Chineli Yehova Wanakenaña, Indochi Enu?

“Yehova [hi]Nzambi, wenzala nawushona, watoñaña antu, hazuwaña swayuku, . . . , wayanakenaña nikuluwa, ninyiloña, ninshidi.”—KWID. 34:6, 7.

WANENU ÑAKWILU

Yehova welili ñahi nanshidi yakoñeliyi Davidi niManase nawa muloñadi?

Muloñadi Yehova chabulililiyi kwanakena muza wawaIsarela wejima?

Hakwila nawu Yehova yatwanakeni twatela kwiladi?

1, 2. (a) Yehova wadimwekesheli nindi hiNzambi wamuchidinyi kumuza wawaIsarela? (b) Lwihwinyi lutukuhanjekahu muchinu chibaaba?

 MUMAFUKU aNehemiya, izanvu dawaLevi dashimwini mukulomba kwahatooka nawu ankakulula jawu ‘akaanineña kutiyilila’ nshimbi jaYehova. Hela chochu, Yehova wadimwekesheleña nindi ‘hiNzambi waanakenaña, waluwi, wenzala wushona, hazuwaña swayuku, wasweja luwi.’ Mumpinji yaNehemiya, Yehova watwalekeluhu kutiyila antu afumini muwunkoli luwi lwabadika.—Nehe. 9:16, 17.

² Wejima wetu twatela kudihula netu, ‘Chineli Yehova wanakenaña, indochi ami?’ Hakwila nawu twakuli ilu lwihu lwalema, tutalenu cheliliyi Nzambi nawantu ayedi, anakenenuwu kudi Yehova, anyanta ayedi Davidi niManase.

NSHIDI YAMANENI YAKOÑELIYI DAVIDI

3-5. Indi Davidi wakoñeli ñahi nshidi yahamesu bwi-i?

³ Hela chakwila Davidi wamutiyileña Nzambi woma, wakoñeli nshidi yahamesu bwi-i. Nshidi jiyedi jakoñeliyi wadivulumwini nawadisumbula, aUriya naBatisheba. Yuma yafumini munshidi yakoñeliyi yayineñesheli wejima wawu. Ilaña njila yamufumbililuwu Davidi kudi Nzambi yamwekeshaña nawu Yehova wanakenaña chikupu. Talenu chuma chamwekeni.

⁴ Davidi watemesheli amashidika amuIsarela kuya nakukuchika musumba weneni wawaAmoni, waRaba. Musumba weniwu wadiña kumusela waYerusalema nawa hadiña makilomita 80, kwishinadi daKaloña Yodana. Kwashaliliyi, iku wudi hewulu dachipañu chamuYerusalema, Davidi wamumweni Batisheba, mumbanda wasumbuka nakuwela. Nfumwindi wayili kunjita. Muchima waDavidi watachikili kweta chamumweniyi Batisheba chakwila wamuleteli  muchipañu nakwila nindi wuvumbi.—2 Sam. 11:1-4.

⁵ Davidi chelukiliyi nindi Batisheba nemiti, wamutambikili nfumwindi Uriya kufunta kuYerusalema nindi yakami nañodindi. Ilaña Uriya wakaanini kwiñila mwitala hela chakwila Davidi wamukanjikijili nindi yakami nañodindi. Kuhiñahu, mwanta wasonekeleli mukulumpi wawamashidika mukanda kumbadi nindi Uriya ‘amushi kumbidi yanjita yasweja ñovu’ nikuleja akwawu amashidika akamushiyi nkawindi kunyima. Dichi kwesekeja nakafuta katuñiliyi Davidi, Uriya wafwilili kunjita. (2 Sam. 11:12-17) Nshidi yakoñeliyi mwanta yawuvumbi yaswejeleluku chelili yajahi muntu wakadi muloña.

DAVIDI WAHIMPILI YILILU YINDI

6. Chumanyi cheliliyi Nzambi nanshidi yakoñeliyi Davidi nawa chumichi chamwekeshañadi hadi Yehova?

⁶ Hela chochu, Yehova wamweni yuma yejima yamwekeni. Kwosi chuma chabulaña kumonayi. (Yish. 15:3) Hela chakwila mwanta wamusumbwili Batisheba, ‘chuma cheliliyi Davidi chamutiyishili Yehova kutama.’ (2 Sam. 11:27) Indi Nzambi welilidi kutalisha hanshidi yamaneni yakoñeliyi Davidi? Watemesheli kaprofwetu kindi Natani kudi Davidi. Chineli hiNzambi wanakenaña, Yehova wakeñeleña njila yakumutiyila luwi. Komana njila yazatishiliyi Yehova yinayizañaleshi? Hamukanjikijili Davidi nindi yashimuni nshidi yinduku ilaña wamulejeli Natani kumuleja nsañu yamwekesheli nshidi yahamesu bwi-i yakoñeliyi. (Tañenu 2 Samweli 12:1-4.) Iyi njila yazatishiliyi Yehova yazatikili chachiwahi nankashi hakusompa iwu muloña wahamesu bwi-i.

7. Davidi wahosheli nindidi chelili Natani yamuleji chakutalilahu?

⁷ Chakutalilahu chaNatani chaleñeleli mwanta kufuukula mwawuñanji. Davidi wazuwili nankashi nansañu yanowu samaheta nawa wamulejeli Natani nindi: “Chahandayi Yehova kwaamu, owu iyala nakoñi chumichi nateli kufwa.” Davidi wahosheli cheñi nindi ona iyala wavulumwinuwu ateleleli kumufweta. Hohenohu yuma yihimpika nikuhimpika. Natani wamulejeli nindi: “Iyalowu yeyi.” Davidi amulejeli cheñi nawu hamuloña wanshidi yakoñeliyi, “mpoku yakabali” hiyakafuma kumutaña winduku nawa muchisaka chindi mwakekala kukala. Akamusawula cheñi hatooka hamuloña wanshidi jakoñeliyi. Davidi chelukiliyi nindi navulumuni chikupu nawa wadihosheleli nindi: “Namuvulumuni dehi Yehova.”—2 Sam. 12:5-14.

KULOMBA KWADAVIDI NICHAMWANAKENENUWU KUDI NZAMBI

8, 9. Indi nsona yaMasamu 51 yamwekesha ñahi chatiyiliyi Davidi nawa atukwashaña kwiluka nawu Yehova himuntu wamuchidinyi?

⁸ Mazu amukamina kasonekeliyi Mwanta Davidi hanyima yakuvulumuna amwekeshaña nawu waneñeli. MuMasamu 51 mwekala mazu aDavidi akumulembelela Yehova nawa wamwekesheli muchima wakudizoza chikupu hayiluwa yakoñeliyi. Nawa cheñi wadanakeneni nshidi yakoñeliyi. Davidi walemesheli nankashi wubwambu windi naNzambi. Wahosheli nindi, “Yeyi, yeyi hohu inavulumuni.” Wamulembeleli Yehova nindi: “Nleñelumu muchima wutooka eyi Nzambi; mbalumwini spiritu yayiha yakashinshi mukachi kami. . . . Nfuntishili muzañalu wawamwinu weyi; wunkoleshi naspiritu yakwovwahila.” (Mas. 51:1-4, 7-12) Komana mwamulejaña Yehova yiluwa yejima yimwakoñaña chakadi kusweka?

⁹ Yehova hakañesheli yihuñu yafumini munshidi yakoñeliyi Davidiku. Davidi wadi kutwalekahu kukabakana naniyi yihuñu muchihandilu chidi chejima. Ilaña, Yehova wamwanakeneni Davidi chamweniyi  nindi nabalumuki mumuchima nawa ‘muchima windi wachikekeli puchi.’ (Tañenu Masamu 32:5; Mas. 51:17) Nzambi watwesha yejima welukaña yililu yamuntu nichaleñelaña yaputoli. Chatela ana ayivumbi ayihishi namuloña wakuyijaha kudi ansompeshi awantu kwesekeja naNshimbi yaMosi, Yehova yomweni naluwi lwindi wafuukwiluhu kumanisha kukala kwaDavidi naBatisheba. (Lev. 20:10) Nzambi watondeli mwanawu Solomoni kwikala mwanta wawaIsarela wahiñiluhu.—1 Kushi. 22:9, 10.

10. (a) Chumanyi chaletesheli Davidi amwanakeni kudi Yehova? (b) Yumanyi yaleñelaña Yehova kwanakena antu?

¹⁰ Hadaha chuma chikwawu chaleñeleli Davidi amwanakeni kudi Yehova muloña wamutiyilili luwi Sawulu. (1 Sam. 24:4-7) Kwesekeja nachalumbulwiliyi Yesu, Yehova watwanakenaña neyi chitwanakenaña akwetu. Yesu nindi, “Bayi musompeshaña akwenuku, kulonda abuli kuyisompesha ninenu. Muloña kusompesha kumukusompesha akwenu diku kwakayisompeshawu nachu ninenu; chesekelu chimukuyesekela akwenu dichi chakayesekelawu ninenu.” (Mat. 7:1, 2) Chatuzañaleshaña chikupu hakwiluka netu Yehova nateli kutwanakena nshidi jetu, chili nshidi yeneni yawuvumbi hela yakujahana! Nateli kutwanakena neyi tukweti spiritu yakwanakena, neyi tumuleja nshidi jetu nawa neyi tukula mazala hamalola netu twakafuntilamu cheñi wanyi. “Yilaaka yakuhizumwisha” yafumaña kudi Yehova neyi akwanshidi abalumuka chikupu.—Tañenu Yililu 3:19.

MANASE WAKOÑELI NSHIDI YENENI ILAÑA WABALUMUKILI

11. Munjilanyi mwakoñeleliyi Mwanta Manase yuma yatama kumesu aNzambi?

¹¹ Tutalenu nsañu yikwawu yamuNsona yinakumwekesha nawu Yehova wanakenaña chikupu. Chimwahitili yaaka kwakwihi na 360 hanyima yakwila Davidi natachiki dehi kuyuula, Manase wekalili mwanta wamuYuda. Hadi yaaka 55 yayuuliliyi, wakoñeleña yuma yatama nawa yishimashima yakoñeliyi yamuneñesheli Yehova nankashi. Yuma yikwawu yakoñeliyi Manase, watuñilili Bayali tumeña, wafukaminineña “yileñaleña yamwiwulu yejima,” ‘wahitishileña anyanindi mukesi’ nawa walejeleña antu nindi apandeña. Eñañi, “welilaña yatama yayivulu kumesu aYehova.”—2 Kushi. 33:1-6.

12. Manase wafuntili ñahi kudi Yehova?

¹² Nkumininaku, Manase amufumishili mumukala windi nakumutwala mukaleya muBabiloni. Hampinji yadiñayi mukaleya watela wanukili mazu aMosi alejeliyi aIsarela nindi: “Chiwakamona yihuñu, niyuma yejimiyi yinakuwani dehi, hamafuku akukuminina wamba kafunta cheñi kudi  Yehova Nzambi yeyi, wamba katiyilila cheñi izu dindi.” (Kuhit. 4:30) Manase wafuntili kudi Yehova. Munjilanyi? ‘Watwalekeluhu kudizoza nankashi’ nawa ‘walombeleña’ kudi Nzambi (neyi chinamumwekeshuwu hefu 21). (2 Kushi. 33:12, 13) Hitukweti nsañu yayeni yashimwiniyi Manase mukulombaku, ilaña tuneluki netu mazu ahosheliyi adifwana namazu asonekeliyi Mwanta Davidi muMasamu 51. Hela chochu, Manase wabalumukili chikupu mumuchima windi.

13. Muloñadi Yehova chamwanakeneniyi Manase?

¹³ Indi Yehova wakwili ñahi kulomba kwaManase? “[Manase] hakulomba kudi yena, yena hakumwitija, hakutiya mwalembeleliyi.” Kufwana Davidi, Manase welukili nindi wavulumwini chikupu nawa wabalumukili chikupu mumuchima. Dihafumini Nzambi kumwanakena Manase nikumufuntisha cheñi hetanda dawanta muYerusalema. Chafuminimu, ‘Manase welukili nindi komana Yehova diyi Nzambi walala.’ (2 Kushi. 33:13) Chatuzañaleshaña hakwiluka netu Nzambi yetu wukweti luwi wanakenaña antu abalumukaña chikupu mumuchima!

KOMANA YEHOVA WATWALEKAÑAHU KWANAKENA?

14. Chumanyi chinateli kuleñela akwanshidi ayanakeni kudi Yehova?

¹⁴ Antu jaNzambi antesha makonu diwu anateli kulomba nawu ayanakeni nshidi jamaneni jakoñañawu neyi jakoñeluwu aDavidi naManase. Chineli Yehova wanakeneni awa anyanta ayedi chatukwashaña kwiluka netu Nzambi yetu wanakenaña nshidi jamaneni neyi mukwanshidi yabalumuka mumuchima chikupu.

15. Tuneluki ñahi netu Yehova hashikenaña dakwanakena antuku?

¹⁵ Dichi hitunateli kukunkulula netu Yehova washikenaña dakwanakena antu ejima nshidi yakoñañawuku. Tusambilenu kwesekeja yililu yaDavidi naManase nayawantu akwakudikaña amuIsarela naYuda. Nzambi watemesheli Natani kudi Davidi nawa wamwinkeli mpinji yakuhimpa  yililu yindi. Davidi wetejeli mwavulumwiniyi. Chelili Manase yaputoli, wabalumukili chikupu mumuchima. Ilaña, antu amuIsarela niamuYuda hiyabalumukileñaku. Dichi, Yehova hayanakenenuku. Ilaña, wayilejeleña kuhitila mudi atuprofwetu twindi nindi elileña yuma yatama. (Tañenu Nehemiya 9:30.) Yehova watwalekeluhu kuzatisha antemesha ashinshika, adi neyi Ezera nikaprofwetu Malaki nihampinji yafuminuwu aIsarela muBabiloni nakufunta kunyikala yawu. Awa antu azañaleleña nankashi neyi ela nkeñelu yaYehova.—Nehe. 12:43-47.

16. (a) Kutalisha kumuza wawaIsarela wejima, chumanyi chafuminumu chelili abuli kubalumuka mumuchima? (b) Kukoolekanyi kukwetuwu antu afuma kumuza wawaIsarela wakushankulu?

¹⁶ Hanyima yakumutemesha Yesu hanu hamaseki nakuhana mulambu wumu hohu wefutu danyiloña wawanina, Yehova walekeli kutambula nyilambu yawaIsarela yawanyama. (1 Yow. 4:9, 10) Hadiñayi namujimba wawuntu, Yesu wamwekesheli yitoñojoka yaTata yindi hakuhosha awa mazu nindi: “Eyi Yerusalema, Yerusalema, wajahaña atuprofwetu, waasaña malola antu akutemeshelañawu! O mapampa kuvula inakeñeli kukuñwija anyaneyi neyi chakuñwijañayi chaadi anyanindi mumpuula jindi, enu kwenu kwonti kwenu!” Dichi Yesu wahosheli nindi: “Talenu itala denu anayishiyilidu dehi yineli dehi kwachihembi hohu.” (Mat. 23:37, 38) Dichi muza wabulileña kubalumuka awusinsili kudi aIsarela akuspiritu. (Mat. 21:43; Ŋal. 6:16) Indi aIsarela akumujimba hamuntu hamuntu? Akweti kukooleka kwakuyanakena kudi Yehova nikuyitiyila wushona kuhitila mukumukuhwelela Nzambi nimulambu waYesu Kristu. Afu afwili chakadi kubalumuka mumuchima nakuleka nshidi jawu niwena akahetelamu ilaña chiña akasañulawu hadinu iseki dakatookeshawu.—Yow. 5:28, 29; Yil. 24:15.

NKISU JAFUMAÑA MUKWANAKENA KWAYEHOVA

17, 18. Chumanyi chitwatela kwila kulonda Yehova yatwanakeni?

¹⁷ Chumanyi chitwatela kwila chineli Yehova wakeñaña nankashi? Chakadi nikujina twatela kwila neyi cheliliyi Davidi niManase. Twatela kwiluka netu tudi akwanshidi, kuleka yiluwa yetu, kulomba chikupu kudi Yehova kulonda yatwanakeni nikulomba kulonda yatwinki muchima wutooka. (Mas. 51:10) Neyi tunakoñi nshidi yahamesu bwi-i, twatela cheñi kuleja aeluda kulonda atukwashi kuspiritu. (Yak. 5:14, 15) Hela chakwila tunakuhita mukukala, chatukundejaña hakwiluka netu Yehova wudi neyi chadilumbulwiliyi kudi Mosi nindi “Nzambi, wenzala nawushona, watoñaña antu, hazuwaña swayuku, wasweja niluwi, wavulisha ninsañu yalala; wahembaña luwi lwindi lwamakombakaji awantu, wayanakenaña nikuluwa, ninyiloña, ninshidi.” Yehova hahimpaku.—Kwid. 34:6, 7.

¹⁸ Yehova wazatishili chakutalilahu chachiwahi hampinji yayikaniniyi aIsarela abalumukili mumuchima nindi wakatookesha chikupu nshidi jawu “jichinana” “jakatooka to-o.” (Tañenu Isaya 1:18.) Chineli Yehova wanakenaña, indochi etu? Hakwila nawu atwanakeni chikupu nshidi ninyiloña yetu, chiña tubalumuka mumuchima.

19. Yumanyi yitwakahanjekahu muchibaaba chinalondeluhu?

¹⁹ Chineli Yehova watwanakenaña, tunateli kumwekesha ñahi muchima wakwanakena akwetu? Tunateli kutondolwela ñahi chaaku chakubula kwanakena antu aputolaña nshidi yahamesu bwi-i ilaña abalumukaña mumuchima? Chibaaba chinalondeluhu chikutukwasha kudishinshika mumuchima wetu kulonda twikali neyi Tata yetu wamwiwulu, Yehova, ‘wamuwahi nawa wanakenaña.’—Mas. 86:5

[Malwihu aKuzatisha haKudiza]

[Mwevulu wudi hefu 24]

Manase amufuntishili cheñi hetanda dawanta muYerusalema muloña Yehova wamwanakeneni