Malwihu Kufuma Kudi Antañi

Komana mazu aYesu adi haMatewu 19:10-12 atalisha mukwila nawu antu afuukulahu kushakama wujiki atambwila chawana chawujiki muchihayamisha?

▪ Talenu yuma yaletesheli Yesu yahoshi hansañu yawujiki. Chelili Afwarisi enzi kudi yena nansañu yakudiseña, Yesu wayilumbulwilili chiwahi chahosha nshimbi jaYehova kutalisha hamaluwi. Hela chakwila Nshimbi yetejeli iyala kusoneka mukanda wakudiseñelahu neyi yamona “chuma chakubula kutela” mudi iñodindi, ichi dichichadiña wanyi hakusambila. (Kuhit. 24:1, 2) Kuhiñahu Yesu wahosheli nindi: ‘Yowu muntu wukuseña iñodindi, chiña namuloña wawuvumbi hohu, nakusumbula wacheñi, neli wuvumbi.’—Mat. 19:3-9.

Chachitiyiluwu, atumbanji ahosheli nawu: “Neyi nsañu yamuntu nañodindi yidi chochichi, komana kusumbula hichachiwahuku.” Yesu wayakwili nindi: ‘Antu ejima hiyakutwesha kwiteja izu iduku, chiña anenkuwu hohu [chawana]. Muloña kudi antu afwa mwitala chakuvwalika mumavumu awamama jawu; kudi antu afwa mwitala chakuyila kudi antu; kudi nawa antu afwa mwitala chakudila awenawu hansañu yawanta wamwiwulu. Yowu natweshi kutambula, atambuli.’—Mat. 19:10-12.

Antu afwa mwitala, avwalikileña naniwu wufwayi kufuma mumavumu awamama jawu indi kwiji hamuloña wawubanji wamwekeni hela ayisokweli. Ilaña, kwadiña cheñi antu adifwishileña aweni mwitala. Hela chakwila ateleli kusumbula, afukwiluhu kudihemba nikutwalekahu kushakama wujiki ‘hamuloña wansañu yawanta wamwiwulu.’ Kufwana Yesu, atondeluhu wujiki kulonda adikiteña mumudimu waWanta. Bayi neyi asemukili nachawana chakwikala ajikiku hela ayinkeli ichi chawanaku. Ilaña afukwiluhu awenawu kwikala ajiki, dikwila nawu atambwili ichi chawana mumushikila.

Kunuña hamazu ahosheliyi Yesu, kapostolu Pawulu walumbulwili nindi hela chakwila akwaKristu ajiki hela adisumbula anateli kuzatila Nzambi chiwahi, ilaña ajiki ‘adikaña munyichima yawu’ nikutwalekahu ‘akusweja kwila mwabadika.’ Munjilanyi? Asumbula anateli kwikala nampinji yakwila yuma yikumuzañalesha mwinikwawu nikumwakamena. Ilaña akwaKristu ajiki anateli kudikita chikupu mumudimu waMwanta chakadi wakuyikañesha. Amonaña wujiki wawu nawu ‘hichawana’ chakufuma kudi Nzambi.—1 Kor. 7:7, 32-38.

Dichi Nsona yatulejaña nawu mukwaKristu hatambwilaña chawana chawujiki muchihayamishaku. Ilaña wekalaña nanichi chawana kuhitila mukubula kusumbula kulonda yakalakaleña mudimu waWanta chakadi wakumukañesha. Makonu antu amavulu afuukulañahu kushakama wujiki hamuloña waWanta, dichi twatela kuyihameka.