Mwovwahilenu Nzambi Kulonda Muheteli Muyikaninu Yindi Yakanayi

“Nzambi, chabuliliyi mukwawu wamubadika, hakudisanyika yomweni.”—HEB. 6:13.

TUTALENU NEYI MUKWAKULA:

Tuneluki ñahi netu Nzambi hakakañanya kwila mwafuukulayiku?

Chumanyi chakaniniyi Nzambi chelili Adama naEvu anaputoli dehi?

Twahetelañamu ñahi muchikaninu chasanyikiliyi Nzambi kudi Abarahama?

1. Indi mazu ahoshañayi Yehova ambuka ñahi namazu awantu akwanshidi?

 YEHOVA ‘hiNzambi wansañu yalala.’ (Mas. 31:5) Antu abula kuwanina hitwayikuhwelelaña mpinji yejimaku, ilaña ‘Nzambi hatweshaña kutwambaku.’ (Heb. 6:18; tañenu Kuchinda 23:19.) Yuma yejima yayiwahi yakanañayi antu yashikijewaña. Chakutalilahu, yuma yejima yashimwiniyi Nzambi nindi wukela hakutachika kuleña ‘wayilili.’ Dichi hakumana kwefuku damuchitanu nachimu dakuleña, “Nzambi wamweni yuma yejima yeliliyi nindi yinawahi nankashi.”—Kutach. 1:6, 7, 30, 31.

2. Ifuku daNzambi dakunooka hichumanyi nawa muloñadi ‘chadijilikililiyi’?

² Hanyima yakumona yuma yaleñeliyi, Yehova Nzambi washimwini kutachika kwefuku damuchitanu nachiyedi, bayi neyi hiifuku damaora 24 hohuku, ilaña himpinji yayilehi yakunooka chakadi kuleña yuma yikwawu hamaseki. (Kutach. 2:2) Ifuku daNzambi dakunooka dichidi kanda dimani. (Heb. 4:9, 10) Bayibolu hiyashimuna jiika mpinji yidatachikiluku. Hadaha datachikili hanyima yakuleña iñoda Adama, Evu, yaaka 6,000 yinahituhu. Kumbidi, Yesu Kristu Wakayuula hadi Yaaka Ikombakaji, nakushikija nkeñelu yaNzambi yakuleña iseki kwikala paradisa yahaya nyaka mwakekala antu awanina. (Kutach. 1:27, 28; Chim. 20:6) Munakuhweleli chikupu nenu yumiyi yakamwekana? Eña! “Nzambi wakiswilili ifuku damuchitanu nachiyedi nkisu yodijilika nikudijilika.” Ichi chikaninu chamwekesheli nawu hela chakwila kukamwekana kukala kwamuchidinyi, nkeñelu yaNzambi yakashikijewa hakumana kwefuku dindi dakunooka.—Kutach. 2:3.

3. (a) Chelili ifuku daNzambi dakunooka dinatachiki dehi, chumanyi chamwekeni? (b) Indi Yehova washimwini nindidi kutalisha hakuchika mukwakudikaña?

 ³ Chelili ifuku daNzambi dakunooka dinatachiki dehi, kwamwekeni yuma yomisha mbaña. Satana, wadiña kañelu nawa mwana kaNzambi, wakeñeli nindi yekala nzambi. Diyi wasambilili kutwamba hakumuleja Evu nindi yadikañi naYehova. (1 Tim. 2:14) Evu niyena wamuhuñumwini nfwimwindi nawa adikañili. (Kutach. 3:1-6) Hela chakwila yileñaleña yadikañili chikupu nakumwekesha nawu Nzambi hisakutwamba, Yehova hasanyikili nakumwekesha nindi nkeñelu yindi yamba kashikijewaku. Ilaña wahosheli mazu amba kelukawu antu hampinji yatoñolayi Nzambi, washimwini chakamuchikawu mukwakudikaña nindi: “Nukusha nkunyi mukachi keyeyi [Satana] namumbanda, nimukachi kawanyaneyi nawanyanindi; [Lubutu lwachikaninu] lwakakuchika kumutu nineyi wakamuchika kukatutu.”—Kutach. 3:15; Chim. 12:9.

KUSANYIKA, HINJILA YAKUMWEKESHELAMU NAWU MUNAKUHOSHA MWALALA

4, 5. Njilanyi yazatishileñayi Abarahama mpinji yikwawu?

⁴ Kufuma hampinji yayileñeliyi Adama naEvu, Nzambi hayilejeli nindi asanyikeña hakuhosha kulonda amwekesheña nawu anakuhosha mwalalaku. Yileñaleña yawanina yamukeña Nzambi nikumwimbujola hiyatela kusanyikaku; yahoshaña mwalala nawa yadikuhwelela. Ilaña yuma yahimpikili chelili nshidi yiñili mudi antu nikubula kuwanina. Nkumininaku, chelili antu asweji kutwamba, atachikili kusanyika kulonda amwekeshi nawu anakuhosha mwalala.

⁵ Nkakulula Abarahama wasanyika chachiwahi kapampa kasatu. (Kutach. 21:22-24; 24:2-4, 9) Chakutalilahu, wasanyikili hampinji yafuminiyi nakushinda mwanta wamuElami nianyanta ejima azuñiliyi nawu. Anyanta akuSalema nikuSodoma ayili nakumuwana Abarahama. Melekizedeki, mwanta wakuSalema, wadiña “kapristu kaNzambi Wabadika Kwiwulu.” Wamukiswilili Abarahama nikumuhameka Nzambi hakumwinka Abarahama ñovu jakushinda ayilumbu jindi. (Kutach. 14:17-20) Chelili mwanta wakuSodoma yakeñi kumufweta Abarahama hamuloña wakupulwisha antu jamwanta kudi ayilumbu jawu, Abarahama wasanyikili nindi: “Ami nololi chikasa chami kwiwulu nenyiki kudi Yehova, diyi Nzambi Wabadika Kwiwulu, diyi waheta nimawulu nimaseki, nami, Ami hinukutambula hela kawanda, hela kamwonji kakunkwabilu, hela kachuma keyi kamuku, wakanda kela neyi, Ami yami namuhetesheli Abarama.”—Kutach. 14:21-23.

CHIKANINU CHAMUKANINUWU ABARAHAMA KUDI YEHOVA

6. (a) Abarahama watushila chakutalilahu chamuchidinyi? (b) Twahetelañamu ñahi mukwovwahila kwaAbarahama?

⁶ Hakwila nawu antu abula kuwanina ahetelumu, Yehova Nzambi wasanyikaña namazu akwila nawu “Mwanta Yehova nindi Chalala chinahandichi.” (Ezek. 17:16) Bayibolu yashimuna nawu Yehova Nzambi wasanyikili kubadika hamapampa 40. Chakutalilahu chimu chitweluka nankashi himazu asanyikili Nzambi kudi Abarahama. Hadi yaaka yayivulu yinahituhu, Yehova watiyañeni naAbarahama yikaninu yashiyashana yamwekesheleña nawu Lubutu lwachikaninu lwakafuma mudi Abarahama kuhitila mudi mwanindi Isaka. (Kutach. 12:1-3, 7; 13:14-17; 15:5, 18; 21:12) Kuhiñahu, Yehova wamwesekeli Abarahama chikupu nawa wamulejeli nindi yalambuli mwanindi akeñesheliyi. Chakadi nikushintajala, Abarahama  wovwahilili nawa cheliliyi nindi yalambuleña Isaka, kañelu kaNzambi kamulekesheli. Kuhiñahu, Nzambi wasanyikili nindi: “Nanochu chiwuneli chumichi, chiwunabuli kuñumina mwaneyi, weyi wumu hohu, nadisanyiki ami aweni, nami, kukukiswila nkisu nakakukiswila, nikuvulisha nakakuvulishila anyaneyi, akavula neyi tutumbwa twamwiwulu, neyi wusekulula wekala hachikumu chakaluñalwiji. Anyaneyi akaheta chisu chawayilumbu jawu. Kudi anyaneyi nyuza yejima yahamaseki yakawenaku kukooleka, nanochu chiwunovwahili mwizu dami.”—Kutach. 22:1-3, 9-12, 15-18.

7, 8. (a) Muloñadi Nzambi chasanyikililiyi kudi Abarahama? (b) Indi ‘anyikoku acheñi’ aYesu ahetelañamu ñahi muchikaninu chaNzambi chasanyikiliyi?

⁷ Muloñadi Nzambi chasanyikililiyi kudi Abarahama nindi yikaninu Yindi yakashikijewa? Wakeñeleña kukolesha answana aKristu, atuña chibalu chamuchiyedi ‘chalubutu’ lwachikaninu nikukolesha chikuhwelelu chawu. (Tañenu Aheberu 6:13-18; Ŋal. 3:29) Kapostolu Pawulu walumbulwili nindi Yehova “hakushaku kusanyika; kulonda nayuma yiyedi yakabalumukaña, [chikaninu nikusanyika kwindi] yabulaña kutweshayi Nzambi, kutwamba, tumwenuku kukundeja kukweti ñovu, etu . . . tukwati kukuchiñeja kwanatushiluwu kumbidi.”

⁸ AkwaKristu awayishewa hidiwu hohu ahetelaña muyikaninu yasanyikiliyi Nzambi kudi Abarahamaku. Kuhitila ‘mulubutu’ lwaAbarahama, Yehova wasanyikili nindi antu ‘akunyuza yejima yahamaseki yakawenaku kukooleka.’ (Kutach. 22:18) Antu wenawa akiswilawu abombelamu ‘anyikoku acheñi’ alondelaña Kristu akweti kuchiñeja kwakutambwila wumi wahaya nyaka hamaseki muparadisa. (Yow. 10:16) Hela tukweti kuchiñeja kwamwiwulu hela kwahamaseki, twatela ‘kukwata’ kukuchiñeja kwetu kuhitila mukumwovwahila Nzambi.—Tañenu Aheberu 6:11, 12.

KUSANYIKA KWANZAMBI KUKWAWU

9. Chikaninwinyi chasanyikiliyi Nzambi hampinji yayikwatiluwu anyana kaAbarahama muwunduñu kudi akwaEjipitu?

⁹ Chimwahitili yaaka, Yehova wasanyikili cheñi yikaninu yitunashimuni hewulu hampinji yamutemesheliyi Mosi nindi yayi nakuhosha nawanyana kaAbarahama, akwatiluwu wunduñu kudi akwaEjipitu. (Kwid. 6:6-8) Hakushimuna chikaninu chenichi, Nzambi wahosheli nindi: ‘Ifuku dinatondeli Isarela, . . . nayisanyikili nami nukuyifumisha mwituña daEjipitu, nakayitwali mwituña dinayili nakuyendeshela,  dikweti tuloña twamayeli nawuchi.’—Ezek. 20:5, 6.

10. Chumanyi chayikaniniyi Nzambi aIsarela hanyima yakuyifumisha muEjipitu?

¹⁰ Chelili aIsarela anayifumishi dehi muEjipitu, Yehova wasanyikili cheñi nindi: “Neyi chalala mukwovwahilaña izu dami, neyi mukuhembaña chitiyañenu chami, mukwikala chuma chalema, chamami aweni chakwambula munyuza yejima yawantu; muloña iseki dejima damami; mukwikala wanta wami wawatupristu, nimuza wajila.” (Kwid. 19:5, 6) Eña, Nzambi wayinkeli aIsarela kukooleka kweneni. Chumichi chatalishili mukwila nawu neyi ovwahilili, kachi antu amuniwu muza adi kwikala nakuchiñeja kwakuyizatisha kudi Nzambi nakwikala wanta wawatupristu kulonda antu ejima akahetelumu. Nkumininaku, Yehova walumbulwili neyi kwiji wayikoñela dehi aIsarela chuma chayikaniniyi, wahosheli nindi: ‘Mwalala, hinukusanyika kudeyi hinukutiyañana naneyi chitiyañenu.’—Ezek. 16:8.

11. Indi aIsarela ahosheli nawudi chelili Nzambi yayileji nindi atuñi chitiyañenu kulonda ekali antu jindi atondewa?

¹¹ Hayina mpinji, Yehova hakanjikijili aIsarela nindi asanyiki nawu akamwovwahilañaku; nawa Nzambi hayikanjikijili aIsarela nindi ekali nawubwambu wawuwahi nayenaku. Ilaña adihosheleli awenawu nawu: “Mwejima mwanahoshiyi Yehova tukwilamu.” (Kwid. 19:8) Chimwahitili mafuku asatu, Yehova Nzambi walejeli aIsarela chuma chateleleli kwila munza windi watondewa. Tachi, atiyili Nshimbi Ikumi, kuhiñahu Mosi wayilejeli nshimbi jikwawu jasonekawu mumukanda waKwidika 20:22 nakushika kuKwidika 23:33. A Isarela ahosheli nawudi? “Antu ejima aakwili nezu dawu dimu hohu, nawu, Mazu ejima anahoshi Yehova tukwila.” (Kwid. 24:3) Kuhiñahu Mosi wasonekeli nshimbi ‘mumukanda wachitiyañenu’ nawa wajitañili nañovu kulonda nyuza yejima yitiyi cheñi iyi nshimbi. Hanyima yakutaña, antu asanyikili kamuchisatu nawu: “Yejima yanahoshiyi Yehova tukwila, tukwovwahila.”—Kwid. 24:4, 7, 8.

12. Chumanyi cheliliyi Yehova niantu jindi atondewa kutalisha hachitiyañenu chatiyañenuwu nindi?

¹² Hashimbwili wanyi, Yehova watachikili kushikija chitiyañenu chaNshimbi kuhitila mukuloñesha itenti dakudifukwilamu nikutonda atupristu akukwasha antu akwanshidi kulonda adifukuleña kudi yena. Ilaña aIsarela akañenyi kwila mwadikaninuwu naNzambi ‘amuneñesheli Wambala waIsarela Wajila.’ (Mas. 78:41) Chakutalilahu, hampinji yayiliyi Mosi nakutambula nshimbi jikwawu kuMpidi yaSinayi, aIsarela akañenyi kuwunda nikumukuhwelela Nzambi nawa atachikili kutoñojoka nawu Mosi nayishiyi chisayikila. Dichi atuñili mukishi wawuru wamwana kañombi, nikuleja antu nawu: ‘Iwu diyi Nzambi yenu, enu aIsarela, diyi wayifumishili mwituña daEjipitu.’ (Kwid. 32:1, 4) Kuhiñahu elili chuma chateneneñawu nawu “chawija chaYehova” nawa atachikili kumufukamina nikumulambula iwu mukishi atuñiluwu. Chachimweniyi Yehova, wamulejeli Mosi nindi: “Anasenuki dehi swayi swayi munjila yinayilejeli.” (Kwid. 32:5, 6, 8) Chawushona, kufuma tuhu hayina mpinji, aIsarela asanyikileña kudi Nzambi ilaña afumpileña mwasanyikileñawu.—Kuch. 30:2.

KUSANYIKA KUKWAWU KUYEDI

13. Indi Nzambi wamukanini Mwanta Davidi nindidi nawa chinakundami ñahi kuchikaninu chaLubutu?

¹³ Muchiyuulu chaMwanta Davidi, Yehova wasanyikili cheñi yikaninu yiyedi kulonda antu ejima amwovwahilaña akahetelumu. Tachi, wasanyikili kudi Davidi nindi itanda dindi dakashakama haya  nyaka. (Mas. 89:35, 36; 132:11, 12) Chumichi chatalishili mukwila nawu Lubutu lwachikaninu akalutena nawu “Mwana kaDavidi.” (Mat. 1:1; 21:9) Mukudizoza, Davidi wateneni iwu mwana nindi “Mwanta” windi muloña Kristu wakekala hachifulu chabadika nankashi.—Mat. 22:42-44.

14. Chumanyi chasanyikiliyi Yehova kutalisha haLubutu lwachikaninu nawa twahetelañamu ñahi?

¹⁴ Chamuchiyedi, Yehova wamoneneni Davidi kushimuna nindi iwu Mwanta wabadika wakekala Kapristu Muneni wawantu. MuIsarela wanta niwupristu wadiña wambuka chikupu. Atupristu afumineña kumutaña waLevi nawa anyanta afumineña kumutaña waYuda. Kutalisha hadi nswana yindi, Davidi washimwini nindi: “Yehova hakumwila mwanta wami nindi, Shakamaku kuchikasa chami chachidiilu, nichinamba kayila ayilumbu jeyi hiyadi itanda dakunyendu yeyi. Yehova nasanyiki, hakubalumuka mwokuku, [nawa hakaditoñeshaku] nindi, Eyi wukapristu wahaya nyaka, wafwana neyi Melekizedeki.” (Mas. 110:1, 4) Hakushikija iwu wuprofwetu, Yesu Kristu, Lubutu lwachikaninu, chayinu mpinji nakuyuulila kuchikasa chachidilu chaNzambi mwiwulu. Cheñi, nakukalakala neyi Kapristu Muneni kuhitila mukukwasha antu abalumukaña mumuchima kulonda ekali nawubwambu wawuwahi naNzambi.—Tañenu Aheberu 7:21, 25, 26.

AISARELA AMAHA AMBALA ANZAMBI

15, 16. (a) A Isarela amuyadihi ayedi atenawu muBayibolu nawa anyi anakutambwila nkisu jaNzambi makonu? (b) Lushimbinyi lwalejeliyi Yesu atumbanji twindi kutalisha hakusanyika?

¹⁵ Hamuloña wakumukaana Yesu Kristu, muza wawaIsarela wajimbesheli wuselewa wawu naNzambi nikuchiñeja kwakwikala ‘wanta wawatupristu.’ Yesu walejeli anlomboli amuYuda nindi: “Dichi nukuyileja nami, wanta waNzambi akayamukawu, akawinka muza wakasoñaña nyikabu yawu.” (Mat. 21:43) Iwu muza wawiha watachikili haPentekosta 33 C.E. chelili spiritu yaNzambi yiichikili hadi atumbanji twaYesu 120 apompeleli muYerusalema. Antu wenawa ekalili ‘aIsarela ambala aNzambi’ nawa neyi mukulabula kwadisu antu amavulu afuma kunyuza yikwawu ekalili muniwu muza.—Ŋal. 6:16.

¹⁶ Kwambukaku nawaIsarela akumujimba, muza wawiha waNzambi wakuspiritu wunakutwalekahu kusoña nyikabu kuhitila mukumwovwahila Nzambi. Lushimbi lwakusanyika lwadiña hakachi kanshimbi jayilejeluwu nawu ovwahileña. Kusanyika akuzatishileña munjila yatama hampinji yadiñayi Yesu hamaseki, asanyikileña nsañu jakutwamba hela hatuyuma twabula kushikilamu. (Mat. 23:16-22) Yesu walejeli atumbanji twindi nindi: ‘Bayi wusanyika nihantuku . . . Chimukuhoshaña, kuminenu dakwila nenu, Eña, eña; Nehi, nehi; neyi mukushaku mazu eñi, chinafumi kudi watama.’—Mat. 5:34, 37.

17. Twakahanjeka hamalwihwinyi muchibaaba chinahiñuhu?

¹⁷ Komana chinayi mukwila nawu kusanyika kwekala kwatama mpinji yejima? Indi mazu akwila nawu Eña atalisha mudihi? Tukahanjeka hanawa malwihu muchibaaba chinahiñuhu. Hampinji yitukutoñojokaña chikupu Hezu daNzambi, twatela kwikala namuchima wakumwovwahila Yehova. Dichi Yehova wakatukiswila haya nyaka kwesekeja nayikaninu yindi yasanyikayi.

[Malwihu aKuzatisha haKudiza]

[Mazu ekoku adi hefu 26]

Yehova washikijaña yikaninu yindi

[Mwevulu wudi hefu 24]

Katataka Abarahama yakamoni kushikijewa kwayikaninu yaYehova