“Nleji Kwila Mwaya Muchima Weyi”
“Nleji Kwila Mwaya Muchima Weyi”
“Nleji kwila mwaya muchima weyi, muloña yeyi Nzambi yami.”—MAS. 143:10.
YIKUMA YIMWATELA KWANUKA
Yumanyi yamumwekeneni Davidi yamwekeshaña nawu wamweneña yuma neyi chayimonañayi Yehova?
Chumanyi chamukwashili Davidi kwiluka nkeñelu yaNzambi?
Chumanyi chikutukwasha kushakama mukukeña kwaYehova?
1, 2. Kutoñojoka hakwila nkeñelu yaNzambi kwatukwashaña ñahi nawa yumanyi yitukudizila kudi Mwanta Davidi?
FWIKIJENU munakwenda munjila yahampidi. Muwana nimakenu. Njila yimu yidihi yimukuya? Munateli kukandama helola didi kwakwihi kulonda mutali kunayi iji njila. Dichitwatela kwila neyi kudi yuma yalema yitunakukeña kufuukula. Kumona yuma neyi chayimonañayi Nleñi wamwenaña halehi kukutukwasha ‘kwenda munjila’ yamuzañaleshaña Yehova.—Isa. 30:21.
2 Muchihandilu chindi chejima, Mwanta Davidi wamuIsarela wakushankulu watushila chakutalilahu chachiwahi chakwila nkeñelu yaNzambi. Tutalenu yuma yamwekeni muchihandilu chaDavidi kulonda tudizili kuyililu yamwekesheliyi yakumukuhwelela Yehova Nzambi chikupu.—1 Anya. 11:4.
DAVDI WALEMESHELI CHIKUPU IJINA DAYEHOVA
3, 4. (a) Yumanyi yamuleñeleli Davidi kulwa naGoliyati? (b) Indi Davidi wamweneña ñahi ijina daNzambi?
3 Toñojokenu hampinji yayili Davidi nakulwa nachilobu chawaFwilistinu Goliyati. Chumanyi chaleñeleli iwu kansi Davidi kuya nakulwa naniwu mushidika nawa chilobu waleheli mamita 2.9? (1 Sam. 17:4.) Komana kuhamuka kwaDavidi dikwamuleñeleli? Indi kwiji hamuloña wakumukuhwelela Nzambi? Iyi yililu yejima yiyedi yamukwashili kwikala nawulobu. Hela chochu, hamuloña wakumulemesha Yehova nijina dindi dabadika dikwamusañumwini Davidi kuya nakulwa naniwu chikelamu weyala wasweja kuleha. Davidi wehwili nakuhila nindi: “Ochu yeniwu chidima chakaFwilistinu hiiyalanyi ntahi mwaka aswidikijaña njita jaNzambi wamumi?”—1 Sam. 17:26.
4 Hampinji yamuwaniniyi Goliyati, Davidi wahosheli nindi: “Eyi wunenzi kudami nampoku yakabali, neyoña, nankebu; ilaña ami nenzi kudeyi mwijina daYehova wamazaza, Nzambi yanjita jawaIsarela jiwunaswidikiji.” (1 Sam. 17:45) Hamuloña wakushindamena hadi Nzambi walala, Davidi wamujahili chikelamu cheyala chawaFwilistinu nelola dimu hohu damwasiliyi namalekenyi. Davidi wamukuhweleli Yehova muchihandilu chindi chejima nikulemesha nankashi ijina dindi bayi hayina mpinji yamujahiliyi Goliyati hohuku. Eñañi, Davidi walejeli akwawu aIsarela ‘kuhameka ijina daYehova dajila.’—Tañenu 1 Kushindulula 16:8-10.
5. Kukalanyi kumunateli kumona kumukwesekeja nakasawuntu kaGoliyati?
5 Komana mwazañalalaña hakwiluka nenu Yehova diyi Nzambi yenu? (Yere. 9:24) Mwatiyaña ñahi neyi mutiya antuñi nenu, amabwambu jenu, akwenu akashikola hela antaña jenu anakumusawula Yehova nikufukishila aYinsahu jindi? Komana mwamuhakwilañaku Yehova neyi ijina dindi anakudisawula nikukuhwelela nenu wukuyikwasha? Eña, kudi “mpinji yakumwena,” ilaña bayi tutiyaña nsonyi hakwikala aYinsahu jaYehova niatumbanji twaYesuku. (Mukwa. 3:1, 7; Maku 8:38) Hela chakwila twatela kubabala hakuhosha nawakwantadi, bayi twikala neyi aIsarela ‘akamini nakutiya woma nankashi’ chatiyiluwu mazu aGoliyati akasawuntuku. (1 Sam. 17:11) Ilaña, twilenuña yuma mukubabala kulonda tulemeshi ijina daYehova Nzambi. Tunakufwila kukwasha antu kulonda eluki chekalayi Yehova Nzambi. Dichi twazatishaña Izu dindi kukwasha nachu antu kulonda eluki chatela kukundaminawu kwakwihi naNzambi.—Yak. 4:8.
6. Chumanyi chakeñeleñayi Davidi kwila hampinji yayiliyi nakulwa naGoliyati nawa chumanyi chitwatela kwakamena nankashi?
6 Kudi chuma chikwawu chalema chitwadizilaña kudi Davidi walwili naGoliyati. Chelili Davidi yenzi lufuchi kwazuñilileñawu njita, wehwili nindi: “Iyala wakajaha iwu kaFwilistinu wakakololola aIsarela nsonyi akamwila ñahi?” Antu ahosheli mazu ahosheluwu hakusambila nawu: “Iyala wakamujaha [Goliyati] akamuhetesha maheta amavulu kudi mwanta, wakamwinka nimwanindi wamumbanda.” (1 Sam. 17:25-27) Kwikala namaheta bayi neyi dichuma chakeñesheliyi Davidiku. Ilaña kudi chuma chakeñeleñayi nankashi. Davidi wakeñeleña kulemesha Nzambi walala. (Tañenu 1 Samweli 17:46, 47.) Indi etu? Komana twasha muchima nankashi hakwikala nejina kuhitila mukudilumbikila maheta nikutiyakana mukaayi? Eña, tumwimbujolenu Davidi, wembili nindi: “Mulemeshenu Yehova nanami hamu, tutuumbakeshenu ijina dindi hamu.” (Mas. 34:3) Dichi tumukuhwelelenu Nzambi, nikusambila kulemesha ijina dindi bayi detuku.—Mat. 6:9.
7. Tunateli kwikala ñahi nachikuhwelelu chakola neyi tuwana akwantadi?
7 Davidi wateleleli kumukuhwelela Yehova nankashi kulonda yahamuki hakulwa naGoliyati. Kansi Davidi wadiña nachikuhwelelu chakola. Washindameneni hadi Nzambi hampinji yazatileñayi mudimu wawukabiña, chumichi chamukwashili kwikala nachikuhwelelu chakola. (1 Sam. 17:34-37) Ninetu nawa twatela kwikala nachikuhwelelu chakola nankashi hakwila nawu tutwalekuhu kushimwina, sweje-e neyi tuwana akwantadi. Tunateli kwikala nachikuhwelelu neyi tukushindamenaña hadi Nzambi munyidimu yetu yitwazataña hefuku hefuku. Chakutalilahu, tunateli kutachika kuhanjeka hansañu yalala yamuBayibolu namuntu itunashakami nindi mubasi. Dichi twatela kuhosha nawantu ejima itwawanaña mumukwakwa neyi tunayi nakushimwina kwitala nikwitala.—Yil. 20:20, 21.
DAVDI WAMUCHIÑILILEÑA YEHOVA
8, 9. Davidi wamwekesheli ñahi nindi watwamijiluku nkeñelu yaYehova hampinji yamukeñeleñawu kudi Mwanta Sawulu?
8 Davidi wamwekesheli cheñi nawu wamukuhweleleli Yehova kuhitila mukumulemesha Sawulu mwanta waIsarela. Mwanta Sawulu wechima wesekeli mapampa kasatu nindi yamwasi Davidi nzwa-a neyoña, ilaña Davidi waleyeli, hakeñeli kufuntisha katama nakatamaku. Nkumininaku, wamutemukili Sawulu. (1 Sam 18:7-11; 19:10) Kuhiñahu, Sawulu wasendeli amayala 3,000 atondeluwu kufuma mudi aIsarela ejima nawa ayili nakumukeña Davidi mwisaña. (1 Sam. 24:2) Nkumininaku, Sawulu chakadi kwiluka weñilili mwiyeñu mwadiña Davidi niamayala adiñayi nawu. David kachi wamujahili mwanta wakeñeleña kukisañana wumi windi hayoyeniyi mpinji. Nawa nkeñelu yaNzambi yadiña yakwila nawu Davidi wakamusinsa Sawulu hawanta waIsarela. (1 Sam. 16:1, 13) Eñañi, neyi Davidi watiyilili mwamulejeluwu amayala adiñayi nawu, kachi wamujahili mwanta. Ilaña Davidi wahosheli nindi: “Chinjila kumesu aYehova kumwila mwanta wami chochichi, hiwambala waYehova awayishawu dehi manji.” (Tañenu 1 Samweli 24:4-7.) Sawulu wachidiña mwanta wawayishewa kudi Nzambi. Chineli Yehova wachidiña kanda yamufumishi hawanta, Davidi hafwilileña kumuhukula Sawulu wantaku. Chaketwiliyi hohu ihina kuchikowelu chaSawulu chakadi kumutiya, Davidi wamwekesheli nawu hakeñeleña kumwila Sawulu katamaku.—1 Sam. 24:11.
9 Davidi wamulemesheli cheñi wawayishewa waNzambi chamumweniyi mwanta kakukumishaku. Haniyi mpinji, Davidi niAbishayi ashikili muchilombu chaSawulu mwamuwaninuwu nakami. Hela chakwila Abishayi wahosheli nindi Nzambi namuhani dehi iwu chilumbu muchikasa chaDavidi nawa nindi yamwiteji yamutapi Sawulu iyoña dimu hohu zwa-a niheseki, Davidi wamukaanishili. (1 Sam. 26:8-11) Chineli Davidi watwalekeluhu kukeña wunlomboli waNzambi, halabili kwila nkeñelu yaYehovaku hela chakwila amukakejeli kudi Abishayi.
10. Kukala kwamuchidinyi kwatuholokelaña wejima wetu nawa chumanyi chinateli kutukolesha?
10 Mpinji jikwawu twaholokelaña mukukala kwatukakejañawu amabwambu jetu nawu twili munakutoñojokawu chatela atukolesheña kwila nkeñelu yaYehova. Kufwana Abishayi, amabwambu jetu amakwawu anateli kutukanjikija nawu twili yuma chakadi kutoñojoka hankeñelu yaNzambi. Hakwila nawu twikali akola, twatela kumona yuma neyi chayimonañayi Yehova nawa nikukolela chikupu kunshimbi jindi.
11. Chumanyi chimunadizili kudi Davidi kutalisha hakutoñojoka hankeñelu yaNzambi?
11 Davidi walombeli kudi Yehova Nzambi nindi: “Nleji kwila mwaya muchima weyi.” (Tañenu Masamu 143:5, 8, 10.) Chatela yashindameni hayitoñojoka hela hansañu yamulejeluwu, Davidi wakeñeli chikupu nindi Nzambi yamudizishi. ‘Watoñojokeleña mwejima mwelañayi Yehova nawa muchima windi wadiña nakuhita mwaya nyidimu yamumakasa aNzambi.’ Tunateli kwiluka nkeñelu yaNzambi neyi tukudizaña muNsona nikutoñojoka nankashi hansañu yayivulu yidi muBayibolu yahosha hadi Yehova chakwashiliyi antu.
DAVIDI WALEMESHELI NSHIMBI
12, 13. Muloñadi Davidi chamwañililiyi menji amuleteleluwu kudi antu jindi asatu?
12 Twatela kumwimbujola Davidi walemesheli Nshimbi nikuyizatisha muchihandilu chindi. Talenu chuma chamwekeni chelili Davidi yakeñi ‘menji akunwa mwishima dakuBetelemi.’ Antu jaDavidi asatu ashili wumi wawu hakatoña hakwiñila mumusumba wawaFwilistinu nakutaha menji. Ilaña, “Davidi kuyinwa kwonti kwindi, hakuyimwañila kumesu aYehova.” Muloñadi? Davidi walumbulwili nindi: “Nzambi yami kwaamu, ami kwila mwenimu kwakulehi tuhu ntahi. Ninwi mashi awantu awa aditwala kukufwa? Muloña wena chanayiletuwu anakeñi kumwenamu kufwa.”—1 Kushi. 11:15-19.
13 Davidi welukili nindi Nshimbi yahosheli nawu mashi atela kuyimwañila kudi Yehova bayi kuyidyaku. Nawa welukili chuma chaleñeleli Nzambi yashuku iyi nshimbi. Davidi welukili nindi “wumi wamujimba wekala mumashi.” Ilaña, awa adiña menji, bayi neyi mashuku. Muloñadi Davidi chakaanininiyi kuyinwa? Muloña welukili yishina yamunshimbi. Davidi, wamweni nindi menji adiña tuhu neyi mashi anana amayala asatu. Dihafumini hakukaana kunwa awa menji. Chatela yanwi, wafuukwiluhu kuyimwañila heseki.—Lev. 17:11; Kuhit. 12:23, 24.
14. Chumanyi chamukwashili Davidi kwiluka yuma yakeñañayi Yehova?
14 Davidi welukili chikupu nshimbi jaNzambi. Wembili nindi: “Natiyi kuwaha nakwila muchima weyi, eyi Nzambi yami, mwalala, nshimbi jeyi jidi mukachi kamuchima wami.” (Mas. 40:8) Davidi wadizileña nshimbi jaNzambi nikutoñojokahu nankashi. Wakuhweleleli chikupu nindi nshimbi jaYehova jabadika. Chafuminumu, Davidi wakeñeli nankashi kuhemba mukanda waNshimbi nikwiluka mwatalishili Nshimbi jamwinkeluwu Mosi. Neyi hitukudiza Bayibolu, twatela kutoñojoka hansañu yitunatañi nikuyihemba mumuchima wetu kulonda twiluki yuma yamuzañaleshaña Yehova.
15. Indi Solomoni wakañenyi ñahi kulemesha Nshimbi jaNzambi?
15 Mwana kaDavidi Solomoni amukeñeli nankashi kudi Yehova Nzambi. Ilaña, chimwahitili mpinji, Solomoni wakañenyi kulemesha Nshimbi jaNzambi. Wadiwili nshimbi yaYehova yakwila nawu mwanta wamuIsarela hateleleli ‘kudivulishila ambandaku.’ (Kuhit. 17:17) Solomoni wasumbwili ambanda amavulu akwacheñi. Chakuliliyi, ‘añodi jindi abalumwini muchima windi nakulondela ankishi.’ Hichikweti muloña nachatoñojokeliyiku, “Solomoni welili chatama kumesu aYehova, hamulondeli Yehova chikupu neyi cheliliyi tata yindi Daviduku.” (1 Anya. 11:1-6) Dichi chikuwaha neyi tukukakela kunshimbi jaMwizu daNzambi. Chakutalilahu, twatela kulondela nshimbi jaNzambi neyi hitukukeña kwiñila mumaluwi.
16. Indi kwiluka mwatalisha lushimbi ‘lwakusumbula hohu mudi Mwanta’ kukukwasha ñahi antu anakukeña kwiñila mumaluwi?
16 Neyi muntu wabula kwitiya yatachika kutukenkamina, komana ñakwilu yetu yamwekeshaña nawu tunakulondela chakutalilahu chaDavidi tahindi chaSolomoni? Akwakudifukula alala ayileja ‘kusumbula hohu mudi Mwanta.’ (1 Kor. 7:39) Neyi mukwaKristu nakukeña kwiñila mumaluwi, watela kusumbuka hela kusumbula mukwawu mukwakwitiya. Neyi twiluka munatalishi iyi Nsona, hitukwiñila mumaluwi namuntu wabula kwitiya hohuku ilaña tukutondolwela cheñi antu atukenkaminaña.
17. Chumanyi chikutukwasha kutondolwela muhetu wakutala nyevulu yanzekesi?
17 Toñojokenu cheñi hachakutalilahu chaDavidi chakukeñesha chikupu wunlombola waNzambi chikunateli kutukwasha kutondolwela chaaku chakutala nyevulu yanzekesi. Tañenu nsona jinalondeluhu, toñojokenu hanshimbi jidimu nawa fwilenu kwiluka nkeñelu yaYehova haniyi nsañu. (Tañenu Masamu 119:37; Matewu 5:28, 29; Akolose 3:5.) Neyi tukutoñojokaña hanshimbi jindi jabadika chikutukwasha kutondolwela muhetu wakutala nyevulu yanzekesi.
IKALENU NAYITOÑOJOKA YANZAMBI MPINJI YEJIMA
18, 19. (a) Hela wadiña mukwanshidi, chumanyi chamukwashili Davidi kushakama mukukeña kwaNzambi? (b) Indi enu munakufwila kwiladi?
18 Hela chakwila Davidi wadiña nayililu yayiwahi mpinji yejima, wakoñeli nshidi jajivulu jamaneni nankashi. (2 Sam. 11:2-4, 14, 15, 22-27; 1 Kushi. 21:1, 7) Muchihandilu chindi chejima, Davidi wabalumukileña mumuchima neyi nakoñi nshidi. Wendeleña naNzambi ‘namuchima wakashinshi.’ (1 Anya. 9:4) Muloñadi? Muloña Davidi welileña nkeñelu yaYehova.
19 Hela chakwila hitwawaninaku, tunateli kushakama mukukeña kwaYehova. Dichi, twatela kudiza Izu daNzambi chikupu nikutoñojoka nankashi hayuma yitunadizi nikuzatisha yuma yitwahembaña mumuchima wetu. Chikafumamu, tukalombaña kudi Yehova neyi chalombeliyi ñimbi yamasamu nindi: “Nleji kwila mwaya muchima weyi.”
[Malwihu aKuzatisha haKudiza]
[Mwevulu wudi hefu 5]
Chumanyi chaleñeleli Davidi yabuli kumujaha Sawulu hampinji yamuwaniniyi?
[Mwevulu wudi hefu 6]
Chumanyi chitukudizila kudi Davidi wakaanini kunwa menji amuleteleluwu kudi antu jindi?
