Nsañu Yachihandilu

Wubwambu Wayaaka 60 Nawa Wudi Neyi Dihutunadikwati

Mu 1951 munooña, namelela anyikwenzi awana, wejima wawu adiña muyaaka yakutachika yamuma 20 emeni mutumatala nakutemeshela nshiña mumusumba waIthaca, muNew York, U.S.A., nawa azañaleli hakutemesha nshiña kumaluña akwakulehi kuMichigan, Iowa nikuCalifornia. Atachikili kulejaku akwawu nsañu yayiwahi yayilejeluwu!

MUKAKWEJI kahitili kaFebruary, apayiniya 122 ashikili muSouth Lansing, muNew York, kulonda awaniki kuShikola yaGileyadi yanaambala 17. Hakachi kanawa akekala amishonali hadiña Lowell Turner, William (Bill) Kasten, Richard Kelsey niRamon Templeton. Lowell niBill afumini kuMichigan, Richard wafumini kuIowa, Ramon wafumini kuCalifornia adilukili neyi mukulabula kwadisu.

Chimwahitili tukweji tutanu, wejima wawu azañaleli nankashi chayilejeluwu nawu Mana kwetu Nathan Knorr wakuchishina chamutayi chamukaayi nakwinza nakuhosha nawatudizi. Awa amana kwetu awana adikasili hamu nawu neyi chinatwesheki akazatila hamu mwituña dimu. Komana ateleleli kwiluka yuma yayivulu kutalisha hamudimu wawu wawumishonali? Eña!

Chelili Mana kwetu Knorr yatachiki kuhosha nawatudizi ejima nakuyileja matuña kwakaya nakuzatilawu nyichima yawu yatachikili kuluza. Atudizi atachi kutambika hachinañamu adiña ana anyikwenzi awana akwawoma ilaña azañaleli chatiyiluwu nawu akuzatilaña hamu. Ayitemesheli kudihi? Akwawu atudizi ahayamini nikusakilila nankashi chelili abidiki nawu anakuyitemesha kuGermany.

A Yinsahu jaYehova ahayamineña nankashi hakutiya kashinshi kamwekesheleñawu aYinsahu muGermany kufuma tuhu mu 1933 muchiyuulu chaHitler. Atudizi amavulu anukili mpinji yatemesheluwu yakuvwala niwukwashu wukwawu nakuyitemeshela amana kwawu muEurope hanyima yaNjita yaMukaayi Yamuchiyedi. Antu jaNzambi muGermany amwekesheli chikuhwelelu chakola kudi Yehova, kukolela kuyuma yafuukwiluwu nikuhamuka. Lowell wanukaña mazu ahosheliyi nindi, ‘Ichi tukuyiluka chikupu amana kwetu niahela hamuntu hamuntu.’ Dichaleñeleli wejima wawu kuzañalala nikutemesha nshiña hanidi ifuku namelela!

HAYILEÑAWU KUGERMANY

HaJuly 27, 1951, mbopolu yaSS Homeland yafumini hachikumu chaEast River chamuNew York, awa amabwambu awana endeli lwendu lwamafuku 11 hakuya kuGermany. Mana kwetu Albert Schroeder, wumu wahadi antañishi yawu kuGileyadi nawa  wekalili membala waMwizaza Dalombolaña, diyi wayidizishili mazu atachi achiGerman. Chineli mumbopolu mwadiña antu amavulu akuGerman, hadaha adizililiku mazu amakwawu. Ilaña awa antu ahosheleña chiGerman chamboka-mboka. Aluwankeni nankashi.

Hela chakwila endeli lwendu lwalulehi nakukabakana, Hachiyedi nantetemena haAugust 7, amana kwetu ashikili mumusumba waHamburg muGerman. Amweni yuma yayivulu yakisikili munjita yamanini yaaka yitanu nachimu yahitili. Hamuloña wakutiya woma nayuma yamwenuwu akandamini masuwa yawufuku nakuya kuWiesbaden, kwadiña kasanji kamutayi.

Hachisatu nampinji yantetemena, adimweni naChinsahu watachi muGermany, wadiña nejina dachiGerman. Han wayitwalili kuBeteli namotoka kufuma kuchitesheni chamasuwa, wayishili mumakasa amuhela wachikulumpi wabulili kwiluka kuhosha Engilishi. Iwu muhela watoñojokeli nindi neyi yahosha nañovu akuchitiya. Hela chakwila watachikili kutohesha izu hakuhosha, iwu muhela ninawa amana kwetu awana atachikili kuhilashana. Nkumininaku, Mana kwetu Erich Frost, nkoñi wamutayi wenjili nakuyimusha namuzañalu nankashi muEnglishi. Yuma yatachikili kwenda chiwahi.

Kukumana kwakakweji kaAugust, awa amana kwetu awana apompeli kupompa kwatachi kweneni muchiGerman, kwahosheleña nawu “Kudifukula Kutooka” muFrankfurt am Main. Antu apompeli adiña 47,432 nawa awa amishonali chamwenuwu antu 2,373 ayipapatishi ekalili neyena nimpwila yakushimwina. Chimwahitili mafuku antesha, Mana kwetu Knorr wayilejeli nindi akushakama haBeteli nawa dihakuzatilañawu.

Chineli Ramon wakeñeli nankashi mudimu wawumishonali, mpinji yimu wakaanini kuya nakuzatila haBeteli muUnited States. Ilaña Richard hela Bill hiyadiña nayitoñojoka yakuzatila haBeteluku. Hela chochu, hamuloña wakudiluñisha chikupu mudimu wayinkeluwu, elukili chikupu nawu Yehova diyi weluka yuma yayiwahi yatela kuzatayi muntu. Dichi chachiwahi kulondela wunlomboli waYehova kubadika kushindamena hayuma yitunakukeña.  Neyi muntu yashindamena hadi Yehova wukumuzatilaña Yehova namuzañalu kwejima kunamutemeshuwu nawa nateli kuzata mudimu wejima wukumwinkawu.

VERBOTEN!

Amana kwetu amavulu muchisaka chaBeteli muGermany azañaleli nankashi hakwikala nawamana kwetu akuAmerica kulonda atachiki kudiza Engilishi. Ifuku dimu, iku adi mukapeka kakudyila, kudi chuma chamwekeni chaluwañesheli yuma yejima. Mana kwetu Frost, watachikili kuhosha nezu dakola chikupu muchiGerman hachuma chimu chalema nankashi. Amavulu muchisaka amweneni iku anakutala hayeña yawu. Awa amana kwetu amaha, hela chakwila hiyatiyileña yuma yahosheleñawuku, atachikili kutoñojoka nawu anakutena wena. Chelili Mana kwetu Frost yahoshi nañovu nindi, “VERBOTEN!” (“Chinjila!”) nakufuntila-funtilahu nañovu, wonsu wawu akameneni. Tunelidi mwaka yatachiki kuzuwa?

Akumishili kudya, antu ejima ayili kutupeka twawu. Nkumininaku, mana kwetu walumbulwili nindi: “Hakwila nawu mutukwashi chiña mutachiki kuhosha chiGerman. Dihafuma Mana kwetu Frost yahoshi nindi sampu munadizi idi idimi, kuhosha nanenu Engilishi hiVERBOTEN.”

Chisaka chaBeteli chovwahilili mwahosheliyi. Chumichi chayikwashili amana kwetu kudiza chiGerman nawa elukili nawu neyi mana kwetu wukweti kukeña yayifumba, hela chikuyeña ñahi hakusambila ilaña kwakwashanaña nankashi. Kufumba kwamana kwetu Frost kwamwekesheli nawu wakeñeleña kuloñesha kwaYehova kutwalekuhu nikukeña amana kwindi. * Dihafumini awa amana kwetu awana kumukeña!

YUMA YITWADIZILILI KUDI AMABWAMBU JETU

Tunateli kudiza yuma yayiwahi kudi amabwambu jetu amutiyaña Nzambi woma nawa chumichi chikutukwasha kwikala nawubwambu wawuwahi naYehova. Amana kwetu awana adizilili kudi amana kwetu niahela amavulu ashinshika akuGermany itukukañanya kutena majina ilaña adizilili cheñi kudi wumu namukwawu. Richard walumbulwili nindi: “Lowell welukili chantesha chiGerman nawa wahosheleña chiwahi, ilaña etu amakwawu twakabakeneña hakuhosha. Chineli diyi wadiña mukulumpi hakachi ketu, diyi itwehwileña mazu amakwawu amuchiGerman nawa diyi watulombweleña.” Ramon nindi: “Nazañaleli nankashi chelili mana kwetu wakuSwitzerland yatwinki  kaditala kanyanya kakukamamu hampinji yitwayili nakunooka hanyima yakuzatila kuGermany chaaka chimu! Twashakamini nyilungu yiyedi chakadi kukabakana nachiGerman! Ilaña nelukili wanyi yuma yatoñojokeleñayi Lowell. Watukonkomweneni nindi tutañeña nikuhanjeka hansona yefuku nantetemena muchiGerman. Watukonkomweneni nindi tutañeña hefuku hefuku nawa dimutwelileña. Ilaña twadizili chuma chachiwahi nankashi. Londelenu munakuyilejawu antu anakukeña kuyikwasha hela chakwila mpinji yikwawu himukwiteja munakuhoshawuku. Ichi chililu chinatukwashi nankashi hadi yaaka yayivulu nawa chatupelelaña kwovwahila anlomboli amukuloñesha.”

Awa amana kwetu awana adizili nawu atela kulemesha mazu anahoshi mukwawu neyi chahosha Afwilipi 2:3 nawu: “Chiña mutoñojokaña yakudizoza, iwu atoñojoki mukwawu, nindi wambadikami kuwaha.” Amakwawu amulemesheli Bill kuhitila mukumwinka nyidimu yamweneñawu wejima wawu asatu nawu nateli kuyizata chiwahi kubadika wena. Lowell wanukaña nindi: “Neyi yuma yinakali hela hadi yuma yitunakukeña kuzatilahu, twamwabilileña Bill. Welukileña chakumanisha kukala kwamwekeneña neyi chitwaditejeli wonsu wetu netu dichitwatela kwila, ilaña twakañenyeña kuhamuka nikwikala nawuswa wakwilamu.”

MALUWI AMUZAÑALU

Wejima wawu atachikili kusumbula wumu wumu. Wubwambu wawu washindameneni hakumukeña Yehova chikupu nihamudimu wampinji yejima, dichi afwilileña kusubula ahela amukeña Yehova nankashi. Mudimu wampinji yejima wayikwashili kwiluka nawu mukuhana mwafumaña wuloku wawuvulu kubadika wafumaña mukutambwila nawa twatela kutwamijaku Wanta kubadika yuma yitwakeña. Dichi asumbwili ahela atachikili aweni mudimu wampinji yejima. Wejima wawu awana adiña namaluwi amuzañalu.

Hakwila nawu wubwambu hela maluwi akoli chikupu chiña Yehova yekala hakachi. (Mukwa. 4:12) Hela chakwila aBill naRamon afwishili añodi jawu, wonsu wawu adiluñishili hawukwashu nimuzañalu wafumaña kudi mumbanda washinshika. Lowell niRichard atwalekeluhu kudiluñisha nawañodi jawu nawa Bill wasumbwili cheñi, watondeli mumbanda walumbuluka kulonda yatwalekuhu mumudimu wampinji yejima.

Muyaaka yalondeleleluhu, nyidimu yazatileñawu yayileñeleli kuya kumatuña amboka-mboka, kuGermany, Austria, Luxembourg, Canada, nikuUnited States. Dichi awa amana kwetu awana hiyazatilileña cheñi hamuku. Hela chakwila ambokelelumu, atiyañeneña nakuzañalela hamu hankisu jatambwililuwu nikudilila hamu muyihuñu. (Rom. 12:15) Twatela kulemesha nikuhameka nankashi wubwambu wamuchidiwu. Hiyawana yalema kufuma kudi Yehova. (Yish. 17:17) Wubwambu wamuchidiwu hiwamwekanaña mukanu kaayi kamakonuku. Ilaña akwaKristu alala ejima anakudiluñisha wubwambu wamuchidiwu. Etu aYinsahu jaYehova twadiluñishaña wubwambu nawakwetu akakwitiya  mukaayi kejima, sweje-e dinu naYehova Nzambi niYesu Kristu.

Awa amana kwetu awana anahiti mukukala neyi kwamonañawu antu ejima, hadaha hamuloña wakufwisha eni kwawu, kuyekela nayikatu yamaneni, kuhemba anvwali ashinakaja dehi, kukala kwamonañawu hakukulisha mwana iku adi mumudimu wampinji yejima, woma watiyañawu neyi ayinka mudimu wukwawu mukuloñesha nikuyekela nakukala kwenzaña nawushinakaji. Ilaña eluka cheñi nawu kwesekeja nakukala kwamonañawu amabwambu jetu hela adi hakamwihi hela adi kwakulehi, akwashaña antu amukeña Yehova kuumika chikupu kukala kwamonañawu.

WUBWAMBU WAHAYA NYAKA

Lowell, Ramon, Bill niRichard adihanini kudi Yehova iku adi nayaaka 18, 12, 11, ni 10 nawa atachikili mudimu wampinji yejima hadiñawu nayaaka hakachi ka 17 na 21. Elili neyi chahosha Mukwakutañisha 12:1 nawu: “Anukaña nawa Nleñi yeyi mumafuku awukwenzi weyi.”

Neyi mudi mukwaKristu weyala wakansi, neyi chikutwesheka itejenu mutambi waYehova wakutachika mudimu wampinji yejima. Hamuloña waluwi lwindi lwasweja, ninenu munateli kwikala namuzañalu neyi chadiluñishiluwu awa amana kwetu awana, azatilili muñinza, munkambi, mudimu wakwendela nyitayi, kuzatila haBeteli, kwikala mamembala amuKomiti yaMutayi; kutañisha muMashikola aMudimu waWanta nimashikola aMudimu wawuPayiniya nikuhana jimpanji hakupompa kwamaneni nikwanyanya. Awa amana kwetu awana azañaleleña hakwiluka nawu antu amavulu aheteleleña mumudimu wazatileñawu. Atwesheli kukalakala muloña etejeli mutambi wawuwahi waYehova wakumukalakela nawumi wawu wejima.—Kol. 3:23.

Chayinu mpinji Lowell, Richard, niRamon anakuzatila hamu cheñi hakasanji kamutayi katenañawu nawu Selters, muGermany. Chawushona Bill wafwili mu 2010 hampinji yazatileñayi neyi payiniya wadimena muUnited States. Wubwambu wanawa amana kwetu awana wunashimbuli hadi yaaka 60 waketukili hamuloña wakufwa! Ilaña Yehova Nzambi yetu havulamenaña amabwambu jinduku. Tunakuhweleli netu muchiyuulu chaWanta waNzambi, wubwambu wejima wawakwaKristu waketukaña hamuloña wakufwa wakekalaku cheñi.

Henohu kanda yafwi, Bill wasonekeli nindi: “Muwubwambu wetu wayaaka 60, hinanukañahu mpinji yitwabobweluku. Wubwambu wetu nawulemesheli nankashi.” Nawa amabwambu jindi asatu achidi nawumi akuhwelela nawu wubwambu wawu wukatwalekahu nimwituña dadiha nawa abombeleluhu nawu, “Wubwambu wetu wudi neyi dihu hitunadikwati.”

[Tumazu twaheshina]

[Mazu ekoku adi hefu 18]

Kudiluñisha munyidimu yawu kwayileñeleli eluki nawu Yehova weluka yuma yayiwahi yatela kuzatayi muntu

[Mazu ekoku adi hefu 21]

“Muwubwambu wetu wayaaka 60, hinanukañahu mpinji yitwabobweluku”

[Mwevulu wudi hefu 17]

Kufuma kuchimunswa kuya kuchidiilu: Richard, Lowell, Ramon, niBill adikwatili wubwambu kuGileyadi

[Nyevulu yidi hefu 18]

Hewulu: Ramon nakutañisha muShikola yaMudimu yaWanta; kuchidiilu: Richard nakuzatila hekina datenañawu nawu Addressograph haBeteli muWiesbaden

[Nyevulu yidi hefu 19]

Hewulu: Mana kwetu Frost (kuchidiilu) niakwawu hampinji yayileñawu nakuhempula naMana kwetu Knorr (kuchimunswa); kuchidiilu: Hampinji yayiluwu nakunooka kuSwitzerland mu 1952

[Mwevulu wudi hefu 20]

Kufuma kuchimunswa kuya kuchidiilu: Richard, Bill, Lowell, niRamon hadibulakenuwu muSelters hakuhana matala amaha hamutayi mu 1984

[Mwevulu wudi hefu 21]

Kufuma kuchimunswa kuya kuchidiilu: Ramon, Richard niLowell