JANZAMBI

7. Nshimbinyi jabadika jovwahilañawu enimbu amuWanta?

⁷ Hakwila twikala enimbu amuWanta, twatela kwiluka nshimbi jaNzambi nikujikeña chikupu. Enimbu amavulu amunfulumendi jawantu ahoshaña nawu nshimbi jetuña mwashakamañawu jajiwahi. Ilaña neyi amona nawu nshimbi jinakukañesha yuma yinakukeña kwilawu nawa kwosi muntu wunakuyimona, afumpaña nshimbi. Antu amuchidiwu akeñaña hohu ‘kutiyisha antu kuwaha.’ (Kol. 3:22) Enimbu amuWanta ovwahilaña nshimbi jabadika. Twovwahilaña nshimbi jaNzambi hela chakwila kwosi muntu wunakutumona. Muloñadi? Muloña twamukeña Mukwakutuña nshimbi.—Isa. 33:22; tañenu Luka 10:27.

8, 9. Munateli kwiluka ñahi nenu nshimbi jaNzambi mwajikeña chikupu?

⁸ Munateli kwiluka ñahi nenu mwakeña nshimbi jaNzambi chikupu? Toñojokenu chimwelaña neyi anayifumbi hayuma yimwakeña chidi neyi hanvwalilu nimmwekenu yenu. Henohu kanda mwikali enimbu amuWanta, mwavwalileña yakuvwala yatama hela yahanukileña mwaana. Ilaña chimwaswejeli kumukeña Nzambi, mwatachikili kuvwala munjila yamutiyishaña kuwaha. (1 Tim. 2:9, 10; 1 Pet. 3:3, 4) Ichi muneluki nenu munakuvwala chiwahi. Indi neyi eluda yenza nakuyileja nindi nvwalilu yimwakeña yatama nankashi muloña yinakutuntwisha akwakushimwina amavulu muchipompelu? Mukwila ñahi? Mukutachika kudikaña, kumuhembela nkunyi hela kutalumoka? Lushimbi lumu lwalema nankashi lwaWanta waNzambi ludi lwakwila nawu enimbu ejima atela kumwimbujola Kristu. (1 Pet. 2:21) Kapostolu Pawulu wasonekeli kutalisha hadi Yesu nindi: “Tutiyishenu akwetu kuwaha wejima wetu hamuntu hamuntu; tulondenu yuma yayiwahi yakukwasha akwetu.” (Rom. 15:2, 3) Hamuloña wakukeña kuleta kuwunda muchipompelu, mukwaKristu wapama watondolwelaña kwila yuma yinateli kutuntwisha yileji yawakwawu.—Rom. 14:19-21.

⁹ Tuhanjekenu hayikuma yiyedi yalema nankashi: yililu yetu kutalisha kunsañu jawuvumbi nimaluwi. Antu achidi kanda ekali enimbu amuWanta waNzambi ahoshaña nawu wutumwa wawuwahi, nyevulu yanzekesi yatama wanyi nawa atoñojokaña nawu muntu yomweni nateli kufuukulahu kwila wuvumbi hela kudiseña. Ilaña enimbu amuWanta hiyelaña yuma yamuchidiwu yashindamena hayitoñojoka yawuku. Hela chakwila akwaKristu amavulu adiña nayililu yatama kunyima, chayinu mpinji eluka nawu kubulakana kweyala namumbanda nimaluwi hichawana chakufuma kudi Nzambi. Alemesha nshimbi jaYehova jabadika nawa eluka chikupu nawu antu ejima elaña wuvumbi hiyatela kwikala enimbu amuWantaku. (1 Kor. 6:9-11) Hela chochu, eluka cheñi nawu muchima wadimbanaña. (Yere. 17:9) Ahamekaña hakutambwila nshimbi  jakusoñamisha jayikwashaña kwikala nayililu yayiwahi nankashi.

ENIMBU AMUWANTA ALEMESHAÑA NSAÑU YAKUSOÑAMISHA

10, 11. Yumanyi yatusoñamishaña Wanta waNzambi nawa twatiyaña ñahi neyi anatusoñamishi?

¹⁰ Nfulumendi jawantu jakaanishaña antu jawu kubula kudya yakudya yimu nikunwa yitumbu. Bayi neyi yakudya hela yitumbu yejima yatamaku. Ilaña neyi kudi yakudya hela yitumbu yinakuleta wubanji, nfulumendi yasoñamishaña kulonda yikiñi antu jawu. Neyi nfulumendi kusoñamisha antu nehi, akuyinka muloña wakubula kushaku maana. Wanta waNzambi niwena wasoñamishaña antu hampinji yatelela hansañu yayililu niwubanji wakuspiritu. Chakutalilahu, Intaneti yinakukwasha antu nankashi munsañu jakuhanjeka, kutaña niyisela. Kuloñesha kwaNzambi nikwena kwazatishaña Intaneti hakukalakala nyidimu yayiwahi. Ilaña, maprogiramu amavulu ahaIntaneti akisañanaña yililu yetu yakumujimba niyakuspiritu. Maprogiramu ahaIntaneti amwekeshaña nyevulu yanzekesi akuvumunaña chihandilu chakuspiritu chawenimbu amuWanta. Hadi yaaka yayivulu, izanvu danduñu wamaana natusoñamishi nankashi hansañu yanawa maprogiramu. Twasakililaña hakusoñamisha kwamuchidiwu kwakuspiritu.

¹¹ Muyaaka yamakonu, kudi progiramu yikwawu yinakuzatishawu antu amavulu nankashi, yinateli kutukwasha neyi tuyizatisha chiwahi. Awa maprogiramu anakutenawu nawu maWeb site akuhanjekelahu, niwena anateli kutuluwañesha. Anateli kukojeja muntu kudikunda nawantu atama. (1 Kor. 15:33) Dihanafumi kuloñesha kwaNzambi kutusoñamisha nawu tubuleña kusandujola hamaprogiramu amuchidiwu. Komana munatañi nyikanda yakatataka yinasonekuwu kudi nduñu wamaana kutalisha hakuzatisha awa maprogiramu akuhanjekelahu? Tukuluwañesha nankashi neyi tutachika kuzatisha maprogiramu amuchidiwu chakadi kutaña iyi nyikanda. * Chidi neyi wunakunwa yitumbu yañovu chakadi kutaña nshimbi jinasonekuwu hanchumpa.

12. Muloñadi chitukuhoshela netu tunakudidimba neyi tubula kulondela nsañu yinatusoñamishuwu?

¹² Antu adiwulaña mwayisoñamishaña nduñu wamaana adokwelaña makala akesi hanyitu yawu niantaña jawu. Amakwawu ateñuka dehi nakutala nyevulu yanzekesi nikwila wuvumbi nawa adidimbaña aweni nawu Yehova hanakumona yuma yinakwilawuku. Neyi tutoñojoka netu Yehova hamonaña yililu yetuku, tunakudidimba. (Yish. 15:3; tañenu Aheberu 4:13.) Nzambi nakukeña kukwasha antu amuchidiwu nawa wazatishaña añimenu indi ahamaseki kulonda ayikwashi. (Ŋal. 6:1) Neyi chochahukulaña nfulumendi yawantu lusesa lwawenimbu lwenkawu muntu wunafumpi nshimbi yetuña, Yehova niyena haketeja enimbu atwalekañahu nakufumpa nshimbi jinduku. * (1 Kor. 5:11-13) Hela chochu, himukwaluwi. Antu abalumukaña mumuchima nakuhimpa yililu yawu ekalaña cheñi nañimenu yayiwahi kumesu aYehova nikwikala enimbu amuWanta. (2 Kor. 2:5-8) Mwalala tudi nakukooleka  kweneni kwakukalakela Mwanta wukweti kukeña.

ENIMBU AMUWANTA ALEMESHA SHIKOLA

13. Indi enimbu amuWanta amwekeshaña ñahi nawu alemesha shikola?

¹³ Nfulumendi jajivulu jawantu jafwilaña kudizisha antu jawu. Atuñaña mashikola kulonda atañishileñamu antu nikuyidizisha nyidimu yatela kuyikwasha. Enimbu amuWanta alemesha mashikola akumujimba nawa afwilaña kwiluka kutaña, kusoneka nikudikwasha aweni munsañu jamali. Sweje-e dinu alemesha nankashi shikola yakwikala enimbu amuWanta waNzambi. Yehova wadizishaña antu jindi muchipompelu chawakwaKristu. Anvwali ayikoleshaña kutañila anyanawu anyanya. Hakakweji hakakweji, nduñu wamaana wasonekaña nyikanda yashindamena haBayibolu muKaposhi Kakutalila nimuAwake! Neyi mukutañaña mafu amavulu hefuku, mukutwalekahu kuhetela mushikola yinakutudizishayi Yehova.

14. (a) Kufumbanyi kutwatambwilaña? (b) Jinjilanyi jimwatiyaña kuwaha kuzatisha haKudifukula kwaChisaka kwamelela?

¹⁴ Enimbu amuWanta atambwilaña kufumba hachipompelu mulungu nimulungu. Chakutalilahu, Shikola yaMudimu waTeokalatiki yinakwashi atudizi kwikala antañishi Ezu daNzambi akuluka yitembi hadi yaaka yakubadika ha 60. Anenu mwasonekesha muniyi shikola? Muyaaka yamakonu, nduñu wamaana nakukonkomwena yisaka kulonda yikaleña nantanjikilu yaKudifukula kwaChisaka kwamelela mulungu nimulungu. Iyi ntanjikilu yinakunuñañesha yisaka. Anenu nawa munakuzatisha jinjila jinakusonekawu munyikanda yetu? *

15. Kukoolekanyi kweneni kutukweti?

¹⁵ Enimbu amunfulumendi yawantu akwashaña chipompelu chawu chapolitiki nawa ayaña kwitala nikwitala nakuleja antu jawu. Enimbu amuWanta niwena akwashaña nankashi Wanta waNzambi kuhitila mukushimwina munyikwakwa nikwitala nikwitala. Neyi chitwashimwini muchibaaba chakudizamu chinafumiku, Kaposhi Kakutalila, kanakubidika Wanta waYehova, himagazini yinakuhanawu nankashi mukaayi kejima. Tudi nakukooleka kweneni kwakulejaku antu nsañu yaWanta waNzambi. Anenu nawa munakudikita neyena mumudimu wakushimwina?—Mat. 28:19, 20.

16. Munateli kumwekesha ñahi nenu mudi enimbu amawahi amuWanta waNzambi?

¹⁶ Wanta waNzambi keña wikali nfulumendi yakayuulaña iseki. Diwakatuloñeshelaña yuma yejima yitwakeñaña yakuspiritu niyakumujimba. Komana mwakekala enimbu amawahi amuWanta waNzambi hayina mpinji? Ayinu diyi mpinji yakuwahisha yililu yetu. Muyuma yejima yimwakoñaña hefuku hefuku, ilenu yuma yejima kulonda mumulemeshi Yehova nawa chumichi chikumwekesha nawu munakushakama chiwahi neyi enimbu amuWanta waNzambi.—1 Kor. 10:31.

[Tumazu twaheshina]

[Malwihu aKuzatisha haKudiza]

[Mazu ekoku adi hefu 14]

Komana mwovwahilaña kusoñamisha kwamuBayibolu kwahosha hamaIntaneti?

[Mwevulu wudi hefu 12]

Kufwana anyana kaKora, anenu mwazañalalaña nakudifukula kwalala nikwiluka nsañu yanyaka yaniku kudifukula?

[Mwevulu wudi hefu 15]

Kudifukula kwaChisaka kwamelela kunateli kuyikwasha nichisaka chenu kwikala enimbu amuWanta amawahi