Adihanini Namuchima Wumu muBrazil

YAAKA yinahituhu, Rúbia (1), muhela wudi nayaaka 30, wayili nakuhempula Sandra (2), payiniya wazatilileña muchipompelu chanyanya kukabeta kambwela kuBrazil. Hampinji yadiñayi kuna, kudi chuma chamwekeni chamutiyishili Rúbia kuwaha nankashi chamuleñeleli yahimpi chihandilu chindi. Chumanyi? Tutiyenu chikushimunayi Rúbia yomweni.

“NAHAYAMINI NANKASHI”

“Nayili chimu naSandra nakutala mumbanda wumu wadizishileñayi Bayibolu. Hakudiza, iwu mumbanda wahosheli nindi: ‘Sandra, atwansi asatu awambanda kumudimu anakukeña kudiza Bayibolu, ilaña nayileja nami ahembeleli mpinji yawu yakuyidizisha yikashika. Neluki nami wukweti atudizi amavulu chinu chaaka.’ Nahayamini nankashi. Antu adiña  nampwila yakukeña kumwiluka Yehova ayilejeli nawu ahembeleleña! Muchipompelu chetu chankalilileña kuwana muntu hela wumu wakudizisha. Hayoyeniyi mpinji yitwadiña mwitala daniwu kadizi waBayibolu, nafuukwiluhu chikupu kukwasha antu muniyi mbaka yanyanya mwashakamineñayi. Nafumini kumusumba weneni kunashakamineña nakuya kumbaka kwazatilileñayi Sandra wupayiniya.”

Chumanyi chafumini mukubuuka kwaRúbia? Wahosheli nindi: “Mutukweji tuyedi hohu kufuma hinabuukilili kunidi iluña, natachikili kudizisha atudizi aBayibolu 15 nawa hashimbwili wanyi antu akeñeleña kudiza avulili chakwila atachikili kuhembelela neyi chichadiña kudi Sandra!”

NATACHIKILI KUTOÑOJOKA CHEÑI HAMUDIMU WAKUSHIMWINA

Diego (3), mana kwetu wudi nayaaka yatachi yamuma 20, wayili nakutala apayiniya adisumbula azatilaña mumbaka yanyanya yaPrudentópolis, yekala kukabeta kambwela muBrazil. Ilu lwendu lwamuzañalesheli nankashi nawa watachikili kutoñojoka cheñi hamudimu windi wakushimwina. Walumbulwili nindi: “Hinadiña nakuzata chiwahi muchipompelu chetuku, nazatileña maora antesha hakakweji mumudimu wakushimwina. Ilaña chinayili nakutala awa apayiniya nikutiya chahosheleñawu hankisu yatambwilileñawu, natachikili kwesekeja chihandilu chawu chachiwahi nakadiwu kinamwekesheleña kutalisha kumudimu wakushimwina. Chinamweni muzañalu wadiñawu nawu, natoñojokeli nami anami nawa nateli kwikala namuzañalu neyi wena.” Chafuntiliyi, Diego watachikili wupayiniya.

Kufwana mana kwetu Diego, komana ninenu mudi Chinsahu wakansi wayaña nakushimwina nikuya kukupompa kwawakwaKristu ilaña hampinji yoyimu mwatoñojokaña nenu kushimwina hichisenda, chayitiyishaña wuudi? Neyi dimu, komana kwila muhimpaku muchihandilu chenu kulonda mwikali namuzañalu wafumaña mukuzatila kudi kukaankila kwawakwakushimwina aWanta nehi? Eña, chinateli kuyikalila kushiya yuma yayiwahi muchihandilu chenu. Hela chochu, atwansi amavulu dimunakwilawu. Afuukulahu kuhimpa yikonkwanyi yawu kulonda amuzatili Yehova nankashi. Tutalenu chakutalilahu chikwawu, chaBruno.

 NATELA KWIKALA ÑIMBI WAKULUKA YITEMBI TAHINDI NKOÑI?

Yaaka yinahituhu, Bruno (4), ichi wudi nayaaka 28, wadizilileña hashikola yeneni hadizishañawu tumina nawa wakeñeleña kwikala ntañishi wakudizisha tumina. Dichi, welukili chikupu mudimu wadizileñayi chakwila amutambikileña nakudizisha tumina. Wamwekeneña neyi wakekala ñimbi wakuluka yitembi. Bruno wahosheli nindi: “Ilaña natachikili kumona neyi kudi chuma chimu chinabulili. Nadihanini amaweni kudi Yehova, ilaña nelukili nami hinamuzatilileña namuchima wejimaku nawa chumichi channeñesheleña nankashi. Nalombeli kudi Yehova nakumuleja chinatiyileña nawa nahosheli nawamana kwetu amuchipompelu akuluka yitembi. Hanyima yakutoñojokahu chikupu, natwamijiluku mudimu wakushimwina, nalekeli shikola yakudiza kwimba nawa nayili nakuzatila kwiluña kwadiña kukaankila kweneni kwawakwakushimwina aWanta.” Chumanyi chafuminumu?

Bruno wabuukilili kumbaka yaGuapiara (mudi antu akushika ku 7,000), hadi makilomita 260 kufuma kumusumba waSão Paulo. Yuma yahimpikili chikupu. Wahosheli nindi: “Nabuukilili mukaditala kanyanya mwakubula fuliji, TV, niIntaneti. Ilaña, hanidi itala natachikili kwikala nayuma yinabulili, chidi neyi itempa dawakaka niitempa danyikabu!” Hampinji yazatilileñayi kunichi chipompelu chanyanya, ifuku dimu mumulungu Bruno wasendeleña yakudya mwipakumuna dindi, menji ninyikanda nakuya nakatukutuku kindi nakushimwina munyikala. Antu amavulu munidi iluña adiña kanda atiyeñahu dehi nsañu yayiwahi. Wahosheli nindi, “Nadizishileña atudizi aBayibolu 18. Nazañaleleña nankashi hakumona atudizi chahimpileñawu chihandilu chawu!” Wabombeleluhu nindi: “Nelukili nami nawani chuma chinabulili muchihandilu chami dikwila nawu muzañalu wafumaña mukusambila kukeña Wanta. Neyi nasambilili kukeña yuma yakumujimba chiña hinidi namuzañaluku.” Indi Bruno wawanineña kudihi mali akudikwasha nachu hadiñayi muGuapiara? Wamwemweteli nakuhosha nindi: “Kuhitila mukudizisha antu chisanji chaguitar.” Wachidiña ñimbi.

“NAFUUKWILUHU KUSHAKAMA”

Mariana (5), wudi muyaaka yindi yakukumisha yamuma 20, wadiña nachihandilu neyi chaBruno. Wadiña ihaku, hela chakwila wakulukili yitembi muniwu mudimu hadiña namuzañaluku. Wahosheli nindi: “Natiyileña neyi kwiji ‘inakukabila tuhu mpepela.’” (Mukwa. 1:17) Amana  kwetu niahela amavulu amukwashili nawu yatoñojoki hamudimu wawupayiniya. Hanyima yakutoñojokahu chikupu, Mariana niamabwambu jindi aBianca (6), Caroline (7), niJuliana (8), afuukwiluhu kuya nakukwasha chipompelu chamuBarra do Bugres, mbaka mwabula antu amavulu yidi kwakwihi naBolivia hadi makilomita amavulu kufuma kwawu. Chumanyi chahiñiluhu?

Mariana nindi: “Nakeñeleña kushakamaku hohu tukweji tusatu. Chamanini tukweji tusatu, nalombweleña atudizi aBayibolu 15! Hela chochu, awa atudizi akeñeleña wukwashu nankashi kulonda eluki chalala chikupu. Dichi, natiyili chikaka chakuyileja nami inakuya. Nafuukwiluhu kushakama.” Ahela awana niwena ayili wanyi. Komana mudimu wakeñeliyi Mariana mwafumini yuma yasweja kuwaha? Wahosheli nindi: “Nazañalalaña hakumona chanzatishañayi Yehova kulonda nikwashi antu ahimpi yihandilu yawu. Hikukooleka chikupu hakwiluka nami chayinu mpinji inakuzatisha mpinji niñovu yami hakudikita mudimu walema nankashi.” Caroline walumbulwili muzañalu wunakutiya ahela ejima awana nindi: “Neyi nakaami nawufuku, nazañalalaña nankashi muloña nadihani chikupu kusambila kukeña Wanta. Wumi wami washindamena hakukwasha atudizi ami aBayibolu. Nazañalalaña hakumona chinakupamawu. Neteji mazu akwila nawu: ‘Mutompenu mutiyi chawahayi Yehova.’”—Mas. 34:8.

Yehova wazañalalaña nankashi hakumona amana kwetu niahela atwansi mwahita kaayi kejima ‘anakudihana namuchima wumu’ kushimwina nsañu yayiwahi yaWanta windi mumaluña mudi antu antesha! (Mas. 110:3; Yish. 27:11) Eñañi, ankoñi ejima adihanaña, atambwilaña nkisu yaYehova.—Yish. 10:22.

[Chikasha/Mwevulu wudi hefu 5]

“Kwosi Yuma Yitwakaankilañaku”

Chelili mana kwetu João Paulo niñodindi Noemi, afuukuluhu kuya nakuzatila kwadiña kukaankila kweneni nankashi, antu amakwawu atachikili kuyiseha. Amakwawu muchipompelu ayihosheleña nawu: “Wakakabakana neyi wubuukila kumbaka yanyanya.” “Munakubuukiladi? Muchipompelu chetu mudi kukaankila kweneni.” João Paulo nindi: “Chatukalilili nankashi muloña mazu ahosheleñawu atiyakeneña neyi alala ilaña adiña akuzeyesha.” Hela chochu, hayinu mpinji, mana kwetu João Paulo niñodindi Noemi anakuzatila kwiluña kudi kukaankila kweneni kwawakwakushimwina nawa adi namuzañalu hakutwalekahu kukolela kuchuma chafuukwiluwu chakutohesha mudimu wawu. Mana kwetu João Paulo nindi: “Kufuma tuhu hitwabuukilili kudinu iluña nañodami kwosi yuma yitwakaankilañaku. Kutalisha hakwikala nayuma yitwafwilaña, tukweti yayivulu kubadika yitwadiña nayu hakusambila.” Noemi wabombeleluhu nindi: “Twafuukwili chachiwahi.”

Kushakama mumbaka yanyanya kwakala nankashi. Ankoñi ayaña nakuzatila kumaluña amunyikala awanaña kudihi mali akudikwasha nachu? Kuhitila mukuzata tunyidimu twashiyashana. Amakwawu atañishaña Engilishi hela idimi dikwawu, kutañisha anyana anyanya, amakwawu achimaña hela kupenta matala hela kuzata nyidimu yikwawu yikuyishilaku mpinji. Indi antu ayaña nakuzatila kudi kukaankila kweneni atambwilañadi? Atambwilaña nkisu jajivulu nankashi kubadika yihuñu yamonañawu!

[Chikasha/Mwevulu wudi hefu 6]

Kukala Kwakwanuka Kwitala

Tiago: “Chinashikili kuchipompelu chachiha, natachikili kwanuka kwitala kunafumini. Mumbaka mwadiña akwakushimwina antesha nawa himwadiña yuma yachisekiku. Natachikili kwanuka kwitala. Nelukili nami kudi chuma chinateleli kwila kulonda nizañalaleña. Natachikili kudiluka chikupu nawamana kwetu niahela muchipompelu nawa chumichi chankwashili nankashi! Nakwatili amabwambu amaha nawa nekalili namuzañalu nikukasunuka chikupu.”

[Mwevulu wudi hefu 3]

Noemi niJoão Paulo, Ascurra, Santa Catarina