Chimwahosha Nenu Eña, Kuminenu Dakwila Nenu Eña

‘Chimwahosha nenu Eña, kuminenu dakwila nenu Eña, Inehi, Inehi.’—MAT. 5:37.

TUTALENU NEYI MUKWAKULA:

Indi Yesu wahosheli nindidi hansañu yakusanyika?

Muloñadi Yesu chekalilayi chakutalilahu chachiwahi welileña mwahosheleñayi?

Munjilanyi mutwatela kukoñela kwesekeja nakufuukula kwetu?

1. Yesu wahosheli nindidi hansañu yakusanyika nawa muloñadi?

 AKWAKRISTU alala hiyatela kusanyikaku. Muloña amwovwahilaña Yesu wahosheli nindi: ‘Chimwahosha nenu Eña, kuminenu dakwila nenu Eña.’ Watalishili mukwila nindi muntu watela kwila munahoshiyi. Yesu wasambilili kuhosha ilu lushimbi namazu akwila nawu: “Bayi wusanyika nihantuku.” Wahosheli awa mazu hakuhisha chaaku chekala nawantu amavulu hakuhanjeka nawakwawu chakusanyika muyuma yejima, niyakabula kwilawu. Chiyashaku “mazu eñi” anabadiki hakwiteja nawu Eña hela Inehi hakuhosha yuma yinakukeñawu, antu amuchidiwu adimwekeshaña nawu hiyasakutwamba nawa anakuyiluwañesha kudi “watama.”—Tañenu Matewu 5:33-37.

2. Shimunenu chitukubulila kuhoshela netu kusanyika kwejima kwatama wanyi.

² Komana mazu ahosheliyi Yesu atalisha mukwila nawu kusanyika kwejima kwatama? Chumichi chinateli kuzatika ñahi? Neyi chitwadizili muchibaaba chinafumuhu, Yehova Nzambi nikambuñindi washinshika Abarahama asanyikili hayuma yalema. Cheñi Nshimbi yaNzambi yetejeli antu kusanyika hakumanisha kukala kwamwekeneña. (Kwid. 22:10, 11; Kuch. 5:21, 22) Dichi mukwaKristu nateli kusanyika hakushimuna wunsahu walala muchota chanyiloña. Mpinji yikwawu, mukwaKristu nateli kusanyika hakuleja antu yuma yinakutoñojokayi hela neyi hadi kukala kunamwekani. Chamwililuwu Yesu nawu yasanyiki kudi kapristu muneni, wakaanini wanyi, ilaña wahosheli mwalala muchota chawaYudeya chaSanihedilini. (Mat. 26:63, 64) Hela chochu, Yesu hateleli kusanyika kudi muntu wudi wejimaku. Ilaña, hakwila antu eluki nawu nakuhosha mwalala, wahosheleña mazu amuchidiwu: “Chalala chalala, nukuyileja nami.” (Yow. 1:51, 13:16, 20, 21, 38) Tusambilenu kutala yuma yitwatela kudizila kudi Yesu  niPawulu niantu amakwawu akoñeli mwahosheluwu.

YESU DIYI CHAKUTALILAHU CHACHIWAHI

3. Yesu wamukanini Nzambi nindidi mukulomba nawa Tata yindi wamwiwulu wamwakwili nindidi?

³ “Tala, ami nenzi dehi nakwila muchima weyi, eyi Nzambi.” (Heb. 10:7) Hakuhosha awa mazu amawahi Yesu wadiheni kudi Nzambi kulonda yeli yuma yejima yashimwinuwu kutalisha haLubutu lwachikaninu, kushilahu ‘nikumuchika kukatutu’ kudi Satana. (Kutach. 3:15) Kwosi muntu wadihanahu dehi kuzata mudimu wamuchidiwu weneni. Yehova wahosheleli mwiwulu nakumwekesha nindi wamukuhwelela nankashi Mwanindi, hela chakwila Yesu hateleleli kusanyika kulonda yamwekeshi nindi wakelamuku.—Luka 3:21, 22.

4. Indi Yesu wamwekesheli ñahi muchima wakwiteja nakukumina dakwila nindi Eña?

⁴ Yesu wakoñeleña yuma yashimwinineñayi kudi antu nakukumina dakwila nindi Eña. Hetejeli chuma chidi chejima kuluwañesha mudimu wamwinkeluwu kudi Tata yindi wakushimwina nsañu yayiwahi yaWanta waNzambi nikwilisha atumbanji akokweliyi Nzambi kudi Yesuku. (Yow. 6:44) Bayibolu yashimuna nawu Yesu wahosheleña mwalala munawa mazu itweluka akwila nawu: “Muloña hela yikaninu yaNzambi yasweja kuvula, mudi Yesu diyi eña.” (2 Kor. 1:20) Eñañi, Yesu hichakutalilahu chachiwahi welileña yuma yejima yamukaniniyi Tata yindi. Tutalenu cheñi muntu mukwawu wamwimbujoleli Yesu chikupu.

PAWULU WAKOÑELEÑA MWAHOSHELEÑAYI

5. Chakutalilahwinyi chatushilayi kapostolu Pawulu?

⁵ “Nukwila ñahi, Mwanta?” (Yil. 22:10) Hakuhosha awa mazu amawahi, Pawulu, ateneneñawu nawu Sawulu, watiyilili mwamulejeliyi Mwanta Yesu walemeshewa, wamwekeni kudi yena muchimwenu nakumuleja nindi yaleka kukabisha atumbanji twaKristu. Hamuloña wachuma chamumwekeneni, Sawulu wabalumukili mumuchima, wapapatisheweli nawa wetejeli mudimu walema wamwinkeluwu wakushimwina hadi Yesu kunyuza yejima. Kufuma tuhu hayina mpinji, Pawulu watwalekeluhu kumutena Yesu nindi “Mwanta,” nikumwovwahila kushika nimpinji yafwiliyi. (Yil. 22:6-16; 2 Kor. 4:5; 2 Tim. 4:8) Pawulu hadiña neyi antu alejeliyi Yesu nindi: “Mwantenenañadi nenu, Mwanta, Mwanta; hakwila yuma yinahoshaña himwayilañaku?” (Luka 6:46) Eñañi, Yesu wakuhwelela ejima amwiteja nawu Mwanta wawu nawa eleña mwafuukulañawu neyi cheliliyi kapostolu Pawulu.

6, 7. (a) Muloñadi Pawulu chahimpililiyi lwendu lwindi lwakuya kuKorinda nawa muloñadi antu awanineña nyiloña mudi yena chahosheleleñawu nawu hisakutwamba? (b) Indi antu atondawu kutulombola twatela kuyimona ñahi?

 ⁶ Pawulu watandishili nsañu yaWanta mwahita Asia Minor nimuEurope nakutachika yipompelu nikuhempula yipompelu yayivulu. Mpinji yikwawu, wadiña nakusanyika nakumwekesha nindi yuma yasonekeliyi yadiña yalala chikupu. (Ŋal. 1:20) Chelili antu amuKorinda amuhishi Pawulu namuloña wakutwamba, wasonekeli nakudihakwila nindi: “Chochashinshikayi Nzambi, mazu etu itwayilejaña hiyakwila aha eña, aha nehuku.” (2 Kor. 1:18) Hampinji yasonekeliyi awa mazu, Pawulu wadiña wafuma dehi kuEfwesesa nawa wahitilili njila yakuMasidoniya hakuya kuKorinda. Hakusambila wadiña wafuukulahu dehi kuhempula akaKorinda henohu kanda yayi kuMasidoniya. (2 Kor. 1:15, 16) Ilaña, ankoñi endaña makonu, mpinji yikwawu ahimpaña njila. Ahimpaña neyi kunamwekani kukala kwakukasumwisha bayi neyi hatuyuma twanyanya hela hayuma yabula kukundama kujawantaku. Kudi chuma chaleñeleli Pawulu yalabi halwendu lwindi lwafuukwililiyi chadimu lwakuya kuKorinda muloña wakeñeli nindi chipompelu chihetelumu. Munjilanyi?

⁷ Hanyima yakwila nafuukuli dehi lwendu lwindi, Pawulu watambwilili mujimbu nawu muchipompelu chaKorinda mwadiña wufwinda niyililu yatama. (1 Kor. 1:11; 5:1) Hakwila nawu yamanishi iku kukala, wasonekeleli aKorinda mazu akuyifumba mumukanda windi watachi. Chatela yafumi kuEfwesesa nakuya kuKorinda, Pawulu wayinkeli amana kwindi mpinji yakuzatisha kufumba kwindi kulonda chakayayi nakuyihempula yakayikoleshi. Hakuyileja nsañu yalala nakushimuna chaleñeleli yahimpi lwendu lwindi, Pawulu wasonekeli mumukanda windi wamuchiyedi nindi: “Nasanyiki Nzambi wamonaña muchima wami, nami chinalekeli kwinza kuKorinda nalondeli kuyanakena.” (2 Kor. 1:23) Bayi twikala neyi antu adiña nakuwana nyiloña mudi Pawuluku; ilaña twatela kulemesha antu atondewa anakutulombola. Dichi twatela kumwimbujola Pawulu neyi chamwimbujoleliyi Kristu.—1 Kor. 11:1; Heb. 13:7.

ANTU AMAKWAWU ADIÑA NACHAKUTALILAHU CHACHIWAHI

8. Rebeka watushila chakutalilahu chamuchidinyi?

⁸ ‘Neteji kuya.’ (Kutach. 24:58) Awa mazu anakumwekesha nawu, Rebeka walejeli amama yindi nimana kwindi nindi wetejeli kuya hadodina ifuku namwenyi nikwenda makilomita 800 kulonda yakekali iñoda Isaka mwana kaAbarahama. (Kutach. 24:50-58) Rebeka wamwekesheli nindi wetejeli nindi Eña nawa wadiña iñoda Isaka washinshika nawa wamutiyileña Nzambi woma. Muchihandilu chindi chejima washakamineña mumatenti neyi mwenyi Mwituña Dachikaninu. Watambwilili wuloku hamuloña wakashinshi kindi nawa wekalili nkakulula yaLubutu lwakaninuwu, Yesu Kristu.—Heb. 11:9, 13.

9. Indi Luti wakakeleli ñahi kumazu ahosheliyi?

⁹ “Aha! Etu kwetu tukuya naneyi kumukala wenu.” (Luti 1:10) Awa diwu mazu ahosheleñawu ambanda anfwila akuMowabi aLuti naOripa kudi mukuwawu Nyawomi nfwila, wafumineña kuMowabi nakuya kuBetelemi. Nkumininaku Oripa wafuntili kwawu muloña amukakejeli kudi Nyawomi. Ilaña Luti wakaanini nakunwinahu nimenji. (Tañenu Luti 1:16, 17.) Wamukakeleli Nyawomi, washili chisaka chindi ninsakililu yakutwamba yakuMowabi. Hakwikala mukwakudifukula waYehova washinshika womikili nawa watambwili wuloku wakwikala hakachi kawambanda atanu ashimwinuwu kudi Matewu muchisaka chaKristu.—Mat. 1:1, 3, 5, 6, 16.

10. Muloñadi Isaya chekalilayi chakutalilahu chachiwahi kudetu?

 ¹⁰ “Yamonu, ntemeshami.” (Isa. 6:8) Henohu kanda yahosha awa mazu Isaya wamumweni Yehova muchimwenu chajila nashakami hetanda Dindi mutembeli yamuIsarela. Hampinji yashinshikileñayi hanidi itanda dalema, Isaya watiyili izu daYehova nindi: “Nukutemeshanyi? Wukutuyila hinyi?” Yehova diyi wamutambikileña nindi yekala mukwakumuhoshelaku hakushimuna nsañu yaNzambi kudi antu Jindi ayiluwañimbi. Isaya wakoñeli mwahosheliyi. Wamukalakeleli Yehova nakashinshi neyi kaprofwetu kubadika hayaaka 46 nakushimuna nsañu yakujilumuna ninsañu yayiwahi yayikaninu yakufuntisha kudifukula kwalala.

11. (a) Muloñadi chichalemena kwila mutunafuukuli? (b) Yakutalilahwinyi yakusoñamisha yawantu abulili kukoña mwafuukwiluwu?

¹¹ Muloñadi Yehova chasonekeleliyi iyi yakutalilahu yinashimunuwu Mwizu dindi? Muloñadi chichalemena kwila mumunafuukuli? Bayibolu yashimuna jiika nawu muntu ‘wabulaña kukakela mwatiyañanañawu nawakwawu’ wudi hakachi kawantu ‘atelela kufwa.’ (Rom. 1:31, 32) Fwaro wakuEjipitu, Mwanta wawaYuda Zedekiya, niAnaniya niaSafwila adi hakachi kayakutalilahu yatama yashimunawu muBayibolu yawantu abulili kukoña mwafuukwiluwu. Wejima wawu akoñeli yuma yatama nawa hiyakutalilahu yakutusoñamisha.—Kwid. 9:27, 28, 34, 35; Ezek. 17:13-15, 19, 20; Yil. 5:1-10.

12. Chumanyi chikutukwasha kwila mutunafuukuli?

¹² Chineli tunakushakama ‘mumafuku akukuminina’ twadikundaña nawantu ‘abula kashinshi,’ antu “afwana neyi aakama Nzambi, hakwinza kwiteja ñovu yachu kwonti kwawu.” (2 Tim. 3:1-5) Twatela kutondolwela chikupu kudikunda nawantu amuchidiwu. Ilaña twatela kudikunda nawantu akoñaña mwafuukulañawu.—Heb. 10:24, 25.

CHIKANINU CHENU CHALEMA NANKASHI

13. Chikaninwinyi chakwiteja nawu Eña chahoshañayi kambanji kaYesu Kristu?

¹³ Chikaninu chalema nankashi chatela kufuukulayi muntu chidi chakudihana kudi Nzambi. Antu anakukeña kudibonda kulonda ekali atumbanji twaYesu ayihulaña mapampa kasatu kulonda eteji nawu Eña. (Mat. 16:24) Neyi aeluda ayedi anakwihujola muntu wunakukeña kwikala mukwakushimwina wabula kupapatishewa, amwihula nawu, “Mwalala munakukeña kwikala Chinsahu chaYehova?” Kuhiñahu neyi mukwakushimwina napaminuku dehi kuspiritu nawa nakukeña nindi amupapatishi, aeluda akumutambika nakumwihula nawu, “Munadihani chikupu kudi Yehova mukulomba?” Nkumininaku, hefuku dachipapatishu, wejima wawu ayihulaña nawu, “Kushindamena hamulambu waYesu Kristu, munabalumuki  munyichima nakuleka nshidi yenu nakudihana enu aweni kudi Yehova kulonda mwili nkeñelu yindi?” Awa amaha etejaña nawu Eña kumesu awayinsahu nakumwekesha nawu anadikani chikupu kumukalakela Nzambi haya nyaka.

14. Twatela kudishinshika ñahi etu aweni?

¹⁴ Hela chakwila munapapatishewi katataka hela munamukalakeli Nzambi hadi yaaka yayivulu, mwatela kudishinshika enu aweni nikudihula awa malwihu: ‘Komana inakumwimbujola Yesu Kristu kuhitila mukwila yuma yinakanini? Komana namwovwahilaña Yesu kuhitila mukushimwina nikutwamijaku mudimu wakwilisha atumbanji muchihandilu chami?’—Tañenu 2 Akorinda 13:5.

15. Munjilanyi jalema mutwatela kukoñela kwesekeja nakufuukula kwetu?

¹⁵ Kwila yuma kwesekeja nakusanyika kwetu kwatalisha mukwila nawu twatela kwikala ashinshika cheñi kuyuma yikwawu yalema. Chakutalilahu: Komana mwasumbula hela kusumbuka? Twalekenuhu kulemesha kusanyika kwenu kwakukeña nikumuhemba chiwahi mwinikwenu. Mwasoneka dehi kontilakiti yakumudimu hela fomu yakutambwilahu kukooleka kwamukuloñesha? Kolelenu kuyuma yimunafuukuluhu nikuyikaninu yenu. Komana muneteji kuya kwitala dakazweñi wunayitambiki nindi mwakadili hamu? Bayi mukaana kuya neyi chakwila kudi muntu mukwawu walema wunayitambikiku. Komana mwakanahu dehi muntu wumwawanini mumudimu wakushimwina kwitala nikwitala nenu mwakafunta cheñi kulonda mwakamukwashi chikupu kuspiritu? Dichi ilenu mumunafuukuli nawa Yehova wakakiswila mudimu wenu wakushimwina.—Tañenu Luka 16:10.

CHITWATELA KUHETELA MUDI KAPRISTU WETU MUNENI NAWA MWANTA

16. Chumanyi chitwatela kwila neyi tukañanya kwila mutwafuukwili?

¹⁶ Bayibolu yahosha nawu etu antu abula kuwanina, ‘twaluwaña muyuma yayivulu,’ sweje munhoshelu yetu. (Yak. 3:2) Twatela kwiladi neyi tunakañanyi kwila mutunafuukuli? Munshimbi yaNzambi yayilejeluwu aIsarela, mwadiña lushimbi lwakwanakena muntu wunatanyi hamuloña ‘wakusanyika lufuchi nakanwa kindi.’ (Lev. 5:4-7, 11) Kudi cheñi njila yayiwahi yakwanakenamu akwaKristu akukoña nshidi yamuchidiwu. Neyi tushimuna nshidi jetu kudi Yehova, nateli kutwanakena kuhitila mudi Kapristu ketu Muneni, Yesu Kristu. (1 Yow. 2:1, 2) Hakwila nawu twikali nawuselewa waNzambi, twatela kumwekesha nyikabu yinakumwekesha nawu tunabalumuki kuhitila mukubula kwikala nanichi chaaku nikuzatila hayiluwa yitwakoñeli hamuloña wanhoshelu yetu yatama. (Yish. 6:2, 3) Ilaña twatela kutoñojokahu chiwahi henohu kanda tufuukuluhu yuma yitukakañanya kukoña.—Tañenu Mukwakutañisha 5:2.

17, 18. Wulokwinyi wakatambwilawu antu afwilaña kwila mwakaninuwu?

¹⁷ Eñañi akwakudifukula aYehova ejima akoñaña mwakaninuwu akatambwila wuloku kumbidi. Awayishewa a 144,000 akayinka wumi wakadi kufwa mwiwulu mwakayuulilawu hamu naYesu muWanta windi, ‘akekala anyanta ambala aNzambi niaKristu, akayuulila hamu nindi ikombakaji danyaka.’ (Chim. 20:6) Hakwila yihita yawantu amavulu akayuulewaña naWanta waKristu muparadisa hamaseki. Akekala antu awanina chikupu muparadisa.—Chim. 21:3-5.

¹⁸ Neyi twakekala ashinshika hakweseka kwakukumishaku kunsa yaChiyuulu chaYesu chaYaaka Ikombakaji, hitwakajinokaña neyi antu anahoshuku. (Chim. 20:7-10) Muntu wejima chahoshayi nindi Eña mwomwenomu, chelayi nindi Inehi, chochenochu. Antu ejima akamwimbujolaña Tata yetu wamwiwulu wukweti kukeña, Yehova, ‘Nzambi wansañu yalala.’—Mas. 31:5.

[Malwihu aKuzatisha haKudiza]

[Mwevulu wudi hefu 28]

Kufuma hamupapatishiluwu kushika nikukufwa, Yesu welileña mwamukaniniyi Tata yindi

[Mwevulu wudi hefu 30]

Komana munakuzata kwesekeja nakwiteja kwenu kwakwila nawu Eña?