Kuwunda Hadi Ikombakaji Danyaka Nihaya Nyaka!

“Kulonda Nzambi akekali diyi hohu kanka windi chikupu, mwejima.”—1 KOR. 15:28.

MUNATELI KULUMBULULA?

Indi kushikijewa kwaniji nsona kukuyileñela mwilidi?

Mika 4:4

Isaya 11:6-9

Yowanu 5:28, 29

1. Yumanyi yayiwahi yatalilaña “izaza deneni”?

 TOÑOJOKENU hayuma yayiwahi yejima yakakoñelawu antu kudi nfulumendi yañovu yikayuulewa namwanta waloña wukweti luwi hadi yaaka ikombakaji! Iyi yuma yayiwahi diyakadiluñisha “izaza deneni” dakadi kutwesha kuchinda, dakapuluka “kuyihuñu oyu yeneni,” yikajilumuna chikupu dinu ituña datama.—Chim. 7:9, 14.

2. Yumanyi yinamonuwu antu hadi yaaka 6,000 yinahituhu?

² Hadi yaaka 6,000 yinahituhu, antu aneseki kudiyuulu aweni. Ilaña chiyuulu chawantu chinaleti kukala kweneni nimakabi. Bayibolu yashimwineñahu dehi nawu: ‘Muntu wayuulaña mukwawu muntu kulonda yamukatishi.’ (Mukwa. 8:9) Yumanyi yitunakumona makonu? Kubombela hanjita nikuzuñañesha jinfulumendi, mukaayi mudi kukala kweneni kwawuzweñi, nyisoñu, kukisika kwayileñaleña, kuhimpika kwayilaaka niyuma yikwawu. Akulumpi janfulumendi anakusoñamisha nawu neyi tukubula kuhimpa yililu yetu yakukisañana iseki, mukafuma yuma yomisha mbaña.

3. Indi Chiyuulu Chayaaka Ikombakaji chakaleta yumanyi?

³ Muchiyuulu chaMwanta wawuMesiya, Yesu Kristu ni 144,000 akayuulayi nawu, Wanta waNzambi wukakoña yuma yayiwahi nakufumishahu yuma yejima yinakisañani antu kushilahu niIseki. Muchiyuulu Chayaaka Ikombakaji chakashikija yikaninu yayiwahi yakanayi Yehova Nzambi nindi: “Hinukuleña mawulu amaha, nimaseki amaha, yuma yakusambila hiyakayanuka nawaku, hiyakenza nikumuchimaku.” (Isa. 65:17) Yumanyi yayiwahi, yichidi kanda yimwekani yitunakutalila? Tutalenu wuprofwetu wamuBayibolu chiwunateli kutukwasha kwiluka yuma yayiwahi yikamwekana niyichidi ‘kanda yimwekani.’—2 Kor. 4:18.

 ‘AKATUÑA MATALA NIKUDIMA MATEMPA ANYIVINYU’

4. Matala amuchidinyi munakushakamawu antu amavulu makonu?

⁴ Hinyi wabulaña kukeña kwikala netala dindi, mwatela kushakamayi nachisaka chindi chachiwahi chakadi ipumba? Makonu antu ejima hiyakweti matalaku. Antu anenzali munyisumba. Antu amavulu anakudichima mutumatala twamajilu twamujimbaka nimunyisumba. Akuminaña dakulota hohu kwikala netala dawu.

5, 6. (a) Indi mukanda waIsaya 65:21 niMika 4:4 wakashikijewa ñahi? (b) Twakatambwila ñahi iyi nkisu?

⁵ Muchiyuulu chaWanta, muntu wejima wakekala netala dindi, muloña kuhitila mudi Isaya aprofweteli nawu: “Akatuña matala, akashakamamu. Akadima matempa anyivinyu, akadya nyikabu yayu.” (Isa. 65:21) Ilaña, kwikala netala dawu bayi neyi dichuma chatalilañawu hohuku. Makonu, antu amakwawu akweti matalawu, antesha ashakamaña mumatala amawahi nawa amaneni chikupu. Ilaña akamenaña nawu anateli kujimbesha matala awu hamuloña wakubula mali, hela amakombi anateli kubalula matala nakuyiyila. Ilaña muchiyuulu chaWanta yuma yakahimpika! Kaprofwetu Mika wasonekeli nindi: “Akashakama iwu mwishina damuvinyu windi, iwu mwishina dachikuyu chindi; kwosi wakayitiyisha womaku.”—Mika 4:4.

⁶ Chineli tunakutalila yumiyi, twatela kwiladi? Wonsu wetu twafwilaña kwikala namatala amawahi. Chatela tufwileña kwikala netala detu, chakwila tudiñija nimunyikudi yakukeña kutuña itala, komana hichikuwahaku neyi tukusha muchima hachikaninu chaYehova? Anukenu mazu ahosheliyi Yesu kutalisha hadi yomweni nindi: “Anyumbu akweti menawu, niatujila ahaluzwizu akweti yisakala yawu; hakwila Mwana kamuntu hakweti hakusachila mutu winduku.” (Luka 9:58) Yesu wadiña nañovu yakutuña hela kulanda itala dadiwahi chikupu kubadika matala awantu ejima. Muloñadi chabuliliyi kwikala netala dindi? Yesu hakeñeleña kuhuwankana nayuma yadi kumukañesha kusambila kukeña Wantaku. Komana kwila tumwimbujola nikwikala nadisu datala mumu, nakubula kuhuwankana nayuma yakumujimba nikwakama nehi?—Mat. 6:33, 34.

‘KAÑWIDI NIMWANA KAMUKOKU AKADIILA HAMU’

7. Chumanyi chafuukwiliyi Yehova hakachi kawantu nawanyama?

⁷ Yehova chatachikiliyi kuleña yuma hamaseki, antu diwu adiña akukumisha kuleña. Yehova wamulejeli Mukalawenu windi, Mwanindi wawedi nkeñelu yindi nindi: “Twilenu muntu wudi neyi chitwekaletu, adifwani nanetu; akekali mwanta niwawanshi amukaluñalwiji, niwawatujila ahaluzwizu, niwawanyama, niweseki dejima, niwayuma yazalalaña yikuzalala hamaseki yejima.” (Kutach. 1:26) Dichi, Adama naEvu, kushilahu niantu ejima, ayinkeli ñovu yakwikala anyanta hadi anyama ejima.

8. Yililwinyi yitwamonaña makonu mudi anyama?

⁸ Komana anyama ejima anateli kuyovwahila antu nikushakama nawu mukuwunda? Antu amavulu adikundaña chikupu nayimuna yawu, chidi neyi atuwa nitumesha. Indi anyama amwisaña? Chileji chimu chashimuna nawu: “Asayantisiti akundama kwakwihi nawanyama nawa adiza chahandañawu eluka nawu anyama ejima azuwaña nikudikeña.” Eña, twamonaña chatiyaña anyama woma hela kuzuwa neyi anayivuloki, komana anateli kumwekesha kukeña  neyi chahoshañawu antu amakwawu? Chileji chatwalekeluhu nawu: “Atunyama amwekeshaña nankashi yililu yikwetuwu yakukeña neyi anakuhemba anyanawu.”

9. Yumanyi yikahimpika kutalisha hadi anyama?

⁹ Dichi bayi tuhayamaku neyi tutaña muBayibolu netu hakekala kuwunda hakachi kawantu nianyama. (Tañenu Isaya 11:6-9; 65:25.) Muloñadi? Anukenu nenu chedikiliyi Nowa nichisaka chindi muwatu hanyima yaDibaji, Yehova wayilejeli nindi: “Akayakama nakuyitiya woma kudi anyama ejima ahamaseki.” Anyama achinaña kuyijaha kudi antu. (Kutach. 9:2, 3) Komana Yehova kwila yafumishahu woma wudi mudi anyama kulonda akashakameña hamu nawantu neyi chahosheliyi hatachuku? (Hos. 2:18) Iyi yikekala mpinji yayiwahi chikupu yikadiluñishawu antu ejima akapuluka nakushakama hamaseki!

‘WAKAKOMBOLA MADILU EJIMA’

10. Muloñadi antu chawulumwinañawu madilu?

¹⁰ Solomoni chamweniyi “makabisha ejima akoñeluwu mwishina detañwa,” wahosheli nindi: “Hinukumona madilu awantu akabishewa, hiyakweti niwakuyikundejaku.” (Mukwa. 4:1) Diyuma yitunakumona makonu nawa yinaswejeluku. Hinyi wabulahu dehi kuwulumuna madilu? Mpinji yikwawu, twadilaña madilu amuzañalu. Ilaña, kakavulu twadilaña hamuloña wachineñi chidi kumuchima.

11. Nsañwinyi yamuBayibolu yayitiyishaña wushona?

¹¹ Anukenu nsañu yawushona yawantu amavulu yitwatañaña muBayibolu. Chafwiliyi Sara nayaaka 127, “Abarahama wayiluku nakuyebañila, nakumudila Sara.” (Kutach. 23:1, 2) Chelili Nyawomi yashiiki akuwindi antuluwa ayedi, ‘adilili chacheni makumbu aweni akudila’ nawa ‘adilili chacheni makumbu aweni akudila chikupu.’ (Luti 1:9, 14) Hampinji yakatiliyi Mwanta Hezekiya yikatu yakufwa, walombeli kudi Nzambi nawa ‘wadilili nankashi,’ dichi Yehova watiyili kudila kwindi nawa wamuukili. (2 Anya. 20:1-5) Wejima wetu twaneñaña neyi tutaña nsañu yakapostolu Petulu chamukaaniniyi Yesu, netuku? Chatiyili ikombu hakwidikila, Petulu ‘wedikili nakudila nankashi.’—Mat. 26:75.

12. Indi chiyuulu chaWanta chakamwina ñahi antu kumakabi?

¹² Hamuloña wayuma yatama yatumwekenaña chili yamaneni chili yanyanya, antu anakukeña chikupu muntu wakuyikundeja nikuyamwina. Iyi diyuma yikamonawu antu Muchiyuulu Chayaaka Ikombakaji: “[Nzambi] wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku.” (Chim. 21:4) Chineli hikwakekala kudila hela kuneña nikukataku, Nzambi wakana cheñi nindi wakafumishahu chilumbu muneni wajahaña antu, kufwa. Indi yuma yejimiyi akayifumishahu ñahi?

‘ANTU EJIMA ADI MUMAJAMU ACHANUKISHU AKEDIKAMU’

13. Indi kufwa kunayandishi ñahi antu kufuma havulumwiniyi Adama?

¹³ Kufuma hampinji yavulumwiniyi Adama, kufwa kunakuyuula antu neyi mwanta. Hichilumbu wabulaña kushindawu, kwosi muntu wunatweshi kutemuka kufwaku nawa dikwaletaña chineñi nichikela nankashi. (Rom. 5:12, 14) Hamuloña ‘wakuchina kufwa,’ antu amavulu ‘adi muwuduñu nyaka yawu yejima.’—Heb. 2:15.

14. Chumanyi chikamwekana neyi anafumishuhu dehi kufwa?

¹⁴ Bayibolu yashimuna mpinji yamba  ‘kanoñeshawu chilumbu chakukuminina, yowu kufwa.’ (1 Kor. 15:26) Kudi mazanvu ayedi amba kahetelamu. ‘Izaza deneni’ dawantu aduku makonu, dakapuluka nakwiñila mwituña dadiha dachikaninu nakwikala nawumi wahaya nyaka. Ilaña yihita yawantu afwa dehi, niwena atela akayisañula. Toñojokenu hamuzañalu nikuwaha kwakatiyawu antu ejima amwizaza deneni hampinji yakatambwilawu antu akasañuka! Neyi tukutañaña nsañu yamuBayibolu yawantu asañwiluwu, chikutukwashaku kwiluka chitwakatiya hampinji yakasañulawu antu kumbidi.—Tañenu Maku 5:38-42; Luka 7:11-17.

15. Mwakatiya ñahi hakumona ntaña yenu anamusañuli?

¹⁵ Toñojokenu hamazu akwila nawu “hohenohu ahayama nikuhayama kwasweja” nawa “hiyakumuhameka Nzambi.” Neyi mwadiñaku haniyi mpinji, hadaha ninenu mwadi kuzañalala. Eñañi, twakazañalala chikupu hakumona antaña jetu itwakeña anasañuki. Yesu nindi: ‘Mpinji yinakwinza yakela antu ejima adi mumajamu achanukishu akatiya izu dindi, akedikamu.’ (Yow. 5:28, 29) Wonsu wetu kanda tumoneñahu hasañukilawu antu, chumichi chikekala hakachi ‘kayuma yabadika yabulahu dehi kumwekana.’

NZAMBI WAKEKALA ‘YUMA YEJIMA KUDI ANTU EJIMA’

16. (a) Muloñadi chitwatela kuhoshela neyena hankisu yichidi kanda yimwekani? (b) Mazwinyi ahosheliyi Pawulu hakukolesha akwaKristu muKorinda?

¹⁶ Eñañi, antu ashinshika kudi aYehova munanu mafuku akala akatambwila nkisu jajivulu! Hela chakwila nkisu yabadika kanda tuyimoni, twatela kutoñojoka hayumiyi kulonda chitukwasheñaku kusha muchima hayuma yalema nankashi nikutondolwela yuma yaletaña ikoku yamukanu kaayi kamakonu yinateli kutuhuñumuna. (Luka 21:34;  1 Tim. 6:17-19) Hampinji yakudiza nikudifukula kwachisaka, hakuhanjeka nawakwetu akakwitiya nihakuhanjeka nawantu itwadizishaña Bayibolu niantu akweti nyichima yayiwahi, twatela kuhosha neyena hakuchiñeja kwetu kwakuwahi nihankisu yakumbidi. Chumichi chikutukwasha kwikala nachikuhwelelu nikuchiñeja. Kapostolu Pawulu niyena wahosheleña neyena hakukolesha akwawu akwaKristu. Mazu ahosheliyi ayikwashili kutoñojoka hayuma yikamwekana hakukuma kwaChiyuulu chaKristu chaYaaka Ikombakaji. Esekenu kufwikija mwatalisha mazu aPawulu asonekawu ha 1 Akorinda 15:24, 25, 28.—Tañenu.

17, 18. (a) Munjilanyi Yehova mwekalililiyi ‘yuma yejima kudi antu ejima’ hakutachika? (b) Chumanyi chakelayi Yesu kulonda yakaleti cheñi kunuñañana nikuwunda?

¹⁷ Kwosi njila yikwawu yitwatela kulumbulwilamu chikekala chihandilu chawantu hakukuma kwayaaka ikombakaji yakubadika mazu akwila nawu ‘Nzambi wakekala yuma yejima kudi antu ejima.’ Indi awa mazu atalisha mudihi? Toñojokenu mpinji yakunyima muEdeni henohu antu awanini, Adama naEvu, achidi muchisaka chaYehova chawunda. Yehova, Mwanta Wakuleña Kwejima, diyi wayuulileña yileñaleña yindi yejima, añelu niantu. Ahosheleña nindi, adifukwileña kudi yena nawa Yehova wayikiswilileña. Yehova wadiña ‘yuma yejima kudi antu ejima.’

¹⁸ Awuna wubwambu wawuwahi awuluwañesheli hampinji yelili Satana yadimbi antu adikañi nachiyuulu chaYehova. Dichi kufuma tuhu mu 1914, Wanta wawuMesiya wemika njila jakufuntishilamu kunuñañana nikuwunda. (Efwes. 1:9, 10) Muchiyuulu Chayaaka Ikombakaji, yuma yayiwahi ‘yichidi kanda yimwekani’ yikamwekana. Kuhiñahu ‘dihakenza kukumisha,’ dikwila nawu, kukumisha kwaChiyuulu chaKristu Chayaaka Ikombakaji. Chumanyi chikalondelahu? Hela chakwila amwinka “ñovu jamwiwulu nijahamaseki jejima,” Yesu hadivwimbañaku. Hafwilaña kuhukula chifulu chaYehovaku. Mukudizoza ‘wakahana wanta kudi Nzambi, Tata yindi.’ Wakazatisha chifulu chindi chalema niñovu yamwinkawu “kulonda kulemesha Nzambi.”—Mat. 28:18; Fwi. 2:9-11.

19, 20. (a) Indi antu ejima akayuulewa naWanta atela kumwekesha ñahi nawu eteja chiyuulu chaYehova? (b) Yumanyi yayiwahi yitunakutalila?

¹⁹ Haniyi mpinji, antu akayuulewaña naWanta hamaseki akekala awanina. Akembujola chakutalilahu chaYesu mukudizoza nawa aketeja chiyuulu chaYehova namuchima wumu. Akekala nakukooleka kwakumwekesha kukeña kwawu kwakwila mwenimu kuhitila mukupuluka kweseka kwakukumishaku. (Chim. 20:7-10) Kuhiñahu, akwakudikaña ejima, antu niañelu, akayijilumuna haya nyaka. Yakekala mpinji yamuzañalu nawa yakuluña chikupu! Yileñaleña yejima yakamuhameka Yehova namuzañalu muloña wakekala ‘yuma yejima kudi antu ejima.’—Tañenu Masamu 99:1-3.

²⁰ Komana yuma yayiwahi yikukeña kuleta Wanta yikuyisañumuna kulonda mushi muchima niñovu hakwila nkeñelu yaNzambi? Komana kwila mutondolwela yuma yinateli kuyihuñumuna nikuchiñeja kwakutwamba nimaheta anakuleta ituña daSatana nehi? Komana munadikasi chikupu mumuchima wenu nenu mukuhakwilañaku chiyuulu chaYehova? Yililu yenu yimwekesheña nawu munakukeña kwila mwenimu haya nyaka. Chimwela mwenimu mwakekala nakukooleka kwakushakama mukuwunda nawa mwakadiluñisha hadi ikombakaji dayaaka nihaya nyaka!

[Malwihu aKuzatisha haKudiza]

[Nyevulu yidi hefu 11]

Chakamanishayi mudimu windi hamu neyi Mwanta, Yesu mukudizoza wakahana Wanta kudi Tata yindi