Mazu Akukolesha ‘Afumini Mutunwa Twawanyikeki’

MuDecember 2009, Chota Cheneni chaSupreme muRussia chetejeli chuma chaleñeleli kushinka kuloñesha kwawaYinsahu jaYehova kwamumusumba waTaganrog, muRussia, kutambula Itala daWanta nawa abidikili nawu nyikanda yetu 34 yadiña yafwana nankashi. Iyi nsañu ayishili haWeb site yawaYinsahu jaYehova ninyevulu yawaYinsahu aholokeleli muniku kukala, kushilahu niatwansi.

Chimwahitili tukweji twantesha akwaAdministrative Center yawaYinsahu jaYehova muRussia atambwili chikasha ninyikanda yafumini kuchisaka chawaYinsahu chamumusumba waQueensland, muAustralia, amweni chileji chafuukwili Chota, asonekeli nawu: “Kudi Amana kwetu, anyanetu aCody niLarissa, akolesheweli nankashi nachikuhwelelu nikweseka kwahitilumu amabwambu jetu muRussia. Anasoneki makaadi ninyikanda nawa tunakuñululi yawaana yitunakukeña kutemeshela anyana amuTaganrog, tunakukeña eluki nawu hela chakwila adi kwakulehi, kudi anyana amakwawu anakumukalakela Yehova nakashinshi nawa anakuyitoñojoka. Anatemeshi mutendi weneni nawa ayikeña nankashi.”

Chatambwiluwu iyi yawaana, anyana amuTaganrog asonekeli nyikanda yakusakilila ichi chisaka muAustralia. Hamuloña wamazu akukolesha “afumini mutunwa twawanyikeki,” Chinsahu wunakuzatila hamutayi wamuRussia wayisonekeleli aCody naLarissa nindi: “Toñojokenu chatiyañawu atwansi niakulumpi neyi ayitwika muloña wachuma chinabuli kukoñawu. Amana kwetu niahela amuTaganrog hiyakoñeli chuma chatamaku, ilaña ayitambwili Itala dawu daWanta. Chumichi chayineñesheli nankashi. Atela kukoleshewa neyi eluka nawu kudi muntu mukwawu mukaayi wunakuyitoñojoka. Tunayisakili hakwikala namuchima wakuhana!”—Mas. 8:2.

Eñañi, tudi amana kwetu achisaka chimu mukaayi kejima nawa kukeñañana kwatukwashaña kuumika kweseka nikukala kwatumwekenaña. Hela chakwila antu ahoshaña nawu nyikanda yawaYinsahu jaYehova yaletaña chaambu, anyanetu amwekeshaña muchima wakudakamena wumu namukwawu, adiwulaña chaambu chanyunza niyisemwa nawa alondelaña mazu aYesu akwila nawu: “Neyi mukukeñañana, dihu hakayilukilawu antu ejima nawu mudi atumbanji twami.”—Yow. 13:35.

[Nyevulu yidi hefu 32]

Anyana amuRussia (adi kuchimunswa) atambwilili yawana kufuma kudi anyana akuAustralia (adi kuchidilu)