“Himuneluki Hela Ifuku Hela Mpinjuku”

“Dichi dinu tonenu, muloña himuneluki hela ifuku hela mpinjuku.”—MAT. 25:13.

MUKWAKULA NENUDI?

Njilanyi jitwahetelañamu hakubula kwiluka ifuku hela mpinji yakenza kukuma?

Indi awayishewa ekala ñahi atona?

Munjilanyi mutunateli kumwekeshela netu tudi adiloñesha kumona kwinza kwaKristu?

1-3. (a) Yakutalilahwinyi yinakumwekesha chikuma chashimwiniyi Yesu muyishimu yiyedi? (b) Malwihwinyi itwatela kwakula?

 FWIKIJENU nenu chilolu waya mpuhu nayileji nindi mumutwali namotoka kulonda yayi nakudimona namuntu wadishikayi nindi. Henohu kunashali jiminiti jantesha nakunyamuka nenu muyi nakumusenda, mwanuka nikwanuka nenu mumotoka mwosi manji amavulu akuyishikija kumunakuya. Mukunyakala kuya nakulandilamu manji. Iku munakufumahu tuhu, chilolu yashika nikushika. Hakuyikeña ilaña kuyimona nehi. Hakutwesha kuyihembelelaku, hakuleja ñendeshi wacheñi nindi yamutwali. Anenu muditula nikuditula kuwana chekeli kambolu, chilolu nayi dehi. Mukutiya ñahi?

² Fwikijenu nenu yenu achilolu nawa munatondi amayala asatu atelela kulonda azati mudimu walema. Muyileja nichakuzata mudimu wumunayinki nawa wonsu wawu asatu aneteji. Ilaña, chimwahita mpinji mufunta nikufunta, muwana nikuwana nenu ayedi hohu diwu anazati mudimu wumwayinka. Ilaña wumu nakañanyi mudimu, nakuleyaleya hohu. Nawa mudimu wumwamwinka, wakwataku niwanyi. Mukutiya ñahi?

³ Muyishimu yawambanda ajiki niyantalenta, Yesu wazatishili mazu amuchidiwu hakulumbulula chikaleñela mumpinji yakukuminina akwaKristu awayishewa amakwawu akayiwani ashinshika nawa amaana, ilaña amakwawu nehi. * (Mat. 25:1-30) Wakonkomweneni hanichi chikuma hakuhosha nindi: “Dichi dinu tonenu, muloña himuneluki hela ifuku hela mpinjuku,” dikwila nawu hampinji yakaletayi Yesu wunsompeshi waNzambi wakukisañana ituña daSatana. (Mat. 25:13) Anetu tunateli kuzatisha iku kufumba. Tunateli kuhetelamu ñahi mukwikala atona, neyi chatukonkomweneniyi Yesu? Anyi anamwekeshi nawu anadiloñeshi kulonda akapuluki? Chumanyi chitwatela kwila makonu kulonda twikali atona?

 HETELENU MUKWIKALA ATONA

4. Muloñadi ‘kwikala atona’ chikwabulila kutalisha mukwila nawu tushinshikeña hakoloku?

⁴ Nyidimu yikwawu, yidi neyi kuzatila mufakitoli, kuya nakumona ndotolu, hela kukandama mumotaka neyi wudi halwendu, kwakeñekaña kulondela mpinji. Ilaña munyidimu yikwawu, yidi neyi yakujima kesi hela yakupulwisha antu neyi kunamwekani wubanji, hiyakeñekaña kutala hakolokuku muloña mukuluwankana hela mukuleta wubanji. Mukukala kwamuchidiwu, mwatela kusha maana hamudimu wumunakuzata kubadika kulondela mpinji. Chineli kukuma kwakanu kaayi kunakuswila kwakwihi, mudimu wakushimuna yuma yatuloñeshelañayi Yehova kulonda tukapuluki walema nankashi. Kwikala atona neyi akwaKristu hikwatalisha mukwila nawu tushinshikeña hakolokuku. Eñañi, kubula kwiluka ifuku nimpinji yakenza kukuma kwatukwashaña munjila jitanu.

5. Indi kubula kwiluka ifuku hela mpinji kwatukwashaña ñahi kumwekesha yuma yekala munyichima yetu?

⁵ Chatachi, kubula kwiluka mpinji yamba kenza kukuma kwatuleñelaña tumwekeshi yuma yekala munyichima yetu. Eñañi, kubula kwiluka mpinji kwatuleñelaña kwikala alema, nakutwinka mpinji yakuzatisha wuswa wetu wakudifuukwila hakumwekesha kashinshi ketu kudi Yehova. Hela chakwila twatalilaña kupuluka hakukuma kwakanu kaayi, twamukalakelaña Yehova muloña twamukeña, bayi neyi hamuloña wakutambwila wumi hohuku. (Tañenu Masamu 37:4.) Twazañalalaña hakwila mwaya kukeña kwindi nawa tweluka netu Nzambi nakutudizisha kulonda tuhetelumu. (Isa. 48:17) Nshimbi jindi twajimonaña netu hijakalaku.—1 Yow. 5:3.

6. Indi Nzambi watiyaña ñahi neyi tumukalakela hamuloña wakumukeña nawa muloñadi?

⁶ Chuma chamuchiyedi chitwahetelañamu hakubula kwiluka ifuku hela mpinji chidi chakwila nawu, tukweti kukooleka kwakuzañalesha muchima waYehova. Neyi tumukalakela hamuloña wakumukeña, bayi neyi hamuloña wakwila kukuma kudi mukamwihi hela hamuloña wakukeña wulokuku, dikwila nawu tunakumuhakwilaku Yehova kulonda yamwekeshi nawu chilumbu chindi, Satana, hisakutwamba. (Yoba 2:4, 5; tañenu Yishimu 27:11.) Neyi tutoñojoka hayihuñu yejima yaletayi Diyabolu, twazañalalaña hakwimenaku chiyuulu chaYehova nikukaana chiyuulu chatama chaSatana.

7. Muloñadi chimunakukeñela kuzatisha wumi wenu kulonda mumukalakeli Nzambi nikukwasha amakwawu?

⁷ Chamuchisatu, kumukalakela chakadi kwiluka mpinji yakenza kukuma kwatukoleshaña kwikala nachihandilu chakudihana. Antu amakwawu makonu abula kumwiluka Nzambi akuhwelela nawu kanu kaayi hikakatwalekahuku. Hamuloña wakuchina kujilumuka kunakwinza, chayileñelaña kwikala nayitoñojoka yakwila nawu: ‘Komana tukumini dakudya nakunwa, muloña kumadiki tukafwa.’ (1 Kor. 15:32) Ilaña etu, hitwachinañaku. Hitwadambulaña kulonda tufwileña kwila yuma yitwakeñañaku. (Yish. 18:1) Ilaña, twadibondaña nikuzatisha chikupu mpinji yetu, ñovu, niyuma yikwawu yitukweti hakushimwina nsañu yayiwahi yaWanta waNzambi kudi antu. (Tañenu Matewu 16:24.) Twekalaña namuzañalu hakumukalakela Nzambi, sweje-e hakukwasha antu amakwawu kulonda amwiluki.

8. Chakutalilahwinyi chamuBayibolu chamwekeshaña muloña wutwatelela kushindamena chikupu hadi Yehova niHezu dindi?

⁸ Njila yamuchiwana yitwahetelañamu hakubula kwiluka ifuku hela mpinji yidi yakwila nawu chatukwashaña kushindamena nankashi hadi Yehova nikuzata nañovu hakuzatisha Izu dindi muchihandilu chetu. Chaaku chimu chasweja nankashi mudetu antu abula kuwanina chekala chakudishindamena etu aweni. Pawulu wakonkomweneni akwaKristu ejima nindi: “Yowu natoñojoki nindi nemani, ababali kuchina kudimbuka.” Antu makombakaji makumi ayedi namakombakaji asatu ajimbesheli wuselewa  waYehova chikwashalili mpinji yantesha hakwila Yoshuwa yayiñiji antu jaNzambi Mwituña daChikaninu. Pawulu wahosheli nindi: ‘Yumiyi dinu ayisonekeli kulonda atukonkomweni, etu tudi kunu kunsa yanyaka yamakonu.’—1 Kor. 10:8, 11, 12.

9. Indi yihuñu yinateli kukolesha ñahi chikuhwelelu chetu nikutukundamisha kwakwihi naNzambi?

⁹ Njila yamuchitanu yitwahetelañamu hakubula kwiluka mpinji yakenza kukuma yidi yakwila nawu twadizilañaku kuyihuñu yitunakumona nikukolesha chikuhwelelu chetu. (Tañenu Masamu 119:71.) Eña, mafuku akukuminina akanu kaayi ‘hinyaka yakala.’ (2 Tim. 3:1-5) Antu amavulu mukanu kaayi kaSatana atuhela, dichi anateli kutuyandisha kukola chikuhwelelu chetu. (Yow. 15:19; 16:2) Neyi tudizoza nikulomba wukwashu waNzambi hampinji yinakutuyandishawu, chikuhwelelu chetu chikukolelaku hela akuchitookesha neyi chikuñu chakuchila nakesi. Hitwazeyaña nakufunta hanyimaku. Ilaña, twaswejaña kukundama kwakwihi naYehova kubadika chitwatoñojokeleña.—Yak. 1:2-4; 4:8.

10. Chumanyi chaleñelaña mpinji yimwekaneña neyi yinakwenda swayi?

¹⁰ Mpinji yinateli kumwekana neyi yinakwenda swayi hela yinakwenda chovu. Neyi tusweja kukasika nanyidimu nawa hitunakutala hankolokuku, mpinji yatemukaña. Chochimu, neyi tukudikitaña chikupu mudimu wawuwahi watwinkayi Yehova, idi ifuku nimpinji yakenza chakadi kwiluka. Awayishewa amavulu emika chakutalilahu chachiwahi kutalisha hakuhemba ifuku nimpinji. Tuhitulukenu mukwihihisha muyuma yamwekeni hanyima yakwila Yesu anamuswanyiki dehi kwikala Mwanta mu 1914 kulonda twiluki antu amakwawu chamwekeshiluwu kutona nikubula kutona.

AWAYISHEWA EKALA ATONA

11. Hanyima ya 1914, muloñadi awayishewa amakwawu chatoñojokeluwu nawu Mwanta nalabi?

¹¹ Anukenu chishimu chaYesu chawambanda ajiki nintalenta. Neyi ambanda ajiki hela añamba muniyi yishimu elukili mpinji yafuntileña nsumbuli hela mwanta wawu, hiyadi kwikala atonaku. Ilaña hiyelukiluku, dichi ateleleli kwikala asoñama. Hela chakwila awayishewa adiña nakutalila chaaka cha 1914 hadi yaaka yayivulu, hiyelukili chikupu yuma yadi kumwekanaku. Chelili yuma yakuhweleleluwu yibuli kumwekana, chamwekeni neyi Nsumbuli walabili. Mana kwetu wumu wahosheli nindi, “Etu antesha twatoñojokeleña chikupu netu tukaya mwiwulu mumulungu wakutachika muOctober [1914].”

12. Indi awayishewa amwekesheli ñahi nawu ashinshika nawa akweti maana?

¹² Toñojokenu chaneñeluwu chineli akuhweleleli nawu kukuma keña kwinzi ilaña hikwenjiluku! Kubombelahu, amana kwetu ayiyandishili hampinji yavulumukili Njita Yatachi Yamukaayi. Kwashalili hantesha mudimu wakushimwina kachi wajiyili chikupu. Ilaña mu 1919, ayihindwishili mutulu! Yesu wenjili mutembeli yaNzambi yakuspiritu, nawa yashikili mpinji yakuhempula antu ejima aditeneneña nawu hiyakwaKristu. Hela chochu, amakwawu akañenyi kuhita chayihempwiluwu nawa ajimbesheli kukooleka kwawu kwakutwalekahu kukalakala “mudimu” waMwanta wawu. (Mat. 25:16) Chidi neyi hiyashileñaku kashinshi kakwinzesha manji awu akuspirituku, kufwana ambanda ajiki asupa. Cheñi kufwana nduñu wakatala, hiyakeñeleña kudihana kulonda akalakali mudimu waWantaku. Hela chochu, awayishewa amavulu amwekesheli kashinshi kakeni nikufwila chikupu kukalakela Mwanta wawu nimuyaaka yakala hikwadiña njita.

13. Indi izanvu danduñu datoñojokeleña ñahi hanyima ya 1914 nawa makonu dinakutoñojokadi?

¹³ Hanyima ya 1914, Kaposhi Kakutalila kabidikili nawu: “Amana kwetu, etu wejima wetu tukweti yitoñojoka yayiwahi hadi Nzambi hitunaneñi nantanjikilu Yinduku. Hitwakeñeleña netu nkeñelu yetu ayilukuku; dichi chitwelukili netu  twadiña nakutalila chuma chabula kutelela muOctober, 1914, twazañaleli muloña Mwanta hahimpili Ntanjikilu Yindi kulonda mutwakeñeleña etu muzatikuku. Hitwakeñeli netu Yakoñi mwenimuku. Twakeñeleña hohu kwiluka kufuukula Kwindi ninkeñelu yindi.” Iyi yililu yakudikehesha nikumwakama diyamwekeshaña chikupu awayishewa ambala aMwanta. Hiyaditenaña nawu ayonenaku, ilaña afwilaña kuzata “mudimu” waMwanta hanu hamaseki. Ichi “izaza deneni” ‘dawanyikoku acheñi,’ akwaKristu akweti kuchiñeja kwakushakama hamaseki, anakwimbujola awayishewa atona nawa adikita.—Chim. 7:9; Yow. 10:16.

TWATELA KWIKALA ATONA

14. Indi kukolela chikupu kunjila yinakuzatishayi Nzambi hakuhana yakudya yakuspiritu kunateli kutukiña ñahi?

¹⁴ Neyi chochatonawu akwaKristu awayishewa, amwizaza deneni niwena ekala atona nawa anakukolela chikupu kunjila yatondayi Nzambi yinakuzatishayi hakuhana yakudya yakuspiritu. Hamuloña wakukolela kunjila jindi, chidi neyi anakwinzesha yipunda yawu yamanji akuspiritu akufuma Mwizu daNzambi nispiritu. (Tañenu Masamu 119:130; Yowanu 16:13.) Chumichi chayikoleshaña, nawa amwekeshaña kutona kulonda atalileña chakafuntayi Kristu nikwikala akola mumpinji yakweseka. Chakutalilahu, muchilombu chimu chawaNazi, hatachi amana kwetu adiña hohu naBayibolu yimu. Dichi alombeli kulonda atambwili yakudya yikwawu yakuspiritu. Chimwahitili kapinji kantesha elukili nawu mana kwetu wenjili akasiluwu mukaleya wawombolweli magazini yaKaposhi Kakutalila nakuyisha mumwendu windi wawufwayi wamutondu. Hakachi kawantu apulukili hadiña mana kwetu wawayishewa wejina daErnst Wauer, wahosheli nindi: “Yehova watukwashili chikupu kwanuka nsañu yakukolesha yadiña muyibaaba yeniyi.” Kuhiñahu wahosheli nindi: “Munanu mafuku, chaswayi kutambwila yakudya yakuspiritu, komana twahamekaña mpinji yejima? Neluki chikupu nami Yehova nahembeli antu amukuhwelela nkisu yayivulu, ikalenu ashinshika, nawa mudyeña kumesa yindi.”

15, 16. Indi adisumbula adikitili chikupu mumudimu wawakwaKristu ayikiswilili ñahi, nawa chumanyi chimukudizilaku?

¹⁵ Anyikoku acheñi niwena anakudikita chikupu mumudimu waMwanta, nakukwasha chikupu amana kwaKristu. (Mat. 25:40) Kwambukaku nanduñu watama wakatala wamuchishimu chaYesu, wena adihanaña nakuzata chikupu hakutwamijaku yuma yaWanta. Chakutalilahu, Jon niMasako hayitambikiluwu  nawu ayi nakuzata mudimu wakushimwina mwiluña dahoshañawu idimi dachiChinese muKenya, hakusambila ajinookeli. Ilaña hanyima yakulomba nakushinshika hachihandilu chawu, afuukwiluhu kuya nakuzatila kudina iluña.

¹⁶ Ayikiswilili nankashi hamuloña wakuzata nañovu. Ahosheli nawu “Mudimu wakushimwina kudina iluña wawuwahi chikupu.” Atachikili kudiza Bayibolu nawantu atanu nayedi. Kuhiñahu kudi yuma yayivulu yakuzañalesha yamwekeni. Akunkulwili nawu, “Twamusakililaña Yehova ifuku niifuku hakutwiteja kwinza nakuzatila kudinu iluña.” Amana kwetu niahela amavulu anakumwekesha nawu anakukeña kutwalekahu nakudikita mumudimu wakumukalakela Nzambi kushika nimpinji yikenza kukumisha, hichidi namuloña nampinji yikenza kukumaku. Toñojokenu hadi antu amavulu anahiti muShikola yaGileyadi nawa anakuzata mudimu wawumishonali. Komana kwila mutala haniwu mudimu wadimena kuhitila mukutaña chibaaba chinakwila nawu, “Twazataña Kushika Hakumina Ñovu Jetu!” chasonekeluwu muKaposhi Kakutalila kaOctober 15, 2001 nehi? Chimukuhitulukaña muniyi nsañu yakuzañalesha yinakuhosha hefuku datachikiluwu mudimu wawumishonali, toñojokenu hanjila yimukuzatisha kulonda musweji kutwala mudimu waNzambi hambidi, nawa wunateli kuyiletela muzañalu.

ANENU NAWA IKALENU ATONA

17. Twahetelañamu ñahi hamuloña wakubula kwiluka ifuku hela mpinji yakenza kukuma?

¹⁷ Eñañi, kubula kwiluka ifuku dadeni hela mpinji yakenza kukuma kwakanu kaayi kwatuheteshaña nankashi. Chatela tuneñeña hela kutiya kutama, twakundamaña nankashi kwakwihi naYehova, Tata yetu wakukeña hampinji yitunakufwila kwila mwaya muchima windi. Hamuloña wakusha kashinshi hakukalakala mudimu watwinkawu nikutondolwela yuma yatukañeshaña, tudi amuzañalu hakumukalakela Mwanta wetu.—Luka 9:62.

18. Muloñadi chitunakukeñela kutwalekahu kwikala nachikuhwelelu chakola?

¹⁸ Ifuku daNzambi dakusompesha keña dishiki. Wejima wetu hitunakukeña kumuneñesha Yehova hela Yesuku. Munanu mafuku akukuminina anatwinki mudimu walema chikupu. Twasakililaña nankashi hakutukuhwelela!—Tañenu 1 Timotewu 1:12.

19. Tunateli kumwekesha ñahi netu tunadiloñeshi?

¹⁹ Chili twachiñejaña kudiluñisha wumi wamwiwulu hela wamuParadisa heseki, tufwilenu kutwalekahu kwikala ashinshika kumudimu watwinkawu kudi Nzambi wakushimwina nikwilisha atumbanji. Hitweluka ifuku hela mpinji yakenza ifuku daYehovaku, komana mwalala tunakukeña kwiluka? Twatela kwikala adiloñesha nikutwalekahu nakutalila idi ifuku. (Mat. 24:36, 44) Tunakuhweleli netu neyi tutwalekahu nakumukuhwelela Yehova nikusambila kutwamijaku Wanta windi, hiyakatutiyisha nsonyuku.—Rom. 10:11.

[Tumazu twaheshina]

[Malwihu aKuzatisha haKudiza]

[Mwevulu wudi hefu 26]

Nimumpinji yakala, keñakeñenu yakudya yakuspiritu

[Mwevulu wudi hefu 27]

Neyi tusha muchima hakuzata nyidimu yawakwaKristu mpinji yendaña swayi