Danakenenu Chikupu Muntu Namukwawu

“Dovwahilenuña nikudanakena muntu namukwawu.”—KOL. 3:13.

MUKWAKULA NENUDI?

Muloñadi chitwatela kwikalila namuchima wakwanakena?

Chakutalilahwinyi chaheniyi Yesu kutalisha hakwanakena?

Nkiswinyi yitwatambwilaña hamuloña wakudanakena chikupu?

1, 2. Muloñadi chitwatela kutoñojokela hansañu yakwanakena?

 IZU daYehova datukwashaña kwiluka chamonañayi Nzambi nshidi nichatiyañayi neyi tuputola. Izu dindi datulejaña cheñi nawu Nzambi wanakenaña. Muchibaaba chinafumuhu, twadizili chayanakenenuwu aDavidi niManase kudi Yehova hayiluwa yakoñeluwu. Nshidi yakoñeluwu yayineñesheli nankashi chakwila adishimwinini aweni nawa adishiñili nawu hiyakafuntilamuku nawa abalumukili chikupu. Yehova niyena wayitambwilili cheñi namakasa ayedi.

² Tusambilenu kuhanjeka hansañu yakwanakena munjila yikwawu. Mwadi kutiya ñahi neyi ntaña yenu wumu wafwili hamuloña wachuma chakoñeliyi Manase? Mwadi kumwanakena Manase? Twatela kudihula ilu lwihu makonu muloña tunakushakama mwituña mudi ayiluwañimbi, akwamadombu niakwalwisu. Muloñadi mukwaKristu chatela kwikalilayi namuchima wakwanakena? Neyi yenu anavulumunuwu, chumanyi chikuyikwasha kulonda muwundishi muchima, hela kwila yuma kwesekeja nachakeñañayi Yehova nindi mwili kulonda mumwanakeni muntu wunayivulumuni?

CHUMA CHATULEÑELAÑA KWANAKENA AKWETU

3-5. (a) Chakutalilahwinyi chaheniyi Yesu kulonda yakwashi antiyilili indi kutalisha hakwanakena? (b) Chikumanyi chidi muchakutalilahu chaYesu chasonekawu haMatewu 18:21-35?

³ Neyi tunakukeña kushakama mukuwunda nawantaña jetu, amabwambu jetu, nawakwetu antu hela naYehova, twatela kwikala namuchima wakwanakena antu anatuvulumuni chili hiyakwaKristu muchipompelu hela nehi. Nsona yashimuna nawu akwaKristu atela kwanakena akwawu hela chakwila anayivulumuni kakavulu. Hakwila nawu ilu lushimbi lwakwanakena lutiyakani, Yesu waheni chakutalilahu chanduñu watambwili mukudi.

 ⁴ Nduñu watambwili kudi mwanta windi mali amavulu chakwila wateleli kuzatila wufwetu wamafuku 60,000,000 hakwila yakafuntishi mukudi, ilaña mwanta windi wamwanakeneni. Nkumininaku, iwu nduñu chanedikiyi, hakuwana mukwawu nduñu watambwili mukudi kudi yena wamali antesha wakuzatila mafuku hohu 100. Ona mukwamukudi walembeli nindi amwinkiku mpinji, ilaña ona nduñu wanakenenuwu mukudi weneni wamumbilili mukwawu nduñu mukaleya. Nkaka yindi chatiyiliyi nsañwiyi wazuwili nankashi. Nkaka yindi wamwihwili nindi: “Eyi kutiyila mukwenu nduñu . . . luwi, neyi china chinakutiyilami nehi? Nkaka yindi hakumuzuwila, hakumuhana [iwu nduñu wabulaña kwanakena] kudi akwakubabesha, nindi kufumamu chiña nafuti mukudi wejima.”—Mat. 18:21-34.

⁵ Chikumanyi chakonkomweneneñayi Yesu munichi chishimu? Wakunkulwili nindi: “Dichi chakayilayi nawa niTata yami wamwiwulu, neyi enu mukubula kwanakena akwenu nyiloña yawu munyichima yenu.” (Mat. 18:35) Yesu wahosheli mwalala. Nshidi yitwavulumuna muchihandilu chetu chejima chakubula kuwanina yamwekeshaña nawu twakañanyaña kwovwahila nshimbi jaYehova chikupu. Ilaña wudi namuchima wakutwanakena nikujima nshidi jetu neyi kwiji twajikoñeli wanyi. Dichi, antu ejima anakufwila kukwata wubwambu naYehova atela kwikala namuchima wakwanakena akwawu. Hela neyi chahosheliyi Yesu muMpanji yaHampidi nindi: “Neyi mukwanakena antu nyiloña yawu, niTata yenu wamwiwulu wakayanakena ninenu nawa. Neyi mukubula kwanakena antu nyiloña yawu, Tata yenu niyena hakayanakena nyiloña yenuku.”—Mat. 6:14, 15.

6. Muloñadi kwanakena chikwakalila?

⁶ Munateli kuhosha nenu, ‘Twatela kwanakena antu, ilaña kuhosha kwaswayi kwilamu kwakala.’ Muloña twahilaña nankashi neyi anatuvuloki. Muntu nateli kuhila, neyi anamufukejeli hela nakukeña nindi muntu wunamuvuloki amubabeshi hela kufuntisha katama nakatama. Antu amakwawu ahoshaña nawu muntu wunayivulumuni hiyakamwanakenaku.  Neyi dichimwatoñojokaña, munateli kwikala ñahi namuchima wakwanakena neyi chakeñañayi Yehova?

SHINSHIKENU HACHUMA CHINALETESHI MUHILI

7, 8. Chumanyi chikuyikwasha kwanakena akwenu neyi anayivulumuni hamuloña wayililu yawu yatama?

⁷ Twahilaña nankashi neyi anatwili katama hela tutoñojoka netu anatuluwañeshi. Talenu cheliliyi mukwenzi wumu hampinji yahililiyi: “Ifuku dimu . . . nahilili nankashi, nedikili mwitala nakuhosha nami nakafuntamu cheñi wanyi. Wadiña mwaana wankankela nawa nayili mukanjila kakalolu, muchima watachikili kuwunda hakumona maluña amawahi nawa chimwahitili maora antesha ndulu yamanini nifunta nikwitala.” Neyi chinashimunuwu munichi chakutalilahu, kwikala nampinji yeneni yakuwundisha muchima nikutala hayuma yinamwekani mukuwunda kunateli kuyikwasha kubula kwila yuma yimukaditoñesha kumbidi.—Mas. 4:4; Yish. 14:29; Yak. 1:19, 20.

⁸ Mwatela kwiladi neyi muchidi nandulu mumuchima? Fwilenu kwiluka chuma chinaleñeli mwikali nandulu. Munahili muloña wakwila anayikasili nyiloña indi kwiji anayili katama? Tahindi munakutoñojoka nenu mukwenu nayivulumuni hohu mumushikila? Chuma chinayiliyi chatama nankashi? Neyi mutoñojoka chikupu nikwiluka chuma chinaleteshi muhili chikuyikwashaku kuwana njila yayiwahi yamuNsona yakumanishilamu kukala kumukweti. (Tañenu Yishimu 15:28; 17:27.) Kutoñojoka muniyi njila kukuyikwasha nankashi kwikala namuchima wakwanakena. Neyi muzatisha iyi njila hela chakwila yakala, dikwila nawu munakwiteja izu daNzambi dishinshiki ‘yitoñojoka niyuma yafuukulaña muchima wenu’ nawa chumichi chikuyikwasha kwimbujola yililu yaYehova yakwanakena.—Heb. 4:12.

KOMANA MUKUTACHIKA KULENDUMOKA?

9, 10. (a) Munateli kwiladi neyi mumona nenu anayivulumuni? (b) Kwikala nayililu yayiwahi nimuchima wakwanakena kunateli kuyikwasha ñahi?

⁹ Kudi yuma yayivulu yatuhilishaña. Chakutalilahu, neyi munakwendesha motoka yenu, fwikijenu neyi motoka yikwawu yakeña kuhuma mumotoka yenu. Mukwila ñahi? Mwatiyahu dehi antu alendumokaña hamukwakwa hamuloña wakuhila nankashi chakwila alotokela nimukwawu ñendeshi. Ilaña enu hakwikala akwaKristu kwila mwila chuma chamuchidiwu nehi.

¹⁰ Henohu kanda mwili chuma, sambilenu kutoñojoka chuma chinaleñeli. Hadaha ninenu mwaluwañesha hachuma chinamwekani muloña mwasha maana kwacheñi. Hekwawu motoka yanowu ñendeshi yinafwi. Ichi chakutalilahu chinakutuleja nawu twatela kufwomona ndulu neyi twiluka chuma chaletesha maposu amwekani, muloña hituneluki yuma yayeni yaleñelaku nawa chumichi chikutuleñela tuyanakeni. Nsona yaMukwakutañisha 7:9 yahosha nawu: “Bayi wunyakala kuzuwa mumuchima weyuku; muloña kuzuwa kwashakama muntulu jawayisupi.” Dichi bayi musweja kulendumokaku. Kakavulu, twatoñojokaña netu anatuvulumuni mumushikila, komana nehi, yumiyi yamwekanaña hamuloña wakubula kuwanina hela kubula kwiluka munatalishiyi mukwenu. Anukenu nenu himukutwesha kwiluka yuma yejima yatoñojokañayi muntu hela kuhoshaku, dichi mwekeshenu muchima wakukeña nikwanakena. Mwakazañalala nankashi neyi mwila mwenimu.—Tañenu 1 Petulu 4:8.

‘KUWUNDA KWENU KUKUFUNTA CHEÑI KUDENU’

11. Chineli tudi akwakushimwina aWanta, tunateli kwiladi neyi antu aneteji hela anakaani nsañu yayiwahi?

¹¹ Munateli kudihemba ñahi neyi  muntu nayihosholi hampinji yimunayi nakushimwina? Hampinji yatemesheliyi Yesu akwakushimwina 70, wayilejeli nindi akaleti kuwunda hamatala ejima hakawanañawu antu. Yesu wahosheli nindi: “Neyi mudi muntu wawunda, kuwunda kwenu kwakekala hadi yena; neyi nehi, kuwunda kwenu kwakafunta cheñi kudenu aweni.” (Luka 10:1, 5, 6) Twazañalalaña neyi antu eteja nsañu yitwashimwinaña muloña tuneluki netu akuhetelamu nankashi. Mpinji jikwawu, twawanaña antu akaanaña. Tukwiladi? Yesu nindi kuwunda kutwaleta hadi mwiniitala kukufunta kudi etu aweni. Dichi, twatela kufuma hanodu itala nakuwunda munyichima yetu hela chakwila antu anatuhosholi. Ilaña neyi tukwilaña cho-leta, tukuleta wufwinda.

12. Kwesekeja namazu aPawulu adi haAefwesesa 4:31, 32, twatela kwiladi?

¹² Fwilenu kuleta kuwunda mpinji yejima, bayi mumudimu wawakwaKristu wakushimwina hohuku. Kwikala namuchima wakwanakena antu hichinayi mukwila nawu mwitejeña hela kudiwula yiluwa yaletaña wufwindaku. Ilaña, muntu wanakenaña hahembelaña nkunyi muntu wamuvulokeluku nawa waletaña kuwunda. Antu amakwawu endaña hohu chikasa munshiñu muloña wakutoñojoka hayuma yatama yayikoñeluwu akwawu. Yitoñojoka yamuchidiwu bayi yiyimika mushinduku. Anukenu nenu mukendaña hohu makasa munshiñu neyi mukuhembelaña akwenu nkunyi. Dichi danakenenuña!—Tañenu Aefwesesa 4:31, 32.

ILENU YUMA YIKUMUZAÑALESHA YEHOVA

13. (a) Indi mukwaKristu ‘walumbikilaña ñahi makala akesi’ hamutu wachilumbu chindi? (b) Chumanyi chafumaña mukwakula muntu wunatuvuloki mumesu awunda?

¹³ Mpinji yikwawu munateli kukwasha muntu wunayili katama kulonda yeluki nshimbi jawakwaKristu. Kapostolu Pawulu wasonekeli nindi: “Neyi chilumbu cheyi natiyi nzala, mwinki yakudya adyi; neyi natiyi mpwila, mwinki menji anwi; muloña neyi mukwila mwenomu, wukumulumbikila makala akesi hamutu windi. Kutama bayi kuyimika mushinduku; fwomonenu yatama nayayiwahi.” (Rom. 12:20, 21) Neyi muhosha mumesu awunda hampinji yinayivulokuwu, mukufwomona ndulu yamuntu wunayivuloki nawa mukuleta kuwunda. Neyi mwiluka chadiyi muntu wunayivuloki nikumutiyila luwi niwushona, mukumukwasha kulonda yeluki chalala chamuBayibolu. Hela chakwila nayili katama, wukutachika kutoñojoka hayililu yenu yayiwahi neyi mumwakula mukuwunda.—1 Pet. 2:12; 3:16.

14. Hela chakwila muntu nayivulumuni chikupu, muloñadi chimukubulila kumuhembela nkunyi?

¹⁴ Mpinji jikwawu, hitwatela kudikunda nawantu amakwawuku. Hakachi kanawantu hanabombeli antu adiña muchipompelu avulumwini, abulili kubalumuka mumuchima nawa ayihaña. Neyi muntu wamuchidiwu nayivulumuni, chikuyikalila nankashi kumwanakena hela chakwila nabalumuki mumuchima, muloña hashimbulaña nankashi hakwila nawu muvulameni mwayikoñeliyi. Neyi mukweti kukala kwamuchidiwu, twalekenuhu kulomba kudi Yehova kulonda yayikwashi mwikali namuchima wakwanakena mukwakuvulumuna wunabalumuki. Mukwiluka ñahi jidi mumuchima wamukwenu? Yehova weluka. Washinshikaña mukachi kamuchima wamuntu nawa wadiwunjikaña nawakwakuputola. (Mas. 7:9; Yish. 17:3) Dihafuma nsona kuhosha nawu: “Bayi mwila mwinenu chatama nakatama kanayiliyuku. Keñenu kwila yuma yalumbwa kumesu awantu ejima. Neyi chikutwesheka, shakamenu chachiwahi nawantu ejima, mwejima mumukutweshela enu aweni. Enu akwetu twakeña, bayi muditendaku; kuminenu dakwovwahila kuzuwa, muloña  anasoneki nawu, Yehova nahoshi nindi, Yami nukutenda, yami nukufweta.” (Rom. 12:17-19) Komana mukushikena kuwana nyiloña mudi akwenu? Inehi. (Mat. 7:1, 2) Mwatela kwiluka nenu Nzambi hohu diyi ñaji waloña.

15. Yumanyi yitwatela kwiluka hadi muntu wunatuvulumuni yikutukwasha kuhimpa yililu yetu?

¹⁵ Neyi mwiluka nenu anayili katama nawa chinakuyikalila kwanakena muntu wunayivulumuni wunabalumuki mumuchima, anukenu nenu niyena chinakumuyeña kumuchima nankashi. Niyena nakwaboka hamuloña wakubula kuwanina. (Rom. 3:23) Yehova watiyilaña akwanshidi ejima wushona. Dichi, mwatela kulombelaku muntu wunayivuloki. Neyi tukulombelañaku antu atuvulumunaña, hitukuyihembelaña nkunyiku. Yesu wahosheli nindi bayi tuhembelaña antu atukabishaña nkunyiku, nindi: “Keñenu ayilumbu jenu, ninawa ayikabishaña, yilombelenu.”—Mat. 5:44.

16, 17. Chumanyi chimwatela kwila neyi aeluda akwaKristu ahakula nawu mukwanshidi nabalumuki nawa muloñadi?

¹⁶ Kwesekeja nankeñelu yaYehova, aeluda akwaKristu ayinka mudimu wakutala hayiluwa yakoñañawu antu muchipompelu. Awa amana kwetu hiyelukaña yuma yejima neyi chelukañayi Nzambuku ilaña afuukulaña kwesekeja nawunlomboli waMwizu daNzambi nispiritu yajila. Dichi yuma yafuukulañawu hansañu yamuchidiwu hanyima yakulomba kudi Yehova yamwekeshaña chatoñojokañayi.—Mat. 18:18.

¹⁷ Twatela kwovwahila munsañu yamuchidiwu. Munateli kwanakena nikukeña muntu anasompeshuwu wunabalumuki mumuchima? (2 Kor. 2:5-8) Chumichi chinateli kuyikalila sweje-e neyi yenu anakoñuwu katama hela ntaña yenu diyi wunaluwañeshi. Dichi mukuwahisha neyi mumukuhwelela Yehova nikwiluka nenu wukumanisha kukala kwejima kuhitila muchipompelu. Mukumwekesha nawu mwanakenaña chakufuma hamuchima.—Yish. 3:5, 6.

18. Nkiswinyi yimukutambwila hamuloña wakwanakena akwenu chikupu?

¹⁸ Ankuluñaña adiza hansañu jawoñu ahoshaña nawu kwanakena chakufuma hamuchima hiyitumbu. Kwatuukaña hamuloña wakubula kuhemba nkunyi nikuneña munyichima yetu nawa kwakoleshaña wubwambu wetu chikupu. Ilaña muntu wabulaña kwanakena akwawu wayekelaña nayikatu, hekalaña nawamabwambuku, waneñaña nawa chamukalilaña kuhanjeka nawakwawu. Neyi tukwanakenaña akwetu, tukutambwila nkisu yabadika yafumaña kudi Tata yetu wamwiwulu, Yehova yakwikala nawubwambu wawuwahi nayena.—Tañenu Akolose 3:12-14.

[Malwihu aKuzatisha haKudiza]

[Mwevulu wudi hefu 27]

Chikumanyi chashimwiniyi Yesu muchakutalilahu chindi?

[Mwevulu wudi hefu 30]

AkwaKristu ejima atela kwanakena akwawu