Mwamwekeshaña Spiritu Yamuchidinyi?

“Luwi lwaMwanta Yesu Kristu lwikali naspiritu yenu.”—FWILE. 25.

MUNATELI KWAKULA?

Muloñadi chitwatela kushila muchima kuspiritu yitwamwekeshaña?

Yililu yamuchidinyi yitwatela kutondolwela nawa tukuyitondolwela ñahi?

Twatela kwiladi kulonda tumwekesheña spiritu yakukolesha akwetu muchipompelu?

1. Kuchiñejanyi kwashimwiniyi Pawulu hakusonekela akwawu akakwitiya?

 HAKUSONEKELA akwawu akakwitiya, kapostolu Pawulu wakonkomweneni hakuchiñeja kwindi nindi Nzambi niKristu atiyili kuwaha naspiritu yamwekesheleña yipompelu. Chakutalilahu, akaÑalija wayisonekeleli nindi: “Luwi lwaMwanta Yesu Kristu lwikali naspiritu yenwenu ana kwetu. Amena.” (Ŋal. 6:18) Watalishili mudihi hakuhosha nindi ‘spiritu yenwenu’?

2, 3. (a) Mpinji jikwawu Pawulu watalishileña mudihi hakuzatisha izu ‘daspiritu’? (b) Malwihwinyi itwatela kudihula kutalisha haspiritu yitwamwekeshaña?

² Izu dazatishiliyi Pawulu ‘daspiritu’ datalisha kuchuma chatwinkaña ñovu yakuhosha hela kwila yuma munjila yambukaku. Muntu wumu nateli kwikala nachililu chakwovwaha, chakutoñojokelaku akwawu, kuwaha, kuhana nikwanakena. Bayibolu yahosha nawu twatela kwikala “naspiritu yayovu yawunda” ‘nikudiwunjika mumuchima.’ (1 Pet. 3:4; Yish. 17:27) Ilaña muntu mukwawu nateli kwikala nachaaku chakuhosha mazu akasawuntu, kukeñesha yuma yakumujimba, kuhila swayi hela kwikala nayililu yakudimena. Kudi cheñi antu ekala nayililu yatama, abulaña kwovwahila hela akweti spiritu yakudikaña.

³ Hampinji yahosheliyi Pawulu nindi ‘Mwanta ekali naspiritu yenu,’ wadiña nakukolesha amana kwindi nindi amwekesheña spiritu yesekana nankeñelu yaNzambi niyililu yidi neyi yaKristu. (2 Tim. 4:22; tañenu Akolose 3:9-12.) Makonu, twatela kudihula netu: ‘Namwekeshaña spiritu yamuchidinyi? Natela kumwekesha ñahi chikupu spiritu yamuzañaleshaña Nzambi? Komana natela kuzata nañovu kulonda nimwekesheña spiritu yayiwahi muchipompelu?’ Chakutalilahu, mwitempa dasanifulawa, wulombu wasanifulawa wamwekeshaña itempa dejima wutotombu.  Komana ninetu tudi neyi “nkenu” yaleteshaña chipompelu chejima kumwekana wutotombu? Eñañi, twatela kwikala antu amuchidiwu. Tusambilenu kutala yuma yitwatela kwila kulonda tumwekeshi spiritu yamuzañaleshaña Nzambi.

TONDOLWELENU SPIRITU YETUÑA

4. Indi ‘spiritu yetuña’ hichumanyi?

⁴ Nsona yatulejaña nawu: ‘Etu hitunatambuli spiritu yamunu mwituñaku, tunatambuli spiritu yakudi Nzambi.’ (1 Kor. 2:12) Indi ‘spiritu yetuña’ hichumanyi? Hispiritu yoyimu yashimunawu haAefwesesa 2:2, nawu: ‘Mumwadiñi nakwenda nakuhuñumuka mwaya nyaka yamakonu, mwakeña mwanta wamuluzwizu [mumpepela] wañovu, yowu Diyabolu, wakoñeshaña katataka mudi anyana akwakujikwa.’ Iyi ‘mpepela’ hispiritu yetuña hela yitoñojoka yawantu nawa yidi neyi mpepela yitwonaña. Yidi kwejima. Yamwekenaña mudi antu amavulu makonu atoñojokaña nawu kwosi muntu watela kunleja chakwila hela ekala nayililu yakudilila yuma yinakeñuwu. Antu wenawa diwu ‘anyana akwakujikwa’ ekala mwituña daSatana.

5. Spiritu yamuchidinyi yatama yamwekesheluwu antu amakwawu muIsarela?

⁵ Yililu yamuchidiwu yatachikili dehi. Mumafuku aMosi, Kora watachikili kuzuñisha anlomboli muchipompelu chaIsarela. Waswejeli kumwimakena Aroni nianyanindi adiña nakukooleka kwakuzata neyi atupristu. Hadaha wamweneña yiluwa yakoñeleñawu. Indi kwiji wahosheleña nindi Mosi wadiña nachaambu chakwinka antaña jindi yifulu. Dichi Kora watachikili kumona yuma nayitoñojoka yawuntu nawa watachikili kuzuñisha antu atondeluwu kudi Yehova, nakuyileja nakasawuntu nindi: “Munadikilakeshi dehi . . . Indi enu munadilemeshelidi hachipompelu chaYehova?” (Kuch. 16:3) Datani naAbirami niwena amutobeleli Mosi nakumuleja nawu wakeñeleña ‘kudilisha kalamba kawu.’ Chayilejeluwu nawu ayi nakudimona naMosi, akwili nawinyi nawu: “Hitukwinza kwokuku.” (Kuch. 16:12-14) Yehova waneñeli nankashi naspiritu yamwekesheluwu. Wayijilumwini akwakudikaña ejima.—Kuch. 16:28-35

6. Indi antu amuyaaka nkulakaji yatachi amwekesheli ñahi yililu yatama nawa chumanyi chaletesheli ekali nayililu yamuchidiwu?

⁶ Antu amakwawu muyaaka nkulakaji yakusambila ahosholeleña antu atondewa muchipompelu, ‘nakudiwula wanta.’ (Yuda 8) Awa amayala hiyalemesheli kukooleka kwawuku muloña achonkeleña akwawu kulonda atachiki kuzuñisha antu atondewa adikitileña chikupu mudimu wayinkeluwu kudi Nzambi.—Tañenu 3 Yowanu 9, 10.

7. Munjilanyi mutwatela kwikalila ababala nankashi muchipompelu makonu?

⁷ Chakadi nikujina, muchipompelu chawakwaKristu himwatela kwikala spiritu yamuchidiwuku. Dichi twatela kubabala kulonda tubuli kwikala naniyi yililu. Aeluda muchipompelu hiyawaninaku neyi chochadiña anlomboli amumafuku aMosi nimumafuku akapostolu Yowanu. Aeluda anateli kukoña yiluwa yikutuneñesha. Neyi chumichi chinamwekani, chikutama nankashi neyi muntu wamuchipompelu wukumwekesha spiritu yetuña nindi amumwekesheli “wuñanji” hela nindi “mana kwetu wunaluwañeshi amubabeshi.” Yehova wadiwulaña yiluwa yanyanya. Komana kwila tumwimbujola nehi? Hamuloña wayiluwa yamonañawu mudi aeluda, antu amakwawu akoñaña nshidi yahamesu bwi-i muchipompelu akaanaña kudimona nakomiti yawaeluda yinenkuwu mudimu wakuyikwasha. Tunateli kwesekeja chumichi namuyeji wunakaani yitumbu yinateli kuuka yikatu yindi hamuloña wayuma yakoñayi ndotolu yabula kukeñayi.

8. Nsonanyi jikutukwasha kulemesha antu anakulombola muchipompelu?

 ⁸ Hakwila nawu tutondolweli spiritu yamuchidiwu, twatela kwanuka netu Yesu amushimuna muBayibolu nawu “muchikasa chindi chachidiilu mudi tutumbwa tutanu natuyedi.” “Tutumbwa” tunakwimenaku ankoñi awayishewa niankoñi ejima amuyipompelu. Yesu nateli kulombola “tutumbwa” tudi muchikasa chindi mwejima munakeñiyi. (Chim. 1:16, 20) Dichi chineli diyi Mutu wachipompelu chawakwaKristu, Yesu walombolaña mazanvu awaeluda. Neyi chakwila eluda wumu hezanvu wudi nakawufwayi, Yomweni wukweti ‘mesu neyi amuzuzu wakesi’ wakamukwasha hampinji Yindi yatelela nawa munjila yayiwahi. (Chim. 1:14) Chayinu mpinji, tukutwalekahu nakulemesha antu atondewa naspiritu yajila, muloña Pawulu wasonekeli nindi: “Ovwahilenu anlomboli jenu nakuyitiyilila, muloña ahembaña nyichima yenu, nawu twamba kashimunamu; kulonda eli mwenimu namuzañalu bayi nakuneñaku, muloña neyi akuneña hichikuyikwasha enuku.”—Heb. 13:17.

9. (a) Yililu yamuchidinyi yinateli kumwekeshayi mukwaKristu neyi anamufumbi? (b) Chumanyi chitwatela kwila neyi anatuzuwili?

⁹ MukwaKristu nateli cheñi kumwekesha spiritu yatama hela yayiwahi neyi amufumba hela amutambula kukooleka muchipompelu. Mana kwetu wumu wakansi amufumbili chachiwahi kudi aeluda nawu yaleki kuhema yisela yamadombu yahavidiyo. Chawushona, wakaanini  mwamufumbiluwu nawa amujimini hawunkoñi wakuzatila muloña wakañenyi kuwanisha yuma yakeñekaña yashimunawu muNsona. (Mas. 11:5; 1 Tim. 3:8-10) Nkumininaku, mana kwetu watachikili kuleja antu nindi aeluda analuwañeshi, watachikili kusonekela kasanji kamutayi nyikanda nakuyitwika aeluda nyiloña nikuluwañesha amakwawu muchipompelu kulonda ahosholeña aeluda. Dichi neyi tukudihakwilaña hamuloña wayiluwa yetu, tukuleta wufwinda muchipompelu chejima nawa hichikutukwashaku. Dichi neyi anatuzuwili, twatela kushaku maana kulonda tumoni mutwazeyazeya mutwabula kwiluka nikwiteja chachiwahi munatufumbuwu.—Tañenu Mukeña 3:28, 29.

10. (a) Lumbululenu chitwatela kudizila kumazu adi haYakoba 3:16-18 kutalisha haspiritu yayiwahi niyatama. (b) Yumanyi yafumaña mukwikala ‘namaana afumaña mwiwulu’?

¹⁰ Hansona yaYakoba 3:16-18 hadi mazu amawahi akutukwasha kwiluka spiritu yatama niyayiwahi yitwatela kumwekesha muchipompelu. Yahosha nawu: “Kwekala ichima nakufwilañana, diku kwekala nikuluwañana ninyidimu yatama yejima. Hakwila maana afumaña mwiwulu, kusambila amawahi, nkumininaku awunda, ovwaha, anyakala kutiya, enzala luwi nanyikabu yayiwahi, hiyaheta ntadi hela wufwikijuku. Antu awunda akuwaña kuwunda, aañulaña kuloña.” Neyi tukuzataña kwesekeja ‘namaana afumaña mwiwulu,’ yililu yetu yakumutiya Nzambi woma yikutukwasha kumwekesha spiritu yayiwahi kudi amana kwetu.

IKALENU NASPIRITU YAKALEMESHA MUCHIPOMPELU

11. (a) Indi kwikala naspiritu yayiwahi kukutukwasha kutondolweladi? (b) Yumanyi yitwadizilaña kudi Davidi?

¹¹ Twatela kwanuka netu Yehova wayinka aeluda mudimu ‘wakubiña mukanka wanyikoku yaNzambi.’ (Yil. 20:28; 1 Pet. 5:2) Dichi hela tudi aeluda hela nehi, wonsu wetu twatela kulemesha ntanjikilu yaNzambi. Kwikala naspiritu yayiwahi kukutukwasha kubula kusweja kusha maana hakufwila chifulu. Chelili Mwanta Sawulu wamuIsarela yeluki nindi Davidi nakukeña kumutambula wanta, Sawulu ‘wamutalileña Davidi nanyiku hohu.’ (1 Sam. 18:9) Mwanta wekalili naspiritu yatama nawa wakeñeleña kumujaha Davidi. Chatela twikaleña namuchima wakufwila chifulu neyi cheliliyi Sawulu, twatela kumwimbujola Davidi. Hela chakwila wamweni yinzeñeli yayivulu, iwu kansi weyala watwalekeluhu kulemesha antu atondeluwu kudi Nzambi.—Tañenu 1 Samweli 26:23.

12. Yumanyi yikuleta kuwunda muchipompelu?

¹² Kwikala nayitoñojoka yashiyashana kunateli kuleta wufwinda muchipompelu nihakachi kawankoñi. Kufumba kwamuBayibolu kunateli kutukwasha, kwakwila nawu: “Itejenu mwinenu abadiki kulema” nawa “Bayi muditoñojoka nenu, yetu tweluka hohuku.” (Rom. 12:10, 16) Chatela tutoñojokeña netu yuma yitunahoshi diyi hohu yaloña, twatela kwiluka netu kudi njila jashiyashana jatela kuzatika. Neyi tukutiyilila munakuhoshawu akwetu, tukuleta kuwunda muchipompelu.—Fwi. 4:5.

13. Twatela kwiladi neyi tunahoshi mutunatoñojoki nawa chakutalilahwinyi chamuBayibolu chinakumwekesha ichi chikuma?

¹³ Komana chinayi mukwila nawu neyi tunamoni yuma hiyinakwenda chiwahi muchipompeluku, twatela kumwenahu? Inehi. Muyaaka nkulakaji yatachi, kudi chuma chamwekeni chaleteli wufwinda nankashi. Amana kwetu ‘akunjikili aPawulu naBaranaba niakwawu, kuya nansañu iyi kuYerusalema kudi apostolu nawakulumpi.’ (Yil. 15:2) Chakadi  nikujina awa amana kwetu adiña nayitoñojoka yashiyashana haniyi nsañu nichateleli kuyimanishawu. Chelili wejima wawu ahoshi yuma yatoñojokeleñawu, afuukwili kwesekeja nawunlomboli waspiritu, amana kwetu hiyatwalekeluhu kuleta yitoñojoka yawuku. Chelili yipompelu yitambwili mukanda mwadiña nsañu yafuukwiluwu, ‘hiyakuzañalala nakukundeja kwayikundejeluwu’ nawa ‘ayikolesheli mukwitiya kwakukuhwelela.’ (Yil. 15:31; 16:4, 5) Anetu nawa, neyi tushimuna kukala kutukweti kudi aeluda, twatela kuyikuhwelela netu akuzatilahu.

MWEKESHENU SPIRITU YAYIWAHI KUDI AKWENU

14. Tunateli kumwekesha ñahi spiritu yayiwahi kudi akwetu?

¹⁴ Kudi njila jajivulu jitwatela kumwekeshelamu spiritu yayiwahi kudi akwetu hamuntu hamuntu. Wonsu wetu twatela kumwekesha spiritu yayiwahi neyi twikala namuchima wakwanakena akwetu anatudati kumukila. Izu daNzambi datulejaña nawu: ‘Twalekenuhu nakudovwahila nikudanakena muntu namukwawu. Neyi kudi muntu wukweti muloña namukwawu amwanakeni; chayanakenenuwu enu kudi Yehova, ninenu nawa ilenu chochimu.’ (Kol. 3:13) Mazu akwila nawu “neyi kudi muntu wukweti muloña namukwawu” anakumwekesha nawu tunateli kuhila neyi anatuvuloki kudi akwetu. Chatela tuswejeña kusha maana kuyiluwa yawakwetu nakuleta wufwinda muchipompelu, twatela kumwimbujola Yehova nikuyanakena chikupu kulonda tutwalekuhu kuzata nawu chiwahi.

15. (a) Yumanyi yitukudizila kudi Yoba hansañu yakwanakena? (b) Kulomba kunateli kutukwasha ñahi kumwekesha spiritu yayiwahi?

¹⁵ Tunateli kudizila kudi Yoba hansañu yakwanakena. Amabwambu jindi asatu ateleleli kumukundeja amuhilishili namazu atama ahosheluwu. Ilaña Yoba wayanakeneni. Munjilanyi? ‘Wayilombeleluku amabwambu jindi.’ (Yoba 16:2; 42:10) Kulombelaku akwetu kunateli kuhimpa yililu yetu nawa tukutachika kuyilemesha. Kulombelaku akwetu akwaKristu kwatukwashaña kwikala nayililu neyi yaKristu. (Yow. 13:34, 35) Kubombela hakulombelaku amana kwetu, twatela kulomba cheñi spiritu yajila. (Luka 11:13) Spiritu yaNzambi yikutukwasha kumwekesha yililu yawakwaKristu hakudikunda nawakwetu.—Tañenu Aŋalija 5:22, 23.

IKALENU NASPIRITU YAYIWAHI MUKULOÑESHA KWANZAMBI

16, 17. Kutalisha ‘haspiritu yitwamwekeshaña,’ chumanyi chimunakufwila kwila?

¹⁶ Munateli kufuma yuma yayiwahi nankashi neyi antu ejima muchipompelu ekala namuchima wakumwekesha spiritu yayiwahi! Hanyima yakuhanjeka haniyi nsañu, twatela kufuukula hamuntu hamuntu kuwahisha yililu yetu kulonda tumwekesheña spiritu yayiwahi yakukolesha akwetu. Neyi tunakukeña kuwahisha yililu yetu, twatela kuzatisha Izu daNzambi kulonda tuhimpi chikupu. (Heb. 4:12) Pawulu wakeñeleña kwikala nayililu yayiwahi muyipompelu nindi: “Ami hineluki chuma chakudinka nachu muloñaku; hela chochu, hidichi chinayiñiluku; Mwanta diyi wansompeshaña.”—1 Kor. 4:4.

¹⁷ Chitukufwilaña kuzata kwesekana namaana afumaña mwiwulu, nikubula kushindamena hayitoñojoka yetu hela kufwila yifulu, muchipompelu mukwikala spiritu yayiwahi. Neyi twikala naspiritu yakwanakena nikulemesha akwetu, tukwikala nawubwambu wawuwahi nawakwetu akwakudifukula. (Fwi. 4:8) Neyi tukwilaña mwenimu, tukukuhwelela netu Yehova niYesu akutiyaña kuwaha ‘naspiritu yitwamwekeshaña.’—Fwile. 25.

[Malwihu aKuzatisha haKudiza]

[Mwevulu wudi hefu 14]

Kutoñojoka chikupu hamudimu wukwetiyi Yesu kukuyikwasha ñahi kwiteja kufumba?