Dizilenu Kudi Yehova Niyesu Adiwunjika

‘Toñojokenu nenu kudiwunjika kwaMwanta wetu hiwamwinu.’—2 PET. 3:15.

MUKWAKULA NENUDI?

Indi Yehova wamwekeshaña ñahi nindi wadiwunjika?

Muloñadi Yesu chadiwunjikililiyi hadi mpinji yeneni?

Yumanyi yitwatela kwila kulonda tusweji kudiwunjika neyi Nzambi?

1. Indi antu ashinshika atoñojokaña hachumanyi?

 MUHELA wumu washinshika womikili kukala kwakuvulu hadi yaaka yayivulu wenhwili nindi, “Namba kamona chikenza kukuma henohu kanda nifwi?” Antu amakwawu anamukalakeli Yehova hadi yaaka yayivulu niwena dichatoñojokañawu. Twatalilaña chikupu ifuku dakabalumunayi Nzambi yuma yejima yikekali yayiha, nakufumishahu kukala kutunakumona. (Chim. 21:5) Hela chakwila kudi yuma yayivulu yinaleteshi tukuhweleli netu ituña daSatana didi kwakwihi nakukuma, chinateli kutukalila kudiwunjika nakuhembelela ifuku denidi.

2. Malwihwinyi anakuhosha hakudiwunjika kwaNzambi itukuhanjekahu?

² Ilaña, Bayibolu yatulejaña nawu twatela kudiwunjika. Kufwana ambuña aNzambi akunyima, twakatambwila yuma yakanayi Nzambi neyi tukwikala nachikuhwelelu chakola nikudiwunjika hakutalila mpinji yakashikijayi yikaninu yindi. (Tañenu Aheberu 6:11, 12.) Yehova yamwini wadiwunjika. Neyi wakeñeli mutenowu chiña wamanisha dehi kutama hampinji yidi yejima, ilaña nakuhembelela mpinji yatelela. (Rom. 9:20-24) Muloñadi chadiwunjikilañayi? Indi Yesu wekala ñahi chakutalilahu chakudiwunjika kwaNzambi? Nkiswinyi yitukatambwila neyi tudiwunjika neyi chadiwunjikayi Nzambi? Ñakwilu yanawa malwihu yikutukwasha kwikala adiwunjika nikwikala nachikuhwelelu chakola, hela neyi tumona netu Yehova nakulaba.

MULOÑADI YEHOVA CHADIWUNJIKILAÑAYI?

3, 4. (a) Muloñadi Yehova chadiwunjikilayi hakwila yashikiji nkeñelu yindi heseki? (b) Indi Yehova welili ñahi nakudikaña kwamuEdeni?

³ Kudi yuma yayiwahi yaleñelaña Yehova yadiwunjiki. Eña tweluka netu Yehova wabadika mukuleña kwejima; ilaña, kudikaña kwamuEdeni kwaleteli kujinoka hansañu  yalema yakuleña kwejima. Yehova wadiwunjika muloña weluka nindi hatela kuhita mpinji hakwila yileñaleña yindi yileki kujinoka. Chineli weluka chikupu yililu niyitoñojoka yawantu amwiwulu niahamaseki, dikwila nawu nakwila yuma yinateli kutuletela nkisu.—Heb. 4:13.

⁴ Nkeñelu yaYehova yadiña yakwila nawu anyana kaAdama naEvu akenzeshi iseki. Satana chamudimbiliyi Evu, dihafumini Adama kudikaña, ilaña Nzambi hahimpili nkeñelu yinduku. Yehova halusukili nakwila yuma lufuchuku nawa hazuwili hela kushiya antu chisayikilaku. Ilaña, waweni njila yakushikijilamu nkeñelu yindi kutalisha hadi antu niIseki. (Isa. 55:11) Hakwila yashikiji nkeñelu yindi nikuyiñisha chiyuulu chindi, Yehova wadihemba nikudiwunjika chikupu, natalili hadi yaaka yayivulu kulonda yashikiji nkeñelu yindi munjila yayiwahi.

5. Kudiwunjika kwaYehova kukaleta nkiswinyi?

⁵ Chuma chikwawu chaleñelaña Yehova yadiwunjikeña nakutalila chidi chakwila nawu wakeñaña antu amavulu akatambwili wumi wahaya nyaka. Chayinu mpinji, nakuloñesha njila yakupulwishilamu “izaza deneni.” (Chim. 7:9, 14; 14:6) Kuhitila mumudimu wetu wakushimwina, Yehova nakutambika antu enzi kulonda eluki Wanta windi ninshimbi jindi jaloña. Nsañu yaWanta diyi nsañu yayiwahi chikupu yatela kutiyawu antu, eña, ‘hinsañu yayiwahi.’ (Mat. 24:14) Muntu wejima wakokañayi Yehova wekalaña hakachi kawamabwambu alala amuchipompelu chamukaayi kejima akeña kwila yuma yaloña. (Yow. 6:44-47) Nzambi yetu wakukeña wakwashaña antu amuchidiwu kwikala nawuselewa windi. Watonda cheñi antu antesha kufuma hamaseki kulonda akekali munfulumendi yindi yamwiwulu. Chakayinkawu yifulu yawu yamwiwulu, awa antu ashinshika akakwasha antu ovwahila hamaseki kwikala awanina nikuheta wumi wahaya nyaka. Mwalala, hela chakwila wadiwunjika nakutalila, Yehova nakuzata kulonda yakashikiji yikaninu yindi, yikatuhetesha.

6. (a) Yehova wamwekesheli ñahi kudiwunjika mumafuku aNowa? (b) Yehova nakumwekesha ñahi kudiwunjika makonu?

⁶ Yehova wadiwunjika hela chakwila antu amakwawu elaña yuma yatama, neyi chitwamonaña hampinji yamanishiliyi kutama henohu kanda yaleti Dibaji. Iseki denzeli nawantu akwanshidi niakwamadombu nawa ‘chamutiyishili Yehova kumuchima bwi’ hamuloña wakusweja kutama kwamuntu. (Kutach. 6:2-8) Yehova halekeli kutama kutwalekuhuku, dichi wafuukwiluhu kuleta dibaji hadi antu abulileña kwovwahila. Hela chakwila ‘Nzambi wadiwunjikili nakuchiñilila mumafuku aNowa,’ Yehova waloñesheli njila yakupulwishilamu Nowa nichisaka chindi. (1 Pet. 3:20) Yehova wamulejeli Nowa mwafuukwiliyi hampinji yatelela nawa wamwinkeli mudimu wakutuña watu. (Kutach. 6:14-22) Kubombelahu, Nowa wadiña “mukwakushimuna kuloña,” nakuleja antuñi nindi kujilumuka kwadiña mukamwihi. (2 Pet. 2:5) Yesu wahosheli nindi mafuku etu adi neyi chadiña mafuku aNowa. Yehova wafuukula dehi mpinji yakajilumunayi kanu kaayi katama. Kwosi muntu weluka “itañwodu hela mpinji oyu” yikenza kujilumukaku. (Mat. 24:36) Chayinu mpinji, Nzambi natwinki mudimu wakusoñamisha antu nikuyileja yuma yikuyikwasha kulonda akapuluki.

7. Komana Yehova nakulaba kushikija yikaninu yindi? Lumbululenu.

⁷ Eñañi, kudiwunjika kwaYehova hikwatalisha mukwila nawu nakuhembelela hohu mpinji yihituku. Bayi tumonaña kudiwunjika kwindi netu hashaku maana hela netu wadiwulakuku. Chinateli kutukalila kuhemba idi ifuku muyitoñojoka hampinji yitunakushinakaja hela hampinji yitunakukabakana mukanu kaayi katama. Tunateli kuneña hela kutachika kutoñojoka netu Nzambi hanakushikija  swayi yikaninu yinduku. (Heb. 10:36) Mwatela kwanuka nenu kudi yuma yayiwahi yaleñelaña yadiwunjikeña nawa nakuzatisha yinu mpinji kulonda ambuñindi ashinshika ahetelumu. (2 Pet. 2:3; 3:9) Toñojokenu, Yesu chembujoleliyi kudiwunjika kwaNzambi.

INDI YESU WEMIKA ÑAHI CHAKUTALILAHU CHACHIWAHI CHAKUDIWUNJIKA?

8. Muyumanyi mwamwekesheliyi Yesu kudiwunjika?

⁸ Yesu nakwila mwaya kukeña kwaNzambi nawa nakwila mwenimu namuchima wumu hadi yaaka yayivulu. Chadikañiliyi Satana, Yehova wafuukwili nindi Mwanindi wumu hohu diyi wateleli kwinza hamaseki neyi Mesiya. Toñojokenu hakudiwunjika kwamwekesheli Yesu hampinji yadiña nakutalilayi hadi yaaka yayivulu nakushika nimpinji yakwinza hamaseki. (Tañenu Aŋalija 4:4.) Hadiña nakuhembelela wushakaminuku, ilaña wazatileña nyidimu yamwinkeleñawu kudi Tata yindi. Chenjiliyi hamaseki, welukili nindi Satana diyi wakamujaha, neyi chaprofweteluwu. (Kutach. 3:15; Mat. 16:21) Wadiwunjikili nakwila nkeñelu yaNzambi, hela chakwila wahitili mwihuñu deneni. Kashinshi kindi kabadikili chikupu. Hashili muchima hadi yomweni hela hachifulu chinduku nawa tunateli kudizilaku chikupu.—Heb. 5:8, 9.

9, 10. (a) Mudimwinyi wazatañayi Yesu chinakudiwunjikayi nakutalila kuzuwa kwaYehova? (b) Twatela kumona ñahi mpinji yatoñolayi Yehova?

⁹ Chamusañwiluwu, Yesu amwinkeli ñovu mwiwulu nihamaseki. (Mat. 28:18) Wazatishaña ñovu yamwinkawu kwila nkeñelu yaYehova kwesekeja nampinji yatoñolayi Nzambi. Yesu wadiwunjikili nakuhembelela kuchikasa chaNzambi chachidiilu kushika nimu 1914 habalumwinuwu akwankunyi nindi kwikala itanda dakunyendu yindi. (Mas. 110:1, 2; Heb. 10:12, 13) Katataka yanyamuki nakujilumuna kaayi kaSatana. Chayinu mpinji, Yesu nadiwunjiki nakuzatila hamu nawantu nawa nakuyilombola ‘kumenji awumi.’—Chim. 7:17.

¹⁰ Komana chakutalilahu chaYesu chayikwashaña kwiluka chimwatela kumona mpinji yatoñolayi Yehova? Chakadi nikujina Yesu wafwilileña kuzata nyidimu yamwinkeli Tata yindi; nawa wadiwunjikili nakuhembelela mpinji yatoñweliyi Nzambi. Chitunakutalila kukuma kwetuña datama daSatana, wonsu wetu twatela kwimbujola kudiwunjika kwaNzambi, bayi tumushiyamu Nzambi hela kuleka hamuloña wakuzeyaku. Twatela kwiladi kulonda twikali adiwunjika neyi Nzambi?

NATELI KUDIWUNJIKA ÑAHI NEYI NZAMBI?

11. (a) Indi chikuhwelelu chendelaña ñahi hamu nakudiwunjika? (b) Muloñadi chitwatela kwikala nachikuhwelelu chakola?

¹¹ Henohu Yesu kanda yenzi hamaseki, atuprofwetu niantu amakwawu ashinshika emikili chakutalilahu chinateli kukwasha antu abula kuwanina kuumika nikudiwunjika. Chikuhwelelu chawu chendeleleña hamu nakudiwunjika. (Tañenu Yakoba 5:10, 11.) Neyi akañenyi kwiteja mwayilejeluwu kudi Yehova, neyi abulili chikuhwelelu, komana adi kutwesha kudiwunjika nakuhembelela kushikijewa kwayikaninu yindi? Mumpinji mumpinji, amweneña kukala kwesekeleña chikuhwelelu chawu, ilaña akuhweleleli nawu Nzambi wukukoña mwakaniniyi. (Heb. 11:13, 35-40) Yumiyi yatukwashaña kwikala nachikuhwelelu chakola, muloña Yesu diyi ‘Mukwakuwanisha chikuhwelelu chetu.’ (Heb. 12:2) Washikijili wuprofwetu nawa wamwekesheli nkeñelu yaNzambi munjila yatuleñelaña tukuhweleli.

12. Twatela kwiladi kulonda tukoleshi chikuhwelelu chetu?

¹² Chumanyi chitwatela kwila kulonda tukoleshi chikuhwelelu chetu nikwikala adiwunjika chikupu? Kuzatisha mwatufumbañayi Nzambi dichuma chabadika kulema.  Chakutalilahu, toñojokenu hayuma yayileñelaña musambileña kukeña Wanta muchihandilu chenu. Komana kwila muzata nañovu kulonda muzatishi kufumba kwekala haMatewu 6:33 nehi? Mukuzata nañovu munabombeli kuzata mpinji yeneni mwiha hela kuhimpa yuma yikwawu muchihandilu chenu. Toñojokenu hankisu yinayikiswiliyi Yehova hamuloña wakuzata nañovu kushika nikulelu. Hadaha wayikwashili kudizisha muntu wamuha nsañu yamuBayibolu hela wayikwashili kutambwila “kuwunda kwaNzambi kwabadika maana ejima.” (Tañenu Afwilipi 4:7.) Chimukutoñojokaña hayuma yimunahetelumu hamuloña wakulondela nshimbi jaYehova, chikuyileñela musweji kudiwunjika.—Mas. 34:8.

13. Tunateli kulumbulula ñahi njila yakukoleshelamu chikuhwelelu nikudiwunjika?

¹³ Chumichi chinadifwani nayuma yamwekanaña mukaayi yidi neyi kutumba, kudima nikwañula mbutu. Neyi ndimi yañula mbutu yayivulu, muchilaaka chikahiñahu wekalaña nampwila yeneni yakutumba mbutu cheñi. Mwalala, watela kudiwunjika nakuhembelela chikashika mpinji yakwañula, ilaña kuhembelela hikwamuleñelaña yakañanyi kutumba mbutuku, hadaha watela nikudima iha deneni kubadika chilaaka chinamani. Wakuhwelelaña nindi wakañula. Chochimu, chitunakutwalekahu kudiza nshimbi jaYehova, kujilondela, nikuwana wuloku wafumañamu, twaswejelañaku kumukuhwelela Yehova. Chikuhwelelu chetu nichena chakolelañaku nawa hichatukalilaña kutalila nkisu yitweluka netu yikenzaku.—Tañenu Yakoba 5:7, 8.

14, 15. Twatela kumona ñahi makabi anakumonawu antu?

¹⁴ Njila yikwawu yakwikalilamu adiwunjika yidi yakwiluka chitwatela kumona yuma yakaayi ninshakaminu yetu. Esekenu kumona yuma neyi chayimonañayi Yehova. Chakutalilahu, toñojokenu chamonañayi yihuñu yamonañawu antu. Waneñaña hakumona  antu anakukabakana; ilaña chineñi hichamukañeshaña kwila yuma yayiwahiku. Watemesheli Mwanindi wumu hohu ‘kulonda yakisañani nyidimu yaDiyabolu’ nikufumishahu yuma yejima yatama yaletayi Satana hadi antu. (1 Yow. 3:8) Eña, makabi itunakumona akapinji kantesha, ilaña Nzambi wakayifumishahu haya nyaka. Munjila yoyimu, chatela tuneñeña hakumona kutama kunakumwekana muchiyuulu chaSatana hela kululuta netu kwiji chakamana mpinjinyi, tukuhwelelenu muyuma yabulaña kumwekana yakekalaku haya nyaka. Yehova watoñola mpinji yakamanishayi yuma yatama nawa wakayimanisha hampinji yatelela.—Isa. 46:13; Nahu. 1:9.

¹⁵ Munanu mafuku akala akukumishaku mukanu kaayi katama, tunateli kuholokela mukukala kunateli kuzeyesha chikuhwelelu chetu. Chatela tuhilashaneña hamuloña wakukala kutunakumona nimadombu hela neyi ntaña yetu yeñila mukukala, twatela kumukuhwelela chikupu Yehova. Chatukalilaña kwila mwenimu muloña wakubula kuwanina. Anukenu, cheliliyi Yesu neyi chasonekawu haMatewu 26:39.—Tañenu.

16. Yumanyi yitwatela kutondolwela muyinu mpinji yinashaluku?

¹⁶ Chuma chatukañeshaña kudiwunjika neyi chadiwunjikayi Nzambi hiyitoñojoka yakwila nawu twakatala neyi yuma yakalumbuluka. Indi ichi chatalisha mudihi? Muntu wabulaña kukuhwelela nindi kukuma kudi mukamwihi nateli kutachika kutoñojoka munjila yacheñi, nateli kutoñojoka nindi hadaha Yehova hakashikija mwahosheliyuku. Munjila yikwawu, iwu muntu nakutoñojoka nindi, ‘nukuhembelela kulonda nakamoni neyi Yehova wakakoña mwakaniniyi.’ Wukufwilaña kutiyakana mukanu kaayi, kwikala namali amavulu chatela yasambileña kukeña Wanta waNzambi hela kukinka manuñu mukutaña shikola yahewulu kulonda yekali nachihandilu chachiwahi. Komana muntu wamuchidiwu hanakumwekesha nindi wukweti chikuhwelelu chazeyaku? Anukenu nenu Pawulu watukonkomweneni nindi twimbujoleña antu ashinshika atambwilili yikaninu yaYehova “nakukuhwelela nakudiwunjika.” (Heb. 6:12) Yehova watoñola dehi mpinji yakajilumunayi kanu kaayi katama nawa hakalabaku. (Hab. 2:3) Chayinu mpinji, bayi twikala nawuudi mumudimu waYehovaku. Ilaña, twatela kwikala asoñama nikudikita chikupu mumudimu wakushimwina nsañu yayiwahi, yaletaña muzañalu weneni nimunanu mafuku.—Luka 21:36.

NKISWINYI YAFUMAÑA MUKUDIWUNJIKA?

17, 18. (a) Kukoolekanyi kutukweti makonu kunabombelumu kudiwunjika? (b) Nkiswinyi yitwakatambwila neyi tudiwunjika makonu?

¹⁷ Chili tunamukalakeli Nzambi hadi tukweji twantesha hela hadi yaaka yayivulu, tunakukeña kumukalakela haya nyaka. Kudiwunjika kukutukwasha kuumika kushika nimpinji yitukapuluka, hichidi namuloña nampinji yinashaliku mukanu kaayuku. Yehova natwinki mpinji kulonda tumwekeshi chikupu netu twakuhwelela muyikaninu yindi nawa mpinji jikwawu tunateli kumona makabi hamuloña wejina dindi. (1 Pet. 4:13, 14) Cheñi Nzambi nakutudizisha yuma yinateli kutukwasha kwikala adiwunjika kulonda tukapuluki.—1 Pet. 5:10.

¹⁸ Yesu wukweti ñovu yamwiwulu niheseki, nawa kwosi wunateli kuyihukula muchikasa chinduku, chiña enu aweni. (Yow. 10:28, 29) Dichi bayi tuchina yuma yikamwekana kumbidi hela kufwaku. Antu omikaña nikudiwunjika kushika nikunsa diwu akapulwishawu. Dichi bayi twiteja kaayi katuheñuli kulonda tuleki kushindamena hadi Yehovaku. Ilaña, twatela kudikasa mumuchima kulonda tukoleshi chikuhwelelu nikuzatisha chiwahi mpinji yinadiwunjikiyi Nzambi.—Mat. 24:13; tañenu 2 Petulu 3:17, 18.

[Malwihu aKuzatisha haKudiza]

[Nyevulu yidi hefu 21]

Kudiwunjika kwaNzambi kukuyikwasha mushi muchima haWanta kulonda mwakatambwili nkisu!