Kwikala Ahamuka Hakuumika Yihuñu Makonu

“Nzambi diyi chiswamu chetu, diyi ñovu yetu, diyi watukwashañaku muyuma yakala, wudi mwamwihi, hakala kumuwanaku.”—MAS. 46:1.

MUKWAKULA NENUDI?

Yumanyi yikutukwasha kubula kuzeya hamuloña wayihuñu?

Yumanyi yatukwashaña kwikala ahamuka?

Yumanyi yatuloñeshelayi Yehova yatukwashaña kuumika yihuñu?

1, 2. Yihuñwinyi yinakumonawu antu amavulu nawa ambuña Nzambi afwilaña kwiladi?

 TUNAKUSHAKAMA mumpinji yinasweji yihuñu. Iseki dinenzali nawubanji wadimwekenaña. Nyitentanshi, matsunami, twesi, mabaji, kusuñunuka kwajimpidi, tunkundunkundu, nimahurricane jinakukisañana antu nankashi. Kudi kukala kukwawu kwamuyisaka nikukala kutwamonaña hamuntu hamuntu kunakutiyisha antu woma nikuyineñesha. Eñañi, ‘mpinji nakululakana chayilulakenu yatushintakeshaña’ wejima wetu.—Mukwa. 9:11.

² Ambuña Nzambi ejima omikaña chiwahi nakukala kwamuchidiwu. Hela chochu, twatela kudiloñesha kulonda tukomiki kukala kukatuholokela kumbidi chineli dinu ituña didi kwakwihi nakujilumuka. Tunateli kuumika ñahi nayihuñu yamuchidiwu kulonda tubuli kuzeya? Yumanyi yikutukwasha kuumika yihuñu yitunakumona makonu nakuhamuka?

DIZILENU KUDI OMIKILI YIHUÑU NAKUHAMUKA

3. Neyi chashimunawu haAroma 15:4, tunateli kukundejewa ñahi neyi tunaholokeli muyihuñu?

³ Hela chakwila antu makonu anakumona yihuñu yasweja, antu atachikili dehi kumona yihuñu. Tutalenu yuma yitwatela kudizila kudi ambuña Nzambi akunyima omikili yihuñu nakuhamuka.—Rom. 15:4.

4. Yihuñwinyi yomikiliyi Davidi nawa chumanyi chamukwashili?

⁴ Shinshikenu hadi Davidi. Wamweni yihuñu yayivulu, womikili kuzuwa kwamwanta, amulukukili kudi ayilumbu jindi, amusendeleli añodi jindi nikumufutukila kudi antu adileñayi nawu cheña chimu nawa waneñeli nankashi. (1 Sam. 18:8, 9; 30:1-5; 2 Sam. 17:1-3; 24:15, 17; Mas. 38:4-8) Nsañu  yamuBayibolu yahoshaña hachihandilu chaDavidi yashimuna jiika nawu Davidi waneñeli nankashi hamuloña waniyi yihuñu. Ilaña yihuñu yeniyi hiyamuzeyesheli kuspirituku. Wahosheli nachikuhwelelu nindi: “Mudi Yehova dimu mwakolela wumi wami, indi muntwinyi inukutiyami woma?”—Mas. 27:1 ; tañenu Masamu 27:5, 10.

5. Chumanyi chamukwashili Abarahama niSara kuumika yihuñu yamweneñawu?

⁵ Abarahama niSara ashakamineña hohu mumatenti mwituña dawenyi. Mpinji yikwawu chihandilu chakalileña. Ilaña omikili chikupu yihuñu yidi neyi nzala yakapwelendendi niwubanji wafumineña kudi ayilumbu akunyuza yadikumashaninuwu nayu. (Kutach. 12:10; 14:14-16) Atwesheli ñahi kuumika? Izu daNzambi datulejaña nawu Abarahama “wadiñi nakutalila ñanda yikweti yikuku, yakwila mukwakuyipima nikuyituña yowu Nzambi.” (Heb. 11:8-10) Abarahama niSara ashili muchima hayuma yakumbidi nawa hiyahuwankeni nayuma yamwituñaku.

6. Tunateli kumwimbujola ñahi Yoba?

⁶ Yoba niyena wamweni yihuñu yamaneni nankashi. Watela waneñeli nankashi hakumona yuma yitachiki kukosomoka. (Yoba 3:3, 11) Nawa yuma yejima yamumwekeneneña helukili chaleñeleli yakabakaneñaku. Ilaña hazeyeluku. Watwalekeluhu nakashinshi nikumukuhwelela Nzambi. (Tañenu Yoba 27:5.) Watushila chakutalilahu chachiwahi nankashi!

7. Yihuñwinyi yamweniyi Pawulu hakuzatila Nzambi nawa chumanyi chamwinkeli ñovu yakutwalekahu?

⁷ Tutalenu cheñi hadi kapostolu Pawulu. Watiyileña ‘woma mumukala, mumasaña nihakaluñalwiji.’ Wahosheli ‘hanzala yatiyileñayi, mpwila, mashika niwuvu.’ Pawulu wahosheli cheñi nindi wadiña ‘mwaana niwufuku mumenji akunama,’ hadaha muloña wakujiya nawatu. (2 Kor. 11:23-27) Hela chakwila wamweni yihuñu yamuchidiwu, talenu chahosheliyi hanyima yakupuluka mukufwa hamuloña wakumuzatila Nzambi : “Kulonda tubuli kudikuhwelela etu aweni, tukuhweleli Nzambi wasañulaña afu. Diyi watupulwishili mukufwa oku kwasweja kutoha. . . diyi wamba katupulwisha.” (2 Kor. 1:8-10) Bayi neyi antu amavulu amonahu dehi yihuñu yasweja neyi yamweniyi Pawuluku. Hela chochu, etu amavulu twaneñaña neyi chaneñeliyi nawa kuhamuka kwamwekesheliyi kwatukundejaña.

BAYI MUZEYA HAMULOÑA WAYIHUÑUKU

8. Indi yihuñu yitunakumona yatutiyishaña ñahi? Lumbululenu.

⁸ Makonu antu azeyaña hamuloña wawubanji nikukala kunasweji. NiakwaKristu niwena azeyaña. Lani, * wazatileña mumudimu wampinji yejima nanfumwindi muAustralia wahosheli nindi chamukwatiluwu nachikatu chakansa kwiyeli, naneñeli nankashi. Wahosheli nindi, “Yitumbu yanyinkeleñawu yankatishileña chikupu nawa nadimweneña neyi nindi wamukunkulwayi.” Kubombela hanawa makabi, wahembeleña cheñi nfumwindi waladikiluwu mumoñololu. Neyi tuholokela muyihuñu yamuchidiwu, tukwiladi?

9, 10. (a) Yumanyi yitwatela kutondolwela kulonda Satana abuli kutuhuñumuna? (b) Tunateli kuumika ñahi kukala kunashimunuwu haYililu 14:22?

⁹ Twatela kwanuka netu Satana nakukeña kuzeyesha chikuhwelelu chetu nayihuñu yitwamonaña. Ilaña bayi tumwiteja kulonda yatuneñesheñaku. HaYishimu 24:10 hahosha nawu: “Neyi wakazeya hefuku dakala ñovu jeyi jakeha.” Tunateli kuumika yihuñu nakuhamuka neyi tutoñojokaña  hadi antu asonekawu muBayibolu neyi awa itunahanjekuhu dehi.

¹⁰ Twatela kwanuka cheñi netu hitukutwesha kumanisha yihuñu yejimaku. Ilaña twatela kukukuhwelela netu kala mpinji tunateli kumona makabi. (2 Tim. 3:12) Yililu 14:22 yatulejaña nawu: “Kwiñila muwanta waNzambi chiña tusambila kumona lukadi lwaluvulu nankashi.” Chatela tuneñeña, kwila tumona yihuñu netu hinjila yakumwekeshelamu kuhamuka kwashindamena hakukuhwelela muñovu yaNzambi netu nateli kutukwasha nehi?

11. Yumanyi yikutukwasha kulonda tubuli kuzeya nayihuñu?

¹¹ Twatela kusha muchima hayuma yayiwahi. Izu daNzambi datulejaña nawu: “Muchima wazañajala waleteshaña kuseha kumesu; ilaña kuneña kwakumuchima kwabalulaña muchima wamuntu.” (Yish. 15:13) Neyi tukutoñojokaña hayuma yitukukañanya kuhimpa muchihandilu chetu, yikutuzeyesha. Twamusakililaña Yehova muloña watukwashaña nankashi. Hela tudi mulukadi, watukoleshaña Nezu dindi, nawukwashu wawamana kwetu niahela niñovu yitwatambwilaña muspiritu yindi yajila. Dichi tutoñojokeña hayumiyi kulonda yituzañalesheña chikupu. Chatela tutoñojokeña hayuma yatama yatumwekeneni, tuzatenu nañovu kulonda tuumiki kukala nikutoñojokaña hohu hayuma yayiwahi yitukweti.—Yish. 17:22.

12, 13. (a) Yumanyi yakwashaña ambuña Nzambi kuumika neyi kunamwekani wubanji? Shimunenu chakutalilahu. (b) Twamwekeshaña ñahi yuma yitwalemesha neyi kunamwekani wubanji?

¹² Muyaaka yamakonu, matuña amakwawu ananwini menji kuchopu munsañu jawubanji. Eña, amana kwetu amavulu anomiki chikupu munawa matuña. Hichinayi mukwila nawu chadiña chaswayi kuumikaku. MuFebruary 2010, mwituña daChile mwahitili mutentanshi weneni nitsunami yakundwili matala awamana kwetu nikukisañana yikumba yawu niyuma yikwawu. Hela chakwila amweni yinzeñeli, amana kwetu akoleli kuspiritu. Samuel wukweti itala dindi dahumukili wahosheli nindi: “Ami niñodami twatwalekeluhu kupompa nikushimwina hela chakwila twamweni yinzeñeli yayeni. Ichi chaaku chatukwashili kubula kususuta.” Iwu mana kwetu niakwawu amavulu ashili muchima hamudimu waYehova bayi hawubanjiku.

¹³ MuSeptember 2009, mapesenti akubadika ha 80 awantu mumusumba waManila, muPhilippines, enzelelumu nadibaji. Samaheta wumu wajimbesheli yikumba yindi wahosheli nindi, “Dibaji datwesekejeli hamu nawantu ejima, muloña asamaheta niatuzweñi anakukabakena hamu.” Awa mazu atwanukisha kufumba kwaYesu kwakwila nawu: ‘Dilumbikilenu maheta mwiwulu, mwabula tububu hela ndala yanoñeshaña, mwabula amakombi alokolaña matala nakwiya.’ (Mat. 6:20) Muntu wadilumbikilaña maheta akumujimba, akisikaña swayi, washalaña makasa munshiñu. Dichi twatela kwikala nawubwambu wawuwahi naYehova wabulaña kukisika hela kukumwekana wubanji wamuchidinyi.—Tañenu Aheberu 13:5, 6.

YUMA YATULEÑELAÑA KUHAMUKA

14. Yumanyi yatuleñela kwikala ahamuka?

¹⁴ Yesu wetejeli nindi kwakamwekana yihuñu hampinji yakumwekana kwindi, ilaña wahosheli nindi: “Bayi mwakafwa mutentuku.” (Luka 21:9) Eña twatela kumukuhwelela chikupu muloña yena diyi Mwanta wetu nawa tukweti Nleñi wayuma yejima watukwashaña. Pawulu wamukolesheli Timotewu nindi: “Nzambi hatwinkeli spiritu yawomaku, chiña yañovu nakukeña nikuwundisha mumesu.”—2 Tim. 1:7.

15. Shimunenu yakutalilahu yawantu jaNzambi adiña nachikuhwelelu nawa lumbululenu chitwatela kwikala ahamuka ninetu.

 ¹⁵ Talenu mazu ahosheluwu ambuña Nzambi nachikuhwelelu. Davidi nindi: “Yehova diyi ñovu yami, diyi nkebu yami; muchima wami wunamukuhweleli, anankwashuku; dichi muchima wami hiwukuluña nankashi.” (Mas. 28:7) Pawulu wahosheli nachikuhwelelu nindi: “Muyuma yejimiyi tunekali akwakwimika mushindu nikubadikamu, nañovu jayena watukeñeli.” (Rom. 8:37) Yesu niyena chelukiliyi nindi ambanji adi kwakwihi, walejeli atumbanji twindi nindi wadiña nawubwambu wakola naNzambi, wahosheli nindi: “Hinidi kanka wamuku, nidi naTata.” (Yow. 16:32) Indi awa mazu anakumwekeshadi? Awa mazu anakumwekesha nawu wejima wawu amukuhweleleli Yehova chikupu. Anetu neyi tukumukuhwelela Nzambi tukwikala ahamuka nakuumika yihuñu.—Tañenu Masamu 46:1-3.

HETELENU MUYUMA YATULOÑESHELAÑAWU YATUKWASHAÑA KWIKALA AHAMUKA

16. Muloñadi chitwatela kulemeshela kudiza Izu daNzambi?

¹⁶ MukwaKristu wahamuka hadishindamenaña yomwenuku. Ilaña kwenzaña hamuloña wakumwiluka Nzambi nikushindamena hadi yena. Tunateli kwikala ahamuka kuhitila mukudiza Izu dindi dasonekewa, Bayibolu. Muhela wakabakanaña nachineñi washimwini chuma chamukwashaña nindi, “Natañaña chikupu nsañu yakukundeja.” Komana tunakuzatisha ntanjikilu yakudifukula kwachisaka yatulejañawu? Neyi tunakuzatisha chikutukwasha kwikala nayitoñojoka yañimbi yamasamu wahosheli nindi: “Nshimbi jeyi o chinajikeña! Najitoñojokaña mwaana wejima.”—Mas. 119:97.

17. (a) Yumanyi yatuloñeshelawu yinateli kutukwasha kwikala ahamuka? (b) Shimunenu chakutalilahu chansañu yachihandilu yasonekañawu chiyatukwashaña.

¹⁷ Chamuchiyedi, tukweti nyikanda yashindamena haBayibolu mudi nsañu yatuleñelaña kumukuhwelela Yehova chikupu. Amana kwetu amavulu ahetelañamu nankashi munsañu jayihandilu jasonekañawu mumagazini etu. Muhela wumu wakuAsia wakata chikatu chakuhuwankana muyitoñojoka watiyili kuwaha chatañiliyi nsañu yachihandilu chamana kwetu wadiña kamishonali womikili nachikatu chamuchidiwu. Wasonekeli nindi: “Iyi nsañu yakwashili kwiluka chikatu chinikweti nikwikala nakuchiñeja.”

18. Muloñadi chitwatela kwikala nachaaku chakulomba?

¹⁸ Chamuchisatu hikulomba. Kulomba kwatukwashaña mukukala kudi kwejima. Kapostolu Pawulu wahosheli hakulema kwakulomba nindi: “Bayi  mwakama chumaku; ilaña mulejenu Nzambi yuma yejima yimunakeñi nakulomba, nakulembelela, nakusakilila. Kuwunda kwaNzambi kwabadika maana ejima kwakahemba nyichima yenu niyitoñojoka yenu mudi Kristu Yesu.” (Fwi. 4:6, 7) Komana ninetu twalombaña hampinji yitunaholokeli mukukala kulonda twikali akola? Mana kwetu Alex wakuBritain wakata chikatu chakuneña, wahosheli nindi: “Kuhosha naYehova mukulomba nikumutiyilila kuhitila mukutaña Izu dindi diyuma yinakwashi nankashi.”

19. Twatela kumona ñahi kupompa kwawakwaKristu?

¹⁹ Kuya nakupompa diyi njila yamuchiwana yatuloñeshelawu yatukwashaña. Ñimbi yamasamu wasonekeli nindi: “Muchima wami wafwilaña, Mwalala, wakuminaña dakuhwidila nakufwila kuyipañu yaYehova.” (Mas. 84:2) Komana dichitwatiyaña ninetu? Lani, ashimunawu hakusambila, nalumbululi kupompa kwawakwaKristu chikwamukwashaña nindi: “Nekala nachaaku chakuya nakupompa. Neluka nami natela kuya nakupompa neyi inakukeña nami Yehova yanyiki ñovu yakumika.”

20. Indi kuzata mumudimu wakushimwina kwatukwashaña ñahi?

²⁰ Njila yamuchitanu yidi yakudikita chikupu mumudimu wakushimwina Wanta. (1 Tim. 4:16) Muhela wakuAustralia wunahiti mukukala kwakuvulu wahosheli nindi: “Hinadiña nampwila yakuya nakushimwinaku, ilaña eluda wumu wanlejeli nindi tuzatili hamu. Nazatili nindi. Mpinji yejima yinazataña mumudimu wakushimwina Yehova wankwashaña nawa nazañalalaña nankashi.” (Yish. 16:20) Antu amavulu ahoshaña nawu neyi akwasha akwawu kulonda ekali nachikuhwelelu chakola mudi Yehova, niwena chikuhwelelu chawu chakolaña. Neyi ela mwenimu, avulamenaña kukala kukwetuwu nikusha maana kuyuma yalema.—Fwi. 1:10, 11.

21. Yumanyi yatukoleshaña neyi tuholokela mukukala?

²¹ Yehova watuloñeshela yuma yayivulu yatukwashaña kuhamuka neyi tuholokela mukala makonu. Neyi tuzatisha iyi yuma yejima yatuloñeshelayi nikutoñojokahu chikupu nikwimbujola yakutalilahu yayiwahi yawambuña Nzambi adiña ahamuka, tukukuhwelela chikupu netu tunateli kwikala ahamuka neyi tuholokela mukukala. Hela chakwila kukala kwakuvulu kunateli kumwekana chineli kukuma kwadinu ituña kudi kwakwihi, tunateli kutiya neyi chatiyiliyi Pawulu, wahosheli nindi: “Anatubuli dehi hamaseki, etu kunoña nehi. Dihu hafuma kubula kuzeya.” (2 Kor. 4:9, 16) Nawukwashu waYehova, tunateli kwikala ahamuka neyi tuholokela mukukala.—Tañenu 2 Akorinda 4:17, 18.

[Tumazu twaheshina]

[Malwihu aKuzatisha haKudiza]

[Nyevulu yidi hefu 10]

Neyi muholokela muyihuñu, zatishenu yuma yatuloñeshelayi Yehova